Jehova Em i Ples Hait Bilong Yumi
“Yu save go long God na hait long ol samting nogut, . . . olsem na samting nogut i no inap kamap long yu.”—SONG 91:9, 10.
1. Olsem wanem yumi ken tok, God em i ples hait bilong yumi?
JEHOVA em i ples hait tru bilong lain bilong em. Sapos yumi givim bel olgeta long em, maski ‘kain kain hevi i painim yumi, tasol ol i no pinisim tru strong bilong yumi; planti samting i paulim tingting bilong yumi, tasol tingting i no bagarap olgeta. Ol i mekim nogut long yumi, tasol God i no lusim yumi. Ol i paitim yumi na mekim yumi i pundaun, tasol ol i no bagarapim yumi olgeta.’ Bilong wanem? Long wanem, Jehova i givim strong long yumi. (2 Korin 4:7-9) Yes, Papa long heven i helpim yumi long bihainim pasin bilong givim bel long God, na yumi ken tingim gut tok bilong song, i tok: “Yu save go long God na hait long ol samting nogut, . . . olsem na samting nogut i no inap kamap long yu.”—Song 91:9, 10.
2. Yumi ken tok wanem long Song 91 na ol tok promis bilong en?
2 Dispela tok bilong Song 91, ating Moses yet i bin raitim. Het-tok bilong Song 90 i kolim nem bilong Moses olsem man bilong raitim, na Song 91 i kamap bihain stret long en, tasol i no gat het-tok long en i tok narapela man i bin raitim. Ating pastaim wanpela man tasol i bin singim Song 91 (91:1, 2), na nau wanpela lain i singsing (91:3-8). Bihain long en, wanpela man tasol i singsing (91:9a) na bihain wanpela lain i mekim (91:9b-13). Orait nau ating wanpela man tasol i singim laspela tok (91:14-16). Tasol maski ol i singim olsem wanem, Song 91 i tok promis olsem lain Kristen God i bin makim ol bai stap bel isi long ol samting bilong spirit, na lain poroman bilong ol i dediket pinis ol tu bai stap olsem.a Orait yumi ken skelim dispela song long wankain tingting olsem bilong ol dispela wokman bilong Jehova.
Ol i Stap Gut Long Ples Hait Bilong God
3. (a) Wanem dispela “ples hait bilong God Antap Tru”? (b) Taim yumi “stap klostu long God I Gat Olgeta Strong,” em i mekim wanem long yumi?
3 Man bilong raitim song i tok: “Man i go long [o, “i stap insait long ples hait bilong,” “NW”] God Antap Tru, bilong God i ken lukautim em, em i stap klostu long God I Gat Olgeta Strong, na God i karamapim em. Bai dispela man i tok long Bikpela olsem, ‘Yu save banisim mi na yu was gut long mi. Yu God bilong mi. Mi save bilip long yu.’ ” (Song 91:1, 2) Dispela “ples hait bilong God Antap Tru,” long tok piksa em ples bilong lukautim yumi na yumi stap gut, na moa yet long ol Kristen God i bin makim, em Satan i strong tru long bagarapim ol. (KTH 12:15-17) Em bai bagarapim yumi olgeta sapos yumi no stap wantaim God long dispela ples hait bilong spirit na em i lukautim yumi. Taim yumi “stap klostu long God I Gat Olgeta Strong,” i olsem God i karamapim yumi na yumi hait long bikpela san. (Song 15:1, 2; 121:5) I no gat narapela gutpela ples hait o haus i gat strongpela banis bilong lukautim yumi olsem Bikpela King Jehova.—Sindaun 18:10.
4. Satan, em “man bilong kisim ol pisin,” em i save mekim wok long wanem ol samting i olsem umben? Olsem wanem yumi save lusim umben na em i no kalabusim yumi?
