“Wok Bilong God Yupela i Mekim Wantaim Stretpela Tingting”
“Yupela i mas givim bodi bilong yupela long God olsem ofa . . . em wok bilong God yupela i mekim wantaim stretpela tingting.”—ROM 12:1, NW.
BIPO yu bin traim lainim wanpela nupela tok ples? Sapos olsem, yu save pinis em i hatwok. Long wanem, i no olsem yu lain long kolim wan wan tok tasol. Sapos yu laik save gut long mekim dispela tok ples, yu mas lain long skruim gut olgeta tok wantaim na kolim stret; na yu mas save, olsem wanem narapela tok i helpim narapela tok, na taim yu bungim ol dispela tok wantaim, bai tok bilong yu i kamapim gut tingting bilong yu.
2 Na i wankain tu long taim yumi wok long kisim save long Baibel. Yumi no ken lain tasol long ol wan wan hap tok i stap nabaut long Baibel, nogat. I olsem yumi mas lain long skruim gut ol hap tok wantaim. Yumi mas lain long olsem wanem narapela tok i helpim narapela tok, na olsem wanem ol dispela tok bilong Baibel i ken kamap olsem ol as lo bilong stiaim wokabaut bilong yumi. Olsem bai yumi “kisim tru olgeta gutpela pasin, na . . . yumi i redi long mekim olgeta kain gutpela wok.”—2 Timoti 3:17.
3 Taim ol Israel i stap aninit long Lo Bilong Moses, sapos ol i bihainim stret ol lo i kolim klia ol samting ol i mas mekim, dispela em i wanpela rot bilong makim olsem ol i stap gut long God. Tasol long yia 33 Jehova i pinisim Lo—i olsem em i “nilim” long diwai ol i bin kilim i dai Pikinini bilong em long en. (Kolosi 2:13, 14) Bihain long dispela taim, God i no bin givim wanpela lista long lain bilong em i kolim ol ofa ol i mas mekim na ol lo ol i mas bihainim. Jehova i tokim ol: “Yupela i mas givim bodi bilong yupela long God olsem ofa . . . em wok bilong God yupela i mekim wantaim stretpela tingting bilong yupela.” (Rom 12:1, NW) Em nau, olgeta Kristen i mas wok strong tru long bel na tingting na strong olgeta bilong ol long mekim wok bilong God. (Mak 12:30; skelim wantaim Song 110:3.) Tasol wanem insait bilong dispela tok, “em wok bilong God yupela i mekim wantaim stretpela tingting bilong yupela”?
4 Dispela tok “stretpela tingting” ol i kisim long wanpela tok Grik, lo·gi·kosʹ, i olsem “tingting stret” o “i gat save.” Baibel i bin skulim bel bilong ol wokman bilong God na ol i mas mekim wok long en. Ol Kristen i no ken tingim ol planti planti lo na skelim ol samting ol i mas mekim, nogat. Ol i mas skelim gut ol tok bilong Baibel i olsem as lo. Ol i mas save, olsem wanem narapela tok bilong Baibel i helpim narapela tok bilong en. Long dispela rot ol inap wokim tingting bilong ol na tingim gut ol samting ol i mas mekim.
5 Tasol olsem wanem? Ol Kristen i no gat sampela lo ol i mas bihainim? Nogat, i no olsem. Ol Skripsa Grik i tambuim tru pasin bilong lotuim ol god giaman, pasin pamuk, kilim man i dai, giaman, mekim wok bilong ol spirit nogut, mekim wok nogut long blut, na ol narapela rong. (Aposel 15:28, 29; 1 Korin 6:9, 10; KTH 21:8) Tasol yumi mas wokim moa yet tingting bilong yumi, winim ol Israel, bambai yumi ken lain na bihainim ol tok bilong Baibel i olsem lo bilong stiaim yumi. Yumi no inap lain hariap tasol—yumi mas lusim bikpela hap taim na wok strong tru, olsem man i lain long wanpela nupela tok ples. Orait, olsem wanem yumi inap kisim pasin bilong wokim gut tingting na bai yumi inap skelim gut ol samting?
