Olsem Wanem? Yu Les Long Wok Bilong Yu?
ATING yu save wok inap 8-pela aua long olgeta de. Em bikpela hap taim long i stap bilong yu, a? Olsem na nogut yu lusim nating dispela taim long pasin bilong les. Tasol planti wok ol man i mas mekim long nau em i wankain tasol long olgeta de, olsem na ol i no inap amamas tumas long en.
Sapos yu mekim sampela samting na bai wok bilong yu i kamap wanpela wok yu ken amamas long en, dispela bai helpim yu tru. Bai yu amamas moa long mekim wok, na yu lain long mekim ol samting na bai yu ken amamas long ol wok bihain bai yu mekim. Orait, yumi ken tingting long sampela rot bilong helpim yu long mekim olsem.
Givim Bel
Sampela lain i tok, i gutpela yu mekim wok olsem yu amamas long mekim. Sapos yu mekim olsem, ating bihain bai yu amamas tru long dispela wok.
Tasol ating yu bai tok: ‘Mi no ken amamas long wok bilong mi!’ Ating long ples wok bilong yu, yu mas mekim wankain samting tasol long olgeta taim. O ating yu bin mekim dispela wok inap planti yia pinis na yu pilim olsem yu no inap amamas moa long dispela wok. Tasol sampela liklik samting, olsem pasin bilong lap na sanap stret em inap helpim yu long givim bel moa long wok bilong yu.
Na ating narapela samting em inap helpim yu, em long putim gut tingting bilong yu long wok yu save mekim. Nogut yu mekim nating wok bilong yu; na taim yu wok, nogut yu tingting tasol long belo, o malolo bilong Sarere Sande, o narapela wok yu mas mekim. I gutpela yu putim tingting olgeta long wok yu save mekim. Orait, wanem samting bai kamap? Ating bihain bai yu amamas long dispela wok, na nau taim bilong wok bai pinis kwiktaim.
Dispela samting i save kamap sapos yu putim gut tingting bilong yu i go long wanpela wok yu amamas tru long en. Na ating wankain samting inap painim yu sapos yu strong long putim olgeta tingting bilong yu long wanpela kain wok yu no save amamas long mekim.
Mekim Gutpela Wok Tru
Wok strong long mekim gutpela wok. Dispela inap helpim yu long amamas long wok bilong yu. Tru, dispela kain tok i pait wantaim tingting bilong planti man olsem, taim yu no amamas long wanpela wok yu no ken wok strong long mekim. Tasol sapos yu no mekim gut wok, na surikim taim bilong mekim, na slek—ol dispela kain pasin inap pinisim strong bilong yu na mekim yu i tingting planti na les olgeta. Man i kam bek long haus na em i bel hevi na tingting planti, na skin i les olgeta, sampela taim i olsem, long wanem, em i no save wok strong.
Saveman 2:24 i tok: “Yumi save kaikai na dring, na amamas long wok bilong yumi.” Dispela tok bilong Baibel i kamapim olsem sapos yumi wok strong long wanpela wok em inap mekim na bai yumi amamas moa long taim bilong malolo. Ating sampela bai ting dispela tok i olsem olpela pinis, tasol sampela i wok long bihainim dispela tok i stret long dispela taim bipo na long nau tu. Ol i wanbel long tok, i no gat wanpela samting i winim amamas i save kamap long wok bilong ol. Wanpela buk (The Joy of Working) i tok: “Man i mekim gutpela wok, bel bilong em bai amamas.”
Olsem na mekim wok inap tru long strong na save bilong yu, na ating bai yu kisim nupela strong. No ken mekim tasol wok yu kisim, mekim sampela wok moa antap long dispela na bai yu amamas moa. Mekim ol bikpela wok pastaim, na long olgeta belo na Sarere Sande bai yu amamas, winim man i les, long wanem, em i surik long wok bilong em.—Skelim wantaim Esta 10:2; Rom 12:11; 2 Timoti 2:15.
