Jehova, Em i Man Bilong Mekim Ol Gutpela Samting Tru

“Yu tasol yu gat bikpela strong. Na yu tasol yu save mekim kain kain gutpela gutpela samting. Yu wanpela tasol yu God tru.”​—⁠SONG 86:⁠10.

1, 2. (a) Ol samting ol man i bin wokim, dispela i helpim ol, o olsem wanem? (b) Wanem hap bilong Baibel em i ken helpim na strongim yumi?

OL MAN i bin wokim planti samting, olsem lait bilong paua, telefon, redio, video, balus, ka, kompyuta. Dispela i mekim na i olsem ol man i stap klostu long ol narapela man. Tasol ol i no stap olsem ol wantok! Ol i no stap wanbel na sindaun gut wantaim! Ol i save pait, na kilim man i dai, na planti raskol i stap, na ol i bagarapim graun, na i gat planti sik, na planti ol i stap rabis. Tru, sampela gavman i rausim sampela samting bilong pait, tasol ol i gat planti i stap yet inap long kilim i dai olgeta man. Na ol bikpela kampani i wokim yet planti samting bilong pait na ol i kisim bikpela mani moa long en. Ol maniman i kisim moa moa mani, na ol rabisman i kamap rabis moa yet. Husat inap stretim ol dispela samting?

² I gat wanpela Man i stap, em God Jehova, em “i stap antap long ol.” (Saveman 5:⁠8) Em i bin kirapim ol man long raitim hap bilong Buk Song long Baibel, na ol dispela tok i bin strongim bel bilong ol man long taim bilong hevi na givim gutpela tingting long ol. Wanpela em Song 86, i gat het-tok olsem: “Devit i raitim dispela beten.” Yu tu yu ken mekim dispela beten.

Sanap Strong, Maski Hevi

 3. Long dispela taim bilong hevi, wanem pasin bilong Devit yumi ken bihainim na dispela bai strongim yumi?

³ Devit i raitim Song 86 long taim em i gat hevi. Yumi ol man bilong nau i stap “long taim bilong las de” na “planti hevi” i stap, na tok bilong Devit inap strongim yumi. (2 Timoti 3:1; lukim tu Matyu 24:​9-13.) Planti hevi i bin painim Devit na em i bel hevi, na kain samting olsem inap painim yumi tu. Tasol Devit i no bin lusim Jehova. Wanpela taim em i beten long Jehova na i tok: “Bikpela, mi no gat strong na mi no inap helpim mi yet. Olsem na mi laik bai yu harim [beten] bilong mi na helpim mi . . . long wanem, mi save bihainim yu. Mi wokman bilong yu, na mi save bilip long yu, olsem na yu mas helpim mi.”​—⁠Song 86:​1, 2.

 4. Yumi mas mekim wanem bilong kamapim bel bilong yumi, olsem yumi bilip tru long Jehova?

⁴ Jehova “em i as bilong olgeta pasin marimari na pasin sori” na “em i save mekim isi bel bilong” yumi, na yumi ken beten askim em long helpim yumi. (2 Korin 1:​3, 4) Yumi mas mekim olsem Devit i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”​—⁠Song 55:⁠22.

Pren Bilong Jehova

 5. (a) Sampela Baibel em ol i bin tanim gut, ol i mekim wanem long nem bilong Jehova? (b) Song 85 na Song 86 i tok wanem long Jehova? (Lukim sta daunbilo long han sut.)

⁵ Long Song 86 Devit i beten long Jehova na kolim nem bilong em planti taim. Sampela kuskus bilong lotu long lain Juda i no laik kolim o raitim dispela nem​—⁠i olsem ol i pret long mekim. Ol i no ting olsem God i wokim yumi i gat ol wankain pasin olsem em yet, na ol i no ting olsem God i gat sampela pasin olsem yumi man. Olsem na taim ol i lukim Baibel na raitim tok bilong en, ol i senisim nem Jehova na raitim Bikpela. Tasol gutpela tru sampela Baibel i no haitim nem bilong God olsem; ol i raitim stret. (Wanpela em New World Translation of the Holy Scriptures.) Olsem na dispela i helpim yumi long kamap pren bilong Jehova.a

