Yu Redi Long Wetim Jehova Long Mekim Samting?

1-2. Yumi bai stori long wanem samting long dispela atikol?

YU BAI pilim olsem wanem sapos yu wetim wanpela pasel we i gat samting yu nidim tru, tasol pasel i no kam kamap long taim yu ekspektim? Yu save bel hevi? Provep 13:12 i tok: “Samting man i ekspektim na i no kamap, dispela i save mekim man i bel hevi.” Tasol olsem wanem sapos yu painimaut olsem i gat gutpela risen na pasel yu wetim i no kam kamap hariap? Sapos olsem, bai yu no les kwik na yu bai amamas long wet.

² Long dispela atikol, yumi bai stori long sampela stiatok bilong Baibel we inap helpim yumi long kisim na holim pasin bilong “wet i stap.” (Mai. 7:7) Na tu, yumi bai stori long tupela rot we yumi no ken les kwik na wet long Jehova i mekim samting. Na yumi bai stori tu long ol gutpela blesing em Jehova i tok promis long givim long ol man i wetim em.

 3. Stiatok i stap long Provep 13:11 i skulim yumi long wanem samting?

³ Wanpela eksampel i soim olsem yumi mas kisim pasin bilong no ken les kwik em tok i stap long Provep 13:11. Em i tok: “Mani kago man i kisim hariap, isi isi em bai go liklik, tasol mani kago man i bungim liklik liklik, em bai kamap planti.” Yu lukim stiatok i stap long hia? Man i gat savetingting i save mekim samting isi isi na em i no les kwik.

 4. Stiatok i stap long Provep 4:18 i skulim yumi long wanem samting?

⁴ Provep 4:18 i tokim yumi olsem “rot bilong stretpela man i olsem lait long moningtaim i wok long kamap strong na i go bikpela moa long belo.” Dispela tok i makim wei Jehova i save kamapim ol samting em i tingting pinis long mekim long ol manmeri bilong em na em i save mekim olsem isi isi. Dispela ves inap makim tu haptaim em wanpela Kristen i mekim senis long laip bilong em bilong i go klostu long God. Man i no inap kamap strong hariap long bilip. Sampela haptaim i mas lus long em i kamap strong long bilip. Sapos yumi stadi gut na bihainim tok bilong Baibel na ol tok i kam long oganaisesen bilong God, isi isi yumi bai kisim ol pasin bilong Krais. Na tu, yumi bai save gut moa long God. Lukim hau Jisas i kamapim klia dispela poin.

 5. Jisas i mekim wanem tok piksa bilong soim olsem man i save mekim ol senis isi isi?

⁵ Jisas i mekim wanpela tok piksa bilong stori long hau tok bilong Kingdom em yumi autim i olsem wanpela liklik sid we isi isi em i save gro insait long bel bilong ol man i gat gutpela bel. Em i tok: “Ol sid i kru na gro i go antap, na em [man bilong planim sid] i no save hau dispela samting i kamap. Graun yet i save kamapim kaikai isi isi, pastaim dispela sid i kru, bihain het i kam antap, na bihain moa em i redi.” (Mak 4:27, 28) Jisas i laik kamapim klia wanem poin? Em i eksplenim hau sid i save gro isi isi, na olsem tasol, man husat i kisim save long gutnius bilong Kingdom isi isi em i save kamap strong long bilip. Olsem, taim ol gutpela Baibel sumatin bilong yumi i go klostu moa long Jehova, yumi save lukim planti gutpela senis ol i mekim. (Efe. 4:22-24) Tasol yumi mas tingim olsem Jehova yet i mekim dispela liklik sid i gro.​—1 Kor. 3:7.

6-7. Yumi lainim wanem samting long hau Jehova i bin wokim dispela graun?

⁶ Long olgeta samting Jehova i mekim, isi isi em i save lusim taim long pinisim gut wok bilong em na em i no save les kwik. Em i save mekim olsem bilong givim glori long nem bilong em, na tu, helpim ol narapela. Olsem, tingim dispela eksampel, isi isi Jehova i lusim taim bilong redim dispela graun bilong ol manmeri i ken i stap long en.