Yu no ken tingting long winim ol narapela—yu mas mekim wok bilong yu yet i kamap gutpela moa. (Galesia 6:4) Putim sampela gutpela pasin na wok olsem mak yu ken winim. Mekim wok bilong yu i kamap gutpela moa. Wanpela meri i gat wok long samapim ol wankain samting long olgeta de. Ating sampela bai les long mekim kain wok olsem long olgeta taim, tasol dispela meri nogat; em i mekim dispela wok olsem wanpela pilai. Em i raitim lista long hamas laplap em i samapim long olgeta wan wan aua, na em i bin wok strong long winim dispela mak. Em i amamas tru long wok bilong em, long wanem, em i wok strong long mekim planti wok.—Sindaun 31:31.
“Bilasim” Wok Bilong Yu
Saveman Dennis T. Jaffe na savemeri Cynthia D. Scott i tok: ‘Tingim wok bilong yu i olsem wanpela haus i no gat wanpela samting insait long en. Orait, yu sindaun long dispela haus na glasim gut ol samting bilong en olsem bun na banis samting bilong haus. Nau yu kirap na tingting long mekim sampela samting long dispela haus. Yu tingim ol rum bilong haus na olsem wanem yu bai mekim wok long ol, na nau yu bilasim ol rum, na haus i kamap gutpela ples bilong yu ken sindaun long en. Yu bilasim haus long stail bilong yu yet.’
Planti wok yu bai kisim i gat ol lo samting bilong stiaim yu long mekim. Sapos yu mekim tasol wok yu mas mekim, dispela i olsem yu sindaun long wanpela haus i no gat wanpela bilas samting. Haus i no gat stail. Tasol sapos yu kamapim stail bilong yu yet long mekim wok, olsem yu skruim sampela gutpela samting moa long en, yu inap amamas moa long dispela wok. I no gat tupela man bai “bilasim” wanpela wok long wankain pasin. Olsem: Wanpela man i wok long wanpela haus kaikai bilong givim kaikai long ol man, em inap holim long tingting ol samting ol man i save kam long olgeta taim ol i askim em bilong kaikai. Tasol narapela man i mekim wankain wok em bai mekim gut tru long ol man i kam long haus kaikai. Tupela wantaim i amamas long wok bilong ol, long wanem, ol i givim bel tru long wok ol i save mekim.
Wok Yet Long Lain
Narapela rot bilong kisim amamas long wok bilong yu em i olsem, yu mas kisim sampela save moa long dispela wok. Wanpela buk (Tension Turnaround) i tok, taim yumi wok long i go bikpela, kru bilong yumi inap mekim planti wok moa long kisim save. Olsem na ol samting bipo yumi bin amamas long en ating nau yumi les long en. Olsem na rot bilong stretim dispela hevi em long lain long ol nupela samting bilong inapim laik bilong kru long kisim nupela save.
Sapos yu wok long kisim sampela save moa long wok bilong yu ating bihain dispela bai helpim yu long kisim wanpela wok yu laikim moa. Tasol maski dispela samting i no kamap, taim yu wok long kisim sampela save moa, dispela yet bai helpim yu long amamas moa long wok bilong yu. Wanpela man na wanpela meri bilong raitim buk, em Charles Cameron na Suzanne Elusorr, ol i tok: “Pasin bilong kisim save i helpim yu long bilip moa long yu yet, long wanem, save bilong yu long mekim wok i go bikpela moa. Dispela i helpim tu tingting bilong yu long ol samting long i stap bilong yu: Olsem yu inap stretim na winim ol hevi, na daunim ol pret, na yu inap mekim planti samting moa yu ting yu no inap mekim.”
Tasol ating yu bai tok: ‘Inap longtaim pinis mi save long olgeta samting long wok bilong mi—mi no inap kisim sampela save moa long en!’ Sapos olsem, yu ting yu inap lain long sampela samting em inap helpim wok bilong yu? Olsem: Yu inap tingting long kisim sampela save moa long ol man yu save wok wantaim ol o long ol masin samting yu save mekim wok long en. Ating yu ken lain long raitim pas bilong ofis i gutpela moa o lain long pasin bilong mekim wanpela miting i kamap gutpela moa. Na yu inap lain long ol gutpela rot bilong toktok wantaim ol bos.
