God i Save Tingim Yu
MARY, em wanpela meri Kristen i gat 48 krismas samting, em i bin kisim bikpela hevi tru long sindaun bilong em. Man bilong em i bin mekim pasin pamuk na em i bin katim marit bilong em inap 10-pela yia samting i go pinis. Kirap long dispela taim Mary wanpela tasol i mas lukautim 4-pela pikinini bilong em na em i gat hatwok tru long mekim. Em i stap wanpis yet, na sampela taim bel bilong em i bagarap stret na i olsem em i no inap karim dispela hevi. Mary i save tingting, ‘Ating dispela i makim olsem God i no save tingim mi o ol pikinini bilong mi i no gat papa?’
Maski kain hevi olsem i no bin painim yu, ating yu inap pilim dispela bel hevi bilong Mary, a? Sampela hevi i bin painim yumi olgeta, na ating yumi bin tingting, wanem taim Jehova bai kirap na helpim yumi, na em bai mekim olsem wanem? Sampela hevi i bin painim yumi, long wanem, yumi bin bihainim ol lo bilong God. (Matyu 10:16-18; Aposel 5:29) Na as bilong sampela hevi, em yumi no gutpela man tumas na yumi save popaia, na yumi stap long dispela graun em Satan i bosim. (1 Jon 5:19) Aposel Pol i tok: “Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.”—Rom 8:22.
Tasol sapos wanpela bikpela hevi i painim yu, dispela i no makim olsem Jehova i lusim yu pinis o em i no tingim yu moa, nogat. Tasol olsem wanem yu ken save tru long dispela? Wanem samting i makim olsem God i save tingim yu?
Samting i Bin Kamap Bipo
Baibel i kamapim long ples klia olsem Jehova i save tingim ol man. Tingim Devit. Jehova i tingim dispela yangpela man bilong lukautim sipsip, long wanem, em “i save bihainim pasin Bikpela [Jehova] i laikim.” (1 Samuel 13:14) Bihain, taim Devit i stap king, Jehova i tok promis long em olsem: “Mi [bai] stap wantaim yu long olgeta hap yu . . . go long en.”—2 Samuel 7:9.
Olsem wanem? Dispela i makim olsem God i bin lukautim Devit na i no gat wanpela hevi i bin painim em? Nogat. Taim Devit i no kamap king yet, na taim em i stap king pinis, planti bikpela hevi i bin painim em. Taim em i no kamap king yet, inap sampela yia King Sol i bin raunim em bilong kilim em i dai. Long dispela taim Devit i raitim tok olsem: “Mi save slip namel long ol man ol i olsem ol laion, na . . . tit bilong ol i sap tumas olsem spia na supsup.”—Song 57:4.
Tasol maski dispela bikpela hevi i painim Devit, em i bilip olsem Jehova i tingim em. Em i bin beten long Jehova olsem: “Yu save long mi karim hevi.” Long tingting bilong Devit i olsem Jehova i bin raitim olgeta hap stori bilong dispela hevi i bin painim em. Na Devit i tok: “Mi pilim nogut tru long en na mi krai nogut i stap. Orait yu tingting yet long dispela, na yu raitim pinis long buk bilong yu.” (Song 56:8) Em nau, Devit i kamapim bilip bilong em, em i bilip olsem Jehova i lukim pinis hevi bilong em na Jehova i save long bikpela bel hevi dispela i givim long em.
Taim Devit i lapun pinis, em i tingim ol samting i bin painim em na em inap tok olsem: “Bikpela i save stiaim wokabaut bilong ol manmeri. Sapos em i laikim pasin bilong wanpela man, em i save strongim em long wokabaut stret. Maski sapos dispela man i pundaun, em i no inap bagarap olgeta. Bikpela i save holim han bilong en, na helpim em long sanap gen.” (Song 37:23, 24) Yu tu, maski ol hevi bilong yu i stap i stap na i no pinis, yu inap bilip tru olsem Jehova i lukim na em i tingim tru pasin bilong yu long sanap strong na karim dispela hevi. Pol i tok: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.”—Hibru 6:10.
Na tu, Jehova inap kirap na helpim yu—em bai strongim yu long karim wanem wanem hevi i kamap bilong pasim rot bilong yu. Devit i tok: “Planti hevi i save kamap long stretpela man, tasol Bikpela i save helpim em na ol dispela hevi i no daunim em.” (Song 34:19) Baibel i tok, oltaim ai bilong Jehova i save lukluk nabaut long graun bilong “was gut long ol manmeri i save aninit long em wanpela tasol, maski ol i stap long wanem hap bilong graun.”—2 Stori 16:9.
