Mekim Tok Long Taim i Stret Long Mekim
Provep 25:11 i tok: “Sapos man i autim klia tru wanpela gutpela tingting, orait tok bilong em i olsem gutpela piksa ol i wokim long gol na bilasim long silva.” Sapos yumi tingting gut na long pasin sori yumi givim sampela tok long man i gat gutpela bel, dispela inap helpim em long bihainim gutpela pasin i stret long ai bilong Jehova. Na sapos planti yia i go pinis, dispela man inap tingim yet gutpela tok yumi bin mekim long em. Wanpela wasman sekit na meri bilong em i go long wanpela kongrigesen, na wanpela sista i baptais nupela em i singautim tupela long i kam kaikai wantaim em. Bihain wasman sekit wantaim meri bilong em i go long narapela hap, na meri bilong em i salim pas long dispela sista na em i tok tenkyu long sista long gutpela pasin em i bin mekim long tupela. Klostu etpela yia i go pinis, na sista i bekim pas na i tok:
“Pas yu bin salim long mi em i bin helpim mi gut inap planti yia nau. Mi bin givim liklik kaikai long yutupela, na yupela i salim pas long mi na tok tenkyu na givim gutpela tok long mi, na yu putim wanpela skripsa em tok bilong en i bin strongim bel bilong mi, na oltaim mi bin tingim. Mi bin kisim pas bilong yu long 1976, na long dispela taim mi tasol i bin laikim tok i tru, na ol narapela bilong famili nogat. Mi bin wok long stadi wantaim ol pikinini meri bilong mi, na mi traim bihainim pasin bilong gutpela meri marit, tasol sampela taim mi les na mi laik lusim tok i tru na ol wok bilong mi. Tasol tok bilong dispela skripsa i wok long kamap oltaim long tingting bilong mi, na mi tok, ‘Sori, dispela tingting bilong mi long lusim tok i tru em i kranki. Ating mi tingting tumas long bihainim laik bilong mi yet.’ Olsem na mi rausim dispela tingting na mi stap yet long bihainim tok i tru.
“Insait long dispela 8-pela yia i go pinis, tok bilong dispela skripsa i bin helpim mi gut, winim ol narapela samting, na mi laik toksave long yu, olsem na mi raitim dispela pas. Na yupela i bin tingim mi na raitim pas long mi maski yupela i gat planti wok; na mi no bin mekim bikpela samting tumas−givim liklik kaikai long yupela, em tasol.
“Yes na dispela skripsa hia, em 2 Jon 8.
“Mi Sandra, mi salim pas long yupela.”
Long nau man bilong Sandra i kisim baptais pinis na em i save autim gutpela tok wantaim Sandra. Wanpela pikinini meri bilong ol em i mekim wok painia oltaim, na narapela pikinini meri bilong ol i kirap mekim wok painia haptaim long taim em i lusim skul na inap long nau.
Yes na yumi laik save 2 Jon 8 i tok wanem? Em i tok: “Yupela lukaut gut. Nogut yupela i lusim ol samting yupela i wok pinis bilong kisim. Mobeta yupela i kisim gutpela pe tru.”