⁷ Taim Baibel i stori long hau Jehova i bin wokim graun, Baibel i tok em i bin “putim ol mak bilong graun,” na em i sindaunim gut “ol pos bilong strongim graun,” na em i “putim ston bilong kona bilong en.” (Jop 38:5, 6) Na tu, em i lusim haptaim long skelim gen ol wok bilong em. (Stt. 1:10, 12) Yu ting ol ensel i pilim olsem wanem taim ol i lukim ol nupela samting Jehova i wokim? Ating ol i amamas tru! Em as na wanpela taim ol i “amamas na singaut.” (Jop 38:7) Yumi lainim wanem samting? Jehova i wokim ol dispela samting insait long planti tausen yia, tasol taim Jehova i lukim na skelim gut olgeta samting em i bin wokim, em i tok ol i “gutpela tru.”​—Stt. 1:31.

 8. Nau bai yumi skelim wanem samting?

⁸ Olsem yumi lukim long ol eksampel yumi stori pinis, yumi inap painim planti stiatok long Baibel we inap helpim yumi long kisim pasin bilong no ken les kwik. Nau yumi bai stori long tupela rot we yumi mas kisim pasin bilong no ken les kwik na wet long Jehova.

 9. Long wanem taim yumi mas wet long Jehova?

⁹ Yumi mas wet long kisim bekim bilong ol beten bilong yumi. Taim yumi beten long God i ken strongim yumi long karim wanpela hevi o helpim yumi long daunim wanpela pasin kranki, yumi inap pilim olsem em i no bekim hariap ol beten bilong yumi. Wai na Jehova i no bekim ol beten bilong yumi hariap?

10. Wai na yumi mas no ken les kwik taim yumi beten?

¹⁰ Jehova i save putim gut yau long ol beten bilong yumi. (Sng. 65:2) Taim yumi beten dispela i soim olsem yumi gat bilip. (Hib. 11:6) Jehova i laik lukim olsem yumi tingting strong long bihainim ol beten bilong yumi long i stap bilong yumi na mekim laik bilong em, o nogat. (1 Jon 3:22) So taim yumi beten askim Jehova long helpim yumi long daunim wanpela pasin we em i no laikim, yumi no ken les kwik na yumi mas wok strong long mekim senis. Tok bilong Jisas i soim olsem God i no inap bekim hariap sampela beten bilong yumi. Em i tok: “Wok yet long askim, na yupela bai kisim; wok yet long painim, na yupela bai lukim; wok yet long paitim dua, na dua bai op long yupela; long wanem, olgeta man i wok long askim, ol i save kisim. Na olgeta man i wok long painim samting, ol i save lukim. Na olgeta man i wok long paitim dua, dua bai op.” (Mat. 7:7, 8) Taim yumi bihainim dispela tok na “oltaim holim strong pasin bilong beten,” yumi ken bilip tru olsem Papa bilong yumi long heven bai harim ol beten bilong yumi na bekim.​—Kol. 4:2.

11. Hau tok bilong Hibru 4:16 inap helpim yumi taim yumi no kisim hariap bekim bilong beten bilong yumi?

¹¹ Maski yumi lukim olsem yumi no kisim hariap bekim bilong wanpela beten bilong yumi, Jehova i promis olsem em bai bekim beten bilong yumi “long taim stret.” (Ritim Hibru 4:16.) Olsem na yumi no ken sutim tok long Jehova sapos yumi lukim olsem yumi no kisim hariap bekim bilong beten bilong yumi. Olsem, planti i bin beten inap planti yia bilong lukim Kingdom Bilong God i pinisim pasin nogut bilong nau. Jisas i tok tu olsem yumi mas beten long dispela. (Mat. 6:10) Tasol em longlong pasin sapos wanpela i larim bilip bilong em long God i kamap slek bikos pinis i no kamap hariap olsem ol man i tingim! (Hab. 2:3; Mat. 24:44) I gutpela long yumi wet long Jehova na holimpas bilip na beten long em. Pinis bai kamap long taim stret bilong en bikos Jehova i makim pinis “dispela de na dispela aua” em bai kamap. Na taim dispela samting i kamap ol manmeri bai amamas tru.—Mat. 24:36; 2 Pita 3:15.

