Wanem Taim Em “Taim Bilong Toktok”?

WANPELA meri Kristen, nem bilong em Maria, em i wok long wanpela haus sik, olsem helpim bilong dokta. Wanpela lo bilong wok bilong em i olsem em i no ken tokim narapela man long ol samting bilong ol sikman. Em i no ken larim ol man nabaut i lukim ol pepa samting i stori long sik o long narapela samting bilong man o meri i kam lukim dokta; ol dokta tasol inap lukim ol dispela pepa. Long provins Maria i stap long en, i gat lo i tambuim ol man long haus sik long tokim narapela man long samting bilong ol sikman.

Wanpela taim wanpela samting i kamap Maria i tingting planti long em i mas mekim wanem. Samting i kamap, em olsem: Maria i sekim ol pepa ol dokta i bin raitim na em i lukim nem bilong wanpela wanlotu bilong em na dokta i raitim tok dispela meri Kristen i bin rausim bel. Nau Maria i tingting planti, em i mas brukim lo bilong wok bilong em na tokim ol elda long kongrigesen long dispela samting, o em i mas pasim maus? Sapos em i tokaut long dispela samting, ating bai ol i rausim em long wok, na bai em i gat kot, o bai ol bos bilong em i gat kot. Tasol Baibel i tok wanem? Em i mas tokaut long dispela samting, o ating Provep 11:13 i makim olsem em i mas haitim na em i no tokaut? Provep 11:13 i tok: “Man bilong mekim planti toktok nabaut i save autim tok hait bilong pren bilong en. Tasol man bilong tok tru i no save autim tok hait bilong pren bilong en.”−Lukim tu Provep 25:9, 10.

Wan wan taim kain samting olsem i kamap na ol Witnes Bilong Jehova i mas tingim wanem rot i stret ol i mas bihainim. Olsem Maria, ol tu i mas tingim gut tok bilong King Solomon, em i tok: “I gat taim bilong mekim olgeta samting aninit long heven: . . . i gat taim bilong pasim maus na taim bilong toktok.” (Eklisiastis 3:1, 7, NW) Olsem wanem? Em taim bilong Maria i mas pasim maus o taim bilong em i mas toktok na tokaut long dispela rong em i kisim save long en?a

Tasol kain hevi olsem em inap kamap na i no wankain stret olsem dispela samting i bin painim Maria. Olsem na yumi no ken putim lo na i tok, yumi mas mekim ol samting wankain olsem Maria i bin mekim. Sapos kain samting olsem i kamap, olgeta Kristen wan wan i mas tingim olgeta samting i insait long dispela samting na em i mas bihainim pasin i stret wantaim lo bilong Baibel na lo bilong gavman, na em i mas mekim ol samting bambai bel bilong em i stap klinpela long ai bilong Jehova. (1 Timoti 1:5, 19) Sapos yumi kisim save long wanpela rong na dispela rong i liklik rong tasol, na sin i stap long skin bilong yumi olgeta, dispela tasol i as bilong en, orait yumi mas bihainim lo olsem: “Pasin bilong sori em i save karamapim planti sin.” (1 Pita 4:8) Tasol sapos em i bikpela rong, orait gutpela Kristen i laikim tumas God na ol brata, em i mas mekim wanem? Em i mas tokaut long dispela rong bambai ol elda i ken helpim dispela man, ating tru em i bin mekim rong, na helpim kongrigesen long i stap klin, o em i mas pasim maus?

Bihainim Ol Lo Bilong Baibel

I gat wanem ol lo bilong Baibel yumi mas bihainim long dispela samting? Namba wan samting yumi mas tingim, em olsem: Man i bin mekim bikpela rong em i no ken haitim rong bilong em. “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na givim baksait long ol dispela sin, orait bai God i marimari long en.” (Provep 28:13) Olgeta samting i stap ples klia long ai bilong Jehova. Maski sin bilong man i stap hait, bihain bai em i kamap ples klia. (Provep 15:3; 1 Timoti 5:24, 25) Sampela taim Jehova i mekim na bai wanpela brata o sista long kongrigesen i kisim save long rong i stap hait. Jehova i mekim olsem bilong stretim dispela rong.−Josua 7:1-26.

