Amamas Long Ol Gutpela Samting Bilong Kingdom!
LONG Mas 10, 2001, wanpela bung bilong amamas i mekim na 5,784 manmeri i kam bung long 3-pela haus long Nu Yok em bikpela famili Betel i save mekim wok long en. Em i bung bilong winim skul bilong klas namba 110 bilong Skul Gileat.
Carey Barber, em wanpela bilong Gavening Bodi Bilong Ol Witnes Bilong Jehova, em i tok welkam long ol lain i kam bung na em i kirapim program na i tok: “Yumi amamas long save olsem inap 110 klas bilong Skul Gileat i bin skulim ol sumatin long kamap misineri na salim ol i go long olgeta hap bilong graun.”
Rot Bilong i Stap Amamas
Bihain long tok Brata Barber i mekim bilong kirapim bung, Don Adams i mekim wanpela tok long bikpela lain i bung na long 48 sumatin i winim skul. Nem bilong tok bilong em, “Blesing Bilong Jehova i Mekim na Yumi Gat Planti Gutpela Samting.” Sindaun 10:22 i as bilong tok bilong em, na em i tok Jehova i save helpim na blesim ol wokboi bilong em taim ol i putim ol samting bilong Kingdom i stap namba wan long laip bilong ol. Em i kirapim ol sumatin long amamas long kisim nupela wok bilong ol, wankain olsem aposel Pol i bin mekim taim ol i bin singautim em long ‘brukim solwara na kam long Masedonia na helpim ol man.’ (Aposel 16:9) Maski i gat sampela hevi bilong winim, Pol i amamas long autim tok long wanem wanem hap ol i salim em long en, olsem na em i kisim planti gutpela blesing.
Ol sumatin bilong dispela klas i pinisim stadi bilong ol long Baibel ol i bin mekim inap 5-pela mun na skul ol i bin kisim long ol samting bilong wok misineri. Tasol Daniel Sydlik, em wanpela bilong Gavening Bodi Bilong Ol Witnes Bilong Jehova, em i tokim ol sumatin long wok yet long kisim save. Em i toktok long “Stap Olsem Ol Disaipel Tru,” na em i tok: “Bilong stap olsem disaipel, oltaim yumi mas bihainim tok bilong Jisas. Oltaim yumi mas amamas long harim tok bilong em, na ol tok em i skulim yumi long en.” Em i tok ol disaipel bilong Krais i save harim tok bilong Bikpela taim ol i makim ol samting ol i laik mekim. Gutpela tingting na save bilong God i pulap long Krais. (Kolosi 2:3) I no gat wanpela bilong yumi inap tok olsem yumi save pinis long olgeta samting bilong Jisas taim yumi harim tok bilong em wanpela taim tasol, nogat. Olsem na Brata Sydlik i kirapim ol sumatin long wok yet long kisim save, bihainim tok, na lainim ol narapela long tok i tru, em dispela ol samting bai mekim na ol i stap fri.—Jon 8:31, 32.
Bilong man i ken amamas long mekim wok bilong God, em i mas orait long ol narapela i stretim em. Wanpela tisa bilong Skul Gileat, em Lawrence Bowen, i kamapim wanpela askim: “Bel Bilong Yu Bai Stretim Yu?” Em i tok, long Baibel bel i makim ol tingting tru i stap long bel bilong man. Ol dispela tingting inap stretim man sapos gutpela tok bilong Baibel i bin go insait tru long bel na stiaim pasin bilong man. (Song 16:7; Jeremaia 17:10) Sapos man i stap gut long Jehova, Jehova bai pilim tru dispela gutpela pasin. Taim brata i ritim pinis Sindaun 23:15, 16, em i askim olsem: “Bel bilong yu bai stretim yu?” Em i tok moa: “Mipela i beten long dispela samting i ken kamap, na dispela bai mekim na Jehova i amamas tru. Em bai pilim tru dispela samting. Em nau, bai yupela i mekim bel bilong Jehova i amamas tru taim yupela i stap gut long wok bilong yupela.”
Mark Noumair i bin mekim wok misineri long Kenya paslain long em i kamap wanpela tisa bilong Skul Gileat, na em i mekim laspela tok bilong dispela hap bilong program. Nem bilong tok bilong em, “Mobeta Yumi Amamas Long Ol Samting Yumi Kisim Pinis,” na tok i kamapim klia olsem em i bikpela samting long yumi lain long amamas long i stap bilong yumi. Olsem Saveman 6:9 i kamapim, Brata Noumair i tok: “No ken tingting long ol samting yu no inap kisim. Dispela i makim olsem ‘yumi amamas long ol samting yumi kisim pinis.’ No ken tingting long ol samting yu laik mekim tasol yu no inap mekim, mobeta yu wok strong long amamas long i stap bilong yu long nau. Sapos yu tingting tasol long ol samting yu laik mekim, o putim ol mak i antap tumas, o tingting tasol long ol samting nogut bilong wok bilong yu, orait dispela bai mekim na yu no stap amamas na bel isi.” Em nau, maski yumi stap we o i stap bilong yumi i wanem wanem kain, pasin bilong lain long belgut long i stap bilong yumi bai mekim na yumi amamas long lotuim Bikpela Man bilong wokim yumi.
