LESEN 51
Hau Bai Yu Ken Amamasim Jehova Long Toktok Bilong Yu?
Taim Jehova i wokim yumi, em i givim yumi wanpela gutpela presen—em pasin bilong toktok. Yu ting em bikpela samting long em long hau yumi yusim dispela presen? Yes, dispela i bikpela samting long em! (Ritim Jems 1:26.) So hau yumi ken yusim pasin bilong yumi long toktok long wei em Jehova bai amamas long en?
1. Yumi mas yusim dispela presen bilong toktok olsem wanem?
Baibel i tokim yumi long “wok yet long mekim isi bel bilong narapela narapela na strongim narapela narapela.” (1 Tesalonaika 5:11) Yu inap tingim sampela em ol i nidim tok bilong strongim ol? Yu inap mekim wanem bilong mekim gut bel bilong ol? Tokim ol olsem yu tingim ol. Ating yu ken tokim ol long ol pasin bilong ol em yu laikim. Yu inap tingim wanpela skripsa we inap strongim wanpela yu save long em? Ating i gat planti skripsa em yu ken makim. Tingim tu olsem, wei yu toktok inap mekim bikpela samting long narapela wankain olsem ol tok yu yusim. So olgeta taim traim long mekim tok long gutpela pasin na long pasin isi.—Provep 15:1.
2. Yumi mas abrusim wanem kain ol tok?
Baibel i tok: “Ol stingpela tok i no ken kamaut long maus bilong yupela.” (Ritim Efesus 4:29.) Dispela i makim olsem yumi no ken mekim ol tok nogut o tok i nogutim na daunim narapela we i bagarapim filings bilong em. Na tu, yumi mas abrusim pasin bilong tok baksait na tok bilong bagarapim gutnem bilong narapela.—Ritim Provep 16:28.
3. Wanem samting bai helpim yumi long mekim ol tok long wei i strongim narapela?
Planti taim ol samting yumi toktok long en i kamapim wanem samting i stap long bel o tingting bilong yumi. (Luk 6:45) Olsem na yumi mas trenim yumi yet long putim tingting long ol gutpela samting—ol samting i stretpela, i klin, i kirapim pasin laikim, na i stret long ol man i litimapim. (Filipai 4:8) Bilong putim tingting long ol dispela samting, yumi mas skelim gut na makim ol amamas yumi laik kisim na ol pren bilong yumi. (Provep 13:20) Na tu, em gutpela long yumi tingting gut paslain long yumi toktok. Tingim samting em toktok bilong yu bai mekim long ol narapela. Baibel i tok: “Man i no tingting gut na toktok, tok bilong em i olsem bainat i sutim man, tasol tok bilong man i gat savetingting i save oraitim man.”—Provep 12:18.
KISIM SAMPELA SAVE MOA
Kisim save long hau yu inap toktok long pasin we i amamasim Jehova na i strongim ol narapela.
4. Bosim gut toktok bilong yu
Sampela taim, yumi olgeta i save mekim ol tok we bihain yumi pilim nogut long en. (Jems 3:2) Ritim Galesia 5:22, 23, na stori long ol dispela askim:
Wanem sampela bilong ol dispela pasin em yu ken beten long kisim bilong helpim yu long kisim pasin bilong bosim gut toktok bilong yu? Olsem wanem ol dispela pasin inap helpim yu?
Ritim 1 Korin 15:33, na stori long dispela askim:
Ol pren na ol amamas yu makim, dispela inap mekim wanem long wei bilong yu long toktok?
Wanem samting inap stiaim wei bilong yu long toktok?
Ritim Eklisiastis 3:1, 7, na stori long dispela askim:
Wanem taim em i gutpela long pasim maus o wet long gutpela taim bilong toktok?
5. Mekim gutpela tok long pasin bilong ol narapela
Hau yumi ken sakim pasin bilong mekim ol tok i bagarapim o nogutim ol narapela? Pilaim VIDIO, na stori long ol dispela askim.
Long vidio, wai na dispela brata i laik senisim wei bilong em long toktok long ol narapela?
Em i mekim wanem samting bilong senis?
Ritim Eklisiastis 7:16, na stori long dispela askim:
Yumi mas tingim wanem samting taim yumi laik mekim tok i no gutpela long narapela?
Ritim Eklisiastis 7:21, 22, na stori long dispela askim:
Hau na ol dispela ves i ken helpim yu long no ken bel hevi taim wanpela i mekim tok i no gutpela long yu?
6. Mekim gutpela pasin taim yu toktok wantaim famili bilong yu
Jehova i laik bai yumi toktok wantaim famili bilong yumi long gutpela pasin na long pasin laikim. Pilaim VIDIO, na stori long dispela askim.
Wanem samting bai helpim yu long toktok gut wantaim famili bilong yu?
Ritim Efesus 4:31, 32, na stori long dispela askim:
Wanem kain tok i save strongim famili?
Tok bilong Jehova i kamapim filings bilong em long Pikinini bilong em, Jisas. Ritim Matyu 17:5, na stori long dispela askim:
Hau yu ken bihainim pasin bilong Jehova long wei yu toktok wantaim famili bilong yu?
Painim rot long mekim tok amamas long ol narapela
SAMPELA MAN I TOK: “Mi kamapim tingting bilong mi. Mi no bisi sapos ol i no amamas long tok mi mekim.”
Yu wanbel long dispela? Wai na yu ting olsem, o wai na yu ting nogat?
OL BIKPELA POIN
Ol tok i gat strong. Yumi mas tingim gut ol tok yumi bai mekim, wanem taim i gutpela long mekim, na hau yumi mekim.
Riviu
Wanem sampela rot em yu ken mekim ol tok i helpim ol narapela?
Wanem kain ol tok em yu laik abrusim?
Wanem samting inap helpim yumi long oltaim mekim toktok long gutpela pasin na mekim tok i strongim ol narapela?
MEKIM WOK PAINIMAUT
Wanem samting inap helpim yumi long mekim ol tok long pasin we i strongim narapela?
Kisim save long wanem samting inap helpim yu long abrusim pasin bilong mekim tok nogut.
“Yu Ting Tok Nogut Em i Samting Nogut Tru?” (Atikol long websait)
Lukim hau yu inap abrusim pasin bilong mekim tok baksait i bagarapim narapela.
Lukim hau Jehova i helpim wanpela man i gat hatwok long lusim pasin bilong tok nogut.
“Mi Tingting Long Laip Bilong Mi Bai Olsem Wanem Long Bihain” (Wastaua, Ogas 1, 2013)