Pasin Bilong Wokim Gut Tingting
6 Namba wan samting, em yumi mas givim bel long stadi long Baibel. Tok Bilong God “i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.” (2 Timoti 3:16) Yumi no ken ting sapos yumi lukim wanpela ves tasol bilong Baibel bai yumi save long rot bilong stretim wanpela hevi, nogat. Yumi mas lukim sampela ves moa i toktok long dispela samting, na yumi mas wokim tingting na skelim gut ol dispela tok. Yumi mas wok strong tru long painim tingting bilong God long dispela samting. (Sindaun 2:3-5) Na yumi mas i gat gutpela tingting, long wanem, “dispela buk . . . bai i skulim ol man i gat gutpela tingting long ol gutpela rot ol i ken bihainim.” (Sindaun 1:5) Man i gat gutpela tingting em inap skelim olgeta wan wan samting insait long wanpela hevi samting, na nau em inap save, narapela i mekim wanem long narapela. Em i mas mekim olsem wanpela kain pilai ol man i wokim, em ol i save brukbrukim wanpela piksa na man i mas skruim gut olgeta wan wan hap bilong en na nau piksa i kamap ples klia.
7 Yumi ken tingim wok bilong ol papamama. Sindaun 13:24 i tok, sapos papa i laikim tru pikinini bilong em, papa bai “strong long stretim em.” Orait, sapos yumi lukim dispela hap tok tasol bilong Baibel yumi inap ting, i orait long papa i ken mekim hatpela pasin long pikinini na givim kanda long em oltaim. Tasol Kolosi 3:21 i stretim tingting bilong yumi, em i tok: “Yupela papa, yupela i no ken mekim ol pikinini bilong yupela i kros, nogut ol i pilim olsem ol i no inap mekim wanpela gutpela wok.” Ol papamama i wokim gut tingting bilong ol na ol i save, olsem wanem dispela tupela tok bilong Baibel i poroman wantaim, ol i no inap mekim hatpela pasin long pikinini na paitim em nogut bilong stretim em. Ol bai mekim pasin sori long pikinini na pilim gut tingting bilong em. (Efesus 6:4) Olsem na long wok bilong papamama na long ol narapela wok tu em tok bilong Baibel i mas stiaim yumi long mekim, sapos yumi skelim ol narapela narapela tok bilong Baibel long dispela samting na yumi save, olsem wanem narapela tok i helpim narapela tok, long dispela rot bai yumi kisim pasin bilong skelim gut ol samting long tingting. Bai yumi kisim tingting bilong God long dispela samting na olsem wanem yumi inap mekim dispela wok. I olsem yumi lain long “skruim gut olgeta tok wantaim na kolim stret” na bai yumi inap pilim tru ol tok bilong Baibel i olsem lo yumi mas bihainim.
8 Namba 2 rot bilong kisim pasin bilong skelim gut ol samting long tingting, em yumi no ken ting olsem tingting bilong yumi tasol i stret na yumi strong tru long ol narapela i mas bihainim. Dispela i save pasim rot bilong kisim pasin bilong skelim gut ol samting long tingting. Yumi ken tingim ol amamas bilong skin. Baibel i tok: “Dispela graun olgeta em i stap aninit long strong bilong Satan.” (1 Jon 5:19) Tasol olsem wanem? Dispela i makim olsem olgeta buk bilong graun o piksa wokabaut o ol program long televisen i nogut tasol na em i bilong Satan? Sapos yumi ting olsem, orait yumi no bihainim stretpela tingting, a? Tru, sampela ol i laik klia olgeta long ol piksa long televisen o piksa wokabaut o ol buk bilong graun. Dispela em i samting bilong ol yet, na yumi no ken skelim. I stret ol i ken mekim olsem sapos ol i laik. Tasol ol i no ken wok long subim ol narapela long bihainim dispela lo bilong ol. Sosaiti i bin kamapim planti tok long ol nius na buk i kolim ol tok bilong Baibel long dispela samting, na dispela inap helpim yumi long bihainim stretpela tingting na skelim ol samting yumi ken lukim o mekim long taim bilong malolo o long taim yumi laik kisim sampela amamas. Tasol sapos yumi kalapim ol dispela tok bilong Baibel i bilong soim rot long yumi na yumi wok long lukim piksa bilong pasin pamuk samting o pait na bagarapim man o wok bilong ol spirit nogut, yumi no bihainim gutpela tingting, nogat tru. Bilong skelim gut ol samting yumi bai mekim bilong kisim amamas, yumi mas mekim wok long tingting bilong yumi bambai yumi ken bihainim ol tok bilong Baibel; olsem bai yumi inap sanap long ai bilong God na ol man na bel bilong yumi i no gat tok.—1 Korin 10:31-33.
