Jehova, Em God i Redi Long Lusim Rong Bilong Man
“Bikpela, yu gutpela tru na yu save rausim sin bilong mipela.”—SONG 86:5.
1. King Devit i bin karim wanem bikpela hevi? Wanem samting i mekim gut bel bilong em?
KING DEVIT bilong Israel bilong bipo em i save pinis olsem taim bel bilong man i kotim em, dispela em i wanpela bikpela hevi em i mas karim. Em i tok: “Ol rong bilong mi i karamapim mi pinis, na ol dispela rong i olsem kago mi karim na i hevi tumas. Mi bagarap tru na mi stap nogut, olsem wanpela samting i krungutim mi strong. Bel bilong mi i pilim nogut tru, na mi singaut long bikpela pen.” (Song 38:4, 8) Tasol maski Devit i stap bel hevi, wanpela samting i mekim gut bel bilong em. Em i save, tru Jehova i nolaik tru long sin, tasol em i no bel nogut long sinman yet—sapos dispela man i tanim bel tru na em i lusim pinis rot bilong sin. (Song 32:5; 103:3) Devit i bilip tru olsem Jehova i amamas long mekim pasin marimari long ol man i tanim bel pinis, olsem na em i tok: “Bikpela, yu gutpela tru na yu save rausim sin bilong mipela.”—Song 86:5.
2, 3. (a) Taim yumi mekim wanpela rong, ating bai yumi karim wanem hevi long dispela? Olsem wanem na dispela em i samting bilong helpim yumi? (b) Sapos bel bilong yumi i gat tok long dispela rong na i “daunim tru” yumi, dispela inap nogutim yumi olsem wanem? (c) Baibel i tok wanem long laik bilong Jehova long lusim rong bilong yumi?
2 Taim yumi mekim wanpela rong, bel i save kotim yumi na ating yumi tu i karim bikpela hevi long dispela. Tasol dispela bel hevi em samting yumi ol manmeri i save pilim, na em i samting bilong helpim yumi. Em inap kirapim yumi long mekim ol samting bilong stretim ol popaia bilong yumi. Tasol bel bilong sampela Kristen i kotim ol strong moa na dispela i daunim ol tru. Bel bilong ol i kotim ol na em i strong long tokim ol olsem God i no inap lusim tru rong bilong ol, maski ol i tanim bel tru. Wanpela sista i tingim wanpela rong em i bin mekim na em i tok: “Taim yumi tingim olsem Jehova i no save laikim yumi moa, bel bilong yumi i nogut tru.” Na maski em i tanim bel pinis na em i kisim ol tok bilong ol elda bilong helpim em, em i wok yet long ting em i no gutpela meri na bai God i ken lusim rong bilong em. Em i tok: “Long olgeta de mi save beten askim Jehova long lusim rong bilong mi.” Orait sapos bel bilong yumi i gat tok long rong yumi bin mekim na i “daunim tru” yumi, ating Satan bai wok strong long kirapim yumi long lusim Jehova, na yumi pilim olsem yumi no gutpela man na bai yumi ken mekim wok bilong Jehova.—2 Korin 2:5-7, 11.
3 Tasol Jehova i no ting olsem, nogat tru! Baibel i tokim yumi olsem taim yumi tanim bel tru, Jehova i amamas, na em i redi tu, long lusim rong bilong yumi. (Sindaun 28:13) Olsem na sapos yu bin ting olsem Jehova i no inap lusim rong bilong yu, orait yu mas save gut, bilong wanem Jehova i save lusim rong bilong man, na em i save mekim olsem wanem.
Bilong Wanem Jehova i Redi Long Lusim Rong Bilong Man?
