Paradais i Kamap Bek i Litimapim Nem Bilong God
“Bai mi mekim [ples mi putim lek bilong mi antap long en] i kamap nambawan tru.”—AISAIA 60:13.
1, 2. (a) Long maus bilong profet Aisaia, God i mekim wanem tok profet long dispela graun? (b) Sapos yumi inap lukluk i go na lukim ol samting i kamap long graun 1,000 yia bihain, bai yumi lukim wanem samting?
JEHOVA i wokim dispela graun i stap aninit long em na i olsem ples bilong em i putim lek bilong em antap long en. Long maus bilong profet Aisaia, em i tok em bai mekim dispela ples “i kamap nambawan tru.” (Aisaia 60:13) Long rot bilong Baibel i olsem yumi inap lukim ol samting bai kamap long ol man inap 1,000 yia bihain, olsem man i save lukluk long kompas bilong lukim samting i stap longwe. Yumi lukim gutpela samting tru i kamap. Olgeta hap bilong graun i stap nambawan tru. Nambawan Bikpela Man bilong wokim gaden em i mekim graun i kamap gutpela ples tru. Ol manmeri long olgeta hap bilong graun ol i stap long Paradais!
2 Tru, God, em Nambawan Bikpela, em i bin putim namba wan man long wanpela gutpela ples paradais na em i tingting long helpim olgeta man bambai ol i ken i stap amamas tru. Dispela Man bilong wokim olgeta samting em i sori tru long ol man, olsem na i stret yumi ken tok “God yet em i as bilong dispela pasin bilong laikim ol arapela.” (1 Jon 4:8, 16) Taim Paradais i kamap bek long graun, ol man na meri i gutpela olgeta bai ol i stap gut wantaim olsem ol brata sista tru—bai narapela i laikim tru narapela. (Aisaia 9:6) Na bai ol i laikim tru God Jehova, em i Man bilong wokim heven na graun, olsem na bai ol i daun tru long em.
3, 4. (a) Bihain olsem wanem bai graun na heven i wankain? (b) Taim Paradais i kamap bek long graun, bai ol ensel i mekim wanem?
3 Planti tausen yia bipo, God i bin stori long ol ples em i bosim na em i tokim lain bilong em: “Heven em i sia king bilong mi na graun em i ples mi putim lek bilong mi antap long en.” (Aisaia 66:1) Taim Paradais i kamap bek long graun, dispela ples em i putim lek antap long en i mas i stap nambawan tru wankain olsem ples bilong sia king bilong em long heven.
4 Taim God i wokim dispela graun, ol ensel i stap klostu long sia king bilong em long heven ol i lukim dispela graun em i wokim. Em i wokim gutpela tru na ol i amamas tru long en! Ol i no inap pasim bel—ol i kirap mekim singsing bilong amamas. (Lukim Sefanaia 3:17; Buk Song 100:2.) Man bilong wokim olgeta samting, em tu i amamas, na long rot bilong spirit bilong em, em i kirapim wokboi bilong em long graun long stori stret long ol samting i bin kamap long dispela taim long heven. Em i stori olsem: “Ol sta i bin lukim na ol i amamas na singim song, na ol ensel i amamas na singaut.” (Jop 38:7) Taim Paradais i kamap bek long graun, bai ol dispela ensel, ol pikinini bilong God long heven, i amamas moa yet na bai ol i mekim singsing bilong litimapim nem bilong God!
5. Taim God i kamapim pinis laik bilong em bilong pastaim long dispela graun, bai yumi mekim wanem?
5 Baibel i stori long ol samting God Jehova i laik mekim na i tok, long pastaim tru na i kam inap long nau em i laik bai olgeta hap bilong graun i kamap gutpela ples paradais. Dispela tok bilong Baibel i strongim tru bel bilong yumi. Taim God i kamapim pinis dispela laik bilong em, bai yumi amamas tru na bai yumi litimapim nem bilong em. Yumi save, God Jehova i mas mekim kain gutpela wok olsem, long wanem strong na biknem bilong em i no ken pinis na olgeta wok em i mekim i nambawan tru. Yumi olgeta i mas litimapim nem bilong em.—Buk Song 150:1, 2; Aisaia 45:18; Kamapim Tok Hait 21:3-5.