9 Yumi save pinis, planti amamas bilong graun long nau i no stret long ol Kristen i mekim.a Olsem na yumi mas skulim bel long nolaik tru long pasin nogut bambai yumi no ken kamap wankain olsem sampela long taim bilong ol aposel, em “ol i no save sem moa long pasin ol i save mekim.” (Song 97:10; Efesus 4:17-19) Bilong skelim gut ol dispela samting, yumi mas kisim stretpela ‘save, na tingting bilong yumi i kamap klia tru.’ (Filipai 1:9) Dispela tok “tingting i kamap klia,” long tok Grik i olsem “pilim tru wanem pasin i stret na wanem pasin i no stret.” Na em i makim tu ol samting skin i save mekim, olsem lukluk. Taim yumi laik skelim ol samting yumi ken mekim bilong kisim amamas, o ol narapela samting em yumi yet i mas tingim, orait yumi mas inap long pilim tru wanem pasin i stret na wanem pasin i no stret; olsem bai yumi inap lukim gut tru ol samting i stap ples klia na ol samting i stap hait liklik na i no klia tumas. Tasol yumi no ken makim wanpela tok bilong Baibel na putim olsem lo i tambuim sampela pasin, na yumi strong long olgeta brata i mas mekim olsem.—Filipai 4:5.
10 Namba 3 rot bilong kisim pasin bilong skelim ol samting long tingting, em yumi mas pilim tingting bilong Jehova na putim gut long bel. Long Baibel Jehova i save kamapim ol pasin na lo bilong em. Olsem: Song 15 i stori long kain man Jehova i save singautim em i go i stap long haus bilong em. Kain man olsem, em i save mekim stretpela pasin, em i save tok tru oltaim, em i save inapim ol promis em i bin mekim, em i no save tingim skin bilong em yet. Taim yu kaunim dispela Song, askim skin bilong yu: ‘Mi gat ol dispela pasin? Jehova inap singautim mi i go i stap long haus bilong em?’ Bai yumi inap skelim ol samting long tingting sapos yumi bihainim pasin na tingting bilong Jehova.—Sindaun 3:5, 6; Hibru 5:14.
11 Long dispela samting yet, ol Farisi i pundaun tru. Long skin ol i save long sampela samting bilong Lo, tasol ol i no save long pasin bilong “skruim gut olgeta tok wantaim na kolim stret.” Tru, ol inap kolim nating planti liklik liklik hap bilong Lo, tasol ol i no pilim pasin bilong Jehova, em i As bilong Lo. Jisas i tokim ol: “Olgeta liklik sayor na kumu samting bilong gaden em yupela i save tilim long 10-pela hap na givim wanpela hap long God. Tasol yupela i save lusim stretpela pasin na pasin bilong laikim God.” (Luk 11:42) Tingting bilong ol Farisi i strong tumas, na bel bilong ol i pas pinis, olsem na ol i no inap skelim gut ol samting long tingting bilong ol. Tingting kranki bilong ol i kamap ples klia taim ol i krosim ol disaipel bilong Jisas, em ol i kisim sampela wit long gaden long de Sabat na ol i kaikai; tasol long dispela de yet, bel bilong ol Farisi i no gat tok taim ol i bung na pasim tok long kilim i dai Jisas!—Matyu 12:1, 2, 14.
