Sapta 1

Bilong Wanem Mi Mas ‘Bihainim Tok Bilong Papamama’?

‘YU MAS bihainim tok bilong papamama.’ Planti yangpela long nau ol i no laik harim kain tok olsem.

Yangpela meri, nem bilong em Veda, em i bikhet long papa bilong em na em i prenim wanpela yangpela man i save kisim drak na em i save dring. Na em i save sakim tok bilong papa na i go danis inap biknait tru. Veda i stori long dispela pasin em i bin mekim na em i tok: “Mi ting papa i putim strongpela lo tumas long mi. Long dispela taim mi gat 18 krismas na mi ting mi gat save pinis. Mi ting papa i mekim hatpela pasin tumas long mi na em i no laik bai mi kisim liklik amamas, olsem na mi sakim tok bilong em na mi bihainim laik bilong mi yet.”

Tru ating planti yangpela i no ken orait long pasin Veda i bin mekim. Tasol sapos papamama i tokim ol long stretim rum bilong ol, o mekim homwok bilong ol, o makim taim bilong ol i mas kam bek long haus, ating planti bai ol i bel nogut long papamama, na ating sampela bai bikhet! Tasol pasin yangpela man o meri i mekim long papamama inap kamapim bikpela kros o helpim famili long i stap bel isi. Na pasin bilong em inap helpim o pasim em long kisim laip i stap oltaim. Long wanem God yet i tok em i mas ‘bihainim tok bilong papamama,’ na God i skruim wanpela tok promis long dispela lo bilong kirapim ol yangpela long bihainim, em i tok: “Bai yu stap longpela taim long dispela graun.” (Efesus 6:​2, 3) Olsem na i bikpela samting yu mas bihainim tok bilong papamama bilong yu! Orait, nau yumi ken stori gut long dispela samting.

Olsem Wanem Yu Ken Daun long Papamama?

Yumi mas daun long ol man i gat wok long bosim yumi. Baibel i tok ol Kristen “i mas givim biknem long king.” (1 Pita 2:17) Ating sampela taim yumi no wanbel long tok bilong “king” o gavman samting, tasol yumi mas tingim wok em i holim na yumi mas daun long em. Na long famili, God i givim wok long papamama long bosim ol pikinini bilong ol, olsem na i stret papamama i ken putim sampela lo long yu. Tru ating papamama bilong sampela pikinini i no save putim lo long pikinini bilong ol olsem papamama bilong yu i mekim. Tasol papamama bilong yu i gat wok long skelim wanem samting i gutpela bilong helpim yu​—na ol narapela papamama i mas tingim wanem samting i gutpela bilong helpim pikinini bilong ol.

Na maski papamama i gutpela papamama, tasol sampela taim ating bai ol i no tingting gut na ol i putim hatpela lo long yu. Tasol long Sindaun 7:​1, 2 wanpela papa i gat gutpela tingting em i tok: “Pikinini, . . . bihainim gut tok bilong mi, bai yu stap gut.” Olsem tasol ol lo na “tok” bilong papamama i bilong helpim yu, na i kamapim long ples klia olsem ol i laikim yu tumas na ol i tingim yu.

Yumi ken stori long wanpela manki nem bilong em Jon. Planti taim mama i bin tokim Jon, taim em i laik brukim bikrot, em i mas wokabaut long bris i stap antap long dispela rot. Orait wanpela taim tupela meri wanskul i tok bilas long em na tokim em, ‘Ating yu pret long brukim bikrot! Yu no gat bun!’ Taim tupela i laik brukim bikrot, Jon i no bihainim tupela, em i wokabaut long bris. Em i go liklik na nau em i harim wanpela ka i brek strong. Em i lukluk i go daun long bikrot na em i lukim wanpela samting nogut tru i kamap​—wanpela ka i bamim tupela meri na tromoi tupela i go! Tru, sapos yu no bihainim tok bilong papamama, i no olgeta taim bikpela bagarap i mas painim yu. Tasol taim yu bihainim tok bilong papamama, dispela i save helpim yu.

Bilong daun long papamama, yu mas harim tok bilong tupela taim ol i laik stretim yu; yu no ken bel nogut o belhat o bikhet. Longlong man i save “sakim tok bilong papa bilong en.” Sindaun 15:5 i tok olsem.

Na bilong daun long papamama, yu no ken mekim long skin tasol o yu bel nogut na yu bihainim tok bilong ol. Nogat. Taim Baibel i tok yumi mas “bihainim tok” bilong wanpela man, as bilong dispela tok long tok Grik i makim olsem yumi ting dispela man em i gutpela man tumas. Yu mas i gat dispela kain tingting long papamama bilong yu, olsem yu ting ol i gutpela tru na yu laikim ol tumas. Yu mas belgut long tupela na pilim tru gutpela pasin ol i mekim bilong helpim yu. Tasol sori tumas, sampela yangpela i no gat kain gutpela tingting olsem long papamama bilong ol.

