Kisim Gutpela Save na Kamap Wanbel Moa Wantaim God

“Yupela i kisim gutpela save long God na long Jisas, Bikpela bilong yumi. Long dispela pasin marimari na bel isi i ken kamap bikpela moa long yupela.”—2 PITA 1:2.

 1, 2. (a) Pasin bilong i stap wanbel wantaim God, olsem wanem dispela i wankain long marit? (b) Olsem wanem yumi ken kamap wanbel moa wantaim God?

TAIM yu kisim baptais, yu kamap wanbel wantaim God Jehova na dispela i kain olsem marit. Taim man na meri i marit, tupela i amamas, tasol sapos tupela i wok strong, bihain bai narapela i save gut long narapela na bai tupela i stap amamas moa yet; bai tupela i pas gut wantaim na i stap wanbel tru, na marit bilong ol bai i stap olsem gutpela ples hait long taim bilong hevi. Olsem tasol, sapos yu wok strong, na Jehova i helpim yu, yu inap kamap wanbel moa wantaim Em.

² Aposel Pita i stori long olsem wanem ol manmeri “i bin kisim bilip” ol i ken i stap wanbel moa wantaim God. Em i raitim tok olsem: “Nau yupela i kisim gutpela save long God na long Jisas, Bikpela bilong yumi. Long dispela pasin marimari na bel isi i ken kamap bikpela moa long yupela.”—2 Pita 1:1, 2.

“Kisim Gutpela Save long God”

 3. Bilong kisim gutpela save long Jehova na Jisas, yu mas mekim wanem?

³ Insait bilong tok Grik (e·piʹgno·sis) ol i tanim olsem “gutpela save” long dispela ves i makim save yu kisim long wanpela man o meri yu save gut long em. Long Luk 1:4 ol i tanim dispela tok olsem “save gut.” Wanpela saveman bilong tok Grik (Culverwel) em i tok, em i ting dispela tok i makim olsem “mi kisim gutpela save moa long wanpela samting mi save pinis long en; i olsem pastaim mi stap longwe long en, na nau mi go klostu long en na mi lukim gut.” Bilong kisim “gutpela save” olsem long Jehova na Jisas, yu mas save gut long pasin bilong tupela.

 4. Olsem wanem yu ken kisim sampela save moa long God? Bilong wanem dispela i helpim yumi long i stap wanbel moa wantaim em?

⁴ Tupela rot bilong kisim dispela save, em olsem: Yu yet yu mas stadi gut, na yu mas i go oltaim long ol miting bilong lain bilong God. Long dispela tupela rot bai yu kisim sampela save moa long pasin na long tingting bilong God. Tingting bilong yu bai klia na bai yu save gut long pasin bilong God. Tasol bilong save gut long God, yu mas bihainim pasin bilong em. Olsem: Jehova i stori long wanpela man i bihainim pasin bilong God na em i helpim ol narapela man, na bihain Jehova i tok: “I olsem em i save long mi, a?” (Jeremaia 22:15, 16, NW; Efesas 5:1) Sapos yu bihainim moa yet pasin bilong God, dispela bai helpim yu long i stap wanbel moa wantaim Em, long wanem yu wok gut long “kamap nupela man.” Oltaim God “i givim save” long yumi, na em i mekim yumi “kamap nupela na i stap wankain olsem God yet.” Yumi bihainim moa yet ol pasin God i laikim.—Kolosi 3:10.

 5. (a) Wanpela meri Kristen i kisim gutpela save na dispela i helpim em olsem wanem? (b) Yumi ken wok long bihainim moa yet wanem ol pasin bilong Jehova?