12 Yumi laik i stap narapela kain long ol Farisi. Yumi kisim save pinis long Tok Bilong God na dispela i mas helpim yumi long bihainim moa yet ol pasin bilong Jehova. Orait, yumi ken mekim olsem wanem? Taim sampela i kaunim wanpela hap bilong Baibel o wanpela buk i kamapim tok bilong Baibel, ol i bin tingim sampela askim olsem: ‘Dispela tok mi bin kaunim, em i bin skulim mi olsem wanem long Jehova na ol pasin bilong em? Olsem wanem mi inap kamapim ol pasin bilong Jehova long ol samting mi mekim long ol narapela man?’ Sapos yumi tingim gut ol kain askim olsem, dispela i lainim yumi long skelim gut ol samting long tingting, na em i helpim yumi long kamap man bilong “bihainim ol pasin [God] yet i save mekim.”—Efesus 5:1.
Ol Wokboi Bilong God na Krais Tasol
13 Ol elda i mas larim ol manmeri i stap long han bilong ol long skelim ol samting long tingting bilong ol. Ol manmeri insait long kongrigesen i no wokboi bilong ol man. Pol i tok: “Sapos mi wok yet long grisim ol man, orait mi no wokman bilong Krais.” (Galesia 1:10; Kolosi 3:23, 24) Tasol ol Farisi i laik bai ol man i ting, em i bikpela samting moa long ol man i mas orait long ol, na i no bikpela samting long God i mas orait long ol. (Matyu 23:2-7; Jon 12:42, 43) Ol Farisi i makim ol yet long bosim strong wokabaut bilong ol man, na ol i kamapim ol lo bilong ol yet na bihain ol i skelim ol man long pasin ol i mekim—ol i bihainim stret ol dispela lo o nogat. Ol man i bihainim ol Farisi, ol i no strong long mekim wok long ol tok bilong Baibel ol i bin lainim na i stap long bel bilong ol, olsem na ol i kamap olsem wokboi bilong ol man.
14 Ol elda Kristen long nau ol i save, i no wok bilong ol long skelim ol pasin na wok bilong ol sipsip. Olgeta Kristen wan wan i mas karim hevi bilong ol yet. (Rom 14:4; 2 Korin 1:24; Galesia 6:5) Dispela samting i stret. Long wanem, sapos ol sipsip i mas i stap wokboi bilong ol man, na ol i mas bihainim tok long wanem ol dispela man i lukluk long ol, orait ol wokboi bai mekim wanem taim ol dispela man i no stap? I gat as na Pol i amamas long ol Filipai. Em i tok: “Oltaim yupela i save bihainim tok bilong mi, na nau tu yupela i mas mekim olsem. Yupela i no ken bihainim tok long taim mi stap wantaim yupela tasol. Nogat. Nau mi stap longwe, na yupela i mas bihainim gut tru. God i kisim bek yupela pinis, na nau yupela i mas pret na guria na wok strong long kisim tru dispela presen em i makim bilong yupela.” Em nau, ol Filipai ol i wokboi bilong Krais, i no bilong Pol.—Filipai 2:12.
15 Olsem na ol elda i no save kolim ol samting em brata o sista i mas mekim sapos em i wanpela samting maus bilong bel yet i mas skelim. Ol elda i save kamapim sampela tok bilong Baibel na nau brata o sista i mas skelim long tingting bilong em yet. Em bikpela wok em i mas mekim, tasol em i wanpela wok bilong em yet, olsem wanpela hevi em yet i mas karim.