4. Jehova i save tingim wanem samting bilong yumi? Olsem na em i save mekim wanem kain pasin long yumi?
4 Baibel i tok: “Hap bilong sankamap em i no klostu long hap bilong san i go daun. Em i longwe tru. Olsem tasol God i save tekewe sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em.” Bilong wanem Jehova i save marimari long ol man? Ves bihain long en i tok: “Em i save olsem em i bin kisim graun na wokim yumi na em i tingim yumi i olsem das tasol.” (Song 103:12-14) Tru tumas, Jehova i no save lusim tingting olsem yumi bilong graun tasol, na yumi gat ol pasin kranki i stap long skin bilong yumi, em sin bilong yumi i kamapim. Dispela tok, em i save olsem “em i bin kisim graun na wokim yumi,” i kirapim yumi long tingim tok bilong Baibel i tok, Jehova i olsem man bilong wokim sospen graun, na yumi olsem ol dispela sospen graun em i save wokim.a (Jeremaia 18:2-6) Man bilong wokim sospen graun, taim em i wokim em i save holim gut, tasol em i holim isi, long wanem em i save, sospen graun inap bruk hariap. Na olsem tasol, Jehova, em Bikpela Man bilong wokim yumi man i olsem sospen graun, em i save tingim sin i stap long skin bilong yumi na yumi no gat strong, olsem na taim em i skelim pasin bilong yumi, em i save mekim pasin marimari tu.—Skelim wantaim 2 Korin 4:7.
5. Buk Rom i stori olsem wanem long strong bilong sin long holimpas yumi?
5 Jehova i save pinis olsem sin i gat bikpela strong. Baibel i tok sin i olsem wanpela strongpela samting bilong bagarapim man, na em i holimpas ol man. Orait dispela strong bilong sin long holimpas yumi, em i bikpela strong tru o olsem wanem? Long buk Rom, aposel Pol i stori gut long dispela samting, olsem: Yumi “stap aninit long sin,” olsem ol soldia i stap aninit long kepten bilong ol (Rom 3:9, NW); sin i bin bosim ol manmeri bilong graun olsem “king” (Rom 5:21); em i save “stap” insait long yumi (Rom 7:17, 20); “lo” bilong sin i wok i stap insait long ol hap bodi bilong yumi, olsem em i laik stiaim wokabaut bilong yumi. (Rom 7:23, 25) Yumi gat hatwok tru long sakim strong bilong sin i save holimpas yumi!—Rom 7:21, 24.
6. Jehova i ting olsem wanem long ol man i pilim tru rong bilong ol na ol i tanim bel na askim em long marimari long ol?
6 Olsem na God bilong yumi, em Man bilong marimari, em i save olsem yumi no inap winim mak bilong bihainim tok bilong em olgeta, maski bel bilong yumi i gat bikpela laik tru long mekim olsem. (1 King 8:46) Long pasin sori em i tokim yumi, sapos yumi pilim tru rong bilong yumi na yumi tanim bel na askim em long marimari long yumi olsem papa i save mekim, em bai lusim rong bilong yumi. Devit, em man bilong raitim Song, em i tok: “God, mi daunim mi yet na mi stap aninit long yu. Dispela em i ofa bilong mi. Mi save, yu no givim baksait long man i pilim hevi long sin na i daunim em yet.” (Song 51:17) Jehova i no inap sakim, o rausim, wanpela man em bel bilong em i kotim em na em i pilim tru asua bilong sin i stap long em. Em gutpela tok tru Baibel i mekim long pasin bilong Jehova, em i redi long lusim rong bilong yumi!
7. Bilong wanem yumi no ken ting God bai marimari long yumi, long wanem, yumi sinman tasol?
7 Tasol olsem wanem? Yumi ken ting God bai marimari long yumi, long wanem, yumi sinman tasol na yumi save mekim rong? Nogat tru! Jehova i no save sori nating long man. Marimari bilong em i gat mak bilong en. Em i no inap lusim rong bilong ol man em bel bilong ol i strong pinis na long laik bilong ol yet ol i mekim ol pasin nogut na ol i no tanim bel. (Hibru 10:26-31) Tasol taim Jehova i lukim bel bilong man i bagarap stret na i “pilim hevi long sin,” em i redi long lusim rong bilong dispela man. (Sindaun 17:3) Orait nau yumi ken toktok long sampela gutpela tok bilong Baibel long pasin bilong God long lusim tru rong bilong man.