 6. Yumi ken mekim wanem bilong kamapim klia olsem yumi laikim tumas nem bilong Jehova?

⁶ Devit i beten moa na i tok: “Yu yet yu God bilong mi. Plis, yu ken marimari long mi. Olgeta de long san na long nait, mi save beten long yu.” (Song 86:​3, 4) Devit i beten long Jehova “long olgeta de long san na long nait.” Planti taim em i beten long nait, olsem long taim ol birua i raunim em long bus. (Song 63:​6, 7) Na long nau tu, taim ol i laik bagarapim sampela Witnes, olsem repim ol o mekim ol narapela samting nogut long ol, ol i save singaut long Jehova i helpim ol, na planti taim em i bin mekim olsem. Nem bilong Jehova em i wanpela gutpela samting tru long ol Witnes bilong Em. Jisas tu, taim em i stap long graun em i gat wankain tingting long nem bilong Jehova. Em i bin skulim lain bilong em long beten long Jehova i ken mekim gut nem bilong em, na em i kamapim nem bilong Jehova long ol.​—⁠Matyu 1:1; 6:9; Jon 17:​6, 25, 26.

 7. Olsem wanem Jehova i bin helpim sampela wokman bilong em? Yumi mas mekim wanem?

⁷ Devit i bin givim bel olgeta long Jehova, na em i laik kirapim yumi long mekim olsem. Long Song 37:5 em i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.” Olsem na taim yumi singaut long Jehova long helpim yumi, em i no ken pasim yau. Ol wokman bilong em i bihainim lo bilong em na ol i amamas long mekim wok bilong em, maski ol man i mekim nogut long ol o ol i gat hevi o sik samting. Long hap bilong Afrika long Angola, na Laibiria, na Mosambik, na Saier, planti bikpela pait i stap, tasol ol i no lusim wok bilong Jehova; em i nambawan bikpela samting bilong ol.b Jehova i bin mekim gut long ol na lain bilong ol i go bikpela. Na yumi tu i no ken les. (Rom 5:3-5) Yumi mas sanap strong na tingim tok promis bilong Baibel, i tok: “Taim bilong ol dispela samting i mas kamap, em i no yet. . . . Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:⁠3) Olsem na yumi mas bilip long Jehova, na yumi mas wok strong i go na “wet liklik” long dispela samting i kamap.

Gutpela Pasin Bilong Jehova

 8. Yumi inap kolim wanem ol samting long taim yumi beten long Jehova? Jehova i bin mekim wanem gutpela pasin long yumi?

⁸ Na Devit i beten moa olsem: “Bikpela, yu gutpela tru na yu save rausim sin bilong mipela. Yu save laikim tumas olgeta manmeri i save beten long yu. Bikpela, yu mas putim gut yau long [beten] bilong mi. Mi singautim yu bilong helpim mi. Harim singaut bilong mi. Yu save helpim mi long taim mi singaut long yu. Olsem na olgeta taim mi karim hevi mi save beten long yu.” (Song 86:​5-7) Yumi inap i go klostu tru long Jehova long rot bilong beten. Wanpela taim Devit i bin beten olsem: “God, yu no ken tingting moa long sin na pasin nogut mi mekim, taim mi yangpela yet. Yu God bilong sori na yu gutpela oltaim. Yu tingting long mi na yu marimari long mi.” (Song 25:⁠7) Jehova em i gutpela Man tru​—⁠em i bin salim Jisas i kam bilong baim rong bilong yumi, na em i marimari long ol man i tanim bel, na em i mekim gut long lain Witnes bilong em ol i stap gut long em.​—⁠Song 100:​3-5; Malakai 3:10.