Ol Man i Kirap Bek Ol i Helpim Wok Bilong Kamapim Bek Paradais
6. Taim Armagedon i pinis, bihain bai wanem ol lain i stap long graun?
6 Ol manmeri i abrusim bagarap long Armagedon bai ol i no bikpela lain tumas na bai ol i kamapim sampela pikinini, tasol i no dispela lain tasol bai stap long graun. Jehova i laik mekim narapela wok tu bilong mekim ‘ples em i putim lek antap long en’ i kamap nambawan tru—em i laik kirapim bek ol manmeri i stap long matmat na ofa bilong Krais inap helpim ol. Ol dispela manmeri tu bai insait long gutpela wok bilong mekim olgeta hap bilong graun i kamap gutpela ples paradais.—Aposel 24:15.
7. Ol manmeri i abrusim bagarap long Armagedon bai tingim wanem ol tok bilong Jisas?
7 Ol manmeri i abrusim bagarap long Armagedon, oltaim bai ol i tingim ol tok Jisas i bin mekim na i kirapim tru bel bilong man; Jisas i bin tok: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong pikinini, na ol bai i lusim matmat na i kam ausait.” (Jon 5:28, 29) Em bai gutpela taim tru, long wanem ol manmeri i dai pinis na i stap long matmat, bai ol i harim maus bilong pikinini bilong God i mekim wankain tok olsem em i bin mekim long Lasarus taim Lasarus i stap long matmat long Betani; Jisas i tok “Lasarus, yu kam ausait.”—Jon 11:43.
8, 9. Ating husat ol bai kirap bek pastaim na kisim laip gen long graun? Na bai ol manmeri i bin abrusim bagarap long Armagedon ol i amamas long wanem samting?
8 Taim Krais Jisas i bosim graun inap 1,000 yia, em bai singautim husat pastaim na bai ol i kirap bek na kisim laip gen long graun? I stret yumi ken ting em bai singautim ol “arapela sipsip” pastaim, em ol i dai nau long taim las de i klostu. Bai ol i kirap bek pastaim. (Jon 10:16) Bai i no hatwok tumas long ol i lain long nupela sindaun ol bai kisim long nupela graun.—Lukim Matyu 25:34; Jon 6:53, 54.
9 Ol manmeri i abrusim bagarap long Armagedon, bai ol i amamas tru long lukim ol dispela “arapela sipsip” i kirap bek, em ol i bin i dai paslain liklik long taim bilong “bikpela hevi tru.” (Matyu 24:21) Bai ol inap luksave tru long ol dispela manmeri i kirap bek, na bai ol i sekanim ol na wok gen wantaim ol long mekim wok bilong God Antap Tru!
10. Sapos yu abrusim bagarap long Armagedon, ating bai yu inap lukim wanem samting?
10 Sapos yu abrusim bagarap long Armagedon bai yu inap lukim ol famili bilong yu i kirap bek. Taim namba wan i kirap bek bai yu amamas tru olsem papamama bilong liklik meri i gat 12-pela krismas ol i amamas, em ol i lukim Jisas i kirapim dispela pikinini bilong ol. Baibel i tok: “Ol i kirap nogut tru.” (Mak 5:42) Tru tumas, taim yu lukim ol manmeri i lusim ples bilong ol man i dai pinis (matmat) na solwara na ol i kirap bek, bai yu amamas moa yet. (Kamapim Tok Hait 20:13) Ol gutpela samting tru i laik kamap long bihain, na dispela taim i klostu pinis!
“Bai Ol i Bosim Ol Manmeri long Olgeta Hap Bilong Graun”
11, 12. (a) Tok bilong Buk Song 45:16 i makim wanem samting? (b) King Krais Jisas bai makim sampela man bilong wanem ol lain na bai ol i holim wok bilong “bosim ol manmeri” long graun?