Jehova i Save Lusim Rong Bilong Man Inap Long Wanem Mak?
8 King Devit i tanim bel na em i tok: “Bihain mi bin autim sin bilong mi long yu. Mi no haitim pasin nogut bilong mi. Mi ting olsem, mi laik autim olgeta sin bilong mi long Bikpela. Mi autim pinis na yu tekewe asua bilong mi na sin bilong mi tu.” (Song 32:5) Dispela tok “tekewe,” ol i kisim long wanpela tok Hibru i olsem “litimapim,” o “karim.” Long dispela hap bilong Baibel em i makim olsem ‘tekewe asua, sin, o rong.’ Em nau, i olsem Jehova i litimapim sin bilong Devit na karim i go. (Skelim wantaim Wok Pris 16:20-22.) Pastaim Devit i bin pilim tru asua bilong sin em i bin karim, tasol nau bel bilong em i no bagarap moa long dispela sin bilong em. (Skelim wantaim Song 32:3.) Yumi tu inap bilip tru long dispela God i save tekewe rong bilong ol man i askim em long lusim rong bilong ol, long wanem, ol i bilip long ofa bilong Krais Jisas long baim bek ol man. (Matyu 20:28; skelim wantaim Aisaia 53:12.) Olsem na ol man Jehova i litimapim sin bilong ol na karim i go, ol i no gat wok long karim yet asua bilong ol rong ol i bin mekim bipo.
9 Jisas i tingim ol man i save givim dinau na man i kisim dinau, na em i mekim wanpela tok piksa long en long pasin bilong Jehova long lusim rong bilong man. Olsem: Jisas i tokim yumi long beten olsem: “Yu ken lusim ol [“dinau,” NW] bilong mipela.” (Matyu 6:12) Em nau, Jisas i kolim “sin” olsem “dinau.” (Luk 11:4) Taim yumi mekim wanpela rong, nau yumi gat “dinau” long Jehova. Wanpela tok Grik ol i tanim olsem ‘lusim rong,’ insait bilong en i olsem ‘lusim wanpela dinau, olsem no ken singaut long man i mas bekim.’ Taim Jehova i lusim rong bilong yumi, i olsem em i pinisim dinau bilong yumi na em i no ken singaut long yumi mas bekim dispela dinau. Olsem na ol man i bin mekim rong na ol i tanim bel pinis, bel bilong ol i ken stap isi. Taim Jehova i pinisim dinau bilong wanpela man, em i no ken singaut long man i mas bekim dispela dinau!—Song 32:1, 2; skelim wantaim Matyu 18:23-35.
10 Long Aposel 3:19, Baibel i mekim narapela tok bilong makim pasin bilong God long lusim rong bilong man: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela.” Dispela tok “rausim,” ol i kisim long wanpela tok Grik em inap makim olsem ‘klinim, pinisim olgeta, tekewe olgeta,’ o kain samting olsem. Sampela saveman i tok, dispela tok Grik i makim pasin bilong rausim wanpela rait. Ol i bin mekim olsem wanem? Long bipo, taim ol i bin wokim ing bilong rait long en, ol i save kisim wanpela kain blakpela sit bilong paia, na blut bilong diwai samting, na wara, na ol i tanim wantaim. Orait taim man i rait long kain ing olsem, na bihain liklik em i laik rausim dispela rait, em i ken kisim wanpela hap mosong bilong solwara na putim liklik wara long en na rausim dispela rait.
10, 11. (a) Dispela tok “rausim” long Aposel 3:19 i makim wanem samting? (b) Ol i bin mekim wanem long bipo na dispela i makim pasin bilong Jehova long lusim tru rong bilong man?
11 Dispela em i gutpela piksa tru bilong pasin bilong Jehova long lusim tru rong bilong man. Taim em i lusim rong bilong yumi, i olsem em i kisim wanpela mosong bilong solwara na em i klinim na tekewe dispela rong olgeta. Yumi no ken pret na ting em bai tingim yet na bihain yumi mas kot long dispela rong yumi bin mekim, long wanem, Baibel i kamapim wanpela samting moa bilong pasin marimari bilong Jehova na yumi kirap nogut long en: Taim em i lusim rong bilong man, em i save lusim tingting long en!