 9. Sapos man i bin mekim rong na em i tanim bel, wanem gutpela samting em i ken tingim bilong strongim em?

⁹ Olsem wanem? Yumi mas bel hevi long ol rong yumi bin mekim bipo? Sapos yumi lusim pinis ol pasin nogut bipo yumi bin mekim, na yumi tanim bel, yumi ken tingim tok bilong Pita na dispela bai strongim bel bilong yumi. Pita i tok, “bai God i rausim ol sin bilong yupela” na em “bai i givim nupela strong long yupela.” (Aposel 3:​19, 20) Na yumi ken stap klostu long Jehova long rot bilong beten, na yumi ken tingim tok bilong Jisas, em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Yupela kisim save long mi, long wanem, mi save mekim pasin isi long ol man. . . . Na bai ol samting i no ken givim hevi long yupela na bai yupela i kisim malolo.” Taim ol Witnes i beten long Jehova long rot bilong Jisas, ol i save stap bel isi na belgut.​—⁠Matyu 11:​28, 29; Jon 15:16.

10. Buk Song i tok wanem long gutpela pasin bilong Jehova?

¹⁰ Planti taim Buk Song i tok, Jehova “em i save laikim yumi tru.” Em i gat bikpela pasin sori! Long Song 118:​1-4, inap 4-pela taim yumi lukim tok, Jehova “i save laikim yumi tru” oltaim oltaim. Na planti taim Song 136 i tok, Jehova “em i save laikim yumi moa yet.” Jems 3:2 i tok: “Planti taim yumi save tingting long mekim wanpela samting, na yumi save popaia.” Olsem na yumi mas askim Jehova long lusim tingting long rong yumi mekim. Em i Man bilong marimari na pasin sori, na em i save sori long yumi. Sapos yumi bihainim laik bilong em long olgeta taim em bai strongim yumi long karim ol hevi.​—⁠1 Korin 10:13.

11. Ol elda i ken mekim wanem na bai man i no ken tingting planti long sampela rong i bin painim em bipo?

¹¹ Sampela i save bel hevi long samting narapela man i bin mekim long ol. Sapos sampela man i bin mekim pasin nogut olsem pasin sem long yumi long taim yumi pikinini, ating nau yumi tingim yet na yumi pilim olsem yumi gat rong na yumi nogut pinis. Tasol yumi ken beten long Jehova na em bai putim yau long harim beten bilong yumi. (Song 55:​16, 17) Sapos wanpela i gat hevi olsem, elda i ken tokim em, dispela rong i no rong bilong em, nogat; em rong bilong ol narapela man i bin mekim dispela samting, na dispela man o meri yet i no gat asua. Na sampela taim elda i ken toktok moa wantaim dispela man o meri bilong helpim em, i go inap long taim em inap “long karim hevi bilong” em.​—⁠Galesia 6:​2, 5.

12. Olsem wanem na ol hevi i go bikpela? Yumi ken mekim wanem na bai yumi inap karim ol hevi?

¹² I gat planti hevi moa em lain bilong Jehova i mas karim long nau. Kirap long taim bilong Namba Wan Pait long 1914 planti bikpela hevi tru i kamap long graun. Olsem Jisas i tok profet long en, “dispela ol samting em i olsem pen i save kamap pastaim long meri i laik karim pikinini.” Na long nau yumi stap yet long taim bilong pinis, na i gat planti hevi moa yet i wok long kamap. (Matyu 24:​3, 8) Na dispela “sotpela taim” bilong Satan i laik pinis nau. (KTH 12:12) Olsem na “em i olsem wanpela laion i singaut strong” long painim abus, na em i mekim kain kain trik na giaman bilong pulim yumi na pundaunim yumi na bai yumi bagarap. (1 Pita 5:⁠8) Em i laik bai yumi lusim Jehova na lain bilong em, tasol em i no inap mekim sapos yumi bilip tru long God Jehova na wetim em, olsem Devit i bin mekim!