11 Taim Jisas i mekim wok long strong bilong em bilong kirapim bek ol man em i bin givim gutpela laip bilong em bilong helpim ol, bai em inap truim tok bilong Buk Song 45:16. Ol tok bilong dispela song i tok profet long Krais Jisas taim em i kamap King pinis. Song i tok: “Na yu king, bai yu gat planti pikinini man, na bai ol i senisim ol tumbuna bilong yu. Bai yu givim bikpela namba long ol, na bai ol i bosim ol manmeri long olgeta hap bilong graun” Dispela tok i makim olsem Jisas bai kamap papa long heven na bai em i gat ol pikinini hia long graun, na bai em i makim sampela pikinini man bilong em bilong “bosim ol manmeri long olgeta hap bilong graun.” Jisas em i “pikinini bilong Devit” na em i namba wan pikinini man bilong nupela meri bilong lain Juda, em Maria, olsem na em i gat ol lain tumbuna bilong em i go bek inap long namba wan tumbuna, em Adam.—Luk 3:23-38.
12 Olsem wanem? Buk Song 45:16 i tok olsem Jisas bai kirapim bek ol dispela tumbuna bilong em na long dispela rot bai ol i kamap olsem ol pikinini man bilong em? Em i stret. Na olsem wanem? Buk Song 45:16 i tok tu olsem King Krais Jisas bai mekim gut long ol dispela lain na em bai makim ol tasol bilong “bosim ol manmeri long olgeta hap bilong graun”? Nogat. Sapos olsem, orait bai i gat liklik lain tasol bilong “bosim ol manmeri long olgeta hap bilong graun.” Na tu i no olgeta tumbuna bilong em ol i bin mekim bikpela wok long bipo na bai ol inap kisim biknem long graun taim em i bosim graun long dispela 1,000 yia. I gat planti man moa em King Krais Jisas inap makim ol bilong “bosim ol manmeri,” i no ol tumbuna bilong em tasol. Sampela man i abrusim bagarap long Armagedon ol inap long mekim dispela wok, na sampela “arapela sipsip” ol i kirap bek, na ol bilipman i bin i stap paslain long taim bilong ol Kristen. Em i ken makim sampela man bilong ol dispela lain em ol inap long mekim wok na ol i ken holim wok bilong “bosim ol manmeri long olgeta hap bilong graun,” na bai ol i stap olsem mausman bilong em long graun.
13, 14. Husat bai ol i kirap bek na bai ol manmeri i bin abrusim bagarap long Armagedon i lukim ol tru?
13 Tingim ol dispela manmeri, em ol inap kirap bek long taim Kingdom bilong Krais i bosim graun. Lukim! Olaman! Abel i kirap bek, em namba wan man i bilip long God na long dispela as brata bilong em i kilim em i dai. Na lukim! Enok tu i kirap bek—em i bin wokabaut stret long ai bilong trupela God. Na Noa tu, em man bilong wokim sip. Na lukim! Abraham na Aisak na Jekop tu ol i kirap bek, em ol tumbuna bilong lain Israel. Na Moses (bilong lain Livai, em lain pris) na Devit, em God i bin mekim kontrak wantaim em long Kingdom bilong i stap oltaim. Na Aisaia tu i kirap bek, wantaim Jeremaia na Esekiel na Daniel na ol narapela profet Hibru i bin raitim sampela tok bilong Baibel, em Malakai i laspela bilong ol. Na Jon Bilong Baptais, em tu i kirap bek, na waspapa bilong Jisas, em Josep.
14 Wanpela taim Jisas i bin tokim ol Juda, “Yupela bai i lukim Abraham na Aisak na Jekop na olgeta profet ol i stap insait long kingdom bilong God, tasol yupela yet ol bai i rausim na yupela bai i stap ausait.” (Luk 13:28) ‘Bikpela lain manmeri’ ol i abrusim bagarap long pait bilong “bikpela de bilong God I Gat Olgeta Strong,” bai ol i lukim tru “Abraham na Aisak na Jekop na olgeta profet,” long wanem ol dispela man bai kirap bek na i stap long Paradais long graun, na bai ol i mekim wok bilong king aninit long Kingdom bilong God i stap long han bilong Krais Jisas, em i “Papa bilong i stap oltaim oltaim.”—Kamapim Tok Hait 7:9, 14; 16:14; Aisaia 9:6.