‘Mi No Ken Tingim Moa Sin Bilong Ol’
12. Taim Baibel i tok Jehova i save lusim tingting long ol rong bilong yumi, yu ting dispela i makim olsem Jehova i no inap tingim bek ol dispela rong? I gat wanem as na yu bekim tok olsem?
12 Long rot bilong profet Jeremaia, Jehova i mekim tok promis long ol man i insait long nupela kontrak: “Bai mi lusim sin bilong ol na mi no ken tingim moa.” (Jeremaia 31:34) Olsem wanem? Ating dispela i makim olsem taim Jehova i lusim rong bilong ol man em i no inap tingim bek ol dispela rong? Nogat. Baibel i stori long rong bilong planti man em Jehova i bin lusim tingting long en, olsem ol rong Devit i bin mekim. (2 Samuel 11:1-17; 12:1-13) Olsem na Jehova inap tingim yet ol rong ol i bin mekim, na yumi tu i mas mekim olsem. Stori bilong ol rong ol i bin mekim, na stori bilong ol i bin tanim bel na God i lusim rong bilong ol, ol dispela stori i stap long Baibel bilong helpim yumi. (Rom 15:4) Orait, olsem wanem long dispela tok bilong Baibel i tok, taim Jehova i lusim rong bilong ol man, em i no save “tingim moa”?
13 Tok Hibru ol i tanim olsem “tingim,” i no makim tasol olsem yumi tingim bek ol samting i bin kamap bipo. Wanpela buk (Theological Wordbook of the Old Testament) i tok, em i “makim tu olsem yumi kirap mekim wanpela samting.” Olsem na dispela tok “tingim” sin bilong ol man, em i olsem Jehova bai givim strafe long ol sinman. Taim profet Hosea i tokim ol bikhetlain bilong Israel, “God bai i tingim sin bilong yupela,” em i laik tok olsem Jehova bai givim strafe long ol, long wanem, ol i no tanim bel. Olsem na laspela tok bilong dispela ves i tok: “Bai em i mekim save tru long yupela.” (Hosea 9:9) Tasol taim Jehova i tok, “Bai mi lusim sin bilong ol na mi no ken tingim moa,” em i laik tokim yumi olsem taim em i lusim tingting long ol rong bilong wanpela man i tanim bel pinis, bihain em i no ken givim strafe long dispela man long ol dispela rong em i bin mekim bipo. (Esekiel 18:21, 22) Olsem na dispela tok olsem em i lusim tingting, i olsem em i no save tingim tingim ol rong bilong yumi bambai em i ken wok long sutim tok long yumi o givim strafe long yumi long olgeta taim, nogat. Em nau, Jehova i stap olsem gutpela piksa tru yumi ken bihainim, olsem: Taim liklik kros i kamap namel long yu na narapela man, i gutpela sapos yu no wok long kamapim ol rong em i bin mekim long yu bipo na yu bin tok bai yu lusim ol dispela rong.