13. Ol papamama wantaim ol pikinini i mas mekim wanem long Jehova?

¹³ Devit i bin skulim pikinini bilong em, em Solomon, long bilip strong long Jehova bai lukautim Solomon. Bihain Solomon yet i gat pikinini, na em i tokim em: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim. . . . Yu mas aninit long Bikpela na givim baksait long pasin nogut.” (Sindaun 3:​5-7) Ol papamama bilong nau tu i mas lainim pikinini long beten tru na kamapim tru tingting bilong em long Jehova, na bilip tru olsem Jehova inap helpim em long sanap strong long taim bilong hevi o ol man i laik pulim em long mekim pasin i no stret. Sapos papamama yet i bihainim lo bilong Jehova long olgeta taim na stap gut long em, pikinini tu bai lain long laikim tumas Jehova na bilip long em.​—⁠Lo 6:​4-9; 11:​18, 19.

Ol Gutpela Wok Bilong Jehova

14, 15. Wanem sampela gutpela gutpela wok bilong Jehova?

¹⁴ Devit i bilip strong long Jehova na em i beten long em na i tok: “Bikpela, i no gat wanpela god i olsem yu. Yu winim ol. Na i no gat wanpela man inap mekim wankain wok olsem yu save mekim.” (Song 86:⁠8) Ol samting Jehova i wokim i bikpela moa na i gutpela moa yet. Ol saveman bilong saiens i bin glasim ol ples antap na ol i lukim i bikpela moa na i go i go, no gat arere bilong en, na ol sta samting i wok stret na bihainim rot na lo bilong ol; na Devit tu i lukim ol dispela gutpela gutpela wok bilong Jehova na em i tok: “Skai i soim yumi olsem God i nambawan tru. Olgeta samting bilong antap i soim yumi gutpela wok bilong em.”​—⁠Song 19:⁠1.

¹⁵ Na Jehova i bin wokim dispela graun tu i gutpela moa. Em i putim taim bilong san na taim bilong nait, na taim bilong ren, na taim bilong planim ol samting, na taim bilong kamautim kaikai long gaden, na planti gutpela samting moa bilong ol man i ken kisim bikpela amamas long en. Na Jehova i bin wokim olgeta hap bilong skin bilong yumi i gutpela tru na bai yumi inap amamas long ol dispela gutpela samting em i bin wokim na yumi save lukim.​—⁠Stat 2:​7-9; 8:22; Song 139:14.

16. Wanem bikpela samting tru God i bin mekim na dispela i kamapim klia gutpela pasin bilong em? Na olsem wanem long bihain?

¹⁶ Adam tupela Iv i bikhet long God, na dispela i as bilong ol hevi i save painim yumi ol man, tasol God i bin salim Krais Jisas i kam bilong autim tok bilong Kingdom na bilong i dai na baim bek ol man. Na gutpela samting tru God i mekim, em i kirapim bek Krais Jisas bambai em i ken kamap King wantaim em. (Matyu 20:28; Aposel 2:​32, 34) Na God i makim sampela man bilong kamap nupela lain olsem “nupela man,” na ol bai stap wantaim Jisas long heven olsem “nupela skai,” na ol bai bosim ol man long graun ol bai i olsem “nupela graun,” na planti milion man i dai pinis ol bai kirap bek na i stap long graun. (2 Korin 5:17; KTH 21:​1, 5-7; 1 Korin 15:​22-26) Na Jehova bai kamapim yet ol gutpela gutpela wok, olsem na yumi ken tok: “Bikpela, . . . Yu save mekim gutpela wok tru bilong helpim ol man i stap aninit long yu. Yu save lukautim gut ol man i bilip long yu. Yu save helpim ol moa yet long ai bilong olgeta manmeri.”​—⁠Song 31:​17 -19.