Narapela tok bilong Baibel em inap stiaim tingting bilong yumi long dispela samting em i stap long Levitikas 5:1 (NW): “Sapos wanpela man i harim ol i mekim tok nogut o em i lukim dispela samting o em i save long dispela samting na em i no kamapim, orait em i gat rong na em i mas kisim strafe.” Dispela “tok nogut” em i no tok swea o tok bilas long God. Nogat. Planti taim dispela kain tok nogut i kamap taim narapela man i bin mekim rong long wanpela man na dispela man i singautim ol man i save long dispela samting long helpim em long kot, na em i kolim ol tok nogut tu wantaim na tok God i mas mekim nogut long dispela man i bin mekim rong long em. Em wanpela pasin bilong subim ol narapela man long helpim em long kot. Ol man i save long dispela rong ol i save narapela man i bin rongim dispela man na ol i gat wok long kamapim ol samting ol i save long en bambai kot i ken skelim husat tru i gat rong. Sapos ol dispela man i no tokaut long ol samting ol i save long en, bai ol yet “i gat rong” long ai bilong Jehova.b

God, em i Man i gat bikpela namba tru winim olgeta narapela man long heven na long graun, em i tok sapos wanpela Isrel i lukim wanpela man i mekim bikpela rong, orait em i mas tokaut long ol hetman o Jas bambai ol i ken stretim dispela samting. Ol Kristen i no aninit tru long Lo bilong Moses, tasol ol as tok bilong en i stret yet long kongrigesen Kristen na ol i mas bihainim. Olsem na sampela taim i stret Kristen i mas tokaut long wanpela samting long ol elda. Tru, long sampela kantri lo i tok ol man i no ken tokim ol man nabaut long samting bilong narapela man i stap long ol pepa bilong em. Tasol sapos Kristen i pilim olsem lo bilong God i tok em i mas tokaut long dispela samting, na em i tingting gut na beten askim God long soim rot long em, orait em i no ken harim tok bilong ol lain i no gat bikpela namba olsem bilong Jehova. Em i mas bihainim lo bilong Jehova na tokaut long dispela samting. Sampela taim sampela samting i kamap na Kristen “i mas bihainim tok bilong God tasol.” Em i “no ken bihainim tok bilong ol man.”−Aposel 5:29.

Tru, yumi no ken brukim nating tok tru antap o tok promis yumi bin mekim, tasol sampela taim ol tok promis ol man i tok yumi mas mekim i no stret wantaim lo bilong God i tok yumi mas lotuim em wanpela tasol. Taim wanpela man i mekim bikpela rong, em i mekim rong long God Jehova, na God i tok dispela man i mas ‘bagarap.’ (Diuteronomi 27:26; Provep 3:33) Olgeta man i kam insait long kongrigesen Kristen, i olsem ol i “mekim tok tru antap” long helpim kongrigesen long i stap klin; ol i mas was gut long pasin ol yet i mekim na ol i mas helpim ol narapela insait long kongrigesen long i stap klin.

Wok Bilong Olgeta Wan Wan

Ating Maria i bin tingim ol dispela lo bilong Baibel taim em i tingim ol samting em yet i mas mekim. Em i no kirap kwik na mekim sampela samting; gutpela tingting i kirapim em na em, i tingting gut pastaim. Baibel i. tok: “Sapos yu kamap witnes long kot, yu no ken tok giaman na daunim nating man i no bin mekim rong.” (Provep 24:28) Bilong save tru, man i gat rong o nogat, i mas i gat tupela o tripela man ol yet i bin lukim rong i kamap na ol i stap olsem witnes: (Diuteronomi 19:15) Sapos Maria i lukim liklik tok tasol bilong rausim bel long pepa dokta i raitim, ating bai Maria i ting, ‘Mi no save tru dispela sista i gat rong o nogat,’ na em i no tokaut long dispela samting, na bai bel bilong em i no gat tok. Ating ol i popaia na raitim tok olsem dispela sista i mas baim dokta long rausim bel, tasol em narapela meri i bin rausim bel, o ating ol tok long pepa i no kamapim stret samting tru i bin kamap.

