Yu Bihainim Gut Tok Bilong Jehova?

“OL STRETPELA man i save sanap strong olsem laion.” (Sindaun 28:⁠1) Ol i save bilip tru na bihainim Tok bilong God, em Baibel, na ol i strong long mekim wok bilong Jehova, maski wanem hevi i kamap.

Bihain long taim ol Israel i lusim kalabus long Isip, long yia 1500 samting paslain long Krais, ol i stap long ples drai klostu long maunten Sainai na long dispela taim tupela man i bin sanap strong olsem laion. Ol i stap gut long Jehova, maski planti hevi i stap. Wanpela bilong ol em Josua long lain bilong Efraim, em i wokman bilong Moses na bihain em i kamap senis bilong Moses. (Kisim Bek 33:11; Namba 13:​8, 16; Lo 34:9; Josua 1:​1, 2) Narapela em Kalep, pikinini man bilong Jefune, long lain bilong Juda.​—⁠Namba 13:6; 32:⁠12.

Kalep i bin stap gut long wok bilong Jehova na em i bin wok strong. Long laip bilong em olgeta em i bin mekim gut wok bilong Jehova, olsem na em inap long tok, “Mi bihainim gut tok bilong God.” (Josua 14:⁠8) Olsem wanem long yu? Yu bihainim gut tok bilong Jehova?

Lukstil Long Graun Kenan

Tingim olsem yu yet yu stap namel long ol Israel bihain liklik long taim Jehova i bin helpim ol long lusim kalabus long Isip. Na yu lukim Moses i givim bel tru long bihainim ol tok bilong Jehova. Na Kalep i bilip tru olsem Jehova i stap wantaim lain bilong em.

Ol Israel i lusim kalabus long Isip na tupela yia bihain ol i kem long Kades Barnea long ples nating bilong Paran. Ol i stap klostu long Graun Bilong Promis. Moses i bihainim tok bilong God na salim 12-pela man bilong lukstil i go long Kenan. Em i tok: “Yupela i mas i go lusim distrik Negev na i go antap long ples maunten. Yupela i mas lukim gut, bai yupela i ken save em i wanem kain ples, na yupela i mas painimaut hamas manmeri i stap long en, na ol i strongpela lain o nogat. Na yupela i mas lukim gut graun bilong dispela kantri, em i gutpela o nogut. Na ol manmeri i stap long ol taun nating o long ol taun i gat strongpela banis. Na lukim gut, dispela graun i gat gris, o nogat, na i gat bus long en, o nogat. Na yupela i mas kisim sampela pikinini bilong ol diwai long dispela kantri na bringim i kam. Yupela i no ken kam bek nating.”​—⁠Namba 13⁠:​17-20.

Orait, 12-pela man i kirap wokabaut i go. Ol i wokabaut inap 40 de. Long taun Hebron ol i lukim ol man i traipela nogut tru. Long ples daun bilong Eskol ol i lukim olsem graun i gat bikpela gris na i kamapim planti kaikai, na ol i pasim tok long karim sampela kaikai i go bek. Wanpela han bilong rop wain i gat planti pikinini wain long en na i hevi nogut tru, olsem na ol i pasim long wanpela hap diwai na tupela man i karim i kam!​—⁠Namba 13⁠:​21-25.

Ol i go bek long kem bilong ol Israel na 12-pela man i ripot long ol samting ol i bin lukim. Ol i tok: “Dispela kantri yu bin salim mipela i go lukim, . . . graun bilong en i gutpela tru na i gat planti gris. Lukim. Mipela i bringim sampela kaikai bilong dispela kantri i kam. Tasol ol pipel bilong dispela kantri i strong tumas na ol taun bilong ol i bikpela tru na i gat strongpela banis. Na tu, mipela i lukim ol lain tumbuna pikinini bilong ol Anak i stap, ol i traipela man. Ol Amalek i stap long hap saut, long distrik Negev, na ol Hit na ol Jebus na ol Amor i stap long ples maunten, na ol Kenan i stap klostu long biksolwara Mediterenian, na sampela i stap long arere bilong wara Jodan.” (Namba 13⁠:​26-29) Tenpela man bilong i go lukstil long dispela kantri ol i no laik bihainim tok bilong Jehova na go insait long Graun Bilong Promis.

‘Jehova i Stap Wantaim Yumi’

Tasol Kalep, em wanpela bilong ol 12-pela, em i bilip long Jehova na i tokim ol: “Nau yumi mas i go pait long ol na kisim dispela graun bilong ol, long wanem, yumi gat strong na yumi inap long winim ol na kisim dispela graun.” Tasol 10-pela man i bin i go wantaim Kalep ol i tok, ol Kenan i strongpela lain, winim ol Israel. Dispela 10-pela man i no gat bilip na ol i pret nogut tru na ol i ting ol i olsem grasopa tasol.​—⁠Namba 13⁠:​30-33.