17. Long nau wanem samting i wok long kamap na i truim tok bilong Song 86:⁠9?

¹⁷ Na Devit i stori long sampela wok moa Jehova i mekim long nau. Devit i tok: “Olgeta lain manmeri yu bin wokim ol, bai ol i go brukim skru long yu, na bai ol i litimapim nem bilong yu.” (Song 86:9) Jehova i bin bungim wanpela lain, olsem “liklik lain sipsip,” em ol i bilong holim wok king long Kingdom, na em i wok long bungim tu “planti manmeri . . . bilong olgeta lain man na . . . kantri na . . . tok ples,” em “ol arapela sipsip,” em planti milion, na ol i bilip long ofa bilong Krais Jisas. Jehova i bungim ol na ol i kamap olsem wanpela strongpela oganaisesen i stap long olgeta hap. Ol i save laikim tumas pasin bilong i stap bel isi, na i no gat narapela lain i olsem. Ol ensel i lukim dispela samting, na ol i brukim skru long ai bilong Jehova na ol i tok: “Yumi amamas moa yet long God bilong yumi, na yumi tokaut long biknem bilong em. Em i gat olgeta gutpela tingting, na yumi givim tenkyu long em, na litimapim nem bilong em. Em i gat strong tru. Yes, olgeta bikpela strong i stap long em. Oltaim oltaim dispela olgeta samting ol i bilong God tasol.” Na lain bilong i stap long graun tu ol i litimapim nem bilong Jehova na mekim wok bilong em “long san na long nait,” na ol i tingting long em bai i lukautim ol long taim em i pinisim pasin nogut bilong graun na bai ol i ken stap oltaim long paradais long graun.​—⁠Luk 12:32; KTH 7:​9-17; Jon 10:16.

Strong Bilong Jehova

18. Jehova i mekim wanem bilong kamapim long ples klia olsem em i “God tru”?

¹⁸ Na Devit i tok long Jehova olsem: “Yu tasol yu gat bikpela strong. Na yu tasol yu save mekim kain kain gutpela gutpela samting. Yu wanpela tasol yu God tru.” (Song 86:10) Bipo yet Jehova i kamapim long ples klia olsem ‘em wanpela tasol i God tru.’ King bilong Isip i bin hambak na i tokim Moses: “[Jehova] em i husat? Bilong wanem mi mas harim tok bilong en na larim yupela Israel i go? Mi no save long [Jehova].” Tasol Jehova i bin mekim save long em na nau em i save Jehova i husat! Nambawan Strongpela God Jehova i daunim ol god giaman bilong ol Isip na ol marilaman bilong ol, na em i givim planti hevi long ol na kilim i dai ol namba wan pikinini man, na em i bagarapim king wantaim ami bilong em long solwara Retsi. Tru tumas, i no gat narapela god i olsem Jehova!​—⁠Kisim Bek 5:2; 15:​11, 12.

19, 20. (a) Singsing bilong Moses na Pikinini Sipsip long Kamapim Tok Hait 15:​3, 4, wanem taim truim bilong en bai kamap? (b) Olsem wanem yumi ken insait long wok bilong Jehova long nau?

¹⁹ Na long nau Jehova i wok long mekim ol gutpela gutpela samting bilong redi long helpim na lukautim lain bilong em long taim em bai bagarapim lain bilong Satan. Em i bin salim ol Witnes bilong em long olgeta hap na ol i tokaut long strafe em bai kamapim, na dispela bikpela wok bilong autim tok i truim tok profet bilong Jisas long Matyu 24:14. Klostu nau “bai las de i kamap,” na Jehova bai kamapim long ples klia bikpela strong bilong em, na em bai pinisim olgeta pasin nogut long graun. (Song 145:20) Nau truim bilong singsing bilong Moses na Pikinini Sipsip bai kamap, i tok: “God, Bikpela I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu.”​—⁠KTH 15:​3, 4.

²⁰ Yumi mas givim bel long autim tok na tokim ol man long ol dispela gutpela gutpela samting Jehova i laik mekim. (Lukim Aposel 2:11.) Jehova bai wok yet long mekim ol bikpela samting long nau na long bihain, na stori i kam bihain long dispela bai toktok long ol dispela samting.

[Ol Futnot]

Yu Tingim Yet?

◻ Bilong wanem yumi mas mekim beten olsem Song 86 i kolim?

◻ Yumi ken mekim wanem bilong i stap klostu long Jehova?

◻ Jehova i mekim wanem ol gutpela pasin long yumi?

◻ Wanem sampela bikpela wok tru Jehova i bin mekim?

◻ Olsem wanem Jehova wanpela tasol i “God tru”?

[Piksa long pes 10]

Long taim bilong “nupela graun,” ol gutpela wok bilong Jehova bai kamapim biknem na gutpela pasin bilong em