4 Song i tok moa: “[“Jehova yet bai i kisim bek yu long umben bilong man bilong kisim ol pisin,” “NW”]. Na bai em i banisim yu na ol sik nogut i no inap kisim yu.” (Song 91:3) Long Israel bilong bipo ol man i save putim ol umben samting bilong kisim ol pisin. “Man bilong kisim ol pisin,” em Satan yet, na sampela samting em i mekim wok long en olsem “umben,” em oganaisesen nogut bilong em na ‘olgeta kain trik na giaman em i save hait na mekim.’ (Efesus 6:11) Em i save haitim ol umben samting long rot bilong yumi bilong pulim yumi i go insait long ol pasin nogut na yumi bagarap long ol samting bilong spirit. (Song 142:3) Tasol yumi givim baksait pinis long ol pasin i no stret, olsem na “yumi lusim ol, olsem pisin i lusim umben wanpela man i bin putim, na i flai i go.” (Song 124:7, 8) Yumi tenkyu tru long Jehova i save kisim bek yumi long han bilong dispela ‘man nogut bilong kisim ol pisin’!—Matyu 6:13.
5, 6. Wanem kain “sik” i bin givim hevi long yumi? Tasol bilong wanem lain bilong Jehova i no larim dispela i daunim ol?
5 Dispela song i tok long “ol sik nogut.” Olsem sik nogut i save kalap long ol man, i gat wanpela samting i save givim bikpela hevi long olgeta lain man na ol man i stap aninit long wok king bilong Jehova. Saveman Arnold Toynbee, i tok: ‘Bihain long Namba Tu Pait, pasin bilong litimapim kantri i mekim na planti kantri i kisim independens na bosim ol yet. Long nau ol man i gat strongpela tingting olsem ol i laik bruk long ol narapela lain.’
6 Inap planti handet yia, sampela gavman i bin wok strong long kamapim moa yet pasin bilong kros pait namel long ol kantri. Na ol i strong long ol man i mas adorim ol yet o sampela imis o mak bilong kantri. Tasol i no gat wanpela taim Jehova i bin larim ol dispela kain samting olsem “sik” i daunim ol gutpela lain bilong em. (Daniel 3:1, 2, 20-27; 6:7-10, 16-22) Yumi olsem bikpela lain brata i stap long olgeta hap na yumi lotuim Jehova tasol, na yumi bihainim lo bilong Baibel i tok yumi no ken insait long ol pait samting bilong graun, na yumi mekim wankain pasin long olgeta man, maski ol i bilong wanem lain, na yumi tokaut olsem, “long olgeta lain [God] i save laikim ol manmeri i aninit long em na i mekim stretpela pasin.” (Aposel 10:34, 35; Kisim Bek 20:4-6; Jon 13:34, 35; 17:16; 1 Pita 5:8, 9) Tru, hevi i save painim yumi ol Kristen taim ol man i mekim nogut long yumi, tasol yumi stap amamas na bel isi “insait long ples hait bilong God Antap Tru.”
7. Olsem wanem Jehova i save lukautim yumi “long wing bilong en”?
7 Jehova em i ples hait bilong yumi, olsem na yumi kisim strong long dispela tok: “Bai em i karamapim yu gut, olsem kakaruk i karamapim ol pikinini long wing bilong en. Yu ken hait gutpela tumas aninit long wing bilong Bikpela, na bai em i was long yu. Em i no save giaman long lukautim yu. Olsem na yu ken i stap wantaim Bikpela, olsem man i hait baksait long hap plang bilong pait.” (Song 91:4) God i save lukautim yumi, olsem pisin i save flai antap long ol pikinini bilong en bilong was long ol. (Aisaia 31:5) ‘Em i karamapim yumi gut long wing bilong en.’ Long wing bilong en, pisin i save karamapim ol pikinini, na bai birua i no ken kisim ol. Olsem ol pikinini pisin, yumi save stap gut aninit long “wing” bilong Jehova, long wanem, yumi bin kam na painim ples hait insait long oganaisesen Kristen tru bilong em.—Rut 2:12; Song 5:1, 11.
8. Olsem wanem pasin bilong Jehova long lukautim tru yumi i olsem bikpela plang na strongpela banis bilong hait baksait long en?