Jehova i Bringim Yu i Kam Long Em
Na yumi ken tingim wanpela tok bilong Jisas i makim olsem Jehova i save tingim yumi olgeta wan wan. Jisas i tok: “I no gat wanpela man inap i kam long mi long laik bilong em yet. Nogat. Papa i mas . . . bringim em i kam long mi.” (Jon 6:44) Tru tumas, Jehova i helpim olgeta man wan wan long mekim ol samting bambai ofa bilong Krais inap helpim yumi. Jehova i mekim olsem wanem? Wanpela bikpela rot, em wok bilong autim tok bilong Kingdom. Tru, ol i mekim dispela wok bambai “olgeta lain manmeri i ken harim,” tasol dispela gutnius i save kamap long olgeta man wan wan. Yu yet yu bin putim yau long dispela gutnius na yu bihainim, na dispela i makim olsem Jehova i save tingim yu.—Matyu 24:14.
Long rot bilong spirit holi, Jehova i save bringim ol man i kam long Pikinini bilong em na ol i ken tingting long kisim laip i stap oltaim. Dispela i mekim na olgeta wan wan inap kisim gut na bihainim ol tok i tru bilong Baibel, maski sin ol i kisim long papamama i pasim ol liklik o ol i gat ol liklik pasin kranki. Yumi no inap kisim gut save long laik bilong God sapos spirit bilong God i no helpim yumi. (1 Korin 2:11, 12) Olsem Pol i tokim ol Tesalonaika, “planti man ol i no save bilip.” (2 Tesalonaika 3:2) Ol man i amamas long Jehova i bringim ol i kam long em, em i save givim spirit bilong em long ol dispela man tasol.
Jehova i save bringim ol man i kam long em, long wanem, em i save laikim ol na em i laik bai ol i kisim laip i stap oltaim. Dispela i kamapim klia tru olsem Jehova i save tingim yumi! Jisas i tok: “Papa bilong yupela i stap long heven em i no laik bai wanpela bilong ol dispela liklik pikinini i lus.” (Matyu 18:14) Yes, long ai bilong God olgeta man wan wan i bikpela samting. Olsem na Pol i tok, God “bai i givim pe long olgeta manmeri inap long pasin ol i bin mekim.” (Rom 2:6) Na aposel Pita i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Ol Mirakel Bilong Jisas
God i save tingim olgeta wan wan man, na dispela i kamap klia long ol mirakel Pikinini bilong em, Jisas, i bin wokim. Taim Jisas i wokim mirakel na oraitim sik bilong ol man, bel bilong Jisas i sori tru long ol. (Mak 1:40, 41) Jisas “i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim.” Olsem na sori bilong Jisas i kamapim klia tru pasin bilong Jehova long tingim olgeta wan wan wokman bilong em.—Jon 5:19.
Tingim wanpela mirakel Jisas i bin wokim, em stori bilong en i stap long Mak 7:31-37. Jisas i oraitim wanpela man yaupas em i no inap toktok gut. Baibel i tok, Jisas “i kisim man i go, na i lusim ol manmeri, na tupela tasol i stap.” Orait nau “Jisas i lukluk i go antap long heven, na em i pilim olsem em i laik krai na em i pulim win strong. Na em i tokim dispela man olsem, ‘Efata.’ Mining bilong dispela tok i olsem, ‘Yu op.’ ”
Bilong wanem Jisas i kisim dispela man i go na tupela tasol i stap? Yumi save, sapos man i yaupas na maus bilong em i hevi na em i no inap toktok gut, em bai sem long i stap long ai bilong planti manmeri. Ating Jisas i lukim pinis dispela samting, olsem na em i laik bai tupela tasol i stap na em i ken oraitim dispela man. Wanpela saveman bilong Baibel i tok, dispela i “kamapim klia olsem Jisas i no tingim dispela man olsem wanpela samting em i mas oraitim—em i tingim em olsem wanpela man. Dispela man em i gat wanpela hevi bilong em yet, na em i mas i gat man bilong helpim em, na long pasin sori tru Jisas i bin helpim em, na em i mekim long pasin i no inap semim man, na long pasin dispela man inap pilim gut.”
Dispela stori i soim yumi olsem Jisas i save tingim tru man. Na yu ken bilip tru olsem em i save tingim yu tu. Tru, dai bilong em olsem wanpela ofa em i bilong helpim olgeta man bilong graun em dispela ofa inap baim bek ol. Tasol yu ken ting olsem dispela ofa Jisas i mekim i bilong helpim yu yet, olsem Pol i bilip long en: “Pikinini Bilong God em i bin laikim mi tru na em i lusim laip bilong em yet bilong helpim mi.” (Galesia 2:20) Na Jisas i tok: “Man i lukim mi, em i lukim Papa.” Olsem na yumi ken save tru, Jehova i save tingim tu olgeta wan wan wokman bilong em.—Jon 14:9.