Tasol Maria i gat sampela save moa long dispela samting, olsem: Maria i save dispela sista i baim pinis dokta na dispela i makim olsem tru dokta i bin rausim pikinini long bel bilong em. Na Maria i save dispela sista i no marit, olsem na ating em i bin mekim pasin pamuk. Maria i laik tru long helpim dispela sista, ating em i bin mekim rong, na Maria i laik helpim oganaisesen bilong Jehova long i stap klin. Em i tingim tok bilong Provep 14:25: “Sapos witnes i tok stret long kot, orait kot i no ken tok long kilim man i no bin mekim rong. Tasol sapos witnes i no tok stret, orait em i man bilong giaman.”

Maria i tingting planti long lo bilong haus sik, tasol long dispela samting i bin kamap em i pilim olsem em i mas bihainim ol lo bilong Baibel, em bikpela samting, na em i no ken tingim lo bilong haus sik i tambuim em long tokaut long ol tok i stap long pepa bilong ol sikman. Maria i tingting olsem: ‘Sapos mi tokaut long dispela samting, ating sista i no ken bel nogut na putim mi long kot bilong bekim nogut long mi.’ Olsem na Maria i skelim olgeta samting em i save tru long en na em i pilim olsem i no taim bilong “pasim maus,” em taim bilong “toktok.”

Tasol i gat narapela samting Maria i mas tingim, olsem: Bai em i tokaut long husat? na olsem wanem em i ken bihainim gutpela tingting na tokaut? Em inap i go stret long ol elda na tokim ol, tasol em i ting gutpela sapos em i go toktok wantaim dispela sista pastaim. Maria i mekim pasin sori. Maria i ting olsem: ‘Sapos sista i no gat asua, ating bai em i amamas long tokim mi wanem samting tru i bin kamap, na sapos em i gat asua, em i ken kamapim rong bilong em.’ Sapos sista i tokaut pinis long ol elda long rong bilong em, em i ken tokim Maria na Maria i no ken mekim sampela samting moa. Na Maria i ting olsem: ‘Sapos sista i bin kalapim lo bilong God na rausim bel na em i no bin tokaut long dispela bikpela rong em i mekim, orait bai mi kirapim em long i go lukim ol elda.’ Na bai ol elda i ken helpim em olsem Jems 5:13-20 i makim. Na samting i kamap olsem. Maria i toktok wantaim dispela sista na nau em i save, sista i no strong long spirit na ol narapela man i strong long em i mas rausim bel, olsem na em i harim tok bilong ol na em i bin rausim bel. Em i sem long dispela samting em i bin mekim na em i pret, olsem na em i haitim rong bilong em. Em i amamas long Maria i kam toktok wantaim em na em i go lukim ol elda na ol i helpim em long kamap strong gen long spirit.

Sapos Maria i bin tokaut long ol elda pastaim, orait bai ol elda tu i mas tingim gut rot ol i mas bihainim, long wanem Maria i tokim ol long sampela tok em i no ken tokim ol narapela man long en. Ol i mas tingim ol samting Baibel na God yet i tok i stret ol i mas mekim olsem ol wasman bilong ol sipsip. Sapos ol tok ol i kisim em bilong wanpela Kristen i baptais pinis na em i save bung wantaim kongrigesen na autim tok wantaim ol, orait ol i mas skelim gut, olsem Maria i bin mekim, na tingting olsem: Mipela i mas mekim sampela samting o nogat? Sapos ol i pilim olsem i gat “yis” i stap insait long kongrigesen, ating bai ol i makim wanpela komiti bilong harim kot long dispela. (Galesia 5:9, 10) Tasol dispela sista ol i harim tok long em i bin mekim rong, sapos em i olsem i lusim pinis lain Witnes, olsem inap longtaim liklik em i no bin i go long ol miting na em i no mekim ol samting i makim em i wanpela Witnes, orait ating bai ol i no mekim wanpela samting. Bai ol i wet pastaim, na sapos bihain em i kirap gen long mekim ol samting i makim em i bilong lain Witnes, orait bai ol i stretim.

