Sapta 6

Olsem Wanem Mi Ken Sindaun Gut Wantaim Ol Brata Susa Bilong Mi?

PLANTI brata susa i no sindaun gut wantaim​—narapela i bel nogut long narapela. Dispela pasin i kamap long bipo tru namel long Kein tupela Abel. Ating long famili bilong yu tu, yupela ol pikinini i no sindaun gut wantaim. Tasol i no olsem yu bel nogut tru long brata o susa bilong yu, a? Wanpela yangpela i tok: ‘Insait tru long bel bilong mi ating mi laikim brata bilong mi.’

Bilong wanem planti brata susa wanblut i save kros pait? Wanpela meri bilong raitim buk (em Harriet Webster) em i tok: “Ol pikinini i laik bai papamama i givim bel tru long ol na givim klos na mani samting long ol. Ol i wok strong long kisim ol dispela samting na dispela i as bilong planti kros pait i kamap namel long ol pikinini.” Wanpela yangpela meri, em Kamil, em i gat 5-pela brata na sista na ol i gat 3-pela rum slip bilong ol. Kamil i tok: “Sampela taim mi laik i stap wanpis long rum bilong mi na mi laik pasim dua long ol brata na sista bilong mi, tasol nogat. Oltaim i gat sampela i stap long rum.”

Na ol brata susa i save kros pait tu long sampela samting papamama i larim sampela i mekim na long ol wok ol i mas mekim long haus. Ating ol bikpela pikinini i bel nogut long ol i mas mekim planti wok long haus na papamama i no givim bikpela wok olsem long ol liklik. Na ating ol liklik i les long ol bikpela i laik bosim ol, o ol i bel nogut taim papamama i orait long ol bikpela i mekim sampela samting ol yet i no ken mekim. Wanpela yangpela meri bilong Englan i bel hevi na em i tok: ‘Sista bilong mi i lain long draivim ka, tasol papamama i no orait long mi mekim. Mi bel nogut long dispela samting na mi save givim hevi long em.’

Tasol sampela taim ol brata susa i gat ol narapela narapela kain pasin na dispela i save kirapim kros namel long ol. Wanpela yangpela meri i gat 17 krismas, em Daian, em i stori long ol brata na sista bilong em na em i tok: ‘Mipela i stap wantaim long olgeta de. Long olgeta de ol i mekim wankain pasin i skrapim bel bilong mi na mi les tru.’ Na yangpela man nem bilong em Andre em i tok: ‘Taim yumi stap long haus yumi kamapim long ples klia pasin tru bilong yumi.’ Tasol sori tumas, taim yumi bihainim “pasin tru bilong yumi,” ating yumi no mekim gutpela pasin long ol narapela man.

Narapela samting i save kirapim kros namel long ol brata susa em olsem: Ol i ting papamama i laikim narapela, winim ol. Wanpela dokta (Lee Salk) em i tok: ‘Ol pikinini i gat narapela narapela kain pasin, olsem na i no inap papa o mama i laikim ol wankain stret.’ Long taim bilong Baibel tu i olsem. Jekop (narapela nem bilong em Israel) “i save laikim Josep moa yet long ol arapela pikinini bilong em.” (Stat 37:3) Olsem na ol brata bilong Josep i bel nogut tru long em.

Mekim i Dai Kros

Sampela taim paia i save kamap long bus. Bilong pasim dispela paia na bai i no ken i go bikpela, ol i save katim na rausim olgeta diwai long wanpela hap bilong bus, na bai paia i kukim ol diwai i go inap long dispela mak, na nau bai paia i dai. I olsem Sindaun 26:20 i tok: “Sapos ol i no putim paiawut long paia, bai paia i dai.” Na olsem tasol i gat rot bilong pasim kros i save kamap namel long yu na ol brata susa bilong yu, olsem: Yupela i mas toktok gut wantaim na painim rot bilong stretim dispela hevi. Olsem bai kros i no ken i go bikpela, na ating bai kros i dai.

Wanpela hevi i save kamap em olsem: Ating yu wantaim ol brata o sista bilong yu i slip long wanpela rum tasol na sampela taim yu laik i stap wanpis, tasol yu no inap, na nau kros i kamap. Sapos olsem, orait yupela i ken toktok gut wantaim bilong stretim dispela hevi. Taim yupela i pasim tok pinis, orait yupela i mas truim tok bilong yupela. (Matyu 5:37) Sapos bihain wanpela samting i kamap na yupela i mas stretim tok gen, orait yu mas toksave long brata o sista bilong yu pastaim, nogut yu yet yu kirap na senisim dispela tok em yupela i pasim pinis.