15. Ol manmeri i abrusim bagarap long Armagedon ol inap mekim wanem narapela kain gutpela wok?
15 Sapos yu abrusim bagarap taim pasin nogut bilong nau i pinis bai yu amamas tru long toktok wantaim Noa na lain bilong em, em ol “8-pela manmeri” ol i bin abrusim wanpela bikpela bagarap long taim bilong Bikpela Tait Wara long yia 2370 paslain long Krais! Bai ol inap stori long yu long ol samting i bin kamap long dispela taim, na bai yu inap stori long ol samting i bin painim yu, na tokaut long ol dispela narapela kain samting God Jehova i bin mekim long dispela taim na em i no ken mekim gen.—1 Pita 3:20; Mak 13:19; 2 Pita 3:5-7.
Em i Tingim Man Nogut i Bilip
16, 17. (a) Taim Jisas i tingim dispela man nogut i bin sori long em, orait ol manmeri i bin abrusim bagarap long Armagedon na ol narapela i stap laip long nupela taim bai ol inap mekim wanem? (b) Taim dispela man nogut i kirap bek, yumi laik bai em i mekim wanem?
16 Taim ol manmeri i dai pinis ol i no kirap bek yet, bai ol man i kirap pinis long mekim ol wok bilong kamapim Paradais long graun, olsem na taim ol dispela manmeri i kirap bek, bai ol i lukim olgeta hap bilong graun i wok long kamap gutpela ples Paradais. Man nogut ol i bin nilim long pos long Golgota klostu long Jisas na em i bin lukim tok ol i nilim long pos bilong Jisas na em i tok, “Jisas, taim yu kamap king, yu ken tingting long mi,” dispela man nogut bai i kirap bek na kisim laip gen long Paradais long graun. (Luk 23:42) Ol manmeri i bin abrusim bagarap long Armagedon na ol narapela manmeri i stap laip long nupela taim, bai ol inap sekanim dispela man nogut em i kirap bek. Bai ol i lainim em na bai em inap save tru long dispela King Krais Jisas, em i bin sori long em long Naisan 14 long yia 33.
17 Taim Bikpela bilong yumi, Krais i stap King inap 1,000 yia, em bai tingim dispela man. Na taim dispela man nogut i kirap bek, yumi laik bai em i stap gut long God Jehova na long dispela rot bai em i kamapim bel bilong em, em i pilim tru gutpela pasin King Krais Jisas i bin mekim long em, olsem em i bin kirapim bek em. Sapos em i mekim olsem, bai God i orait long em na bai em inap i stap oltaim oltaim long Paradais wantaim ol narapela manmeri i bin kirap bek na ol i bihainim tok.
Gutpela Sindaun long Gutpela Ples Olsem Gaden Iden
18. Taim Paradais i kamap bek long graun, bai ol man i gat wanem kain sindaun?
18 Long dispela Paradais i kamap bek long graun, olgeta manmeri i stap pren bilong ol narapela. Bel bilong ol i pilim tru gutpela pasin bilong i stap olsem wanpela famili long olgeta hap bilong graun. Narapela i save gut long narapela. Olgeta i mekim wanpela tok ples tasol, em i kain olsem tok ples namba wan man i bin mekim na olgeta manmeri long graun i bin mekim inap 1,800 yia—kirap long taim God i wokim Adam long 4026 paslain long Krais i go inap long taim bilong Pelek (yia 2269 inap 2030 paslain long Krais), long wanem “taim Pelek i stap, ol manmeri bilong graun i bruk bruk nabaut long ol liklik lain.” (Stat 10:25; 11:1) Olgeta i amamas long ol inap i stap laip, na long olgeta moningtaim ol i tenkyu long God ol inap i stap laip wanpela de moa. Ol sik bilong skin i wok long pinis. Skin bilong ol man i wok long kisim bek strong, i no wok long bagarap.—Lukim Jop 33:25.