8 Yumi save bilip tru long man ‘i no save giaman tasol long lukautim yumi.’ Em i olsem hap plang bilong pait, i bikpela inap long man i ken haitim gut skin bilong em. (Song 5:12) Yumi bilip tru olsem Jehova inap lukautim gut yumi, olsem na yumi no pret. (Stat 15:1; Song 84:11) Wankain olsem bilip bilong yumi, pasin bilong Jehova long lukautim tru yumi i olsem bikpela plang i save haitim yumi na sakim ol spia bilong Satan na sakim han bilong ol birua i laik pait long yumi. (Efesus 6:16) Na tu, em i olsem strongpela banis yumi hait baksait long en na yumi sanap strong.
‘Yumi No Inap Pret’
9. Bilong wanem ol man i save pret long nait? Tasol bilong wanem yumi no pret?
9 Man bilong raitim song i tingim pasin bilong God long lukautim yumi na em i tok: “Long nait yu no inap pret long wanpela samting nogut. Na long san yu no ken pret long wanpela samting i kamap kwik tumas bilong bagarapim yu. Na bai yu no inap pret long bikpela sik i kamap long nait, na long samting nogut i kamap long biksan tu na i laik bagarapim yu.” (Song 91:5, 6) Planti pasin nogut i save kamap long taim bilong tudak, olsem na long nait ol man i save pret. Long nau, tudak bilong spirit i karamapim graun, olsem na planti taim ol birua i save hait na traim long bagarapim yumi long ol samting bilong spirit na pasim wok bilong yumi long autim tok. Tasol ‘long nait yumi no pret long wanpela samting nogut,’ long wanem, Jehova i save was long yumi.—Song 64:1, 2; 121:4; Aisaia 60:2.
10. (a) ‘Samting i save kamap kwik tumas bilong bagarapim yumi,’ olsem spia samting, ating em i makim wanem samting? Yumi save mekim wanem long en? (b) ‘Bikpela sik i kamap long nait’ em i wanem samting? Bilong wanem yumi no pret long en?
10 ‘Samting i save kamap kwik tumas bilong bagarapim yumi,’ olsem spia samting, ating em i makim pasin bilong ol birua long toknogutim yumi. (Song 64:3-5; 94:20) Taim yumi strong long givim tok i tru long ol manmeri, dispela pasin bilong biruaim wok bilong yumi i lus nating. Na tu, yumi no pret long “bikpela sik i kamap long nait.” Dispela sik em tok piksa na i kamap namel long tudak bilong dispela graun i stap aninit long strong bilong Satan, na olkain pasin pamuk na lotu nogut i pulap long en olsem sik nogut. (1 Jon 5:19) Dispela “sik” i save bagarapim tingting na bel bilong ol man na ol i stap tudak na i no gat save long Jehova na ol samting em i laik mekim, na ol gutpela samting em i mekim bilong helpim yumi. (1 Timoti 6:4) Yumi stap namel long dispela tudak, tasol yumi no pret, long wanem, yumi gat lait bilong spirit i lait strong tru.—Song 43:3.
11. Wanem samting i painim ol man em “samting nogut i kamap” long ol “long biksan”?
11 ‘Samting nogut i kamap long biksan na i laik bagarapim yumi,’ em tu i no pretim yumi. Ating dispela tok “biksan” i makim save ol man i kisim na ol i ting em i olsem lait. Ol man i bihainim pasin bilong dispela graun long givim bel long mani kago, ol bai bagarap long ol samting bilong spirit. (1 Timoti 6:20, 21) Taim yumi autim strong tok bilong Kingdom, yumi no pret long ol birua, long wanem, Jehova i Man bilong lukautim yumi.—Song 64:1; Sindaun 3:25, 26.