Tingim Gut Ol Hevi Inap Kamap

I stret bos bilong wokboi Kristen i ken ting olsem dispela Kristen “i mas bihainim gut tok,” na bihainim lo long i no ken tokaut long sampela samting long ol narapela man. (Taitas 2:9, 10) Sapos bos i tok Kristen i mas mekim tok tru antap long kain samting olsem, orait Kristen i mas tingting gut pastaim. Mekim tok tru antap i strongpela samting; i no olsem pasin bilong mekim tok promis nating. (Sam 24:4) Na sapos lo bilong gavman tu i tok man i no ken tokaut long sampela samting long ol narapela man, orait i bikpela samting moa long Kristen i mas tingim gut ol samting em i mekim. Taim Kristen i no mekim yet tok tru antap long em i no ken tokaut long sampela samting, em i mas tingim ol hevi inap kamap sapos bihain dispela tok tru antap i pait wantaim wok bilong Kristen long bihainim ol lo bilong Baibel. Hevi inap kamap long dispela samting sapos Kristen i wok long wanpela dokta o long haus sik o long haus kot o long ofis bilong wanpela loya na sampela brata sista i save go long dispela dokta o haus sik o loya. Yumi no ken sakim lo bilong gavman na yumi mas bihainim gut ol tok tru antap yumi mekim, tasol lo bilong Jehova i namba wan.

Sampela brata ol i loya o dokta o akaunen samting ol i tingim gut ol hevi inap kamap, na ol i raitim pinis long pepa sampela tok bilong stiaim tingting na taim wanpela brata o sista i kam lukim ol, na em i laik kamapim sampela tok ol i no ken kamapim long ol narapela man, ol i tokim brata o sista long kaunim ol tok long dispela pepa pastaim. Olsem na dispela brata o sista i ken save, sapos em i kamapim tok long wanpela bikpela rong, bai ol i kirapim em long i go lukim ol elda long kongrigesen bilong em na kamapim rong bilong em. Na sapos em i no mekim olsem, orait ol yet i mas tokim ol elda long dispela rong.

Olsem na ating sampela taim bilip bilong wanpela gutpela wokboi Kristen na save em i bin kisim long Baibel bai kirapim em long tokaut long sampela tok em i no ken tokim ol narapela man long en, long wanem lo bilong God i namba wan. Long kain taim olsem, Kristen i no ken pret na em i mas bihainim gutpela tingting. I no olsem Kristen i laik lukstil long ol samting narapela Kristen inap long mekim. Nogat. Tasol em i laik helpim man i mekim rong na em i laik bai kongrigesen Kristen i ken i stap klin. Ol i no ken tingim ol liklik rong man i mekim long wanem em i gat sin. Baibel i tok, “Pasin bilong sori em i save karamapim planti sin,” na yumi mas lusim rong bilong ol brata inap 70 taims 7-pela taim.” (Matyu 18:21, 22) Long kain taim olsem em i “taim bilong pasim maus.” Tasol sapos i gat bikpela rong na Kristen i laik haitim, ating dispela em i “taim bilong toktok.”

[Ol Futnot]

[Piksa long pes 31]

Sapos wanpela Witnes i bin mekim rong na yu kirapim em long i go tokim ol elda, long wanem yu save ol bai mekim gutpela pasin isi na helpim em, orait yu mekim pasin i stret na pasin sori