⁵ Wanpela meri Kristen, nem bilong em Lin (Lynn) em i hatwok long lusim tingting long kros i bin kamap namel long em na narapela sista Kristen. Tasol Lin i stadi gut na dispela i kirapim em long skelim tingting bilong em long dispela samting. Em i tok: “Mi tingim pasin bilong God Jehova—em i no save bel nogut long man i mekim rong long em. Mi tingim olgeta planti liklik rong yumi save mekim long Jehova long olgeta de, tasol em i save sori long yumi na lusim tingting long ol dispela rong. Mi tingim dispela samting na mi tingim hevi i bin kamap namel long mi na sista Kristen bilong mi, na mi save dispela hevi i liklik tumas. Olsem na taim mi lukim dispela sista, mi save tokim skin bilong mi: ‘Jehova i laikim tumas dispela sista wankain olsem em i laikim mi.’ Dispela samting i helpim mi long winim dispela hevi.” Olsem wanem long yu? I gat sampela pasin yu mas stretim bambai yu bihainim moa yet pasin bilong Jehova?—Sam 18:35; 103:8, 9; Luk 6:36; Aposel 10:34, 35; 1 Pita 1:15, 16.

Kisim Gutpela Save long Krais

 6. Jisas i mekim wanem na yumi save em i tingim wok bilong autim tok i nambawan bikpela samting?

⁶ Bilong kisim gutpela save long Krais, yumi mas “i gat tingting bilong Krais” na yumi mas bihainim pasin bilong em. (1 Korin 2:16) Jisas i givim bel long autim tok i tru. (Jon 18:37) Sampela lain i tingting nogut long ol man bilong narapela lain, tasol Jisas i no larim dispela kain tingting i pasim em long autim tok. Maski ol arapela Juda i no laikim ol Sameria, tasol Jisas i autim tok long wanpela meri bilong Sameria long hul wara. Na ol Juda i no ken amamas long dispela samting, long wanem ating ol i no save toktok longtaim wantaim meri long ples bung!a Tasol Jisas i no larim tingting bilong ol man i pasim em long autim tok. Em i amamas long mekim wok bilong God. Em i tok: “Kaikai bilong mi em i olsem: Mi bihainim laik bilong dispela em i bin salim mi na mi kam. Na mi mas pinisim wok bilong em.” Taim Jisas i autim tok na ol manmeri i harim gut, olsem dispela meri na planti Sameria bilong dispela taun, dispela i strongim Jisas olsem kaikai i save strongim skin.—Jon 4:4-42; 8:48.

 7. (a) Yumi save long Jisas na dispela i mas kirapim yumi long mekim wanem? (b) God i ting olgeta wokboi bilong em inap mekim bikpela wok bilong autim tok o olsem wanem? Stori long dispela samting.

⁷ Yu gat wankain tingting olsem Jisas? Tru, i hatwok long planti man long kirap toktok long Baibel wantaim man ol i no save long em, na planti taim ol narapela man i no amamas long dispela wok yumi mekim. Tasol sapos yumi gat tingting bilong Krais, bai yumi save: Yumi mas autim tok. Tru, sampela inap mekim bikpela wok bilong autim tok na sampela inap mekim liklik wok tasol, long wanem yumi olgeta i gat narapela narapela strong na narapela narapela wok yumi mas mekim. Olsem na yu no ken ting God i no save amamas long ol wok yu mekim bilong lotuim em. Nogat. Tasol yumi save long Jisas na dispela i mas kirapim yumi long mekim gut tumas wok bilong yumi. Jisas i amamas long man i givim bel olgeta long mekim wok.—Matyu 13:18-23; 22:37.

Yumi Mas Nolaik Tru long Pasin Nogut

 8, 9. Kolim sampela pasin God i nolaik tru long en. Yumi mas mekim wanem na bai yumi tu i nolaik tru long ol dispela pasin?