Jehova Em Man Bilong Praisim Yumi
Bilong kisim save long God, yumi mas save long olgeta wan wan pasin bilong em olsem Baibel i kamapim. Insait bilong dispela nem Jehova i olsem “Em i Mekim i Kamap,” na dispela i makim olsem Jehova inap kamap wanem wanem kain bambai em i ken kamapim laik bilong em. Kirap long bipo yet na i kam inap nau, Jehova i bin kamap olsem: God bilong mekim i kamap olgeta samting, Papa, Bikpela King, Wasman, Bikpela i Gat Olgeta Strong, Man i save harim beten, Man i save skelim pasin bilong olgeta man, Man bilong skulim ol man, Man bilong kisim bek ol man.a
Bilong pilim tru insait bilong nem bilong God, yumi mas save long Jehova olsem Man bilong givim gutpela pe long ol man. Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru [olsem givim gutpela pe] long ol man i wok long painim em.”—Hibru 11:6.
Ol man bilong nau i laik givim bel olgeta long mekim wok bilong Jehova, em i tok promis pinis long givim laip oltaim long ol long Paradais bai kamap long graun. Na i stret yumi ken tingim na wetim dispela gutpela tok promis i kamap tru, na long tingting yumi ken lukim olsem yumi yet i stap long dispela Paradais. Moses i bin “ting long dispela gutpela pe God i laik givim em.” (Hibru 11:26) Pol tu i bin tingting strong long gutpela prais God i tok promis long givim long ol Kristen em i bin makim ol na ol i stap gut long em. Pol i tok: “Mi save ran strong bilong kamap long mak na kisim prais. Dispela prais em i olsem. Long wok bilong Krais Jisas, God i singautim mi bilong i go antap na i stap gut tru wantaim em.”—Filipai 3:14.
Yu tu inap tingting na wetim gutpela prais Jehova i tok promis long givim long ol man i sanap strong na i no les. Pasin bilong tingim dispela gutpela prais em i insait long dispela save yu kisim long God na pasin bilong yu long sanap strong long mekim wok bilong em. Olsem na long olgeta de yu mas tingim ol gutpela samting Jehova i laik givim long yu bihain. Mary, em yumi bin kamapim stori bilong em, em i wok strong long mekim olsem. Em i tok, “Nau mi bilip tru olsem Jisas i bin mekim ofa bilong helpim mi. Em namba wan taim bilong mi long kisim dispela tingting. Nau mi kirap long pilim tru olsem Jehova i save tingim mi. Mi stap Kristen inap 20 yia pinis, na nau tasol mi kirap long bilip olsem.”
Mary i stadi long ol tok bilong Baibel na em i tingim tingim ol dispela tok, olsem planti milion moa ol i mekim, na nau em i kisim save olsem Jehova i save tingim tru lain bilong em na olgeta wan wan bilong dispela lain. Aposel Pita i bilip tru long dispela samting, olsem na em i tok: “God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:7) Tru tumas, God i save tingim yu!
[Futnot]
a Lukim Hetman 11:27; Song 23:1; 65:2; 73:28; 89:26; Aisaia 8:13; 30:20; 40:28; 41:14; lukim tu Baibel “New World Translation of the Holy Scriptures—With References,” Appendix 1J, pes 1568, Sosaiti Wastaua bilong Nu Yok i wokim.
[Blok long pes 6]
Kirap Bek Long Matmat—i Kamapim Klia Olsem God i Tingim Ol Man
WANPELA tok bilong Baibel long Jon 5:28, 29 i kamapim klia tru olsem God i save tingim olgeta wan wan man: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”
Long dispela skripsa Jisas i kolim wanpela tok Grik, mne·meiʹon (olsem matmat bilong ol man God i save tingim ol), na em i no kolim tok Grik taʹphos (matmat). Dispela tok taʹphos i makim olsem planim man. Tasol mne·meiʹon i makim olsem olgeta pasin samting bilong dispela man i dai pinis, i stap long tingting bilong God.
Orait, tingim bikpela samting Jehova i mas mekim bilong kirapim bek ol man i dai pinis. Bilong kirapim bek wanpela man, Jehova i mas save long olgeta samting bilong dispela man—olgeta liklik liklik pasin em i bin kisim long papamama, na olgeta tingting bilong em. Long dispela rot tasol dispela man inap kamap wankain man gen—em dispela man stret—olsem em i bin i stap taim em i no dai yet.
Tru, long tingting bilong yumi ol man, dispela samting i no inap kamap. Tasol “God em inap mekim olgeta samting.” (Mak 10:27) Na God inap save long tingting i stap long bel bilong man. Maski man i bin i dai inap planti handet handet yia bipo, God inap tingim olgeta samting bilong em; God i no save lusim tingting long wanpela samting, nogat. (Jop 14:13-15) Olsem na maski Abraham na Aisak na Jekop i dai planti handet handet yia paslain long taim bilong Jisas, taim em i kolim nem bilong ol em inap tok, Jehova “i no God bilong ol man i dai pinis. Nogat. Em i God bilong ol man i stap laip. Long ai bilong em, olgeta manmeri i stap laip.”—Luk 20:38.
Olsem na planti bilion manmeri i dai pinis, ol i stap long tingting bilong God Jehova na em i tingim olgeta samting bilong ol. Dispela i kamapim long ples klia tru olsem God i save tingim ol man wan wan!
[Piksa long pes 7]
Jisas i tingim tru ol man em i oraitim ol