19. Bai olsem wanem long ol manmeri bipo ol i lek nogut samting?
19 Na lukim! Ol manmeri bipo ol i lek nogut, nau ol i wokabaut gut—ol i amamas tru na ol i kalap kalap. Ol man bipo han o lek bilong ol i lus, nau skin bilong ol i orait bek. Ol manmeri bipo ol i aipas, nau ol i lukluk, na ol yaupas i harim na mauspas i toktok na mekim singsing bilong kamapim bikpela amamas bilong ol long dispela samting. (Lukim Aisaia 35:5, 6.) Olgeta samting nogut long skin bilong ol manmeri i pinis. Ol man bai stap olsem man tru na ol meri bai stap olsem meri tru, na pasin bilong narapela bai poromanim gut pasin bilong narapela. (Stat 2:18) Skin bilong ol manmeri i kamap gutpela olgeta na dispela samting i litimapim nem bilong God Jehova, em i man bilong wokim skin bilong man i gutpela olgeta.
20. Bai olsem wanem long win na san na ren samting? na kaikai? na ol animal? Na olsem wanem long wok ol man i mekim long graun?
20 Olgeta hap bilong graun i wok long kamap gutpela ples tru. I no gat ripot olsem bikpela san o bikpela ren o bikpela win i bagarapim sampela hap. Nogat tru! (Lukim Mak 4:37-41.) San na win na ren i wok gut wantaim long mekim olgeta hap bilong graun i kamap gutpela ples bilong ol manmeri i ken i stap long en. I no gat wanpela hap i sot long kaikai, long wanem long olgeta hap bilong graun kaikai i kamap gut long ol gaden. (Buk Song 72:16) Olgeta man i sindaun gut wantaim na i stap bel isi na ol animal tu, olsem Jehova i tok: “Long olgeta ples antap long maunten bilong [mi], olgeta samting bai i stap gut wantaim. Bai i no gat wanpela i mekim nogut long narapela.” (Aisaia 11:9; lukim tu ves 6-8.) Olsem na graun bai i kamap gutpela ples bilong i stap long en na lotuim Jehova na mekim wok bilong em, em i Man bilong wokim dispela graun na em i Papa bilong en. Em i bin wokim dispela graun, olsem na graun i bilong em na i stret ol manmeri i mas mekim wok long en long pasin Em i laikim na i litimapim nem bilong Em.—Lukim Aisaia 35:1, 2, 6, 7.
21. Ol manmeri em God i baim bek ol, bai ol i ting olsem wanem long olgeta samting i kamap long graun? Bai ol i harim wanem kain musik?
21 Ol manmeri God i bin baim bek ol na ol i stap long dispela nupela taim bihain, ol i no bin i stap long Paradais long Iden, em namba wan man i bin stap long en, olsem na olgeta samting bai i nupela na i gutpela tru long ol! (Kamapim Tok Hait 21:5) Bai i gat ol gutpela musik na singsing, em olgeta i litimapim nem bilong Jehova!—1 Stori 23:4, 5; Buk Song 150:3-6.
22. Ol manmeri bai stap olsem wanem long Paradais long nupela taim bihain?
22 Em gutpela tru ol manmeri inap i stap oltaim long graun, long wanem olgeta samting nogut sin bilong Adam i bin kamapim, olsem pasin bilong i go lapun na i dai, i pinis olgeta! (Lukim Jon 10:10.) Long dispela graun olgeta manmeri God i orait long ol, bai ol i bihainim gutpela pasin wankain olsem bilong God Jehova—bai ol i kamap olsem God yet, wankain olsem namba wan man Adam taim God i wokim em! (Stat 1:26, 27) Long dispela taim bai graun i no i stap moa olsem samting nogut long ai bilong ol ensel i raunim sia king bilong Jehova na ol strongpela ensel na ol narapela ensel. Taim ol i lukluk i kam daun long graun na ol i lukim dispela graun i kamap gutpela ples paradais, bai ol i wok long tok tenkyu na litimapim nem bilong dispela Man em ol inap lukim tru pes bilong Em, em Jehova, em King bilong heven na graun.—Matyu 18:10.
