‘Amamas Wantaim Meri Yu Bin Kisim Taim Yu Yangpela’
“Yu mas amamas wantaim meri bilong yu em yu bin kisim taim yu yangpela yet.” “Pikinini, nogut yu tingting oltaim long meri bilong narapela man na yu laik holim susu bilong en.”—SINDAUN 5:18, 20; NW.
1, 2. Olsem wanem yumi ken tok pasin laikim namel long man na meri marit em i wanpela gutpela samting?
BAIBEL i no surik long kamapim sampela tok long maritpasin. Long Sindaun 5:18, 19; (NW ) Baibel i tok: “God i ken mekim gut long hul wara bilong yu, na yu mas amamas wantaim meri bilong yu em yu bin kisim taim yu yangpela yet.” “Em i naispela tumas na pasin bilong en i gutpela tru. Em i save laikim yu tumas, olsem na oltaim yu mas tingting long em na laikim em tru. Na yu mas amamas oltaim long susu bilong en.”
2 Long dispela ves, “hul wara” i makim amamas bilong maritpasin. Em i wanpela gutpela samting, long wanem, pasin laikim namel long ol marit na amamas ol i kisim bilong slip wantaim em presen i kam long God. Tasol maritpasin em bilong tupela marit tasol. Olsem na King Solomon bilong Israel long bipo, em wanpela bilong ol man i bin raitim Buk Sindaun, em i tok: “Pikinini, nogut yu tingting oltaim long meri bilong narapela man na yu laik holim susu bilong en.”—Sindaun 5:20.
3. (a) Wanem samting i painim planti marit? (b) God i ting olsem wanem long pasin pamuk?
3 Long de man na meri i marit, ol i mekim tok promis long laikim na stap gut long narapela narapela. Maski i olsem, pasin pamuk i bagarapim planti marit. Bihain long wanpela savemeri i skelim 25 ripot, em i tok olsem “inap 25 pesen bilong ol meri marit na 44 pesen bilong ol man marit i bin slip wantaim wanpela husat i no poroman marit bilong ol.” Aposel Pol i tok: “Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, . . . olgeta dispela kain man bai i no inap i go insait long kingdom bilong God.” (1 Korin 6:9, 10) Dispela tok i kamapim klia olsem long ai bilong God pasin pamuk em i bikpela sin, na ol man i save lotu tru long God ol i mas sakim dispela pasin. Wanem samting bai helpim yumi long ‘lukautim gut marit bilong yumi, na bai em i stap klin tru long ai bilong God’?—Hibru 13:4.
Was Gut Long Bel
4. Long wanem ol rot ol marit Kristen inap kirap prenim wanpela husat i no poroman marit bilong em?
4 Long nau dispela graun i pulap long olkain pasin pamuk, na planti man “i save aigris long ol meri na tingting long mekim pasin pamuk. Ol i no inap pinisim laik bilong ol long mekim sin.” (2 Pita 2:14) Ol i save prenim narapela man o meri i no poroman marit bilong ol. Long sampela hap, planti meri i kirap mekim wok mani, na nau i gat ol man na meri i wok wantaim, dispela i mekim na ol i ken prenim ol wanwok. Na tu, long rot bilong Intenet em i isi long ol man i gat pasin bilong sem, long kirap prenim ol arapela. Planti man na meri marit i kirap prenim ol arapela na ol i no luksave long samting i wok long painim ol.
5, 6. Wanem samting i painim wanpela meri Kristen na klostu em i pundaun? Dispela i lainim yumi long wanem samting?
5 Tingim wanem samting i kamap taim wanpela Kristen, em yumi ken kolim em Mary, i bin kirap prenim wanpela man na klostu em i mekim pasin pamuk. Man bilong Mary i no wanpela Witnes Bilong Jehova, na em i no save soim olsem em i laikim famili bilong em. Mary i tingim bek sampela yia i go pinis taim em i bungim wanpela wanwok bilong man bilong em. Dispela man i mekim gutpela pasin, na bihain em i kamapim olsem em i gat laik long save long ol bilip bilong Mary. Mary i tok: “Em i mekim gutpela pasin tru, na em i no wankain olsem man bilong mi.” I no longtaim na Mary na dispela man i kirap pren wantaim. Mary i tok: “Mi no mekim pasin pamuk na dispela man i gat laik long save long Baibel. Ating mi inap helpim em.”