12. Planti tausen ol i “dai” klostu long husat? Ol i dai olsem wanem?
12 Song i tok moa: “Sapos 1,000 man i dai klostu long yu, na 10,000 i dai long han sut bilong yu, maski, samting nogut i no ken i kam klostu long yu. Bai yu yet i lukim God i bekim pasin nogut ol man nogut i bin mekim.” (Song 91:7, 8) Planti man i no laik go long Jehova olsem ples hait bilong ol, olsem na ol i “dai” long ol samting bilong spirit na pundaun klostu long yumi. I olsem “10,000” i bin dai long “han sut” bilong ol Israel bilong spirit ol i stap long nau. (Galesia 6:16) Tasol maski yumi bilong lain Kristen God i bin makim, o yumi poroman bilong ol i dediket pinis, yumi stap bel isi insait long “ples hait” bilong God. Yumi sanap lukluk tasol, olsem yumi “lukim God i bekim pasin nogut ol man nogut i bin mekim,” em ol i kisim bikpela hevi long ol wok bisnis na lotu na ol narapela rot.—Galesia 6:7.
‘Samting Nogut i No Inap Kamap Long Yumi’
13. Wanem ol samting nogut i no save painim yumi? Bilong wanem ol i no painim yumi?
13 Ol samting ol lain bilong dispela graun i mekim bilong helpim ol long i stap gut, ol i wok long bagarap, tasol yumi putim God i stap namba wan na bel bilong yumi i kisim strong long tok bilong song, em i tok: “Yu save go long God na hait long ol samting nogut, na God Antap Tru em i wasman tru [o “haus,” “NW”] bilong yu. Olsem na samting nogut i no inap kamap long yu. Na bikpela sik i no inap i go klostu long haus bilong yu.” (Song 91:9, 10) Tru tumas, Jehova em i ples hait bilong yumi. Na tu, yumi tingim God Antap Tru i olsem “haus” bilong yumi bilong i stap gut long en na abrusim bagarap. Yumi litimapim nem bilong Jehova olsem King bilong heven na graun, na yumi stap long em olsem “haus” bilong yumi na em i lukautim yumi, na yumi autim gutnius bilong Kingdom. (Matyu 24:14) Olsem na ‘samting nogut i no inap kamap long yumi’—em ol samting yumi stori pinis long en long namba wan hap bilong dispela song. Na maski yumi kisim hevi wantaim ol narapela man long ol bikpela guria, strongpela win na ren, tait wara, bikpela hangre, pait, dispela i no bagarapim bilip bilong yumi o pasin bilong yumi long i stap bel isi long ol samting bilong spirit.
14. Bilong wanem ol sik nogut i no kisim yumi ol wokman bilong Jehova?
14 Ol Kristen God i bin makim, ol i olsem man bilong narapela ples i sindaun long ol haus sel long dispela graun. (1 Pita 2:11) Na “bikpela sik i no inap i go klostu long haus” sel bilong ol. Maski yumi wet long kisim laip long heven o long graun, yumi no bilong dispela graun, na ol sik nogut bilong spirit olsem pamuk, givim bel long mani kago, lotu giaman, lotuim “wel animal” wantaim “piksa” bilong en, Yunaitet Nesen, i no ken bagarapim yumi.—KTH 9:20, 21; 13:1-18; Jon 17:16.
15. Ol ensel i save helpim yumi olsem wanem?
15 Jehova i lukautim gut yumi, olsem song i tok: “Bikpela bai i givim wok long ol ensel bilong was long yu long olgeta wokabaut bilong yu. Na bai ol i karim yu long han bilong ol, nogut wanpela ston i sutim lek bilong yu.” (Song 91:11, 12) God i bin givim strong long ol ensel bilong lukautim yumi. (2 King 6:17; Song 34:7-9; 104:4; Matyu 26:53; Luk 1:19) Ol i save ‘was long yumi long olgeta wokabaut bilong yumi.’ (Matyu 18:10) Ol ensel i save stiaim yumi ol lain bilong autim tok bilong Kingdom na ol i was long yumi, na yumi no pundaun long ol samting bilong spirit. (KTH 14:6, 7) Ol “ston” tu, olsem ol tambu ol i putim long wok bilong yumi, ol i no mekim yumi i pundaun na bai God i no orait moa long yumi, nogat.
16. Olsem wanem pait bilong “laion” i narapela kain long pait bilong “snek”? Taim ol i mekim olsem, yumi save mekim wanem?