16 Yumi ken tingim taim Jehova i bin putim ol hetman bilong soim rot long ol Israel. Baibel i tok: “Long dispela taim, ol Israel i no gat king. Olsem na olgeta man i save mekim ol samting long laik bilong ol yet.” (Hetman 21:25) Tasol Jehova i wokim rot bambai lain bilong em inap kisim sampela tok bilong soim rot long ol. Olgeta taun i gat sampela man olsem elda, na sapos wanpela man i gat sampela askim o hevi, em i ken i go long ol dispela elda na ol bai givim sampela tok long em bilong helpim em. Na tu, ol pris bilong lain Livai i save skulim ol man long ol lo bilong God na long dispela rot ol i stiaim ol man long bihainim gutpela pasin. Taim wanpela bikpela hevi i kamap na i hatwok long stretim, orait long rot bilong tupela ston bilong kisim save long laik bilong God, hetpris inap askim God long givim tingting long em. Buk Insight on the Scriptures i tok: “Taim man i bihainim ol dispela pasin na em i kisim save long lo bilong God na bihainim, em i gat gutpela samting bilong stiaim maus bilong bel bilong em. Orait, taim em i ‘mekim wanpela samting long laik bilong em yet,’ dispela i no inap kamapim ol samting nogut. Jehova i bin givim rot long ol Israel na bai ol inap kamapim klia olsem ol i amamas o ol i no amamas long bihainim wanpela rot.”—Volyum 2, pes 162-163.b
17 Olsem ol hetman na pris bilong Israel bipo, ol elda tu i save helpim kongrigesen na givim ol gutpela tok long ol bilong helpim ol long stretim ol hevi bilong ol. Na sampela taim ol elda i save “givim strongpela tok long ol bilong sutim bel bilong ol na bilong kirapim ol long tanim bel na bihainim pasin bilong God. Na oltaim [ol i] isi long ol na skulim ol gut long ol pasin God i laikim.” (2 Timoti 4:2) Ol elda i save kamapim tok bilong God yet taim ol i laik helpim man, na i no tok bilong ol yet. Na taim ol i stap olsem gutpela piksa na ol i wok strong long putim tok bilong God i go daun long bel bilong man, dispela i kamapim gutpela samting!
18 Bel i olsem “ensin” i save kirapim yumi long mekim wok Kristen. Olsem na Baibel i tok: “Gutpela tingting bilong stiaim laip bilong yu, em i save kamap long [bel, NW] bilong yu.” (Sindaun 4:23) Taim elda i putim tok i go daun long bel bilong ol manmeri insait long kongrigesen, dispela i save kirapim ol long wok strong long mekim wok bilong God. Ol yet i save kirap na mekim wok, na i no gat wok long ol narapela i mas kirapim ol oltaim long mekim. Jehova i no laik bai ol narapela i mas subim yumi long bihainim tok bilong em. Em i laik bai yumi bihainim tok bilong em, long wanem, yumi save laikim em tru. Bilong kirapim ol sipsip long givim bel tru long mekim wok bilong God, ol elda i mas helpim ol sipsip long kisim pasin bilong skelim ol samting long tingting bilong ol.
Kisim “Tingting Bilong Krais”
19 Olsem yumi tok pinis, sapos yumi save long lo bilong God na em tasol, dispela i no inap. Man bilong raitim Song i tok: “Mekim klia mining bilong lo bilong yu, na bai mi bihainim. Bel bilong mi bai i kirapim mi long bihainim olgeta lo.” (Song 119:34) Long Baibel Jehova i kamapim klia “tingting bilong Krais.” (1 Korin 2:16) Jisas i bin skelim ol samting long tingting bilong em na em i mekim wok bilong Jehova, na long dispela pasin em i stap olsem nambawan piksa bilong yumi. Em i save long ol lo na tok bilong God, na em i bihainim olgeta. Sapos yumi kisim save long dispela pasin bilong em, bai yumi inap “save gut long pasin bilong Krais long laikim tru ol arapela, em i bikpela tru, na i go longpela moa, na i go antap tru, na i go daun moa.” (Efesus 3:17-19) Tru tumas, taim yumi kisim save long Jisas long rot bilong Baibel, i no olsem yumi save nating long planti stori bilong em, nogat; yumi inap save klia long ol pasin bilong Jehova yet.—Jon 14:9, 10.