⁸ Yumi kisim gutpela save na dispela i helpim yumi long save tu long ol pasin Jisas na Jehova i nolaik tru long en. (Hibru 1:9; Aisaia 61:8) “Bikpela i no laikim tru ol man i mekim dispela 7-pela pasin. Pasin bilong hambak na lukim ol arapela man i olsem samting nating. Pasin bilong mekim tok giaman. Pasin bilong kilim nating ol arapela man. Pasin bilong tingting long mekim pasin nogut. Pasin bilong hariap long mekim sin. Pasin bilong giaman long kot. Pasin bilong mekim ol man i bel nogut long ol brata bilong ol yet.” (Provep 6:16-19) Jehova i “no laikim tru” ol dispela kain tingting na pasin. Insait bilong tok Hibru ol i tanim olsem “no laikim tru,” i makim samting i olsem “stingpela” samting long ai bilong man na man i “bel nogut tru” long en na “les olgeta” long en; dispela tok i makim samting i mekim bel bilong man i olsem i laik traut. Olsem na sapos yumi laik i stap wanbel wantaim God, yumi tu yumi mas nolaik tru long ol dispela pasin na givim baksait olgeta long en.

⁹ Olsem: Yumi mas sakim “pasin bilong hambak na lukim ol arapela man i olsem samting nating.” Sampela nupela Kristen, taim ol i baptais pinis, ol i pilim olsem i no gat wok moa long tisa bilong ol i helpim ol. Tasol ol i mas bihainim pasin daun na larim tisa i helpim ol inap long ol i kamap strong long tok i tru. (Galesia 6:6) Na tu yumi mas klia long pasin bilong mekim planti toktok nabaut na tok baksait, long wanem dispela pasin inap “mekim ol man i bel nogut long ol brata bilong ol yet.” Sapos yumi tok win na toknogutim arapela man, o yumi sutim tok nating long pasin bilong em, o yumi mekim sampela tok giaman, tru yumi no “kilim” dispela man, tasol yumi bagarapim gutpela nem bilong em. Yumi mas i stap wanbel wantaim ol brata bambai yumi inap i stap wanbel wantaim God. (Provep 17:9; Matyu 5:23, 24) Na long Baibel God i tok tu “em i nolaik tru long pasin bilong katim marit.” (Malakai 2:14, 16, NW ) Sapos yu marit, olsem wanem long pasin bilong yu? Yu wok strong bambai marit bilong yu i no ken bagarap? Yu no laik tru long pasin bilong tok gris samting wantaim meri bilong narapela man? Yu gat tingting wankain olsem bilong Jehova na yu nolaik tru long pasin pamuk na pasin bilong bagarapim marit? (Diuteronomi 23:17, 18) I hatwok long yumi no laikim tru ol dispela kain pasin long wanem yumi gat laik nogut i stap long skin bilong yumi, na ol manmeri bilong dispela graun ol i save laikim ol dispela kain pasin.

10. Yumi mas mekim wanem na bai yumi nolaik tru long pasin nogut?

¹⁰ Bilong helpim yumi na bai yumi nolaik tru long ol dispela pasin nogut, yumi no ken lukim ol piksa long televisen o long haus piksa em ol i kamapim sampela wok bilong ol spirit nogut, o pasin pamuk, o pasin pait. Na yumi no ken lukim o kaunim ol buk na nius i stori long ol dispela kain pasin. (Diuteronomi 18:10-12; Sam 11:5) Ol dispela kain piksa na buk samting i mekim ol man i lap o kirapim ol long ting olsem ‘i no gat bikpela rong’ long ol dispela kain pasin. Olsem na sapos yumi lukim, bai yumi hatwok long bihainim pasin bilong God na nolaik tru long ol kain pasin olsem. Tasol sapos yumi beten strong long God, dispela inap helpim yumi, long wanem Jisas i tok: “Yupela was na mekim [beten]. Nogut samting bilong traim yupela em i kam painim yupela. Tru, bel i laik, tasol bodi em i no gat strong.” (Matyu 26:41) Wanpela Kristen i tok, taim laik nogut bilong skin i kamap strong na i laik pulim em, em i save beten. Em i tok: “Mi subim skin long mekim beten. Sampela taim mi sem long i go klostu long Jehova long rot bilong beten, tasol mi subim skin na mi beten askim em long helpim mi, na long dispela rot mi kisim strong inap long sakim traim.” Sapos yu tingim ol hevi i save painim man i mekim pasin nogut, dispela inap helpim yu long save gut bilong wanem Jehova i no laikim tru pasin nogut.—2 Pita 2:12, 13.