16 Song i tok moa olsem: “Bai yu krungutim laion na snek na yangpela laion na bikpela snek nogut tu.” (Song 91:13) Olsem ol yangpela laion i save stap ples klia na ran i kam bilong holim abus, sampela birua i save kamapim pasin birua bilong ol long ples klia, olsem ol i wokim lo bilong pasim wok bilong yumi long autim tok. Tasol sampela taim ol i save mekim pasin olsem snek i stap hait na kwik tumas em i kam ausait bilong kaikaim yumi. Na sampela taim ol pris pasto i save hait na pait long yumi long rot bilong ol man bilong wokim lo, na ol jas bilong haus kot, na ol narapela lain. Tasol Jehova i helpim yumi, olsem na yumi save stap isi na traim long pinisim dispela hevi long rot bilong ol kot, na long dispela pasin yumi “helpim na strongim gutnius.”—Filipai 1:7; Song 94:14, 20-22.
17. Olsem wanem yumi save krungutim “yangpela laion”?
17 Dispela song i toktok long krungutim “yangpela laion na bikpela snek nogut tu.” Sampela yangpela laion ol i man bilong kros, na bikpela snek em inap makim wanpela snek i traipela nogut tru. (Aisaia 31:4) Tasol maski yangpela laion i kros nogut taim em i stap ples klia na i kam bilong holim yumi, long tok piksa i olsem yumi krungutim em taim yumi bihainim tok bilong God na yumi no bihainim tok bilong ol man na oganaisesen ol i olsem laion. (Aposel 5:29) Olsem na dispela “laion” i no bagarapim yumi long ol samting bilong spirit.
18. Dispela “bikpela snek” i kirapim yumi long tingim husat? Taim em i kam pait long yumi, yumi mas mekim wanem?
18 Long Baibel Grik Septuagint, ol i kolim dispela “bikpela snek” olsem “traipela snek.” Dispela i kirapim yumi long tingim “traipela snek . . . em dispela snek bilong bipo yet, na ol i kolim em Satan.” (KTH 12:7-9; Stat 3:15) Em i olsem traipela snek nogut tru em inap holim abus na taitim strong na brukbrukim ol bun bilong en na daunim olgeta. (Jeremaia 51:34) Taim Satan i laik holim strong yumi na brukbrukim ol bun bilong yumi long rot bilong ol hevi bilong dispela graun, na em i laik daunim yumi olsem abus, yumi mas strong long sakim dispela “bikpela snek” na bai yumi lusim kalabus bilong en na krungutim em. (1 Pita 5:8) Lain remnan God i bin makim, ol i mas mekim olsem bambai ol i ken insait long truim bilong Rom 16:20.
Jehova—Man Bilong Kisim Bek Yumi
19. Bilong wanem yumi save go long Jehova olsem ples hait bilong yumi?
19 Dispela song i tok long ol man i lotu tru long God olsem: “God i tok olsem, ‘Bai mi kisim bek ol man i laikim mi tru, na bai mi lukautim gut ol man i save tru long [“nem bilong,” “NW”] mi.’ ” (Song 91:14) Dispela tok “bai mi lukautim gut ol,” yumi ken tanim olsem “bai mi putim ol i go antap,” olsem longwe long ol birua. Yumi ol man bilong lotuim Jehova, yumi go long em olsem ples hait bilong yumi, long wanem, ‘yumi laikim em tru.’ (Mak 12:29, 30; 1 Jon 4:19) Olsem na God i wokim rot bilong ‘kisim bek yumi’ long han bilong ol birua. Ol i no inap bagarapim yumi olgeta. God bai kisim bek yumi, long wanem, yumi save long nem bilong em na yumi bilip na singaut long dispela nem. (Rom 10:11-13, NW ) Na yumi strong tru long ‘wokabaut long nem bilong Jehova inap oltaim oltaim.’—Maika 4:5, NW; Aisaia 43:10-12.