20 Olsem na taim yumi stadi long Baibel, yumi inap pilim gut tingting bilong Jehova, na nau yumi inap tingim gut ol samting yumi mas mekim. Tru, yumi mas wok strong. Yumi mas givim bel long stadi long Baibel na bai yumi ken pilim tru ol pasin bilong Jehova na wanem pasin i stret long ai bilong em. I olsem yumi lain long kolim stret nupela tok ples. Ol man i mekim olsem ol i bihainim tok bilong Pol, em i tok, yumi “mas givim bodi bilong [yumi] long God olsem ofa . . . em wok bilong God [yumi] i mekim wantaim stretpela tingting.”—Rom 12:1, NW.
[Ol Futnot]
a Olsem na yumi no ken mekim sampela amamas i gat ol samting insait long en olsem ol samting bilong ol spirit nogut, o ol piksa nogut i gat sem, o ol i bagarapim nogut tru ol man, na sampela stori ol i tok em i bilong ol famili i lukim na i givim tingting long ol man olsem pamuk samting i no gat rong, em ol samting ol Kristen i no inap orait long en.
b Sosaiti Wastaua bilong Nu Yok i wokim.
Yu Lainim Wanem Samting?
◻ Wanem senis i bin kamap long yia 33 long pasin bilong mekim wok bilong God?
◻ Olsem wanem yumi inap kisim pasin bilong skelim ol samting long tingting bilong yumi?
◻ Olsem wanem ol elda i ken helpim ol sipsip long i stap wokboi bilong God na Krais?
◻ Bilong wanem yumi mas “kisim tingting bilong Krais”?
[Askim Bilong Stadi]
1, 2. Taim yumi lain long bihainim ol tok bilong Baibel, olsem wanem em i kain olsem yumi lainim nupela tok ples?
3. Wanem senis i bin kamap long yia 33 long pasin bilong mekim wok bilong God?
4, 5. Yumi mas mekim wanem bambai yumi ken mekim wok bilong Jehova wantaim stretpela tingting bilong yumi?
6. Bilong stadi long Baibel yumi mas mekim wanem?
7. Olsem wanem ol papamama i ken kisim stretpela tingting long Baibel long pasin bilong stretim pikinini?
8. Long ol samting bilong amamas, olsem wanem yumi ken abrusim pasin bilong ting olsem tingting bilong yumi tasol i stret na yumi strong tru long ol narapela i mas bihainim?
9. Wanem insait bilong dispela tok, ‘tingting i kamap klia tru’?
10. Olsem wanem yumi inap save long ol pasin bilong Jehova, olsem Song 15 i kamapim?
11. Olsem wanem ol Farisi i “lusim stretpela pasin na pasin bilong laikim God”?
12. Yumi ken mekim wanem bilong bihainim moa yet ol pasin bilong Jehova?
13. Olsem wanem ol Farisi i bihainim pasin olsem hatpela bos?
14, 15. (a) Olsem wanem ol elda inap kamapim klia olsem ol i wanwok bilong ol sipsip? (b) Ol elda i mas mekim wanem long ol samting em maus bilong bel yet i mas skelim?
16. Long Israel bipo, i gat wanem pasin i stap bilong stretim ol hevi samting?
17. Taim ol elda i givim tok long man bilong helpim em, olsem wanem ol i ken kamapim klia olsem dispela em i tok bilong God na i no tok bilong ol yet?
18. Taim elda i putim tok i go daun long bel bilong man, dispela i mekim wanem gutpela wok?
19, 20. Bilong wanem em i bikpela samting long yumi mas kisim tingting bilong Krais?
[Piksa long pes 23]
Ol elda i save helpim ol narapela long skelim ol samting long tingting bilong ol