Larim “Lo Bilong Pasin Helpim” i Stiaim Yu

LISAa i tok: “Samting i bin kirapim tru tingting bilong mi em pasin helpim bilong ol bratasista Kristen.” Em i stori long fes samting i kirapim em long laikim tok i tru. Anne i mekim wankain tok, em i tok: “Mi laikim tok i tru bikos long pasin helpim bilong ol Witnes, na i no bikos long ol tok ol i skulim mi long en.” Nau dispela 2-pela sista i save amamas long ritim Baibel na tingim tingim ol tok bilong en, tasol fes samting i kirapim ol long laikim tok i tru em pasin helpim.

Hau yumi ken mekim pasin helpim long ol narapela em ol bai pilim tru long bel? Yumi bai stori long 2-pela rot bilong mekim olsem. Long rot bilong ol tok yumi mekim na ol pasin yumi mekim. Bihain yumi bai stori long husat lain yumi mas mekim pasin helpim long ol.

Gutpela meri marit em Provep sapta 31 i stori long en, “lo bilong pasin helpim” i stap long maus bilong dispela meri. (Prov. 31:26) Em i larim dispela “lo” i bosim toktok bilong em na pasin bilong em long toktok. Ol papa tu i mas larim dispela “lo” i bosim toktok bilong ol. Planti papamama i save olsem sapos ol i mekim hatpela tok long ol pikinini, dispela i no inap helpim pikinini. Sapos papamama i no toktok gut na ol i mekim sotpela hap tok long nek i soim olsem ol i kros, pikinini i no inap amamas. So sapos papamama i laik bai pikinini i putim yau long tok bilong ol na bihainim, ol i mas wok strong long toktok long pikinini long gutpela pasin.

Maski yu wanpela papa o mama o yu no gat pikinini, hau yu inap kisim pasin bilong mekim ol gutpela tok? Yumi kisim save long bekim taim yumi lukim tok i stap long Provep 31:26, em i tok: “Em i save opim maus bilong em na autim savetingting.” Dispela i makim olsem yumi mas skelim gut ol tok yumi bai mekim na krai bilong nek bilong yumi. Gutpela samting bai kamap taim yumi mekim kain askim long yumi yet olsem, ‘Dispela tok mi laik mekim bai kirapim man long belhat, o em bai kamapim bel isi?’ (Prov. 15:1) Yes, em i savetingting long tingting gut paslain long yumi toktok.

Narapela savetok i tok: “Man i no tingting gut na toktok, tok bilong em i olsem bainat i sutim man.” (Prov. 12:18) Taim yumi tingim olsem ol tok yumi mekim na krai bilong nek bilong yumi inap mekim sampela samting long ol narapela, yumi bai bosim gut toktok bilong yumi. Yes, taim yumi bihainim “lo bilong pasin helpim” dispela bai helpim yumi long sakim pasin bilong mekim ol tok i daunim ol narapela na toktok long hatpela pasin. (Efe. 4:31, 32) Yumi bai mekim ol gutpela tok na krai bilong nek bilong yumi bai soim olsem yumi tingim tru ol narapela, na yumi no mekim ol hatpela tok i daunim ol. Jehova i stap gutpela piksa long dispela pasin taim em i mekim gut bel bilong wokman bilong em Elaija husat i bin pret nogut tru. Ensel bilong Jehova i toktok long Elaija long “nek i toktok isi tru.” (1 Kin. 19:12) Em tru olsem bilong mekim pasin helpim yumi mas mekim ol gutpela tok, tasol yumi mas mekim narapela samting moa. Yumi mas mekim ol samting bilong helpim ol narapela. Hau yumi ken mekim olsem?

Yumi bihainim pasin bilong Jehova taim yumi mekim ol gutpela tok na mekim ol samting long helpim ol narapela. (Efe. 4:32; 5:1, 2) Lisa em yumi stori pinis long em, em i stori long hau ol Witnes i bin mekim pasin helpim long em. Em i tok: “Famili bilong mipela i kisim toksave long muv na mipela i no bin ekspektim dispela, tasol 2-pela marit long kongrigesen i kisim de-of long wok mani bilong ol long helpim mipela long pekim ol kago. Long dispela taim, mi no stadi yet long Baibel!” Ol i mekim ol samting bilong helpim Lisa na dispela i kirapim em long kisim sampela save moa long tok i tru.

Anne em yumi bin stori tu long em long kirap bilong atikol, em i pilim tru pasin helpim bilong ol Witnes. Em i tok: “Pasin bilong ol man bilong dispela graun i no gutpela, so mi bin gat tupela tingting. Mi pilim hatwok long trastim ol narapela. Taim mi bungim ol Witnes, mi no trastim ol. Mi tingting, ‘Wai na ol i helpim mi?’ Tasol gutpela pasin helpim bilong Baibel tisa bilong mi i kirapim mi long trastim em.” Wanem gutpela samting i kamap? Em i tok moa: “Bihain mi stat long tingim tingim ol samting mi lainim.”