6 Mary i laikim dispela man, tasol taim em i no mekim yet pasin pamuk, em i kisim stretpela tingting. (Galesia 5:19-21; Efesus 4:19) Maus bilong bel bilong em i kirap wok gen, na em i kirap stretim ol samting. Samting i painim Mary i kamapim klia olsem “bel bilong olgeta man i save tingting oltaim long mekim pasin giaman. Tingting bilong man em i nogut tru.” (Jeremaia 17:9) Baibel i tok: “Gutpela tingting bilong stiaim laip bilong yu, em i save kamap long tingting [“bel,” NW ] bilong yu. . . . Olsem na olgeta taim yu mas was gut tru long tingting [“bel,” NW ] bilong yu.” (Sindaun 4:23) Olsem wanem yumi inap mekim olsem?
‘Man i Gat Gutpela Tingting i Abrusim Hevi’
7. Wanem stiatok bilong Baibel bai lukautim yu taim yu laik helpim wanpela husat i gat hevi insait long marit?
7 Aposel Pol i tok: “Sapos wanpela man i ting em i sanap strong, orait em i mas lukaut gut. Nogut em i pundaun.” (1 Korin 10:12) Na Sindaun 22:3 i tok: “Man i gat gutpela tingting, em i save olsem, hevi i laik kamap long em na em i abrusim.” I no gutpela long kisim tingting olsem: ‘I no gat wanpela samting inap painim mi.’ Em i savepasin long skelim ol samting inap kamap em dispela samting inap kamapim hevi. Olsem, no ken i stap olsem man em meri i kamapim hevi bilong marit bilong em long yu, o yu no ken i stap meri em man i kamapim hevi bilong marit bilong em long yu. (Sindaun 15:22) Tokim dispela man o meri olsem em i mas toktok wantaim poroman marit bilong em long dispela hevi. Sapos em i sista em i ken kamapim long wanpela strongpela meri Kristen o sapos em i brata em i ken kamapim long wanpela strongpela man Kristen husat i laik bai marit bilong em i stap gut, o em i ken kamapim long ol elda. (Taitus 2:3, 4) Ol elda long ol kongrigesen bilong ol Witnes Bilong Jehova i stap gutpela piksa long dispela samting. Taim wanpela elda i laik toktok wantaim wanpela sista Kristen, em bai mekim long ples klia—kain olsem long Haus Kingdom.
8. Ol marit i mas was gut long wanem samting long ples wok?
8 Long ples wok o long narapela hap, abrusim ol samting em inap mekim na narapela i kirap laikim yu. Olsem, sapos yu wok long lusim sampela aua moa long wok wantaim narapela wanwok bilong yu, dispela inap pulim yu long mekim pasin pamuk. Long toktok na pasin bilong yu, yu mas kamapim klia olsem yu gat poroman marit bilong yu na yu no laik prenim narapela. Yu save lotuim God, olsem na yu no laik mekim ol samting i kirapim bel bilong narapela, olsem mekim tok gris o pasim klos na bilas i no haitim gut skin stret. (1 Timoti 4:8; 6:11; 1 Pita 3:3, 4) Sapos yu gat poto bilong poroman marit bilong yu na ol pikinini bilong yu long ples wok, dispela bai kirapim yu na ol narapela long tingim olsem famili bilong yu i bikpela samting long yu. Tingting strong olsem yu no ken kirapim wanpela—o orait liklik—long em i tok gris long yu.—Jop 31:1.
Amamas Wantaim Meri Bilong Yu Long Olgeta De
9. Wanem ol samting i save kamap na nau man o meri marit i gat bikpela laik long prenim narapela?
9 Bilong was gut long bel yu mas abrusim ol samting inap pulim yu long mekim pasin pamuk na yu mas mekim sampela samting moa. Sapos wanpela man o meri marit i kirap laikim wanpela i no poroman marit bilong em, dispela i soim olsem tupela marit i no save tingim laik na tingting bilong narapela narapela. Ating man i no save tingim meri bilong em o oltaim meri i kros na sutim tok long man bilong em. Na nau i luk olsem narapela man o meri—wanpela wanwok o wanpela insait long kongrigesen Kristen—i gat ol gutpela pasin em poroman marit bilong em i no gat. I no longtaim na narapela i kirap laikim narapela, na nau ol i gat bikpela laik tru long pren wantaim. Dispela ol samting i kamapim klia olsem tok bilong Baibel i tru: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin.”—Jems 1:14.
10. Olsem wanem ol marit i ken strongim marit bilong ol?
10 Ol man na meri marit i no ken painim narapela bilong inapim laik bilong ol—olsem ol i laik bai wanpela i laikim ol, o kamap pren bilong ol, o helpim ol long taim ol i karim hevi—tupela i mas wok long strongim pasin bilong laikim tru poroman marit bilong ol. Olsem na i gutpela ol i lusim haptaim long mekim ol samting wantaim na pas gut moa wantaim. Tingim bek wanem ol samting i mekim na yu kirap laikim em. Traim long tingim dispela filings em pastaim yu kisim long em. Tingim ol amamas yutupela i bin kisim wantaim. Beten long God long dispela samting. Man bilong raitim song, em Devit, em i tok long Jehova: “God, yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Song 51:10) Long olgeta de yu stap laip, amamas wantaim meri bilong yu.—Saveman 9:9.