Ol Hevi i Kamap Long Sin Bilong Yumi
14 Jehova i redi long lusim rong bilong ol man i tanim bel, tasol yu ting dispela i makim olsem ol i no inap kisim sampela hevi long dispela rong ol i bin mekim? Nogat tru, i no olsem. Yumi no ken ting yumi inap mekim rong na i no gat wanpela strafe o hevi inap painim yumi long dispela rong yumi bin mekim. Pol i tok: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” (Galesia 6:7) Sampela hevi inap painim yumi long ol samting yumi bin mekim, tasol taim Jehova i lusim pinis rong bilong yumi, em i no save mekim na bai taim nogut i painim yumi, nogat. Taim sampela hevi i kamap, Kristen i no ken ting, ‘Ating Jehova i givim strafe long mi long ol rong mi bin mekim bipo.’ (Skelim wantaim Jems 1:13.) Tasol Jehova i no save pasim rot bambai ol hevi i no ken painim yumi long rong yumi bin mekim. Sampela hevi olsem marit i bruk, kisim bel nating, sik bilong pamuk, ol narapela i no bilip moa long yumi o ol i no tingim yumi i olsem man o meri i gat nem—ol dispela hevi inap kamap long wanpela rong yumi bin mekim, na Jehova i no save banisim yumi na bai ol dispela hevi i no ken painim yumi, nogat. Tru, Jehova i lusim ol rong Devit i bin mekim wantaim Batseba na long Uria. Tasol sampela bikpela hevi tru i painim Devit long ol dispela rong em i bin mekim, na Jehova i no pasim ol dispela hevi, nogat.—2 Samuel 12:9-14.
15, 16. Lo i stap long Wok Pris 6:1-7, olsem wanem em i helpim dispela man em narapela i bin rongim em na i helpim tu man i bin mekim dispela rong?
15 Na ol rong yumi bin mekim inap kamapim sampela hevi moa long yumi. Yumi ken tingim stori i stap long Wok Pris sapta 6. Long dispela sapta, Lo Bilong Moses i toktok long taim wanpela Israel i mekim bikpela rong, olsem em i stilim sampela samting long wantok bilong em, o em i giamanim dispela man na pulim ol samting bilong em. Orait bihain dispela sinman i tok em i no bin mekim dispela rong, na em i giaman na mekim tok tru antap olsem em i no gat asua. Em nau, ol i no inap save husat i tok stret na husat i giaman. Tasol bihain bel bilong dispela man i kotim em na em i kamapim rong bilong em. Orait, i gat 3-pela samting moa em i mas mekim bambai God i ken lusim rong bilong em: Em i mas bekim ol samting em i bin kisim long man, na em i mas givim mani long man inap 20 pesen bilong samting em i bin kisim, na em i mas givim wanpela sipsip man long pris bilong mekim ofa bilong mekim i dai asua bilong em. Na lo i tok moa olsem: “Pris bai i ofaim dispela sipsip long Bikpela bilong tekewe sin bilong dispela man, na bai God i lusim sin bilong en.”—Wok Pris 6:1-7; skelim wantaim Matyu 5:23, 24.
16 Dispela lo em i wanpela pasin marimari God i bin mekim long ol Israel. Em i helpim dispela man em narapela i bin rongim em—man i bekim ol samting long em, na ating bel bilong em i gutpela taim man bilong rongim em i tokaut long dispela rong em i bin mekim. Na tu, dispela lo i helpim man em bel bilong em i bin kotim em na i kirapim em long kamapim asua bilong em na stretim rong bilong em. Sapos em i bin bikhet na i no laik mekim ol dispela samting, God i no inap lusim rong bilong em.
17. Taim sampela i bin kisim hevi long rong yumi bin mekim, Jehova i laik bai yumi mas mekim wanem?
17 Tru, yumi no aninit long Lo Bilong Moses, tasol dispela Lo i givim gutpela save long yumi long tingting bilong Jehova, na tingting bilong em long lusim rong bilong man. (Kolosi 2:13, 14) Taim yumi bin mekim rong long sampela man o sampela i kisim hevi long rong yumi bin mekim, Jehova i save amamas taim yumi wok strong long ‘stretim dispela rong.’ (2 Korin 7:11) Bilong mekim olsem, yumi mas kamapim dispela rong bilong yumi, na tokaut olsem yumi gat asua, na yumi mas tok sori long man yumi bin mekim rong long em. Em nau, long rot bilong ofa bilong Jisas yumi ken singaut long Jehova na bel bilong yumi bai i stap isi, long wanem, bel i no kotim yumi moa na yumi ken bilip tru olsem God i bin lusim rong bilong yumi.—Hibru 10:21, 22.