Olsem wanem? Yu save kros long brata o sista bilong yu i kisim sampela samting bilong yu? Wanpela yangpela meri i bel hevi long dispela na em i tok: “Sista bilong mi i save kisim ol samting bilong mi na em i no askim mi pastaim. Em i bin kisim wanpela samting bilong mi na mekim wok long en, na bihain gen em i tok em i no laikim dispela samting!” Tru, yu inap singautim papamama long stretim dispela kain kros, tasol i gutpela sapos yu wet liklik na taim bel i kol pinis, orait nau yu yet yu ken toktok wantaim brata o sista bilong yu long dispela hevi. Yu no ken kros pait long brata o sista i kisim wanpela samting bilong yu. Gutpela sapos yu ‘hapim samting bilong yu’ i go long em. (1 Timoti 6:18) Na yupela i ken pasim tok long sampela lo yupela i ken bihainim, olsem sapos narapela i laik kisim wanpela samting bilong narapela, orait em i mas askim pastaim. Na yupela i ken tingim ol narapela samting tu yupela i ken mekim bilong stretim dispela hevi, tasol narapela i mas isi long narapela. Long dispela rot bai kros i dai. Bai i olsem “paia” i dai!

Tasol olsem wanem sapos pasin bilong brata o sista bilong yu i save skrapim bel bilong yu? Yu no inap senisim pasin bilong em. Olsem na yu mas lain long ‘givim bel long brata na karim hevi em i givim long yu.’ (Efesus 4:2) No ken tingim tingim tasol ol liklik pasin kranki bilong em; yu mas bihainim pasin sori Kristen i save “karamapim planti sin.” (1 Pita 4:8) No ken mekim sampela tok kros em inap bagarapim bel bilong em; yu mas lusim “pasin bilong kros na belhat na bel nogut, na pasin bilong tok nogut long ol arapela.” Oltaim yu mas mekim ol “gutpela tok tasol.”​—Kolosi 3:8; 4:6.

‘I No Stret!’

Wanpela manki i tok, “Olgeta samting susa bilong mi i laik kisim, em papamama i save givim long em. Ol i no save tingim mi liklik.” Olsem wanem? Yu save tok olsem? Tasol tru papamama i save tingim brata o susa bilong yu tasol na ol i no tingim yu liklik? Ating nogat, a? Na sapos tru papamama i moa tingim brata o susa bilong yu, yu no ken bel hevi long dispela, long wanem olgeta pikinini i gat narapela narapela kain pasin, olsem na yu no ken ting papamama i mas mekim wankain pasin stret long yutupela wantaim. Ating papamama i tingim ol samting ol i mas mekim bilong helpim yutupela wan wan.

Tasol sapos papa o mama i moa laikim brata o susa bilong yu, yu no ken ting em i mekim pasin i no stret. Baibel i stori long Jekop i moa laikim Josep, winim ol narapela pikinini bilong em. Wanem as bilong dispela? Jekop i laikim tumas mama bilong Josep, em Resel, em i dai pinis, olsem na yumi ken save bilong wanem Jekop i moa laikim Josep. Tasol i no olsem em i no laikim ol narapela pikinini man bilong em. Nogat. Jekop i save tingim tru ol na em i laik save, ol i stap orait o nogat. (Stat 37:​13, 14) Olsem na i no gat as na ol i bel nogut long Josep!

Na ating i wankain long papa o mama bilong yu. Ating em i moa laikim brata o susa bilong yu, long wanem tupela i gat wankain laik na pasin. Tasol i no olsem em i no laikim yu. Sapos yu bel nogut long dispela samting, yu mas save bel i giamanim yu, na yu mas wok long daunim dispela tingting kranki bilong bel. Sapos papamama i tingim yu na lukautim yu long ol samting, orait yu no ken bel nogut sapos i olsem papa o mama i moa tingim brata o susa bilong yu.

Yu Mas Amamas long Ol Brata Susa Bilong Yu

Ating sampela taim yu no amamas long ol, long wanem ol i mekim sampela samting i skrapim bel bilong yu. Tasol yangpela meri Daian i tok: “Mi amamas long ol brata na sista bilong mi.” Em i gat 7-pela brata na sista na em i tok: “Sapos yu gat sampela brata susa, em i gutpela. Yu ken toktok wantaim ol na poroman wantaim ol.”

Wanpela yangpela meri, em An Mari, wantaim brata bilong em Andre, tupela i tok: “Tru sampela taim yu inap raun wantaim ol poroman bilong yu, tasol ol brata susa bilong yu i save stap wantaim yu long olgeta taim, olsem na sapos yu laik mekim wanpela pilai o raun samting, yu gat poroman i stap.” Na Dona i tingim narapela samting ol brata susa i ken poromanim yu long mekim. Em i tok: “Ol i ken helpim yu long mekim ol wok long haus.” Na sampela yangpela i tok, brata o susa bilong ol i save ‘putim gut yau long ol hevi bilong ol na givim sampela gutpela tingting long ol’ na i save ‘pilim hevi bilong ol.’