Olsem wanem yu inap lain long ol dispela samting? Ating kampani bilong yu i gat wanpela kain skul bilong helpim yu long mekim olsem. O ating wanpela laibreri i gat ol buk bilong helpim yu long kisim dispela save. Tasol no ken lusim tingting long ol narapela rot bilong helpim yu long kisim save. Yu inap skul taim yu lukluk long ol man i wok—yu kisim save long ol gutpela pasin na save bilong ol, na sampela pasin i no gutpela tumas. Ol popaia bilong yu inap skulim yu, na ol gutpela wok bilong yu inap skulim yu tu taim yu skelim ol samting yu bin mekim stret. Ol samting yu lukim ol narapela i mekim, dispela inap skulim yu long sampela samting yu no inap kaunim long ol buk o harim long skul.
Sampela Tok Moa Bilong Helpim Yu
Na narapela samting yu inap tingim long wok bilong yu i olsem: Yu inap ting olsem, i stret yu mas kisim wanpela wok i gutpela moa—rot i op bilong ol narapela i ken kisim na i no gat wanpela taim rot i op bilong yu ken mekim wok yu gat bikpela laik long mekim. Yu inap mekim planti tok long dispela samting wantaim ol man i wanbel long tok bilong yu, na ating bihain bai yu bilip olsem tingting bilong yu i stret.
Tasol ating tingting bilong yu i no stret. Planti man i amamas long wok bilong ol, ol i bin lain long amamas long en. Man i amamas long wokim piksa bilong haus ol man i laik wokim em inap amamas tu long draivim bas. Bilong wanem i olsem? Long wanem, em inap wokim gut tingting bilong em taim em i mekim dispela wok na dispela i save givim amamas long em.
Olsem na lusim dispela tingting kranki olsem ol de bilong wik i olsem taim nogut sapos yu skelim wantaim Sarere Sande. No ken lusim nating taim bilong tingim bek sampela wok yu bin mekim bipo na i pundaun, na no ken tingim ol hevi inap kamap, na ol narapela i ting olsem wanem long yu. Tingim wok yu bai mekim nau. Putim olgeta tingting bilong yu i go long dispela wok tasol. Wok long tingim gut dispela wok olsem yu save mekim taim yu mekim wanpela wok yu save kisim amamas long en. Wok strong tru na amamas long gutpela wok bilong yu.
[Blok/Piksa long pes 11]
No Ken Les Long Wok Bilong Yu
Long Sindaun 27:23, 24 Baibel i tok olsem: “Yu mas lukautim gut ol sipsip na meme bilong yu, long wanem, mani bilong yu i no inap i stap oltaim, na lain bilong king tu i no inap i stap oltaim.” Wanem insait bilong dispela tok?
I olsem: Maski man inap kisim bikpela mani na bikpela namba (olsem wok king), planti taim dispela ol samting i no inap stap oltaim. Olsem na wanpela wasman bilong sipsip long taim bilong Baibel i bihainim savepasin sapos em i ‘lukautim gut ol sipsip na meme bilong em.’ Olsem 3-pela ves i kamap bihain i tok, sapos wasman i mekim gutpela wok olsem, orait em wantaim famili bilong em bai stap gut long ol samting bilong skin.—Sindaun 27:25-27.
Olsem wanem long nau? Planti manmeri i givim bel long kisim bikpela mani kago o bikpela namba na ol i ting long dispela rot ol i ken lusim wok nau ol i holim. Sampela i tingim gut ol samting ol bai mekim bilong kamapim dispela laik, tasol sampela nogat—i olsem ol i driman nating tasol. Tasol maski man i tingim gut ol samting o nogat, sapos em i les o em i no mekim gut wok em i holim long nau, em i no bihainim gutpela tingting. Dispela wok i gutpela rot long nau, na ating long bihain tu bilong helpim em long kisim wansiling. Em i savepasin tru sapos wanpela man i givim bel long wok bilong em na putim tingting olgeta long dispela gutpela wok em i holim pinis. Sapos em i mekim olsem, em bai stap gut long ol samting bilong skin long nau na long bihain.