18. Taim Jehova i lusim rong bilong yumi, sampela taim em i save mekim wanem bilong stretim yumi?
18 Taim Jehova i orait long lusim rong bilong yumi, sampela taim em i save mekim sampela samting bilong stretim yumi, olsem wanpela gutpela papa i save mekim. (Sindaun 3:11, 12) Sapos wanpela Kristen i mekim rong na i tanim bel, na em i bin holim wok elda o wokman insait long kongrigesen, o em i wanpela painia, ating em i mas lusim dispela wok. Tru, ating em bai bel hevi tru long lusim dispela wok em i bin laikim tru na em i mas wet inap longtaim liklik bilong kisim bek dispela wok. Tasol taim Jehova i stretim em olsem, i no olsem Jehova i no orait moa long em o Jehova i no bin lusim rong bilong em. Na yumi mas save tu olsem taim Jehova i stretim yumi, dispela i kamapim klia olsem em i save laikim tru yumi. Sapos yumi larim Jehova i stretim yumi na yumi bihainim ol dispela tok, dispela bai helpim tru yumi na em inap bringim yumi i go long laip i stap oltaim oltaim.—Hibru 12:5-11.
19, 20. (a) Sapos yu bin mekim sampela rong, bilong wanem yu no ken ting Jehova i no inap marimari long yu? (b) Long stori i kamap bihain long dispela, bai yumi toktok long wanem samting?
19 Taim yumi save olsem yumi mekim wok bilong wanpela God em i redi long lusim rong bilong yumi, dispela i save givim nupela strong long yumi! Jehova i no save lukim ol rong na popaia tasol bilong yumi. (Song 130:3, 4) Em i save long olgeta tingting i stap long bel bilong yumi. Sapos yu pilim olsem bel bilong yu i bagarap stret long ol rong yu bin mekim bipo, yu no ken ting Jehova i no inap marimari long yu. Maski yu bin mekim wanem ol popaia long bipo, sapos yu bin tanim bel tru na yu mekim ol samting bilong stretim dispela rong, na yu bin beten strong long Jehova long lusim dispela rong bilong yu long rot bilong blut bilong Jisas i bin kapsait, orait yu ken bilip tru olsem tok bilong 1 Jon 1:9 i makim yu: “Sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.”
20 Baibel i kirapim yumi long bihainim pasin bilong Jehova long lusim rong bilong man. Tasol taim sampela i mekim rong long yumi, Jehova i laik bai yumi mas lusim rong bilong ol i go inap wanem mak? Bai yumi toktok long dispela samting long stori i kamap bihain long dispela.
[Futnot]
a Tok Hibru ol i tanim olsem “em i bin kisim graun na wokim yumi,” ol i save kolim wankain tok long ol sospen graun em man i save wokim.—Aisaia 29:16.
Bai Yu Bekim Olsem Wanem?
◻ Bilong wanem Jehova i redi long lusim rong bilong man?
◻ Baibel i stori olsem wanem long pasin bilong Jehova long lusim tru rong bilong man?
◻ Taim Jehova i lusim rong bilong man, olsem wanem em i save lusim tingting long en?
◻ Taim sampela i bin kisim hevi long rong yumi bin mekim, Jehova i laik bai yumi mas mekim wanem?
8. Taim Jehova i lusim ol rong bilong yumi, i olsem em i mekim wanem? Dispela i mas mekim wanem long yumi?
9. Wanem insait bilong tok bilong Jisas: “Yu ken lusim ol [dinau] bilong mipela”?
13. (a) Wanem narapela insait bilong dispela tok Hibru ol i tanim olsem “tingim”? (b) Taim Jehova i tok, “Bai mi lusim sin bilong ol na mi no ken tingim moa,” em i laik tok wanem long yumi?
14. Olsem wanem yumi save, taim Jehova i lusim rong bilong ol man i bin tanim bel, dispela i no makim olsem ol i no inap kisim sampela hevi long dispela rong ol i bin mekim?
[Piksa long pes 12]
Taim sampela i kisim hevi long rong yumi bin mekim, Jehova i laik bai yumi mas mekim sampela samting bilong stretim dispela rong