Ol Gutpela Ekspiriens Bilong Wok Autim Tok na Gileat
Ol i harim ol dispela gutpela tok, na bihain ol sumatin i stori long sampela ekspiriens ol i bin kisim taim ol i autim tok long dispela 5-pela mun ol i bin stap long skul. Kuskus bilong Skul Gileat, em Wallace Liverance, em i lukautim hap bilong program em ol sumatin i stori long ol i bin mekim wanem bilong stap olsem ol wokman bilong God. (2 Korin 4:2) Ol i bin kirapim sampela man i gat gutpela bel long harim tok bilong ol. Ol ekspiriens bilong ol sumatin i soim olsem wanem ol i bin kirapim Baibel-stadi wantaim ol man i gat gutpela bel em ol i bin bungim ol long rot, long ol haus, na long ol narapela hap. Sampela bilong ol dispela man i laik harim tok, ol i tok olsem ol buk na nius bilong Baibel em oganaisesen bilong Jehova i save wokim, ol i kamapim tok i tru. Wanpela ves bilong Baibel i bin kirapim tru bel bilong wanpela meri. Nau em i stadi long Baibel wantaim ol Witnes Bilong Jehova.
Bihain long dispela tok, Joel Adams i toktok wantaim sampela i bin winim Skul Gileat long bipo. Nem bilong tok bilong em, “Oltaim Wok Long Kisim Save, Lotu Long Jehova Inap Oltaim.” Ol dispela brata ol i toktok wantaim ol, ol i givim sampela gutpela tok long ol nupela misineri. Harry Johnson i tingim taim em i bin stap long klas namba 26 bilong Skul Gileat, na em i tok: “Ol i lainim mipela olsem oltaim Jehova i save stiaim lain bilong em na em bai wok yet long stiaim yumi. Dispela save i bin strongim mi i kam inap long nau.” William Nonkes i bin go long klas namba 53 bilong Skul Gileat, na em i tokim ol sumatin olsem: “Nambawan bikpela samting em olsem: Tingim ol lo bilong Baibel, larim ol dispela lo i stiaim tingting bilong yupela taim yupela i mekim ol samting long nau na long olgeta taim bihain. Dispela bai mekim na yupela inap stap gut long wok bilong yupela, na Jehova bai givim planti blesing long yupela.”
Nem bilong tok bilong Richard Rian em, “Strong Long Mekim Laik Bilong Jehova.” Em i toktok wantaim John Kurtz, em i bin go long klas namba 30, na em i bin mekim wok misineri long Spen winim 41 yia. Taim Brata Rian i askim em long ol samting ol i lain long en long Skul Gileat, Brata Kurtz i tok: “Nambawan buk ol i stadi long en em Baibel. Na yumi gat ol narapela buk samting bilong helpim yumi long kisim gut save long Baibel. Yumi olgeta inap kisim ol dispela buk. Long Skul Gileat ol i no lainim man long sampela tok hait. Oltaim mi laik kamapim klia dispela samting, long wanem, olgeta Witnes inap kisim dispela save ol i lainim ol man long en long Skul Gileat.”
Brata Gerrit Lösch em wanpela bilong lain Gavening Bodi, em i mekim laspela tok bilong dispela gutpela program, nem bilong tok bilong em, “Antap na Aninit Long Wing Bilong Jehova.” Em i tok, long Baibel wing bilong tarangau i makim wok bilong God long lukautim na helpim ol wokboi i stap gut long em. (Lo 32:11, 12; Song 91:4) Sampela taim bikpela tarangau i save taitim wing bilong en inap planti aua bilong lukautim ol pikinini bilong en. Sampela taim mama tarangau i save karamapim pikinini long wing bilong en bambai kolwin i no ken bagarapim pikinini. Long wankain pasin na olsem i stret wantaim laik bilong Jehova, em inap helpim ol wokboi i stap gut long em, na em bai helpim ol moa yet taim ol samting bilong traim bilip bilong ol i painim ol. Jehova i no save larim ol traim i winim strong bilong ol wokboi bilong em, nogat; em i save wokim rot bilong helpim ol long sanap strong na karim hevi. (1 Korin 10:13) Brata Lösch i pinisim tok bilong em olsem: “Bilong stap gut long ol samting bilong spirit, yumi mas stap aninit long wing bilong Jehova. Bilong mekim olsem, yumi no ken kisim pasin bilong bosim wokabaut bilong yumi yet. Oltaim yumi mas stap klostu long Jehova na oganaisesen bilong em i olsem wanpela mama, na oltaim yumi mas larim ol i stiaim na stretim yumi.”
Siaman i ritim ol telegram na gude ol brata i bin salim i kam long olgeta hap. Nau, ol sumatin i kisim pepa i makim ol i winim skul. Taim ol i bin kamapim Skul Gileat, ol i bin tingting long mekim sampela klas tasol insait long 5-pela yia. Tasol God Jehova i bin helpim dispela skul long wok inap 58 yia. Olsem Brata Barber i bin tok long kirap bilong program: “Kirap long 1943 taim Skul Gileat i bin kamap, ol brata sista i winim Skul Gileat ol i bin mekim planti gutpela wok! Wok bilong ol i bin helpim planti handet tausen manmeri i gat pasin daun long kam insait long gutpela oganaisesen bilong Jehova.” Tru tumas, dispela skul bilong ol misineri i bin helpim planti milion long amamas long ol gutpela samting bilong Kingdom.
[Blok long pes 24]
OL SAMTING BILONG OL SUMATIN
Hamas kantri ol i kam long en: 8
Hamas kantri ol bai go long en: 18
Hamas sumatin: 48
Krismas bilong ol, averes: 34
Hamas yia long tok i tru, averes: 18
Hamas yia long wok painia, averes: 13
[Piksa long pes 25]
Klas Namba 110 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.