Tasol Olsem Wanem Sapos Pasin Bilong Papamama i No Gutpela?

Wanpela yangpela meri, nem bilong em Jina, em i tok: “Papa bilong mi i man bilong dring, na em wantaim mama i save tok pait na bikmaus na mi no inap slip. Mi save stap long bet na krai tasol. Mi no inap kamapim hevi bilong mi long tupela, long wanem mi save bai mama i paitim mi. Baibel i tok mi mas daun long papa, tasol mi no inap mekim olsem.”

Olsem wanem sapos pasin bilong papamama bilong yu i no gutpela, olsem ol i save belhat kwik o mekim pasin pamuk o dring spak o tok pait oltaim? I stret yu mas daun long ol? I stret, long wanem Baibel i tambuim pasin bilong “tok bilas” long papa o mama. (Sindaun 30:17) Na Sindaun 23:22 i tok, papamama i bin “kamapim yu.” Olsem na i stret yu mas daun long tupela. Bipo yangpela man Gregori i no save harim tok bilong mama, tasol nau em i tok: “Mi tenkyu long God Jehova, long wanem, taim mi stap yet long bel bilong mama, em i no bin rausim bel na bagarapim mi, na taim em i karim mi pinis, em i no tromoi mi i go. Em i no gat man bilong em, tasol em i bin mekim bikpela long mipela 6-pela pikinini, na mi save em i gat bikpela hatwok tru long lukautim mipela.”

Ol papamama i no gutpela olgeta​—ol i save popaia na mekim sampela pasin kranki. Tasol papamama bilong yu i bin lusim planti samting bilong ol yet bambai ol i ken lukautim yu. Gregori i stori moa olsem: “Wanpela taim mipela i sot tru long kaikai. Liklik kon tasol i stap na mama i kukim bilong mipela, tasol em yet i no kaikai. Mi kaikai inap pinis na mi go slip, tasol mi tingim mama em i no bin kaikai. Nau mi gat ol pikinini bilong mi yet na mi pilim tru pasin mama i bin mekim, em i givim kaikai long mipela, tasol em yet i no gat.” (Bilong mekim bikpela long pikinini i go inap long em i gat 18 krismas, papamama i mas tromoi bikpela mani tru.)

Yu mas save tu, maski pasin bilong papamama i no gutpela tumas, tasol yu no ken ting olgeta tok ol i givim long yu i kranki. Long taim bilong Jisas, pasin bilong ol bikpela man bilong lotu i nogut. Tasol Jisas i tokim ol manmeri: “Olgeta tok ol i givim long yupela, em yupela i mas harim na bihainim. Tasol pasin ol i save mekim, em yupela i no ken bihainim.” (Matyu 23:​1-3, 25, 26) Ating dispela tok i stret long sampela papamama tu, a?

Sapos Yu Bel Nogut long Papamama Yu Mas Mekim Wanem?

Tasol olsem wanem sapos yu pilim olsem papa o mama i mekim nogut long yu?a Yu mas i stap isi. Sapos yu bikhet na bel nogut long papamama na yu laik bekim nogut long ol, dispela i no inap kamapim wanpela gutpela samting. (Saveman 8:​3, 4; lukim tu Saveman 10:​4.) Wanpela yangpela meri i gat 17 krismas em i kirap long bel nogut long papamama, long wanem oltaim ol i save kros na tok pait na i olsem tupela i no tingim em. Em i bel nogut long papamama na em i no laik bihainim moa ol lo bilong Baibel em papamama i bin lainim em long en. Bilong bekim nogut long papamama, em i kirap mekim pasin pamuk na kisim drak. Bihain em i tok: “Papamama i bin mekim nogut long mi na mi ting i stret mi ken bekim nogut long tupela.” Em i laik bekim nogut long papamama, tasol em i mekim nogut long em yet.

Baibel i tok: “Nogut yu larim belhat bilong yu i pulim yu long . . . [bekim] pasin nogut. Olsem na yu mas lukaut gut. Nogut yu pas olgeta long pasin nogut.” (Jop 36:​18-21) Yu mas save, Jehova bai skelim pasin bilong papamama, na sapos ol i mekim pasin i no stret, Jehova bai bekim long ol.​—Kolosi 3:25.