Tasol Kalep na Josua i strong na i tok: “Bikpela i stap wantaim yumi. . . . Olsem na maski pret long ol.” Tasol ol manmeri i no laik harim, na ol i tok long tromoi ston long tupela na kilim tupela i dai. Tasol God i pasim ol na em i tokim ol: “Mi bin promis long larim yupela i go i stap long dispela kantri, tasol nau yupela olgeta i no inap i go. Kalep wantaim Josua tasol bai i go. . . . Bai mi bringim ol dispela pikinini i go long dispela kantri yupela i no laikim. Na bai ol i kisim . . . Na ol pikinini bilong yupela bai i raun nabaut long dispela ples drai inap long 40 yia, inap yupela olgeta i dai pinis. . . . Yupela i bin i go raun long dispela kantri na lukim graun bilong en inap 40 de. Olsem na nau yupela i mas karim hevi bilong sin bilong yupela inap 40 yia. Mi makim wanpela wanpela yia bilong inapim olgeta wan wan de yupela i bin raun long dispela kantri.”​—⁠Namba 14⁠:​9, 30-34.

Planti Yia Bihain Ol i Stap Strong Yet

Orait, ol i wokabaut inap 40 yia pinis na olgeta Israel i bin bikhet long God ol i dai pinis. Tasol Kalep na Josua i stap gut yet long God. Nau ol i stap long hap bilong Moab, na Moses wantaim Het-pris Eleasar i kaunim pinis olgeta soldia i winim pinis 20 krismas. Long olgeta wan wan lain bilong Israel, God i makim wanpela man bilong tilim Graun Bilong Promis long ol. Sampela bilong ol dispela man em Kalep na Josua na Eleasar. (Namba 34⁠:​17-29) Kalep i gat 79 krismas, tasol skin bilong em i strong yet na em i givim bel yet long God na i stap gut long em.

Bipo, paslain liklik long taim ol Israel i pret na i no laik i go insait long Kenan, Moses na Aron i bin kaunim ol manmeri taim ol i stap long hap bilong Sainai, na i gat 603,550 soldia bilong ol i stap. Orait, 40 yia bihain i gat 601,730 tasol i stap. (Namba 1:​44-46; 26:51) Tasol Josua em kepten bilong ol, na Kalep i stap wantaim ol, olsem na ol Israel i go insait long Graun Bilong Promis na ol i winim planti pait. Long olgeta taim Josua na Kalep i bilip olsem Jehova bai helpim ol long winim pait.

Lapun Josua na Kalep i brukim Wara Jordan wantaim ol soldia na mekim pait. Ol i pait i go inap 6-pela yia na i gat bikpela hap graun ol i no kisim yet. Bihain Jehova bai rausim ol lain i stap long ol dispela hap, tasol nau em i tok long tilim graun long ol wan wan lain bilong Israel.​—⁠Josua 13⁠:​1-7.

Em i Bihainim Gut Tok Bilong Jehova

Inap planti yia pinis Kalep i bin mekim ol pait, na nau em i tokim Josua: “Mi gat 40 krismas na Moses, wokman bilong Bikpela, i tokim mi long lusim Kades Barnea na i go bilong lukstil long dispela kantri. Orait mi bin i go na mi bringim ripot i kam bek long Moses long ol samting olsem mi bin lukim tru long ai bilong mi stret. Mi no bin giaman. Ol man i bin i go wantaim mi ol i mekim arapela kain tok na dispela i mekim ol manmeri i pret. Tasol mi bihainim gut tok bilong God.” (Josua 14⁠:​6-8) Tru tumas, Kalep i bin bihainim gut tok bilong Jehova na mekim laik bilong em.

Kalep i tok moa olsem: “Olsem na Moses i mekim wanpela promis long mi. Em i tok, ‘Yu bin bihainim gut God, . . . olsem na yu wantaim ol pikinini bilong yu bai i kisim dispela hap graun yu bin wokabaut long en.’ . . . Nau mi gat 85 krismas pinis. Tasol strong bilong mi i no pinis. Nogat. Strong bilong mi i stap wankain olsem bipo long taim Moses i bin salim mi i go long dispela wokabaut. . . . Orait nau yu mas givim mi dispela ples maunten Bikpela i bin tok long en long taim mi givim ripot bilong ol samting mi bin lukim. Yu bin harim mi tok olsem ol traipela man bilong Anak i stap long dispela ples, long ol bikpela taun i gat strongpela banis. Tasol sapos Bikpela i stap wantaim mi, orait bai mi inap rausim ol dispela man, olsem Bikpela i tok pinis.” Orait, nau Josua i givim taun Hebron long Kalep.​—⁠Josua 14⁠:​9-15.