12. Wanem samting inap kamap na dispela inap traim pasin bilong yumi long no ken les kwik?

¹² Yumi no ken les kwik long karim hevi bilong pasin i no stret. Ol man bilong dispela graun i save mekim nogut long ol man i no wankain olsem ol, ol man bilong narapela ples, skin kala, traib, na narapela kantri. Na long sampela narapela, ol man i mekim nogut long ol bikos ol i gat bagarap long bodi o long tingting. Planti wokman bilong Jehova i karim hevi long pasin i no stret bikos long ol bilip bilong ol em Baibel i as bilong en. Taim yumi karim hevi long kain ol rot olsem, yumi mas tingim tok bilong Jisas. Em i tok: “Man i sanap strong i go inap long pinis, God bai kisim bek em.” (Mat. 24:13) Tasol olsem wanem sapos yu lukim wanpela long kongrigesen i mekim wanpela bikpela rong? Taim ol elda i kisim save pinis long dispela samting, yu bai lusim dispela long han bilong ol na i no les kwik long wetim ol long stretim dispela hevi long wei Jehova i makim? Ol elda i mas mekim wanem sapos wanpela i mekim wanpela bikpela rong?

13. Jehova i laik bai ol elda i mekim wanem taim wanpela i mekim wanpela bikpela rong?

¹³ Taim ol elda i kisim save olsem wanpela long kongrigesen i mekim wanpela bikpela rong, ol i save beten long kisim “savetingting i kam long heven” na bai ol i bihainim tingting bilong Jehova long stretim dispela hevi. (Jems 3:17) Ol i laik bai man i mekim rong i “lusim rot nogut em i bihainim” sapos em inap. (Jems 5:19, 20) Na tu, ol i laik mekim olgeta samting bilong lukautim kongrigesen na mekim gut bel bilong ol lain i bel hevi. (2 Kor. 1:3, 4) Taim ol elda i harim kot long wanpela i mekim wanpela bikpela rong, pastaim ol i mas kisim gut olgeta stori bilong ol samting i kamap, na sampela haptaim i mas lus bilong mekim olsem. Bihain ol i beten na skelim gut ol tok bilong Baibel na “stretim [man] inap long mak i stret” long em. (Jer. 30:11) Ol elda i no inap wet longpela taim tumas, na tu, ol i no inap hariap tumas long mekim disisen. Taim ol elda i bihainim daireksen bilong Jehova long stretim hevi i kamap, dispela i save lukautim olgeta long kongrigesen. Tasol maski ol elda i stretim pinis hevi i kamap, man i no gat asua inap pilim bel hevi yet. Sapos yu pilim olsem, yu inap mekim wanem bilong daunim dispela bel hevi?

14. Wanem eksampel long Baibel inap mekim gut bel bilong yu sapos wanpela Kristen i mekim bikpela rong long yu?

¹⁴ Olsem wanem? Wanpela wanbilip i bin mekim bikpela rong long yu? Yu inap painim ol gutpela eksampel long Baibel we inap helpim yumi long wet long Jehova long stretim ol hevi. Olsem, maski ol brata bilong Josep i mekim pasin i no stret long em—em i no larim ol rong ol i mekim long em i mekim em i bel hevi inap longpela taim, nogat. Em i putim tingting i go long wok bilong Jehova em i mekim, na Jehova i blesim pasin bilong em long i no les kwik na sanap strong na karim hevi. (Stt. 39:21) Inap sampela haptaim bihain, Josep i fogivim ol lain i rongim em na em i lukim Jehova i blesim em. (Stt. 45:5) Olsem Josep, yumi kisim bel isi taim yumi go klostu long Jehova na yumi larim em i stretim ol hevi long taim stret bilong en.—Sng. 7:17; 73:28.