20. Long pinis bilong Song 91, Jehova i givim wanem tok promis long ol gutpela wokman bilong em?
20 Long pinis bilong Song 91, Jehova i tok long ol gutpela wokman bilong em: “Taim ol i prea long mi bai mi harim prea bilong ol. Na sapos hevi i kamap long ol bai mi stap wantaim ol. Na bai mi kisim bek ol na givim biknem long ol. Bai mi skruim laip bilong ol i go longpela olsem prais bilong ol. Na bai mi kisim bek ol.” (Song 91:15, 16) Taim yumi beten long God long pasin i stret wantaim laik bilong em, em i save harim. (1 Jon 5:13-15) Yumi winim pinis planti hevi em Satan i bin kirapim ol man long givim long yumi. Tasol dispela tok “sapos hevi i kamap long ol bai mi stap wantaim ol,” i helpim yumi long save, sampela hevi moa bai kamap bihain na yumi ken bilip tru olsem God bai lukautim yumi taim em i pinisim ol pasin nogut bilong graun.
21. Olsem wanem dispela lain God i bin makim ol i kisim biknem pinis?
21 Maski Satan i birua nogut tru long yumi, olgeta bilong dispela lain God i bin makim na ol i stap namel long yumi, ol bai go antap na kisim biknem long heven long taim Jehova yet i makim—taim ol i stap “longpela” taim pinis long graun. Tasol planti taim God i bin kisim bek ol long han bilong ol birua, olsem na long ol samting bilong spirit ol i kisim biknem pinis long dispela. Na ol i holim gutpela wok tru long i go pas olsem ol Witnes bilong Jehova long graun nau long taim bilong las de! (Aisaia 43:10-12) Nambawan bikpela wok bilong Jehova long kisim bek lain bilong em bai kamap long bikpela pait bilong em, Armagedon, taim em i kamapim long ples klia olsem i stret em i stap Nambawan Bos na em i mekim holi nem bilong em.—Song 83:18, NW; Esekiel 38:23; KTH 16:14, 16.
22. Jehova bai “kisim bek” husat?
22 Maski yumi bilong dispela lain God i bin makim o yumi poroman bilong ol i dediket pinis, yumi wetim God i kisim bek yumi. Long taim bilong “dispela bikpela De” bilong Jehova, olgeta man i stap gut long God na mekim wok bilong em, bai em i kisim bek ol. (Joel 2:30-32) Yumi ol manmeri bilong bikpela lain em ol bai abrusim bagarap na go insait long nupela taim God bai kamapim na ol i stap gut long em long laspela traim bai kamap bihain, em bai “skruim laip bilong ol i go longpela”—em laip i stap oltaim oltaim. Na em bai kirapim bek planti milion manmeri ol i dai pinis. (KTH 7:9; 20:7-15) Yes, Jehova bai amamas tru long ‘kisim bek yumi’ long rot bilong Jisas Krais. (Song 3:8) Em nau, yumi inap wetim ol dispela gutpela samting i kamap, olsem na yumi mas wok yet long larim God i helpim yumi long kaunim ol de bilong yumi long pasin i givim biknem long em. Long tok na pasin bilong yumi, yumi mas wok yet long kamapim klia olsem Jehova em i ples hait bilong yumi.
[Futnot]
a Ol man bilong raitim Ol Skripsa Grik i no toktok long Song 91 olsem wanpela tok profet bilong Mesaia. Tru, Jehova em i ples hait na strongpela haus bilong dispela man Jisas Krais, na Em i stap olsem tu long ol disaipel bilong Jisas na ol poroman bilong ol i dediket pinis nau long “taim bilong las de.”—Daniel 12:4.
Bai Yu Bekim Olsem Wanem?
• Wanem dispela “ples hait bilong God Antap Tru”?
• Bilong wanem yumi no pret?
• Olsem wanem na ‘samting nogut i no inap kamap long yumi’?
• Olsem wanem yumi ken tok, Jehova tasol em i Man bilong kisim bek yumi?
[Piksa long pes 17]
Yu save olsem wanem pasin bilong Jehova long lukautim tru yumi i olsem bikpela hap plang bilong yumi?
[Ol Piksa long pes 18]
Jehova i helpim ol wokman bilong em long autim tok, maski sampela man i hait na mekim pasin birua long ol na sampela i mekim long ples klia
[Kredit Lain]
Cobra: A. N. Jagannatha Rao, Trustee, Madras Snake Park Trust