Baibel i Tok Wanem?

Man i Kilim i Dai Em Yet—Em Inap Kirap Bek?

TAIM man i kilim i dai skin bilong em yet, ol wanblut na ol wantok i no inap lusim tingting long dispela samting, nogat; bai ol i sori long dispela man​—tasol ol i kros tu long em, na bai ol i bel hevi tu na ting ol yet i gat asua. Olsem na yumi tingting: Taim wantok bilong yumi i kilim i dai skin bilong em yet, em inap kirap bek na i stap laip gen, o nogat?a

Tru, no gat wanpela as i stret long man i kilim i dai skin bilong em yet na yumi ken orait long dispela samting, nogat; tasol aposel Pol i tokaut long wanpela gutpela samting bai painim sampela man nogut. Em i tok: “God bai i kirapim bek ol man i dai pinis, em ol stretpela man na ol man nogut wantaim.”​—Aposel 24:15.

Tasol longtaim pinis planti tisa bilong lotu i no bilip olsem man i bagarapim skin bilong em yet bai kirap bek wantaim ol narapela man nogut. Bilong wanem ol i no bilip olsem?

Ol Tisa Bilong Lotu i Daunim Tok Bilong Kirap Bek

Long tok i go pas bilong wanpela Baibel, em Wiliam Tindel i wokim long yia 1550 samting, em i tok: ‘Sapos tru tewel bilong man i dai pinis i go stap long heven o bikpaia o klinpaia, orait, ol tok Krais na Pol i mekim bilong strongim tok bilong kirap bek i no gat as bilong en.’ Tru tumas, inap planti handet yia bipo, ol pris pasto i pulim wanpela bilip giaman i kam insait long lotu olsem: I gat wanpela samting ol i kolim tewel, na taim man i dai dispela tewel i lusim em na i go stret long heven o klinpaia o bikpaia. Tasol dispela bilip i daunim tok bilong Baibel long man inap kirap bek. Olsem na wanpela pasto bilong misin Baptis (Charles Andrews), i kamapim askim olsem: ‘Sapos tewel i stap amamas pinis long heven (o kisim pen pinis long bikpaia), orait i gat wanem samting moa bai painim man i dai pinis? Nogat wanpela samting, a?’

Long wanpela buk (Bible Review bilong Disemba 1989), Arthur Droge i kolim wanpela samting dispela bilip giaman i kamapim olsem: ‘Kirap long taim bilong Ogastin [354-430] , sios i bin tokaut strong olsem, pasin bilong kilim i dai skin bilong yumi yet i wanpela sin em indai bilong Jisas i no inap tekewe, em sin i wankain olsem sin bilong lusim bilip na givim baksait long God, na bagarapim marit.’

Tasol dispela strongpela kot ol i tok i mas painim ol dispela kain man, em i stret o nogat? Wanpela nius (National Catholic Reporter) i tok, ‘Tupela bikpela tisa bilong lotu i tokaut strong long man i kilim i dai em yet​—Ogastin i tok em “pasin i nogut tru na man i mekim i mas i go long bikpaia.” Na Akwinas i tok, man i mekim dispela sin, God i no inap lusim dispela sin bilong em​—em i mekim rong long God na ol man. Tasol i gat sampela tisa bilong lotu i no wanbel long tok bilong ol.’

Tasol tingting bilong yumi i no inap paul sapos yumi bilip long tupela tok bilong Baibel olsem: “Sapos wanpela man i mekim sin, dispela man . . . i mas i dai.” (Esekiel 18:4) Namba tu tok i olsem: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Tasol olsem wanem long man i kilim i dai skin bilong em yet?

Wanpela Man Nogut Bai Kirap Bek

Jisas i tokim wanpela man nogut em kot i makim em bilong i dai, olsem: “Bai yu stap wantaim mi long [paradais].” Dispela man i no gat wanpela bikpela hevi na em i kilim i dai skin bilong em yet, nogat. Em i wanpela stilman​—em i man bilong brukim lo. Em yet i tokaut olsem em i bin mekim rong. (Luk 23:​39-43) Em i no gat tingting long i go long heven na mekim wok king wantaim Jisas. Nogat. Olsem na dispela Paradais em stilman i gat tingting long kisim laip gen long en, em dispela graun i stap aninit long Kingdom bilong God Jehova.​—Matyu 6:​9, 10; Kamapim Tok Hait 21:​1-4.

