Bilip Strong Long Jehova

“Bikpela, mi save bilip long yu tasol. Mi yangpela yet na mi bilip long yu, na mi bilip yet inap long nau.”​—⁠SONG 71:⁠5.

 1. Wanem samting i painim yangpela Devit?

GOLIAT em i traipela man, longpela bilong em i klostu 3-pela mita. I no hatwok long save long as na ol soldia bilong Israel i pret long pait wantaim em! Inap planti wik, long olgeta moning na apinun, traipela Filistia Goliat i wok long tok bilas long ami bilong Israel, em i tokim ol long salim wanpela strongpela soldia i kam pait wantaim em. Goliat i mekim i go i go na bihain wanpela i tok em bai kam pait wantaim Goliat, tasol i no wanpela soldia, nogat, em wanpela yangpela mangi. Yangpela Devit em i liklik tru long Goliat. Ating hevi bilong ol klos pait bilong Goliat i winim hevi bilong Devit! Tasol maski Goliat i traipela tru Devit i pait wantaim em, na long olgeta taim bihain ol man i tingim Devit olsem mak bilong man i gat strongpela bel.​—⁠1 Samuel 17:​1-51.

2, 3. (a) Wanem samting i mekim na Devit i no pret taim em i go pait wantaim Goliat? (b) Bai yumi toktok long wanem tupela samting yumi inap mekim na bai yumi ken bilip strong long Jehova?

² Wanem samting i mekim na Devit i gat strongpela bel olsem? Tingim sampela tok Devit i bin raitim taim em i go lapun: “Bikpela, mi save bilip long yu tasol. Mi yangpela yet na mi bilip long yu, na mi bilip yet inap long nau.” (Song 71:⁠5) Yes, taim Devit i stap yangpela em i bin bilip tru long Jehova. Taim em i laik pait wantaim Goliat em i tok: “Yu holim bainat na ol spia na yu kam pait long mi. Tasol mi kam pait long yu long nem bilong Bikpela I Gat Olgeta Strong, em God i bosim ol ami bilong mipela Israel. Em dispela God yu bin bikhet na tok bilas long en.” (1 Samuel 17:45) Goliat i bilip long bikpela strong bilong em yet na ol bainat samting, tasol Devit i bilip long Jehova. Bikpela King bilong heven na graun i stap long sait bilong Devit, olsem na i no gat as na em i pret long wanpela man, maski dispela man i traipela na i gat ol strongpela samting bilong pait.

³ Olsem wanem? Taim yu ritim stori bilong Devit, yu save kisim tingting olsem yu laik bai bilip bilong yu long Jehova i mas strongpela moa? Ating planti bilong yumi i gat kain tingting olsem. Olsem na yumi ken skelim tupela samting yumi inap mekim na bai yumi ken bilip strong long Jehova. Namba wan, yumi mas winim na wok oltaim long daunim wanpela samting i save pasim planti man long bilip strong long Jehova. Namba tu, yumi mas kisim save long ol samting i insait long pasin bilong bilip long Jehova.

Winim Wanpela Samting i Save Pasim Planti Man Long Bilip Long Jehova

4, 5. Wanem as na planti man i hatwok long bilip strong long God?

⁴ Wanem samting i save pasim ol man long bilip strong long God? Planti taim ol man i paul long as na ol samting nogut i save kamap. Planti i bin lain olsem God i as bilong pen na hevi. Taim samting nogut i kamap, ol pris pasto i tok God i kisim ol dispela man i dai bilong i stap wantaim em long heven. Na tu, planti hetman bilong lotu i lainim ol man olsem longtaim pinis God i bin makim olgeta samting bai kamap​—⁠olgeta samting nogut na olgeta samting ol man nogut i mekim. Em bai hatwok long bilip strong long wanpela God i gat kain hatpela pasin olsem. Satan, em man i save pasim tingting bilong ol man i no bilip, em i laik strongim olgeta dispela kain ‘tok bilong ol spirit nogut.’​—⁠1 Timoti 4:1; 2 Korin 4:⁠4.

⁵ Satan i laik bai ol man i no gat pasin bilong bilip strong long Jehova. Dispela birua bilong God i no laik bai yumi save long as tru bilong ol pen na hevi i painim ol man. Na sapos long rot bilong Baibel yumi lain pinis long ol as bilong ol pen na hevi, Satan i laik bai yumi lusim tingting long dispela. Olsem na sampela taim em i gutpela long skelim 3-pela bikpela as na pen na hevi i stap long graun. Taim yumi mekim olsem, dispela bai strongim bel bilong yumi olsem Jehova i no as bilong ol hevi i save painim yumi.​—⁠Filipai 1:​9, 10.