11. Wanem samting inap putim hevi long yumi sampela taim?

¹¹ Yu stap wanbel wantaim God, tasol sampela taim ol hevi bilong olgeta de, na ol samting i laik pulim yu, na ol liklik pasin kranki bilong yu yet, ol dispela samting inap putim hevi long yu. Yu no ken lusim tingting olsem Seten i wok strong long pundaunim yu. Em i save mekim pait long ol man i bihainim ol lo bilong God na ol i Witnes Bilong Jehova! (Revelesen 12:17) Orait, olsem wanem yu ken i stap bel isi?

Rot Bilong Karim Ol Hevi i Laik Bagarapim Bel Isi Bilong Yu

12. (a) Wanem samting i bin kamap na bihain Devit i raitim ol tok bilong Sam 34? (b) Baibel i stori olsem wanem long tingting bilong Devit taim dispela hevi i painim em?

¹² Long Sam 34:19, Devit i tok: “Planti hevi i save kamap long stretpela man”. Liklik tok i stap long pinis bilong dispela sam i tok Devit i bin raitim ol dispela tok taim em i klostu i bagarap. Em i ranawe long King Sol na em i go kamap long Akis, em king bilong ol Filistia long Get. Devit i laik painim ples hait, tasol ol wokboi bilong Akis i luksave long em na ol i tingim bikpela wok em i bin mekim long ami bilong Isrel, na ol i toksave long king. Devit i harim na “i pilim tru dispela tok, na em i pret tumas long King Akis i kilim em.” (1 Samyuel 21:10-12) Taun Get em i as ples bilong Golaiat na Devit i bin kilim i dai dispela man em i mekim bikpela wok bilong helpim ol Filistia long pait, na em i holim yet bainat bilong dispela draipela man! Nogut nau ol i kisim dispela draipela bainat na katim nek bilong em yet na kilim em i dai! Devit i mas mekim wanem?—1 Samyuel 17:4; 21:9.

13. Taim dispela hevi i painim Devit, em i mekim wanem? Olsem wanem yumi ken bihainim pasin bilong em?

¹³ Devit i beten long God na singaut long em bai em i helpim em. Devit i tok: “Mi bin beten long Bikpela bai em i helpim mi, na em i harim [beten] bilong mi. Em i tekewe olgeta pret long bel bilong mi, na nau mi stap bel isi.” Na Devit i tok, God i helpim em long olgeta hevi bilong em. (Sam 34:4, 6, 15, 17) Yu lain long beten askim Jehova long helpim yu long taim bilong hevi? Yu save beten na kamapim olgeta hevi na olgeta tingting bilong yu long em? (Efesas 6:18; Sam 62:8) Taim hevi i painim yu, ating i no bikpela hevi olsem bilong Devit, tasol bai Jehova i helpim yu long taim stret. (Hibru 4:16) Devit i beten, tasol em no beten tasol.

14. Devit i gat “gutpela save” na em i mekim wanem? God i givim wanem samting long yumi bilong helpim yumi long mekim olsem?

¹⁴ “Olsem na long ai bilong king wantaim ol ofisa bilong en, Devit i giaman long kamap longlong. . . . Akis i lukim na i tokim ol ofisa bilong en olsem, ‘Dispela man em i longlong tru. Olsem na bilong wanem yupela i bringim em i kam long mi?”’ (1 Samyuel 21:13-15) Devit i wokim tingting na tingim sampela samting em i ken mekim bambai em i abrusim bagarap. Jehova i blesim ol samting em i mekim. Olsem tasol long nau, taim hevi i painim yumi na i hatwok long stretim, Jehova i laik bai yumi wokim tingting na painim rot bilong stretim; em i no laik bai yumi sindaun nating tasol na wetim em i helpim yumi. Em i givim Baibel long yumi, em Tok Bilong Em, na “sapos sampela man i gat liklik save tasol, bai dispela tok . . . i givim gutpela save long ol . . ., na soim ol long gutpela pasin bilong wokabaut.” (Provep 1:4; 2 Timoti 3:16, 17) Na God i putim ol elda long kongrigesen bilong helpim yumi bambai yumi inap save long rot yumi mas bihainim bilong holimpas stretpela pasin bilong God. (1 Tesalonaika 4:1, 2) Planti taim ol dispela elda inap helpim yu long painim sampela tok insait long ol buk o nius bilong Sosaiti Was Taua, na bai yu inap tingim gut ol samting yu mas mekim o save long rot bilong stretim hevi.