Sindaun 19:11 i tok: “Man i gat gutpela tingting, em i no inap kros kwik. Nambawan pasin bilong en i olsem: Em i no save tingim rong narapela man i mekim long em.” Olsem na sapos papa o mama i mekim nogut long yu, ating gutpela sapos yu lusim tingting long dispela samting. No ken tingim ol pasin kranki bilong em​—yu mas tingim ol gutpela pasin bilong em. Wanpela yangpela meri, nem bilong em Dodi, mama bilong em i no save tingim em na papa i man bilong dring. Tasol Dodi i gat gutpela tingting na em i no bel nogut long ol pasin kranki bilong tupela. Em i tok: “Taim mama i pikinini yet, papamama i bin mekim nogut long em, olsem na em i no save mekim pasin sori long mipela ol pikinini, long wanem em i no bin lain long mekim. Papa i save tingim mipela taim em i no dring, tasol em wan wan taim tasol, long wanem planti taim em i spak. Tasol papa i lukautim mitupela sista bilong mi long kaikai samting.”

Tasol i no gat planti papamama olsem. Ating papamama bilong yu i save tingim yu na ol i wok long mekim gutpela pasin bambai ol i ken i stap olsem gutpela piksa. Tasol ating sampela taim yu bel nogut long sampela pasin bilong ol. Wanpela yangpela man, nem bilong em Roja, em i tok: “Sampela taim mi toktok wantaim mama long wanpela hevi bilong mi na mama i no pilim tingting bilong mi, na nau mi belhat na mi mekim sampela tok bilong bagarapim bel bilong em. Mi mekim olsem bilong bekim nogut long em. Tasol taim mi lusim em i go, bel bilong mi i stap nogut, na mi save bel bilong em tu i hevi.”

Sapos man i no tingting gut na i tok, orait tok bilong em inap “bagarapim bel bilong narapela man olsem bainat i sutim em.” Tasol dispela kain tok i no inap stretim hevi bilong yu. “Tasol tok bilong man i gat gutpela tingting i save helpim ol man olsem gutpela marasin.” (Sindaun 12:18; 15:1) Roja i stori olsem: “I hatwok, tasol mi save go bek na tok sori long mama. Na nau mitupela inap toktok gut wantaim long hevi bilong mi na mitupela inap stretim.”

‘Tok Bilong Papa i Stret’

Sampela yangpela i sakim tok bilong papamama na ol i givim bikpela hatwok long ol yet na long papamama, tasol bihain ol i kisim save olsem dispela tok bilong papamama i stret. Tingim Veda (em pastaim yumi bin stori long em), wanpela taim em i raun long ka wantaim boipren bilong em. Man hia i spak long maruana na bia. Em i draiv na givim siksti na ka i bamim wanpela pos. Veda i no bagarap, tasol wanpela hap glas i katim pes bilong em nogut tru. Boipren bilong em i ranawe na em i no go lukim Veda long haus sik.

Veda i tok: “Taim papamama i kamap long haus sik mi tokim tupela, olgeta tok papa i bin givim long mi long bipo i stret na mi yet mi asua, long wanem mi no bin bihainim tok bilong em. . . . Mi popaia tru na klostu mi bagarap.” Bihain Veda i stretim tingting bilong em na kisim gutpela tingting long papamama.

Ating yu tu yu mas stretim sampela tingting bilong yu. Dispela lo bilong Baibel i tok, ‘yu mas bihainim tok bilong papamama,’ sampela yangpela i ting dispela lo i no bilong ol yangpela bilong nau i mas bihainim. Tasol sapos yu bihainim tok bilong papamama, yu bihainim savepasin, na bikpela samting em olsem: Yu mekim pasin i stret long ai bilong God. Tasol olsem wanem sapos yu laik harim tok bilong papamama, tasol yu pilim olsem tupela i no save gut long tingting bilong yu o tupela i putim planti tumas tambu long yu na dispela i kalabusim yu? Orait, nau yumi ken stori long ol samting yu ken mekim bilong stretim kain hevi olsem.

[Ol Futnot]

Toktok Wantaim long Ol Dispela Askim

◻ Yu mas mekim wanem bilong daun long papamama?

◻ Bilong wanem papamama i save putim planti lo long yu? Yu ting ol dispela lo inap helpim yu?

◻ Sapos papamama i gat sampela pasin i no gutpela, yu mas daun long tupela o nogat? Bilong wanem yu mas mekim olsem?

◻ Sapos sampela taim yu bel nogut long papamama, yu ken mekim wanem na bai gutpela samting i kamap? Wanem sampela pasin longlong yu no ken mekim?

[Rait long pes 16]

“Mi ting papa i mekim hatpela pasin tumas long mi na em i no laik bai mi kisim liklik amamas, olsem na mi sakim tok bilong em na mi bihainim laik bilong mi yet”

[Piksa long pes 12]

Yu mas ting olsem wanem long ol lo papamama i putim long yu?

[Piksa long pes 14]

Sapos pasin bilong papamama i no gutpela tumas, yu mas daun long tupela?