 6. Olsem wanem 1 Pita 5:8 i kamapim wanpela as na ol man i save kisim pen na hevi?

⁶ Wanpela as na ol man i karim pen na hevi em Satan i laik bagarapim pasin bilong ol gutpela manmeri bilong Jehova long i stap gut long Em. Satan i bin traim long bagarapim pasin bilong Jop long i stap gut long God. Em i no inap mekim, tasol em i wok yet long mekim long ol man. Em i bos bilong dispela graun, na em i laik painim ol gutpela wokboi bilong Jehova bilong “kaikai.” (1 Pita 5:⁠8) Em i laik mekim long yumi olgeta! Satan i laik pasim yumi long lotuim Jehova. Olsem na planti taim em i kirapim ol man long mekim nogut long yumi. Tru yumi pilim pen taim ol i mekim olsem long yumi, tasol i gat gutpela as na yumi sanap strong na karim dispela hevi. Taim yumi mekim olsem, yumi kamapim klia Satan em i man bilong giaman na dispela i amamasim Jehova. (Jop 2:4; Sindaun 27:11) Taim Jehova i wok long strongim yumi long karim pen na hevi, bilip bilong yumi long em i kamap strong moa.​—⁠Song 9:​9, 10.

 7. Tok bilong Galesia 6:7 i helpim yumi long luksave long wanem as bilong pen na hevi?

⁷ Yumi ken save long namba tu as na ol man i karim pen na hevi taim yumi ritim dispela stiatok: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” (Galesia 6:⁠7) Sampela taim ol man i no bihainim gutpela tingting na i olsem ol i planim dispela na ol pen na hevi ol i karim long samting ol i mekim i olsem kaikai i kamap. Ol i mekim nabaut taim ol i draivim ka na eksiden i kamap. Planti i smok, na bihain ol i kisim sik long klok o kensa long waitlewa. Ol man i pamuk nabaut na dispela inap bagarapim famili, man i no amamas long em yet, kisim ol sik bilong pamuk, na ol meri i kisim bel nating. Planti man i sutim tok long God long ol hevi bilong ol, tasol tru tru samting ol yet i bin mekim i givim hevi long ol.​—⁠Sindaun 19:⁠3.

 8. Olsem Saveman 9:11 i tok, wanem as na pen na hevi i painim ol man?

⁸ Namba tri as bilong pen na hevi i stap long Saveman 9:​11, i tok: “Mi bin lukim wanpela samting moa long dispela graun. Ol man i save ran strong tumas i no save winim resis. Ol strongpela soldia i no save winim pait. Ol man i gat gutpela tingting o bikpela save, ol i no save kisim planti mani samting. Na ol hapman bilong kain kain wok, ol i no save kisim ol bikpela wok. Taim nogut i save painim yumi olgeta.” Sampela taim ol man i stap long wanpela hap we hevi i kamap na ol i no inap abrusim. Maski yumi strong o yumi no strong long mekim ol samting, pen, hevi, na indai inap painim yumi wantu long taim yumi no ting em bai kamap. Olsem: Long taim bilong Jisas wanpela taua i bin pundaun na i kilim i dai 18 man. Jisas i kamapim olsem God i no givim strafe long ol long sampela sin ol i bin mekim long bipo. (Luk 13:⁠4) Nogat. Jehova i no as bilong ol kain hevi na pen.

 9. Wanem samting i hatwok long planti man long save long en?

⁹ Em i bikpela samting long save long as bilong ol dispela pen na hevi i save painim ol man. Tasol i gat wanpela samting em planti man i hatwok long save long en. Em olsem: Bilong wanem God Jehova i larim pen na hevi i stap?

Wanem As na Jehova i Larim Pen na Hevi i Stap?

10, 11. (a) Olsem Rom 8:​19-22 i kamapim, wanem samting i kamap long “olgeta samting God i bin wokim”? (b) Olsem wanem yumi ken save husat i bin mekim na olgeta samting i stap nogut na i save bagarap?