11. Olsem wanem save, savetingting, na pasin bilong skelim gut ol samting i save strongim marit?
11 Save, savetingting, na pasin bilong skelim gut ol samting, ol dispela samting tu i bikpela samting bilong strongim marit. Sindaun 24:3, 4 i tok: “Man i gat gutpela tingting na save, em bai i gat gutpela haus, na famili bilong en bai i kamap strong. Dispela kain man em inap baim olkain gutpela samting i dia tumas na putim long haus bilong en.” Pasin laikim, pasin bilong stap gut long narapela, pret long God na bilip, ol dispela pasin tu i mekim famili i stap amamas. Bilong kisim ol dispela pasin man i mas kisim save long God. Dispela i makim olsem ol marit i mas stadi gut long Baibel. Na olsem wanem savetingting na pasin bilong skelim gut ol samting i bikpela samting? Bilong karim ol hevi bilong wan wan de, man i mas i gat savetingting, olsem save long rot bilong bihainim ol tok bilong Baibel. Man i save skelim gut ol samting em bai kliagut long tingting na filings bilong poroman marit bilong em. (Sindaun 20:5) Long rot bilong Solomon, Jehova i tok: “Pikinini, putim yau gut long tok bilong mi. Mi laik givim gutpela tingting na save long yu.”—Sindaun 5:1.
Taim “Hevi” i Kamap
12. Bilong wanem yumi no kirap nogut long ol marit i gat ol hevi?
12 I no gat wanpela marit i gutpela olgeta. Baibel i tok ol man na meri marit bai “painim planti hevi long laip bilong ol.” (1 Korin 7:28) Ol wari, sik, pasin birua, na ol narapela samting inap putim hevi long marit. Tasol taim hevi i kamap, yupela marit i laik amamasim Jehova, yupela i mas wok wantaim long painim rot bilong stretim dispela hevi.
13. Ol man na meri marit i ken skelim ol yet olsem wanem?
13 Olsem wanem sapos hevi i kamap long wanem tupela i no save mekim gut long narapela narapela? Bilong stretim dispela kain hevi tupela i mas wok strong. Olsem, ating pasin bilong mekim tok i bagarapim bel bilong narapela i kamap insait long marit na nau em i kamap pasin bilong tupela. (Sindaun 12:18) Olsem yumi stori long stadi i kamap paslain long dispela, dispela inap bagarapim marit. Wanpela savetok bilong Baibel i tok: “Sapos man i stap long ples wesan nating, dispela pasin i winim pasin bilong i stap wantaim meri bilong tok kros na toktok planti.” (Sindaun 21:19) Sapos yu wanpela meri marit i gat kain marit olsem, orait askim yu yet, ‘Pasin bilong mi i mekim na man bilong mi i pilim hatwok long i stap wantaim mi?’ Baibel i tokim ol man marit: “Yupela man, yupela i mas laikim tru ol meri bilong yupela, na yupela i no ken mekim nogut bel bilong ol.” (Kolosi 3:19) Sapos yu wanpela man marit, orait askim yu yet, ‘Mi no gat pasin bilong sori na tingim meri bilong mi, na dispela i mekim na em i go painim narapela man long mekim gut bel bilong em?’ Tasol ol dispela kain samting i no mekim na man o meri i gat rait long mekim pasin pamuk. Tasol dispela samting inap kamap, olsem na i gutpela long toktok gut wantaim long ol hevi i kamap insait long marit.
14, 15. Bilong wanem pasin bilong prenim wanpela husat i no poroman marit bilong yu i no inap stretim hevi bilong marit?
14 Pasin bilong painim narapela man o meri long mekim gut bel bilong yu, dispela em i no rot bilong stretim hevi insait long marit. Sapos yu mekim olsem, wanem samting bai kamap? Yu ting bai yu marit long em na marit bilong yu bai i gutpela? Ating sampela bai ting olsem. Ol bai tok, ‘Dispela man o meri i gat ol pasin em mi laikim long poroman marit.’ Tasol kain tingting olsem i giaman, long wanem, man o meri i lusim poroman marit bilong em—o i kirapim yu long lusim poroman marit bilong yu—em i no tingim marit em i samting holi. No ken ting taim yu maritim narapela man o meri, dispela marit bai i gutpela.