Lisa na Anne i pilim tru long bel ol samting em ol bratasista insait long kongrigesen i mekim bilong helpim ol, na dispela i kirapim ol long kisim save long tok i tru. Kongrigesen i mekim pasin helpim long tupela na dispela i kirapim tupela long trastim Jehova na lain bilong em.

Em isi long sampela long mekim ol gutpela tok na smail bikos em pasin bilong ples ol i kamap bikpela long en. Em gutpela olsem kalsa bilong ol na pasin bilong ol yet i kirapim ol long mekim olsem. Tasol sapos ol dispela samting tasol i kirapim yumi long mekim pasin helpim, dispela inap makim olsem yumi no bihainim pasin helpim bilong God.​—Skelim Aposel 28:2.

Pasin helpim em wanpela pasin holi spirit bilong God i kamapim. (Gal. 5:22, 23) Olsem na bilong mekim pasin helpim, yumi mas larim holi spirit i stiaim tingting na pasin bilong yumi. Taim yumi mekim olsem yumi bihainim eksampel bilong Jehova na Jisas, em samting yumi laik tru long mekim. Na olsem ol Kristen, yumi laik tru long helpim ol narapela. So pasin bilong yumi long laikim God Jehova na ol narapela i kirapim yumi long mekim pasin helpim. Long dispela rot, yumi mekim pasin helpim em yumi pilim tru long bel na em kain pasin helpim em God i orait long en.

Ating em isi long yumi mekim pasin helpim long ol manmeri em ol i bin mekim pasin helpim long yumi o yumi save long ol. (2 Sml. 2:6) Wanpela rot yumi mekim olsem em long tok tenkyu long ol. (Kol. 3:15) Tasol olsem wanem sapos yumi pilim olsem i no stret long yumi mekim pasin helpim long wanpela?

Tingim dispela: Jehova i stap nambawan gutpela eksampel tru long mekim bikpela pasin helpim, na yumi kisim wanpela bikpela skul long Baibel long mekim dispela pasin. Dispela tok “bikpela pasin helpim” i stap planti taim tru long Ol Skripsa Grik. Long wanem rot God i mekim pasin helpim long yumi?

Tingim planti milion milion manmeri em Jehova i mekim pasin helpim long ol long rot bilong givim ol samting ol i nidim bilong stap laip. (Mat. 5:45) Paslain long yumi save long Jehova, em i mekim pasin helpim long yumi. (Efe. 2:4, 5, 8) Olsem, em i givim dispela wanpela Pikinini tru bilong em olsem pe bilong baim bek ol manmeri. Aposel Pol i tok Jehova i givim pe bilong baim bek man “na dispela i stret wantaim bikpela pasin helpim bilong [Em].” (Efe. 1:7) Na tu, maski yumi mekim sin na Jehova i bel hevi long yumi, em i wok yet long stiaim na skulim yumi. Ol instraksen na ol tok bilong em i olsem “liklik ren.” (Lo 32:2) Yumi luksave olsem yumi no inap tru long bekim dinau long bikpela pasin helpim Jehova i mekim long yumi. Na yumi save olsem sapos Jehova i no soim pasin helpim long yumi, yumi bai no gat rot long bilip na wet long gutpela samting tru bai kamap bihain.​—Skelim 1 Pita 1:13.

Tru tumas, pasin helpim bilong Jehova em wanpela naispela pasin bilong em na i kirapim yumi long mekim pasin helpim tu. Olsem na yumi no ken mekim pasin helpim long sampela manmeri tasol na ol narapela nogat, yumi mas wok hat long bihainim eksampel bilong Jehova na mekim pasin helpim long ol narapela long olgeta de. (1 Tes. 5:15) Taim yumi mekim pasin helpim long olgeta taim, yumi olsem paia long taim bilong kol. Yumi mekim gut bel bilong ol wanfamili, ol wanbilip, ol wanwok, ol wanskul, na ol neiba bilong yumi.

Tingim ol narapela insait long famili bilong yu o long kongrigesen husat bai amamas taim yu mekim ol gutpela tok long ol na mekim ol samting bilong helpim ol. Ating i gat wanpela long kongrigesen husat i nidim helpim long sait bilong mekim ol wok long haus na plaua gaden o long mekim wanpela wok em planti taim em i mas mekim olsem go long stua. Na tu, taim yu bungim wanpela long wok autim tok husat i nidim helpim, yu ting yu inap mekim sampela samting bilong helpim em?

Yumi laik tru long bihainim eksampel bilong Jehova, olsem na oltaim yumi mas larim “lo bilong pasin helpim” i stiaim toktok na pasin bilong yumi.