Tok Bilong Yu i Save Bagarapim o Mekim Gut Long Man?
LONG dispela taim nogut, yumi no kirap nogut olsem planti manmeri “i gat hevi” na “[tingting] bilong ol i bagarap.” (Song 34:18) Olsem na oltaim yumi mas “strongim bel bilong ol man i save pret na . . . helpim ol man i no strong” olsem aposel Pol i bin tok. (1 Tesalonaika 5:14) Tasol olsem wanem sapos narapela i rongim yumi o em i mekim wanpela bikpela rong? Long kain taim olsem, ating yumi ting i stret yumi givim sampela strongpela tok long em. Tasol yumi mas tingting gut. Ol tok yumi givim bilong stretim man, maski i gat as tru long givim, tasol em inap bagarapim man sapos yumi givim long em long hatpela pasin. Sindaun 12:18 i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em.”
Olsem na taim yumi laik givim tok bilong stretim wanpela man o stretim wanpela hevi, em i bikpela samting long tingim namba tu hap bilong Sindaun 12:18: “Tok bilong man i gat gutpela tingting i save helpim ol man olsem gutpela marasin.” Oltaim yu mas askim yu yet, ‘Sapos ol i mas stretim mi, mi laik bai ol i mekim wanem pasin long mi?’ Planti bilong yumi i amamas long kisim ol tok bilong strongim yumi na yumi no amamas long ol tok i kamapim ol pasin kranki bilong yumi. Olsem na yumi ken tokaut long ol gutpela wok o pasin bilong narapela. Planti taim dispela bai kirapim man i mekim rong long kamap gutpela, na em bai amamas long kisim sampela tok moa bilong helpim em.
Long olgeta taim yumi mas givim tok long narapela long pasin isi, em i bikpela samting! Ol tok bilong mekim gut bel bilong man bai mekim na man yu givim tok long em bai pilim wankain olsem man bilong raitim Song, em i tok: “Sapos stretpela man i paitim mi, dispela i olsem em i mekim gutpela pasin sori long mi; na sapos em i givim tok long mi bilong stretim mi, em i olsem wel long het, na het bilong mi i no laik sakim.”—Song 141:5, NW.