¹⁰ Wanpela hap bilong pas aposel Pol i raitim long ol Rom i givim yumi sampela save long dispela bikpela tok. Pol i tok: “Olgeta samting God i bin wokim, ol i wetim taim God i makim bilong kamapim ples klia yumi ol pikinini bilong en. I olsem olgeta samting i litimapim het na i lukluk nabaut, na i ting, wanem taim tru bai dispela taim i kamap. Nau olgeta samting i stap nogut na i save bagarap. Dispela i no kamap long laik bilong ol yet. Nogat. God yet i mekim ol i stap olsem, bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God [“na mekim em i kamap fri bilong kisim glori bilong ol pikinini bilong God,” King Jems Nupela Testamen]. Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.”​—⁠Rom 8:​19-22.

¹¹ Bilong kisim gut mining bilong ol dispela ves, pastaim yumi mas kisim bekim bilong sampela askim. Olsem: Husat i mekim na olgeta samting i stap nogut na i save bagarap? Olsem aposel Pol i bin tok, God yet i bin mekim bai ol man i ken “wetim gutpela samting God i laik mekim long ol.” Em nau, ol man i stap gut long God, bihain “God bai pinisim dispela kalabus bilong bagarap” bilong ol.a

12. Wanem tingting kranki i bin kamap long mining bilong dispela tok “olgeta samting God i bin wokim”? Yumi ken bekim dispela askim olsem wanem?

¹² Tasol dispela tok “olgeta samting God i bin wokim” i makim wanem samting long dispela skripsa? Sampela i tok dispela i makim olgeta samting bilong graun God i bin wokim, ol man, ol animal, na ol diwai sayor samting. Tasol olsem wanem? Ol animal na ol diwai sayor samting i laik “kamap fri bilong kisim glori bilong ol pikinini bilong God”? Nogat. (2 Pita 2:12) Olsem na dispela tok “olgeta samting God i bin wokim” i makim ol manmeri tasol. Em dispela samting God i bin wokim, em sin na dai i kamap long ol taim pasin bikhet i kamap long Iden, na ol i mas wetim gutpela samting long bihain.​—⁠Rom 5:⁠12.

13. Pasin bikhet long Iden i bin mekim wanem long ol man?

¹³ Pasin bikhet long Iden i bin mekim wanem long ol man? Pol i tok dispela i mekim na olgeta samting i stap nogut na i save bagarap.b Wanpela buk i tok dispela tok i makim “samting i no wok gut olsem man i bin wokim i gat laik long en.” God i bin wokim man bilong i stap oltaim, na wok gut wantaim na wanbel long lukautim Paradais hia long graun olsem wanpela famili i gutpela olgeta. Tasol ol i stap sotpela taim tasol, kisim pen, na stap bel hevi. Olsem Jop i tok, “mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela.” (Jop 14:⁠1) Man i stap nogut tru!

14, 15. (a) Wanem samting i makim olsem Jehova i bihainim stretpela pasin taim em i givim strafe long ol man? (b) Olgeta samting i stap nogut na i save bagarap, bilong wanem Pol i tok dispela samting i no kamap long “laik bilong ol yet”?

¹⁴ Nau yumi laik stori long nambawan bikpela askim: Wanem as na “Jas bilong olgeta graun” i larim ol man i karim dispela bikpela pen na hevi? (Stat 18:25) Olsem wanem? Em i bihainim stretpela pasin taim em i mekim olsem? Tingim samting namba wan tumbuna papamama bilong yumi i bin mekim. Taim ol i bikhet long God, ol i sapotim Satan​—⁠em i bin sutim bikpela tok long wok Jehova i mekim bilong bosim ol man. Long pasin ol i mekim, ol i sapotim tok bilong Satan olsem sindaun bilong ol man bai gutpela moa sapos Jehova i no bosim ol na ol i bosim ol yet na wanpela bikhet ensel i stiaim ol. Taim Jehova i tokaut long strafe bilong ol dispela bikhet lain, i olsem em i larim ol long mekim samting ol i gat laik long mekim. Em i larim ol man i bosim ol yet aninit long wok bos bilong Satan. Olsem na God i bihainim tru stretpela pasin taim em i larim ol i stap nogut, tasol ol i ken wetim gutpela samting em i laik mekim long ol.