Ol man bilong dispela hap ol i traipela man tru, na Kalep i gat bikpela wok bilong rausim ol. Tasol maski em i gat 85 krismas pinis, em i mekim pait na bihain em i rausim dispela lain ol i stap long Hebron. Otniel, em pikinini bilong brata bilong Kalep, em i wanpela hetman na em i winim pait na kisim taun Debir. Bihain ol Livai i sindaun long dispela tupela taun, na Hebron i kamap wanpela taun ol man i ken hait long en sapos ol i bin popaia na kilim i dai wanpela man.​—⁠Josua 15:​13-19; 21:​3, 11-16; Hetman 1:​9-15, 20.

Oltaim Bihainim Gut Tok Bilong Jehova

Kalep na Josua i gat sin long skin bilong ol, tasol ol i bihainim gut laik bilong Jehova. Ol i bin wokabaut inap 40 yia long ples drai, long wanem, ol Israel i no bihainim tok bilong God, tasol tupela i no surik na lusim bilip​—⁠ol i stap gut long Jehova. Na i olsem tu long ol wokman bilong Jehova long nau​—⁠ol i no larim wanpela samting i pasim ol long mekim wok bilong Jehova. Ol i save, oganaisesen bilong God i gat pait long oganaisesen bilong Satan, olsem na ol i sanap strong, na oltaim ol i laik mekim olgeta samting em Papa bilong ol long heven i laikim.

Bilong mekim bung bilong tingim i dai bilong Jisas, planti wokman bilong Jehova inap kisim bagarap long han bilong ol birua, tasol ol i no pret. (1 Korin 11:​23-26) Wanpela meri Kristen i bin kalabus long wanpela bikpela banis kalabus bilong Hitler long taim bilong Namba 2 Pait. Em i tok:

‘Mipela i pasim tok long mipela olgeta i mas i go bung long hap bilong wasim ol laplap long 11 klok nait. Orait, long dispela taim stret mipela 105 manmeri olgeta i bung. Mipela sanap klostu klostu na raunim wanpela liklik tebol samting mipela i bin karamapim waitpela laplap long en na i gat bret na wain long en. I gat lait bilong wanpela kandel tasol long rum, nogut mipela putim lait bilong paua na ol man i lukim mipela. Mipela i mekim gen tok promis long Papa bilong mipela olsem mipela bai givim strong bilong mipela olgeta bilong litimapim nem holi bilong Em na stap gut long Gavman bilong em.’

Planti hevi i save painim yumi ol wokman bilong Jehova, tasol em i strongim yumi long mekim wok bilong em na litimapim nem holi bilong em. (Filipai 4⁠:13) Yumi laik mekim ol samting Jehova i laikim, olsem na i gutpela sapos yumi tingim Kalep, em i bin bihainim gut tok bilong Jehova. Wanpela yangpela man i bin mekim olsem. Long yia 1921 em i kirap mekim wok painia, olsem autim tok bilong Baibel long olgeta de. Em i tok:

“Bilong kamap painia mi mas lusim gutpela wok bilong mi long Koventri [Inglan] long wanpela haus bilong prinim ol buk samting, tasol mi no bel hevi long dispela. Mi bin dediket long God; mi bin givim skin bilong mi olgeta long mekim wok bilong God. Mi tingim Kalep, em i bin i go insait long Graun Bilong Promis wantaim Josua, na Baibel i tok, ‘Em i bihainim gut tok bilong Jehova.’ (Jos. 14⁠:⁠8) Mi laik bihainim tingting bilong Kalep. Mi save, sapos mi mekim ‘gut’ wok bilong God, bai mi gat rot bilong mekim bikpela wok moa, olsem kamapim ol kaikai i makim man i Kristen.”

Jehova i bin mekim gut tru long Kalep, long wanem, em i bihainim gut tok bilong Jehova na oltaim em i laik mekim laik bilong Jehova. Ol narapela tu i bin kisim bikpela amamas long wok bilong God na em i bin mekim gut long ol. Ating dispela samting bai painim yu tu taim yu wok long bihainim gut tok bilong Jehova.

[Piksa long pes 26]

Kalep na Josua i bin winim ol traim na stap gut long Jehova. Olsem wanem long yu?