Taim yu bikpela pinis, bai sampela hevi i kamap namel long yu na ol narapela man wankain olsem i kamap namel long yu na ol brata susa bilong yu long nau. Long wanem ol man i bikpela pinis ol tu i gat narapela narapela kain pasin, na ol i save bel nogut long narapela man, na kisim samting bilong em na ol i no askim pastaim, na ol i laikim sampela man na sampela nogat, na ol i save tingim skin bilong ol yet tasol. Olsem na taim yu yangpela yet, sapos yu lain long winim ol dispela hevi na sindaun gut wantaim ol brata susa bilong yu, orait dispela bai helpim yu taim yu bikpela pinis, na bai yu inap sindaun gut wantaim ol narapela man.

Andre em yangpela man i gat 17 krismas, na em i mekim wankain tok olsem i stap long 1 Jon 4:​20, em i tok: “Sapos yu no pren gut wantaim ol man em yu inap lukim ol, olsem wanem bai yu stap pren bilong dispela Man yu no inap lukim, em God Jehova?” Tru sampela taim bai kros i kamap namel long yu na ol brata susa bilong yu. Tasol yu inap lain long hapim samting bilong yu i go long ol, na toktok gut wantaim ol, na lusim pasin bilong mekim ol samting long laik bilong yu yet tasol. Sapos yu lain long mekim olsem, wanem samting bai kamap? Ating bai yu amamas long ol brata susa bilong yu.

Toktok Wantaim long Ol Dispela Askim

◻ Bilong wanem planti brata susa i no sindaun gut wantaim?

◻ Sapos ol brata susa i no larim yu i stap wanpis long sampela taim, o ol i kisim nating sampela samting bilong yu, orait yu ken mekim wanem na bai kros pait i no ken kamap?

◻ Bilong wanem sampela taim i olsem papa o mama i moa laikim wanpela pikinini, winim ol narapela? Yu ting dispela pasin i no stret o olsem wanem?

◻ Sapos pikinini i no gat brata o susa, dispela i nogutim em o olsem wanem?

◻ Sapos yu gat sampela brata susa, dispela inap helpim yu olsem wanem?

[Rait long pes 52]

‘Ol pikinini i gat narapela narapela kain pasin, olsem na i no inap papa o mama i laikim ol wankain stret.’​—Wanpela dokta, em Lee Salk, em i tok olsem

[Blok long pes 54]

‘Mi No Gat Brata o Susa’

Sapos yu no gat brata o susa, i no olsem dispela samting i nogutim yu. Ating ol narapela yangpela i hatwok long sindaun gut wantaim ol brata susa bilong ol, tasol yu no gat dispela hevi. Yu inap kisim ol poroman long laik bilong yu (sapos papamama i orait long ol). Na ating yu gat bikpela hap taim moa bilong stadi na tingim ol tok bilong God na lain long mekim sampela wok samting.​—Lukim Sapta 14.

Wanpela yangpela man, em Tomas, em i no gat brata o susa, tasol em i tingim narapela samting em i ken amamas long en. Em i tok, ‘Mi no gat brata o susa, olsem na papamama i tingim mi wanpela tasol.’ Tasol nogut dispela i kirapim pikinini long tingim em yet tasol. Papamama i mas was gut long dispela samting, na bai ol i helpim pikinini long kisim gutpela tingting na pasin olsem bilong man tru, na bai em i lain long pren gut wantaim ol manmeri i bikpela pinis.

Yu no gat ol brata o susa bilong givim o hapim sampela samting bilong yu i go long ol, olsem na yu mas was gut, nogut yu kisim pasin bilong tingim skin bilong yu yet tasol na yu laik kisim ol samting bilong helpim yu yet. Jisas i tok: “Yupela i mas givim ol samting long ol arapela.” (Luk 6:38) Yu mas lain long givim o hapim sampela samting bilong yu i go long ol poroman na wanblut bilong yu. Lain long pasin bilong tingim gut ol narapela man na bai yu ken save, ol i sot long wanem ol samting na yu ken helpim ol. Sapos yu mekim gutpela pasin olsem long ol man, bai ol i laikim yu, na maski yu no gat brata o susa, bai yu no stap wanpis​—bai yu gat ol gutpela poroman.

[Piksa long pes 53]

Mi no gat sista na sampela taim mi bel hevi long dispela samting, tasol mi stap gutpela