¹⁵ Dispela samting i no kamap “long laik bilong ol yet.” Taim mama i karim yumi, yumi kamap olsem wokboi nating bilong sin na i dai, na yumi no inap mekim wanpela samting long dispela. Tasol long pasin marimari bilong em, Jehova i larim Adam na Iv i stap na kamapim ol pikinini. Maski yumi ol tumbuna pikinini bilong ol, na sin na i dai i pas long yumi, yumi gat rot long mekim samting Adam na Iv i no bin mekim. Yumi ken putim yau long tok bilong Jehova na kisim save olsem wok bos bilong em i stretpela na gutpela olgeta, tasol taim ol man i sakim Jehova na bosim ol yet dispela i save bringim pen na bel hevi, na i no kamapim gutpela samting. (Jeremaia 10:23; KTH 4:11) Na wok Satan i mekim bilong stiaim ol man i mekim na ol samting i go nogut moa yet. Ol samting i bin painim ol man i soim olsem ol dispela tok i tru.​—⁠Saveman 8:⁠9.

16. (a) Wanem samting i mekim na yumi save tru tru olsem Jehova i no as bilong pen na hevi yumi lukim long nau? (b) Long pasin sori Jehova i mekim wanem na ol man i stap gut long em ol i ken wetim gutpela samting?

¹⁶ Tru tumas, i gat ol stretpela as na Jehova i larim ol man i stap nogut. Tasol olsem wanem? Dispela i makim olsem Jehova i as na yumi olgeta i stap nogut na pen na hevi i painim yumi long nau? Tingim wanpela jas i makim strafe bilong wanpela raskol. Ating dispela raskol bai karim planti pen na hevi taim em i kisim strafe jas i bin makim, tasol yu ting i stret em inap tok olsem jas i as bilong pen na hevi em i karim? Nogat tru! Na tu, Jehova i no as bilong pasin nogut. Jems 1:13 i tok: “Sin i no inap pulim God, na God i no save pulim man long mekim sin.” Na tu yumi laik tingim, taim Jehova i kolim dispela strafe em i tok “bai ol i wetim gutpela samting God i laik mekim long ol.” Long pasin sori em i stretim rot bilong ol tumbuna pikinini bilong Adam na Iv husat i stap gut long em long ol i ken lukim pinis bilong dispela taim bilong i stap nogut na kisim amamas long “kamap fri bilong kisim glori bilong ol pikinini bilong God.” Long olgeta taim bihain, ol manmeri i stap gut long God i no ken tingting planti na ting olsem olgeta samting God i bin wokim bai i stap nogut gen. Jehova i bihainim stretpela pasin taim em i stretim ol samting na dispela i kamapim long ples klia inap oltaim oltaim olsem i stret em i stap nambawan bos.​—⁠Aisaia 25:⁠8.

17. Taim yumi skelim ol as bilong pen na hevi bilong nau, dispela i mas mekim wanem long yumi?

¹⁷ Olsem wanem? Taim yumi skelim ol dispela as bilong pen na hevi, yumi lukim samting i makim olsem Jehova i as bilong ol pasin nogut na i gat as na yumi no ken bilip strong long em? Nogat, a? Taim yumi skelim ol dispela samting yumi laik mekim wankain tok olsem Moses: “God bilong yumi i save stap olsem oltaim. Em i olsem wanpela bikpela strongpela ston i no save senis. Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:⁠4) Taim yumi tingim tingim ol dispela askim, dispela bai helpim yumi long tingim gut ol bekim bilong ol dispela askim. Long dispela rot, taim ol traim i painim yumi, yumi inap sakim wok bilong Satan long givim tupela tingting long yumi. Tasol olsem wanem long namba tu samting yumi bin kolim long kirap bilong dispela stori? Wanem ol samting i insait long pasin bilong bilip long Jehova?

Bilip Long Jehova​—⁠Mining Bilong En

18, 19. Baibel i mekim wanem tok bilong kirapim yumi long bilip long Jehova? Tasol sampela man i kisim wanem ol tingting kranki long dispela pasin?

¹⁸ Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:​5, 6) Em ol gutpela tok i save strongim yumi. I no gat narapela man long heven na graun yumi inap bilip tru long em olsem yumi bilip long Papa bilong yumi long heven. Em i isi long ritim dispela tok bilong Sindaun, tasol i hatwok long bihainim.

¹⁹ Planti i gat tingting kranki long mining bilong dispela pasin bilong bilip long Jehova. Sampela i ting em i samting man i pilim long bel, wanpela amamas nating i kamap long bel bilong man. Sampela i ting pasin bilong bilip i makim olsem yumi inap bilip olsem God bai lukautim yumi na olgeta samting nogut i no ken painim yumi, na em bai stretim olgeta hevi bilong yumi, na olgeta samting i painim yumi long olgeta de bai kamap gutpela olsem yumi gat laik long en​—⁠na em bai kamap wantu! Tasol kain tingting i no gat as bilong en. Pasin bilong bilip i no samting man i pilim long bel tasol, na pasin bilong bilip i gat as bilong en. Long ol man i bikpela pinis, pasin bilong bilip i save mekim na ol i tingting gut na mekim ol samting.