15. Olsem wanem tok bilong Sam 34:18 i strongim bel bilong yumi?

¹⁵ Taim yumi popaia o mekim pasin kranki na bel bilong yumi i hevi long dispela, sapos yumi bihainim stretpela tingting, yumi inap i stap wanbel yet wantaim God. Long Sam 34:18, Devit i tok: “God i save stap klostu long ol manmeri i gat hevi. Na em i save helpim ol manmeri [bel] bilong ol i bagarap.” Sapos yumi beten askim God long lusim rong bilong yumi na yumi mekim ol samting yumi mas mekim bilong stretim dispela rong (sapos yumi bin mekim bikpela rong, i bikpela samting moa yumi mas mekim olsem), orait bai Jehova i stap klostu long yumi, na bai em i strongim bel bilong yumi.—Provep 28:13; Aisaia 55:7; 2 Korin 7:9-11.

Yumi Save Jehova i Helpim Yumi na Dispela Samting i Mekim Yumi i Stap Bel Isi

16. (a) I gat wanem narapela rot bilong helpim yumi long kisim gutpela save long God? (b) Wanem insait bilong tok bilong Devit, em i tok: “Traim na lukim na bai yupela i save Bikpela i gutpela tru”?

¹⁶ Yumi mas kisim save long ol samting bilong God, tasol narapela rot bilong kisim gutpela save long God, em olsem: Long rot bilong ol samting em i mekim bilong helpim yumi. Taim em i helpim yumi, yumi save em i laikim yumi na sori long yumi. (Sam 41:10, 11) Em i save helpim yumi long olgeta hevi bilong yumi, tasol i no olsem wantu tasol bai hevi i pinis o em bai pinis olgeta. Nogat. Ating yumi mas karim yet dispela hevi. (1 Korin 10:13) Devit i abrusim bagarap long Get, tasol em i mas ranawe long Sol inap sampela yia moa na kain kain samting nogut i painim em. Long olgeta dispela hevi, Devit i pilim olsem Jehova i sambai long em na helpim em. Em i bin wok long kamap wanbel wantaim God na em i kamap wanbel pinis. Em i kisim save olsem ol man i kamap wanbel wantaim God “ol i no save sot long ol gutpela samting.” Devit i save Jehova i bin helpim em taim hevi i painim em, na dispela samting i kirapim Devit long tok olsem: “Yupela yet i mas traim na lukim na bai yupela i save Bikpela i gutpela tru. Man i save bilip tru long Bikpela, em i ken i stap belgut tru.”—Sam 34:8-10, 14, 15.

17. Hevi i painim wanpela famili, tasol ol i “bilip tru” long Jehova na dispela i helpim ol olsem wanem?

¹⁷ Taim hevi i painim yumi, sapos yumi bilip tru long Jehova, dispela bai helpim yumi long “traim na lukim na bai [yumi] save Bikpela i gutpela tru.” Birua i painim wanpela Kristen long Amerika na em i no inap mekim moa gutpela wok em i bin mekim inap 14 yia pinis em i gat bikpela pe bilong en. Nau em i no gat mani, olsem na em wantaim meri pikinini bilong em ol i beten askim God long helpim ol. Ol i beten olsem, na tu ol i painim rot bilong kisim kaikai samting long liklik pe tasol—ol i go long ol gaden klostu na bungim ol kaikai, ol man bilong kisim i lusim i stap, na ol i go painim pis tu. Sampela long kongrigesen i helpim ol, na taim i gat wok bilong haptaim, ol i mekim na kisim liklik wansiling. Long ol dispela rot, dispela famili, em papa na mama na tupela pikinini, ol i stap laip. Wanpela yia bihain long taim dispela hevi i bin painim ol, mama i tok: “Sampela taim yumi ting yumi bilip long Jehova na wetim em, tasol yumi giamanim bel bilong yumi yet, long wanem yumi bilip long strong na save bilong yumi yet o long poroman marit bilong yumi o long wok mani bilong yumi. Tasol nau mipela i lain long bilip tru long Jehova. Ol dispela narapela samting inap tekewe long mipela, tasol Jehova i no lusim mipela—nogat tru. Mipela i kisim tasol ol samting mipela mas kisim bilong i stap laip, tasol nau mipela famili olgeta i stap klostu moa long Jehova.”