Stap Amamas Oltaim Oltaim
23. Ating bihain bai i gat wanem samting bilong ol Kristen, em God i makim ol long spirit holi? Na dispela bai mekim wanem long ol manmeri i stap long Paradais long graun?
23 Samting inap kamap na ating em bai kamap tru, em olsem: Bai i gat lista bilong nem bilong olgeta Kristen God i bin makim ol long spirit holi bilong i stap “lain bilong em yet,” em ol i no bin pundaun na ol i kirap bek na kisim laip long Kingdom bilong heven. Na bai olgeta manmeri i stap long Paradais long graun inap save long nem bilong ol. (2 Pita 1:10; Buk Song 87:5, 6) Olsem na olgeta manmeri bai save bilong wanem ol dispela 144,000 disaipel bilong Krais Jisas, em God i bin makim ol, ol i no i stap long Paradais long graun, na bai ol i amamas tru na amamas wantaim ol long dispela samting.
24. (a) Bai Jehova inapim tru wanem laik bilong em long dispela graun i olsem ‘ples bilong em i putim lek antap long en’? (b) Olsem wanem yumi save nupela taim i no ken pinis? Ol tok profet bilong wanem singsing bai kamap tru?
24 Olgeta manmeri i stap gut olgeta long Jehova, em Nambawan Gutpela King bilong olgeta hap, bai ol i stap amamas inap oltaim oltaim. Bai ol manmeri i pulap long graun, tasol ol i no ken pas pas, na bai dispela gutpela ples Paradais i kamap olsem gutpela ‘ples bilong God i ken putim lek antap long en.’ Tru tumas, bai Jehova i mekim dispela ‘ples bilong putim lek bilong em’ i kamap nambawan tru na bai i stap olsem inap long olgeta taim bihain, na bai olgeta manmeri i stap daun long Jehova na ol i no bikhet liklik! (Matyu 5:34, 35; Aposel 7:49) Dispela nupela taim bilong bihain i no ken pinis, long wanem “strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.” (Aisaia 9:7) Long dispela taim bai ol samting i kamap tru olsem ol ensel i tok profet long en long singsing ol i mekim taim mama i karim Jisas long Betlehem bilong Judia long yia 2 B.C.E., em ol i tok: “Litimapim nem bilong God i stap antap tru. Na long graun ol manmeri [God i belgut long ol] i ken stap bel isi.”—Luk 2:13, 14.
25. (a) Nau bikpela lain “arapela sipsip” i pilim tru wanem samting? (b) Yumi mas laik tru long mekim wanem?
25 Ol manmeri bilong bikpela lain “arapela sipsip” bilong Gutpela Wasman ol i pilim tru ol tok bilong dispela promis olsem Paradais bai kamap bek long graun. Dispela tok promis i kirapim tru bel bilong ol. Ol i gat gutpela wok ol i ken mekim—ol i ken bung wantaim lain bilong God long nau na ol i ken wok strong long autim gutpela tok bilong Kingdom long olgeta hap bilong graun, olsem Krais i tok ol bai mekim. (Matyu 24:14; Mak 13:10) Yumi ol Witnes Bilong Jehova, yumi laik tru bai yumi inap i stap gut long God oltaim oltaim, na bai dispela i litimapim nem bilong King bilong olgeta hap, em God Jehova, na yumi laik stap aninit long wok king bilong dispela wanpela Pikinini bilong em, em Krais Jisas. Litimapim nem bilong Jehova!—Kamapim Tok Hait 19:1, 3, 4, 6; Sindaun 10:9.
Bai Yu Bekim Wanem Tok?
◻ Jehova i bin mekim wanem tok promis long dispela graun i olsem ‘ples bilong em i putim lek antap long en’?
◻ Husat ol bai helpim wok bilong kamapim bek Paradais long graun?
◻ King Krais Jisas bai makim sampela man bilong wanem ol lain bilong “bosim ol manmeri” long graun?
◻ Taim ol manmeri i kirap bek, wanem gutpela samting inap painim yu na em bai mekim bel bilong yu i amamas?
◻ Ol man i stap gut olgeta long Jehova, wanem samting bai painim ol long bihain?