20, 21. Wanem samting i insait long pasin bilong bilip long Jehova? Mekim tok piksa long dispela.

²⁰ Tingim gen tok bilong Sindaun 3:⁠5. Em i tok long bilip long Jehova, i no long save bilong yumi yet. I olsem yumi no inap mekim tupela wantaim. Olsem wanem? Dispela i makim olsem yumi no ken yusim tingting na save bilong yumi yet? Nogat, long wanem, Jehova i bin givim dispela tingting na save long yumi, em i laik bai yumi yusim dispela long mekim wok bilong em. (Rom 12:​1, NW ) Tasol taim yumi mas makim samting yumi bai mekim, yumi save bilip long wanem samting? Sapos tingting bilong yumi i no wankain olsem bilong Jehova, yumi save kisim gutpela tingting na save bilong em na ting dispela i winim tru tingting bilong yumi? (Aisaia 55:​8, 9) Pasin bilong bilip long Jehova i makim olsem yumi larim tingting bilong em i stiaim tingting bilong yumi.

²¹ Yumi ken tok piksa olsem: Tingim wanpela liklik pikinini i sindaun insait long wanpela ka, na papamama i sindaun long fran. Papa i draivim ka. Taim ol hevi i kamap long raun bilong ol​—⁠olsem ol i mas makim wanem rot i stret long bihainim o bikpela win na ren i kamapim hevi o rot i bagarap⁠—pikinini i save bihainim tok na i bilip long papa bai mekim wanem? Yu ting em bai singaut bikmaus na tokim papa long wanem rot em i mas bihainim na olsem wanem papa i mas draivim ka? Em i kisim tupela tingting long samting papamama i mekim o sakim ol taim ol i tokim em long pasim sia let? Nogat, em i save bilip long ol long lukautim ol dispela samting, maski ol i no gutpela olgeta. Jehova em i wanpela Papa i gutpela olgeta. I stret yumi bilip tru long em, na moa yet taim ol hevi i painim yumi, a?​—⁠Aisaia 30:⁠21.

22, 23. (a) Bilong wanem yumi mas bilip long Jehova taim ol hevi i painim yumi? Yumi ken mekim olsem wanem? (b) Stori i kamap bihain long dispela bai toktok long wanem samting?

²² Tasol, Sindaun 3:6 i tok yumi mas ‘tingting strong long Bikpela long olgeta samting yumi mekim,’ i no long taim bilong hevi tasol. Olsem na ol samting yumi pasim tok long mekim long olgeta wan wan de i mas soim olsem yumi bilip long Jehova. Taim ol hevi i kamap, yumi no ken bel hevi, tingting planti, o sakim tok bilong Jehova long stiaim yumi long nambawan gutpela rot bilong stretim ol hevi. Yumi mas tingim ol hevi i olsem rot bilong sapotim nambawan wok bos bilong Jehova, kamapim long ples klia olsem Satan em i man bilong giaman, na kamapim pasin bilong bihainim tok na ol narapela gutpela pasin Jehova i save amamas long en.​—⁠Hibru 5:​7, 8.

²³ Yumi ken soim olsem yumi bilip long Jehova maski wanem kain hevi i laik painim yumi. Yumi mekim olsem long rot bilong ol beten bilong yumi na long pasin bilong yumi long lukluk long Tok bilong Jehova na oganaisesen bilong em long stiaim yumi. Tasol olsem wanem yumi ken soim olsem yumi bilip long Jehova taim ol hevi bilong nau i painim yumi? Stori i kamap bihain long dispela bai skelim dispela samting.

[Ol Futnot]

Bai Yu Bekim Olsem Wanem?

• Devit i mekim wanem bilong soim olsem em i bilip tru long Jehova?

• Wanem 3-pela bikpela as na pen na hevi i stap long nau? Bilong wanem i gutpela long skelim ol dispela samting long sampela taim?

• Jehova i makim wanem strafe bilong ol manmeri? Olsem wanem dispela strafe i stret?

• Wanem samting i insait long pasin bilong bilip long Jehova?

[Ol Piksa long pes 8]

Devit i bilip tru long Jehova

[Piksa long pes 10]

Jisas i kamapim olsem taim wanpela taua i bin pundaun long Jerusalem, Jehova i no as bilong dispela