18. Wanem samting inap helpim yu long karim hevi i stap longtaim?

¹⁸ Tru, hevi olsem i no gat wok o i no gat mani, dispela kain hevi inap i stap longtaim. O sapos bikpela sik i painim yumi, ating bai yumi karim hevi longtaim; o ating kros i kamap namel long yu na narapela man; o bel bilong yu i gat hevi na yu stap bel hevi oltaim; o i gat kain kain hevi inap painim yu. Tasol sapos yu save gut long God, bai yu bilip tru olsem em bai sambai long yu na helpim yu. (Aisaia 43:10) Dispela strongpela bilip bai helpim yu long karim hevi na sanap strong na bai yu kisim “bel isi God i save givim yumi.”—Filipai 4:7.

19. Olsem wanem yumi save, Jehova i tingim tru yumi taim yumi karim hevi?

¹⁹ Taim hevi i painim yu, yu no ken lusim tingting olsem Jehova i save yu karim hevi. Devit i raitim narapela sam tu taim em i tingim ol samting i bin painim em long Get na em i tok: “Yu save long mi karim hevi na mi pilim nogut tru long en, na mi krai i stap. Orait, yu tingting yet long dispela, na yu raitim pinis long buk bilong yu.” (Sam 56:8) Yumi save, God i harim beten bilong Devit. Taim yumi karim hevi na yumi pilim nogut tru na yumi krai i stap, God i tingim tru yumi—i olsem em i raitim dispela long buk bilong em! Dispela samting i strongim tru bel bilong yumi, a? Jehova i sori tru long yumi!

20. Olsem wanem yumi ken i stap wanbel moa wantaim God?

²⁰ Olsem na taim yu kisim baptais, yu kirap tasol long kamap wanbel wantaim God. Bihain yu mas kisim gutpela save moa long ol pasin bilong God na Jisas, na yu yet yu mas pilim ol samting Jehova i mekim bilong helpim yu long karim hevi na winim traim, na long dispela rot bai yu wok long kamap wanbel moa wantaim God. Bai yu stap pren bilong God na bai em i stap olsem gutpela ples hait bilong yu, na bai yu inap bilip na wet long kisim laip i stap oltaim long Paradais. Long dispela Paradais bai yu inap “sindaun gutpela tumas na amamas i stap.”—Sam 37:11, 29.

[Futnot]

Yu Tingim?

◻ Yumi ken kisim gutpela save long God na Jisas long wanem ol rot?

◻ Sapos yumi bihainim pasin bilong God na Jisas, dispela bai kirapim yumi long mekim wanem?

◻ Yumi mas mekim wanem na bai yumi bihainim pasin bilong God na nolaik tru long pasin nogut?

◻ Olsem wanem yumi inap i stap bel isi maski i gat kain kain hevi i painim yumi?

[Piksa long pes 18]

Jisas i no larim tingting kranki bilong sampela lain i pasim em long autim tok. Yu save bihainim pasin bilong em na wok strong long autim tok?

[Ol Piksa long pes 19]

Taim bikpela hevi i painim Devit, Devit i singaut long God bai em i helpim em . . . . . . na em i giaman long kamap longlong bambai em inap abrusim bagarap. Jehova i harim beten bilong Devit na helpim em