Jisas i Sori Tru Long Lepraman na i Oraitim Em

Jisas na fopela disaipel bilong em i go autim tok long “ol sinagog long olgeta hap bilong Galili.” (Mak 1:39) Stori bilong ol gutpela wok Jisas i mekim i go long olgeta hap. Olsem, long wanpela taun i gat wanpela man i gat sik lepra i stap. Luk em wanpela dokta long dispela taim i tok, “sik lepra i pulap tru long bodi” bilong dispela man. (Luk 5:12) Taim sik lepra i go bikpela, isi isi em inap mekim sampela hap bilong bodi i go krungut.

Sik lepra i inapim klostu olgeta hap bilong bodi bilong dispela lepraman, olsem na em i mas stap longwe long ol narapela. Taim ol man i wokabaut i kam klostu, em i mas singaut olsem: “Mi no klin, mi no klin,” na bai ol man i no kam klostu long em na sik i kalap long ol. (Wok Pris 13:45, 46) Tasol dispela lepraman i mekim wanem? Em i go klostu long Jisas na brukim skru, na i tok: “Bikpela, sapos yu laik, yu inap mekim mi kamap klin.”—Matyu 8:2.

Dispela man i bilip long Jisas! Tingim, sik bilong en i mekim na em i bel hevi tru! Olsem na Jisas bai mekim wanem? Sapos yu stap long dispela taim, bai yu mekim wanem? Jisas i sori tru long dispela lepraman, olsem na em i putim han i go na tatsim em. Jisas i tokim em: “Mi laik. Yu ken kamap klin.” (Matyu 8:3) Na wantu sik lepra bilong em i pinis, na sampela bilong ol man husat i lukim dispela samting i hatwok long bilip.

Ating yu bai amamas tru sapos wanpela man i gat pasin sori na em i save mekim ol gutpela wok wankain olsem Jisas, em i stap king bilong yu. Pasin Jisas i mekim long dispela lepraman i helpim yumi long bilip olsem taim em i stap King na bosim graun, dispela bai truim tok profet bilong Baibel olsem: “Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.” (Song 72:13) Jisas bai inapim tru laik bilong em long helpim olgeta man i gat sik.

Tingim, paslain long Jisas i oraitim dispela lepraman, ol manmeri i wok long toktok long ol gutpela wok bilong em. Na nau ol manmeri bai harim stori long dispela mirakel em i bin wokim. Maski i olsem, Jisas i no laik bai ol manmeri i harim stori bilong ol samting em i mekim na ol i bilip nating long em. Long wanem, Jisas i save long dispela tok profet olsem em bai i “no sanap long ol rot na toktok.” (Aisaia 42:1, 2) Olsem na Jisas i tokim lepraman olsem: “No ken tokim wanpela man, tasol go soim yu yet long pris, na mekim ofa olsem Moses i bin makim.”—Matyu 8:4.

Tasol dispela lepraman i amamas tru olsem sik bilong em i pinis, na em i no inap long pasim maus. Em i go na tokim ol man long samting i kamap. Na planti man i laik bungim Jisas. Olsem na Jisas i no inap i go insait long ol taun, na inap sampela haptaim em i stap long ol ples we i no gat man. Tasol ol manmeri bilong olgeta hap i kam long Jisas bilong em i ken skulim ol na oraitim sik bilong ol.