15. Wanem samting i helpim wanpela sista long karim hevi bilong pasin i no stret?

¹⁵ Tru sampela pasin i no stret i no bikpela olsem ol hevi Josep i bin karim, tasol yumi inap pilim bel hevi yet long pasin i no stret ol narapela i mekim long yumi. Taim yumi gat hevi wantaim wanpela, na dispela i makim tu wanpela i no lotuim Jehova, yumi bai kisim helpim sapos yumi bihainim ol stiatok bilong Baibel. (Fili. 2:3, 4) Skelim wanpela ekspiriens. Wanpela sista i bel hevi tru taim em i painimaut olsem wanpela wanwok i mekim ol tok i bagarapim gutnem bilong em na em i mekim ol tok i no tru long em long ol narapela. Dispela sista i no hariap long mekim samting, em i lusim haptaim long tingim eksampel bilong Jisas. Taim ol narapela i tok nogut long Jisas, em i no bekim tok nogut long ol. (1 Pita 2:21, 23) Em i tingim dispela, na em i no laik mekim samting bilong mekim hevi i go bikpela. Bihain em i painimaut olsem wanwok bilong em i bin sik inap sampela haptaim na dispela i mekim em i bel hevi. Na sista i luksave olsem wanwok i no bin tingting gut taim em i mekim ol dispela tok. So sista i amamas olsem em i no bin les kwik na em i sanap strong na karim hevi, na dispela i givim em bel isi.

16. Wanem samting inap mekim isi bel bilong yu sapos yu karim hevi bilong pasin i no stret? (1 Pita 3:12)

¹⁶ Sapos yu karim hevi bilong pasin i no stret o narapela hevi, tingim olsem Jehova i save stap klostu long ol manmeri em “hevi i daunim tru ol.” (Sng. 34:18) Em i laikim yu bikos yu gat pasin bilong i no les kwik na yu putim hevi bilong yu long han bilong em. (Sng. 55:22) Em i Jas bilong graun olgeta. Na em i save lukim olgeta samting i kamap. (Ritim 1 Pita 3:12.) Taim yu karim ol hevi we yu yet i no inap stretim, yu redi long wet long em?

17. Olsem Aisaia 30:18 i kamapim, Jehova i tok promis long mekim wanem?

¹⁷ Klostu nau Papa bilong yumi long heven bai givim yumi planti blesing long rot bilong Kingdom bilong em. Aisaia 30:18 i tok: “Jehova i stap isi na wet i stap bilong soim pasin helpim long yupela, na em bai kirap long soim marimari long yupela. Long wanem, Jehova, em God bilong mekim stretpela kot. Ol manmeri husat i save wet long em, ol i ken amamas.” Ol manmeri i wet long Jehova bai kisim planti blesing long nau na long nupela taim bai kamap bihain.

18. Yumi bai kisim wanem ol blesing?

¹⁸ Taim ol manmeri bilong God i go insait long nupela taim, ol i no inap karim hevi bilong tingting planti na ol hevi ol i feisim long nau. Pasin i no stret bai pinis, na bai i no gat pen na hevi moa. (Rev. 21:4) Yumi no inap wari moa long kisim ol samting yumi nidim bikos bai i gat planti samting. (Sng. 72:16; Ais. 54:13) Em gutpela blesing tru, a?

19. Long nau, isi isi Jehova i wok long redim yumi long wanem samting?

¹⁹ Long nau, Jehova i wok long redim yumi long stap aninit long wok bos bilong em, em i mekim olsem taim em i helpim yumi long daunim ol pasin kranki bilong yumi na kisim ol gutpela pasin i amamasim em. No ken bel hevi, na no ken givap. Klostu nau bai yu kisim gutpela laip tru! Yumi luk fowed long gutpela taim tru bai kamap bihain, olsem na long nau yumi ken stap amamas taim yumi wetim Jehova long inapim ol tok promis bilong em!