Yu Save Long Dispela?

Ol anis i save bungim kaikai na putim i stap long taim kaikai i sot o nogat?

▪ Sindaun 6:​6-8 i tok: “Yupela ol lesman, mi gat tok long yupela olsem. Yupela go lukim gut pasin bilong ol anis na bai yupela i kamap saveman. Ol anis i no gat hetman o bikman o ofisa bilong bosim ol. Tasol taim i gat planti kaikai i stap, ol anis i save bungim kaikai na putim i stap bilong taim kaikai i sot.”

Sampela kain lain anis i save bungim kaikai. I luk olsem lain anis Solomon i toktok long en​—na planti i stap nau long Israel​—em ol lain anis bilong bungim kaikai (Messor semirufus).

Wanpela buk i tok, “ol anis bilong bungim kaikai i save lusim haus bilong ol long taim weda i gutpela bilong painim kaikai . . . [na] inap sampela mun bilong yia long taim bilong san, ol i bungim ol sid.” Ating ol bai kisim ol sid long ol plaua samting o long graun. Ol i save wokim haus bilong ol insait long graun klostu long ol gaden, long ol haus wit, o long ol hap we ol i save rausim pipia bilong wit na kisim wit.

Insait long haus bilong ol, ol anis i save bungim ol kaikai long planti rum. Bikpela bilong ol dispela rum kaikai em inap olsem 12 sentimita na i go antap inap 1 sentimita. Ol dispela lain anis bilong bungim kaikai, ol i bungim inap kaikai, olsem na ol inap i stap laip “winim 4-pela mun na ol i no kisim kaikai o wara long ausait.”

Wanem samting i insait long wok bilong lukautim wain bilong king?

▪ Nehemia i mekim wok olsem man bilong lukautim wain bilong King Artaserksis bilong Persia. (Nehemia 1:​11) Long ol haus king bilong ol lain bilong Midel Is long bipo, man bilong lukautim wain bilong king, em i no wanpela wokboi nating. Nogat. Em i holim wok i gat namba. I gat ol buk na planti piksa bilong bipo tru i gat stori na piksa bilong ol man bilong lukautim wain em ol inap helpim yumi save long wok bilong Nehemia long haus king bilong Persia.

Man bilong lukautim wain i save traim wain bilong king bilong banisim king long dring poisen. Olsem na king i trastim tru man bilong lukautim wain. Wanpela saveman, em Edwin M. Yamauchi i tok: “I gat bikpela nid long kisim ol wokman em King inap trastim ol tru long mekim wok long haus bilong em, long wanem, pasin bilong painim rot bilong bagarapim king i save kamap long haus king bilong ol [Persia].” Na i luk olsem man bilong lukautim wain em wanpela wokman king i save laikim tru na em i save stiaim tingting bilong king long planti samting. Em i save wok klostu long king long olgeta de na ating dispela i mekim na em inap makim husat man bai kam lukim king.

Kain wok olsem i mekim na ating king i orait long Nehemia i go bek long Jerusalem bilong wokim gen banis. Ating king i bin rispektim tru Nehemia. Buk The Anchor Bible Dictionary i tok: “King i mekim dispela tok tasol, ‘Wanem taim bai yu kam bek?’”​—Nehemia 2:​1-6.

[Sat/Piksa long pes 9]

PIksa long haus king bilong Persia long Pesepolis

[Sat]

Man bilong lukautim wain

Prins Serksis

Bikpela king Darius

[Kredit Lain]

© The Bridgeman Art Library International