Makim Gut Ol Pren Bilong Yu

Ol gutpela pren i save helpim yumi long stap amamas long gutpela taim, na ol i strongim yumi long taim bilong hevi. Tasol Baibel i givim tok lukaut olsem i no olgeta man inap stap gutpela pren. So hau bai yu inap makim ol gutpela pren? Skelim ol dispela askim.

1. Ol pren yu makim ol inap mekim wanem long yu?

Ol man yumi pas wantaim ol long olgeta taim, yumi bai kisim pasin bilong ol. Dispela inap helpim yumi o nogutim yumi​—na em tru sapos yumi save toktok wantaim ol long olgeta taim o yumi toktok wantaim ol long rot bilong Intenet. Olsem Baibel i tok, “man i wokabaut wantaim ol man i gat savetingting, em bai gat savetingting, tasol man i poroman wantaim ol longlong man, trabel bai painim em.” (Provep 13:20) Ol pren husat i laikim na lotuim Jehova ol inap helpim yu long pas gut wantaim em, na long mekim ol gutpela disisen. Tasol sapos yumi pas wantaim ol man i no laikim Jehova, ol inap pulim yumi i go longwe long em. Olsem na Baibel i kirapim yumi long makim gut ol pren! Sapos ol pren bilong yumi em ol man i laikim God, ol bai helpim yumi na yumi bai helpim ol. Na yumi bai “wok yet long mekim isi bel bilong narapela narapela na strongim narapela narapela.”​—1 Tesalonaika 5:11.

2. Jehova bai pilim olsem wanem long ol pren yu makim?

Jehova i save makim gut ol pren bilong em. “Em i save pas gut wantaim man bilong mekim stretpela pasin.” (Provep 3:32) Jehova bai pilim olsem wanem sapos yumi makim ol pren em ol man i no laikim em? Em i no inap amamas! (Ritim Jems 4:4.) Tasol Jehova bai amamas na makim yumi olsem pren bilong em sapos yumi sakim ol poroman nogut na pas gut wantaim em na ol man i laikim em.​—Buk Song 15:1-4.

KISIM SAMPELA SAVE MOA

3. Lukaut long ol poroman nogut

Ol man i no laikim God na ol lo bilong em ol i no gutpela poroman. Pilaim VIDIO, na stori long dispela askim.

VIDIO: Sakim Ol Poroman Nogut (6:17)

• Hau yumi inap poromanim ol man nogut na yumi no luksave long dispela?

Ritim 1 Korin 15:33, na stori long ol dispela askim:

• Long yu yet, wanem kain man i poroman nogut? Bilong wanem?

Ritim Buk Song 119:63, na stori long dispela askim:

• Wanem samting bai soim yu olsem wanpela i gutpela pren o nogat?

4. Ol man i no wankain long yumi ol inap kamap gutpela pren bilong yumi

Baibel i stori long Devit na Jonatan, tupela man bilong Israel bilong bipo. Ol i gat narapela narapela krismas na sindaun; tasol ol i stap gutpela pren tru. Ritim 1 Samuel 18:1, na stori long dispela askim:

• Yu ting yu mas prenim tasol ol man i gat wankain krismas o sindaun olsem bilong yu?

Ritim Rom 1:11, 12, na stori long dispela askim:

• Olsem wanem ol pren i laikim Jehova i ken strongim narapela narapela?

Long dispela vidio, lukim hau wanpela yangpela brata i painim ol gutpela pren. Pilaim VIDIO, na stori long ol dispela askim.

VIDIO: Painim Ol Pren i Gat Kain Kain Krismas (5:06)

• Long vidio, wai na papamama bilong Akil i tingting planti long ol pren bilong em long skul?

• Pastaim, wanem ol samting i mekim na em i laikim ol dispela pren?

• Olsem wanem em i daunim hevi bilong pilim olsem em i stap wanpis?

5. Rot bilong kisim ol gutpela pren

VIDIO: Husat Em i Pren Tru? (4:14)

Ritim Provep 18:24 na 27:17, na stori long ol dispela askim:

• Olsem wanem ol pren tru i helpim narapela narapela?

• Yu gat ol gutpela pren olsem? Sapos nogat, hau bai yu inap kisim ol kain gutpela pren olsem?

Ritim Filipai 2:4, na stori long dispela askim:

• Bilong kisim ol gutpela pren, yu yet i mas i stap gutpela pren. Hau bai yu inap mekim olsem?

OL BIKPELA POIN

Sapos yumi makim gut ol pren bilong yumi, yumi amamasim Jehova na dispela i helpim yumi yet.

Riviu

• Wai na ol pren yumi makim, dispela i bikpela samting long Jehova?

• Yumi mas sakim wanem kain ol pren?

• Hau bai yu strongim pasin pren bilong yu wantaim ol man em i stret yu poroman wantaim ol?

MEKIM WOK PAINIMAUT

Lukim hau ol gutpela pren inap helpim yu long taim bilong ol hevi.

“Strongim Pasin Pren Paslain Long Pinis i Kamap” (Wastaua, Novemba 2019)

Skelim sampela gutpela rot yu ken bihainim long stap gutpela pren bilong ol narapela.

“Olsem Wanem Mi Inap Painim Ol Gutpela Pren?” (Atikol long jw.org/tpi)

Wanem samting yu mas save long en long ol pren long Intenet?

Sosel Netwok—Bihainim Savetingting (4:12)

Long stori “Mi laik tru bai mi gat wanpela papa,” luksave long samting i mekim na wanpela man i mas skelim gut gen ol poroman bilong em.

“Baibel i Save Senisim i Stap Bilong Man” (Wastaua, Epril 1, 2012)

1. Yumi mas tingim wanem samting taim yumi makim ol amamas yumi laik kisim?

Yu laik mekim wanem taim yu kisim malolo? Sampela i laik yusim taim bilong ol long malolo long stap isi tasol long haus​—ritim buk, harim ol musik, watsim muvi, o lukluk long Intenet. Na sampela i amamas long mekim ol samting wantaim ol pren bilong ol​—raun long bus, go was was, o pilai gem. Maski wanem kain amamas yumi makim, yumi laik bai “Bikpela i orait long en.” (Efesus 5:10) Em i bikpela samting long yumi mas kliagut long dispela bikos planti amamas long nau i kamapim ol samting we Jehova i heitim, olsem pait na kilim man i dai, pasin pamuk, na wok bilong ol spirit nogut. (Ritim Buk Song 11:5.) Wanem samting bai helpim yumi long makim gut ol amamas yumi laik kisim?

Sapos yumi gat ol pren husat i laikim Jehova, gutpela pasin bilong ol inap helpim yumi na i stiaim yumi long makim gut ol amamas yumi laik kisim. Olsem yumi lainim long wanpela lesen i go pinis, “man i wokabaut wantaim ol man i gat savetingting, em bai gat savetingting.” Tasol sapos yumi save poroman wantaim ol man i no laikim ol lo bilong God “trabel bai painim” yumi.​—Provep 13:20.