I gat wanem as na God bai kirapim bek dispela stilman? Bilong Em i ken givim strafe long em? Nogat, long wanem Rom 6:​7, 23 i tok: “Man i dai pinis, em i no pas moa long sin. Sin i save givim pe long ol wokboi bilong en. Dispela pe em dai tasol.” Tru, em i no ken kot long ol sin em i bin mekim bipo, tasol i dai bilong Jisas i mas helpim em bambai em i ken kisim laip i gutpela olgeta.

Olsem na tok bilong wanpela tisa bilong lotu, em Albert Barnes, i no stret. Em i tok: ‘Ol man i bin mekim pasin nogut bai ol i kirap bek na go long bikpaia. Dispela tasol i as na ol i kirap bek.’ Tasol dispela tok i no stret wantaim pasin bilong God. Em i God bilong sori na pasin bilong em i stret! Olsem na dispela man em pastaim em i stilman (wantaim ol narapela man i bin mekim pasin nogut) bai kirap bek long paradais long graun na bai rot i op long ol i kot long ol samting ol i mekim bihain long taim ol i kirap bek.​—1 Jon 4:​8-10.

Gutpela Rot Bilong Helpim Ol

Ol wantok bilong man i bagarapim skin bilong em yet, ating ol i bel hevi long dispela. Tasol sapos ol i save Jehova “i save sori long ol manmeri i pret long em . . . na em i tingim yumi i olsem das tasol,” dispela bai mekim gut bel bilong ol. (Buk Song 103:​10-14) God tasol i save, wanem samting tru i kirapim man long kilim i dai em yet​—olsem sik bilong tingting o em i gat bikpela bel hevi o em i kisim sampela pasin na sampela sik bilong tingting long papamama taim em i blut yet. Wanpela nius (National Observer) i tok: ‘Wanpela hevi o tingting samting i kamap insait long sampela minit o sampela aua tasol, dispela inap mekim na man i kilim i dai skin bilong em yet. I no olsem kirap long taim em i bebi yet em i gat tingting long mekim olsem. Nogat.’​—Lukim Saveman 7:7.

Tru, man i kilim i dai skin bilong em yet, i no gat rot long em i hevi long rong bilong em na tanim bel. Tasol sapos man i traim long bagarapim skin bilong em yet, tasol em i no inap, ating bihain bai tingting bilong em inap senis na em i no ken tingting moa long mekim, a? Sampela man ol i man bilong kilim man i dai, ol i bin tanim bel na senisim pasin bilong ol, na God i lusim ol dispela rong taim ol i stap laip yet.​—2 King 21:16; 2 Stori 33:​12, 13.

Jehova i bin “baim bek planti manmeri,” olsem na i stret em i sori long ol na sori tu long sampela man i kilim i dai ol yet; na i stret em i ken kirapim bek ol na bai rot i op long ol i ‘tanim bel na bilip long God, na pasin bilong ol i mas soim olsem ol i tanim bel pinis.’​—Matyu 20:28; Aposel 26:20.

Baibel i Tok Wanem long Laip Bilong Yumi?

Laip em i wanpela gutpela presen i kam long God​—em i no samting bilong mekim nabaut long en o bagarapim. (Jems 1:17) Baibel i helpim yumi long save, yumi no gat tewel​—yumi olsem wanpela gutpela samting tru em God i bin wokim. Na God i amamas long yumi stap laip na em i wetim taim bilong ol man i dai pinis ol i kirap bek.​—Jop 14:​14, 15.

Sapos yumi sori long man, dispela i helpim yumi long save, sapos man i kilim i dai skin bilong em yet, tru em i no gat hevi moa, tasol dispela i givim planti hevi moa yet long ol wanblut bilong em. Man i no tingting gut pastaim na em i kilim i dai em yet, yumi man i no ken skelim em, em bai kirap bek o nogat, o em i gat bikpela asua o nogat. God tasol i ‘save long olgeta tingting na laik bilong ol.’ (1 Stori 28:9) Tasol yumi ken bilip olsem, ‘Jas bilong olgeta graun, em i mas bihainim pasin sori na stretpela pasin.’​—Stat 18:25.

[Ol Futnot]

[Piksa Kredit Lain long pes 10]

Kollektie Rijksmuseum Kröller-Müller, Otterlo