15 Mary, em yumi stori long em long pastaim, em i tingting gut long ol samting inap kamap long pasin em i mekim, olsem dispela inap mekim na em yet o narapela man i no inap i stap gut long ai bilong God. (Galesia 6:7) Em i tok: “Taim mi wok long skelim gen filings bilong mi long dispela wanwok bilong man bilong mi, mi luksave olsem sapos dispela man bai kisim save long tok i tru, samting mi mekim bai pasim rot bilong em long mekim olsem. Rong mi mekim inap bagarapim mi yet na man bilong mi na dispela wanwok bilong em na inap pundaunim ol arapela!”—2 Korin 6:3.
Nambawan As Bilong i Stap Gut Long Poroman
16. Wanem sampela samting nogut inap kamap bihain long man i mekim pasin pamuk?
16 Baibel i mekim tok lukaut olsem: “Sapos wanpela meri i lusim man bilong en, na i aigris long yu, orait em bai i mekim planti switpela tok gris bilong pulim yu. Na sapos yu bihainim tok bilong en, bihain bai yu pilim em i samting nogut, olsem marasin i gat pait, na em i pen olsem bainat i sutim yu.” (Sindaun 5:3, 4) Ol samting i kamap bihain long taim man i mekim pasin pamuk inap kamapim bikpela pen na hevi na inap kilim man i dai. Maus bilong bel bai kotim em, em inap kisim sik bilong pamuk, na bagarapim bel bilong poroman marit bilong em. Tru tumas, long dispela as yumi no laik tru long kirap mekim ol samting inap pulim yumi long mekim pasin pamuk.
17. Wanem nambawan as na ol marit i mas stap gut long poroman marit bilong ol?
17 Jehova, em Man i kamapim marit, na Man i wokim rot bilong man na meri marit i ken slip wantaim, em yet i no orait long pasin pamuk—dispela i nambawan as na pasin pamuk i no stret. Long rot bilong profet Malakai, Jehova i tok: “Mi bai kam bilong skelim pasin bilong yupela. Na kwiktaim bai mi kotim ol man i save . . . bagarapim marit.” (Malakai 3:5) Sindaun 5:21 i toktok long ol samting Jehova i save lukim, na i tok: “Bikpela i save lukim olgeta samting yumi mekim, na em i glasim gut olgeta pasin bilong yumi.” Yes “olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” (Hibru 4:13) Olsem na as tru na ol marit i mas stap gut long poroman marit bilong ol, em ol i mas luksave olsem maski ol i hait na mekim pasin pamuk na i luk olsem no gat bikpela hevi i kamap long en, dispela pasin bai bagarapim pasin bilong ol long pas gut wantaim Jehova.
18, 19. Stori bilong Josep wantaim meri bilong Potifar i lainim yumi long wanem samting?
18 Pasin bilong Josep, em pikinini man bilong Jekop, i kamapim klia olsem laik bilong man long stap gut long God i strongim man long mekim pasin i stret. Potifar em ofisa bilong king bilong Isip, em i amamas long Josep na i makim em long bosim olgeta samting long haus bilong em. Josep i “gat strongpela bodi na em i luk nais tru,” na meri bilong Potifar i luksave long dispela. Long olgeta de, em i traim long pulim Josep long slip wantaim em, tasol Josep i no mekim olsem. Wanem samting i mekim na Josep i sakim em? Baibel i tok: “Josep i no laik na i tokim em olsem, ‘Bos bilong mi . . . i no tambuim wanpela samting long mi. Nogat. Tasol em i no tokim mi long slip wantaim yu, long wanem, yu meri bilong en. Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.’ ”—Stat 39:1-12.
19 Singel man Josep i bihainim klinpela pasin taim em i no slip wantaim meri bilong narapela man. Sindaun 5:15 i tokim ol man marit: “Yu no ken i go long hul wara bilong narapela man. Yu mas i stap gut wantaim meri bilong yu, na slip wantaim em wanpela tasol, olsem man i dring wara long hul wara bilong em yet.” Was gut nogut yu kirap prenim wanpela husat i no poroman marit bilong yu. Wok long strongim pasin laikim insait long marit bilong yu, na stretim ol hevi inap kamap insait long marit bilong yu. Tru tumas, yu mas ‘amamas wantaim meri yu bin kisim taim yu yangpela yet.’—Sindaun 5:18, NW.
Yu Lainim Wanem Samting?
• Olsem wanem wanpela Kristen inap kirap laikim wanpela em i no poroman marit bilong em?
• Ol marit i ken mekim wanem na bai ol i no ken kirap laikim wanpela husat i no poroman bilong ol?
• Taim hevi i kamap insait long marit, ol marit i mas mekim wanem?
• Wanem nambawan as na ol marit i mas stap gut long poroman marit bilong ol?
[Piksa long pes 26]
Sori tru, ples wok inap kamap ples we man o meri marit i kirap prenim narapela
[Piksa long pes 28]
‘Man i gat gutpela tingting na save em inap baim olkain gutpela samting na putim long haus bilong en’