Ol Yangpela i Save Tingim Man Bilong Wokim Ol
“God i bin wokim yumi olgeta. Olsem na long taim yupela i yangpela yet, yupela i mas tingim em.”—SAVEMAN 12:1.
EM I gutpela samting tru taim ol yangpela i mekim ol tok na pasin i kamapim klia olsem ol i tingim God Jehova em i wanpela man i stap tru, na ol i givim biknem long em na ol i laik mekim pasin em i laikim! Wanpela manki i gat 11-pela krismas em i tok: “Taim mi stap wanpis na mi sanap long windo na lukluk i go ausait, mi lukim ol samting Jehova i wokim i gutpela tru. Orait nau mi save tingim Paradais bai kamap bihain, em bai i gutpela ples tru, na long dispela taim mi inap holim ol animal.” (Aisaia 11:6-9) Na em i tok moa: “Taim mi stap wanpis, mi save beten long Jehova. Mi save em i no inap kros long mi sapos mi toktok oltaim long em. Mi save em i stap na oltaim em i lukluk long mi.” Olsem wanem? Yu wankain olsem dispela manki na yu tingim Man bilong wokim yu em i wanpela man i stap tru?
Yu Tingim God i Stap Tru?
2 Bilong tingim Jehova i stap tru na ol tok promis bilong em bai kamap tru, pastaim yu mas kisim save long em na long gutpela sindaun tru em i laik givim long yu long nupela taim i gat stretpela pasin long en, em Baibel i stori long en. (KTH 21:3, 4) Sapos papamama i bin skulim yu long ol dispela samting, i gat as na yu ken tenkyu long dispela, long wanem, nau yu inap bihainim dispela tok bilong Baibel, olsem: “God i bin wokim yumi olgeta. Olsem na long taim yupela i yangpela yet, yupela i mas tingim em.” (Saveman 12:1) Wanpela yangpela meri em papamama i bin skulim em kirap long taim em i liklik yet, em i tok: “Oltaim ol i save tok, Jehova i insait long olgeta samting yumi mekim. Dispela i kirapim mi long tingim Man bilong wokim mi.” Narapela yangpela meri i tok: “Inap long olgeta taim bihain mi mas tenkyu long papamama, long wanem, ol i bin skulim mi olsem Jehova em i wanpela man i stap tru. Ol i soim mi long olsem wanem mi ken laikim em tru, na ol i tokim mi long bikpela amamas yumi inap kisim taim yumi mekim wok bilong em long olgeta de.”
3 Tasol planti yangpela ol i save hatwok long tingim God em i wanpela man i stap tru na em i save tingim ol. Olsem wanem long yu? Yu save hatwok olsem? Wanpela tok bilong Wastaua i bin helpim wanpela yangpela long tingim God em i wanpela man i stap tru. Dispela Wastaua i tok: “Bodi bilong Jehova i bikpela olsem wanem, em yumi no save.” Tru, yumi no tingim mak bilong bodi bilong Jehova na bai yumi ken tingim em i gat bikpela namba tru. Dispela Wastaua i tok moa olsem: “Bilong save olsem em i bikpela Man tru, yumi ken tingim olsem em i wanem kain God,” olsem em i God bilong bihainim olgeta tok bilong em, na em i gat pasin sori, na laikim tru ol man, na lusim tingting long rong bilong ol.a (Kisim Bek 34:6; Lo 32:4; Song 86:5; Jems 5:11) Yu save tingim Jehova i kain man olsem, olsem wanpela pren yumi ken bilip tru long em na pas gut wantaim em?—Aisaia 41:8; Jems 2:23.
4 Jisas i bin helpim ol disaipel bilong em bilong pastaim long pas gut wantaim God. Olsem na taim aposel Jon i toktok long taim em bai kirap bek long matmat na go antap long heven, em i tok: “Yumi bai lukim [God] tru, na yumi bai kamap wankain olsem em yet.” (1 Jon 3:2; 1 Korin 15:44) Long nau tu, yumi inap helpim ol yangpela long tingim God em i wanpela man i stap tru, na ol inap save gut long em, maski ol i no inap lukim em. Wanpela yangpela man i tok: “Papamama i bin givim planti askim long mi bilong helpim mi long tingim Jehova. Ol i askim mi olsem, ‘Jehova bai tok wanem? Long tok bilong yu yet bai yu stori olsem wanem long dispela? Wanem insait bilong dispela tok?’ ” Ol gutpela askim olsem, ol inap kirapim yumi long tingting olsem yumi pas gut wantaim God o nogat?
Yumi Ken Tingim Em Olsem Wanem?
5 Bilong bihainim dispela tok, “Yupela i mas tingim [God],” i no olsem yumi tingting tasol long Jehova—yumi mas mekim ol samting em i laikim. Wanpela man bilong mekim pasin nogut i bin krai long Jisas olsem: “Taim yu kamap king, yu ken tingting long mi.” Tasol dispela man i no laik bai Jisas i tingting long nem bilong em tasol—em i laik bai Jisas i mekim wanpela samting, olsem kirapim em bek long matmat. (Luk 23:42) Na Josep tu, taim em i stap kalabus na em i askim man bilong lukautim wain bilong king long tingting long em na tokim king, Josep i laik bai dispela man i mekim wanpela samting bilong helpim em. Na taim Jop i singaut long God na i tok, “Tingim mi,” i olsem Jop i askim God long kirapim em bek long wanpela taim bihain.—Jop 14:13; Stat 40:14, 23.
6 Wanpela saveman i stori long wanpela tok Hibru yumi tanim olsem “tingting” o “tingim,” na em i tok, planti taim dispela tok i makim olsem “tingting i laikim tumas wanpela samting o wanpela man, na taim em i tingim, em i kirap mekim wanpela samting.” Insait bilong dispela tok “tingting” o “tingim,” olsem “laikim tumas,” em i kamap klia long wanpela tok bilong ol dispela “planti manmeri bilong ol arapela kantri” ol i wokabaut long ples drai nating, em ol i tok: “Mipela i tingting yet long pis mipela i bin kaikai long Isip.” Jop i bin askim God long tingim em, na i gat sampela man moa, olsem Hesekia, Nehemia, Devit, na wanpela man bilong raitim Song em yumi no save long nem bilong em, ol tu i krai long Jehova i ken tingim pasin bilong ol long i stap gut long em, na em i ken tingting long ol.—Namba 11:4, 5, NW; 2 King 20:3; Nehemia 5:19; 13:31; Song 25:7; 106:4.
7 Olsem na yumi ken askim olsem, ‘Yumi save laikim tumas Man bilong wokim yumi na yumi tingim em, na yumi no laik mekim wanpela samting i bagarapim bel bilong em?’ Wanpela yangpela i tok: “Mama i bin helpim mi long save, Jehova inap amamas na em inap bel hevi tu, na taim mi liklik yet mi save, olgeta samting mi mekim em inap mekim bel bilong Jehova i amamas o mekim em i bel hevi.” (Song 78:40-42) Narapela meri i tok: “Mi save pinis, ol samting mi mekim bai helpim Jehova o pasim rot bilong em long bekim tok Satan i bin sutim long em. Mi laik mekim bel bilong Jehova i amamas, na dispela tingting i bin helpim mi, na em i wok yet long helpim mi long nau.”—Sindaun 27:11.
8 Tru, long dispela graun i gat pasin nogut tru long en, sampela taim i hatwok long tingting long Jehova, olsem mekim olgeta wok em i save laikim. Tasol i gutpela tru sapos yu inap bihainim pasin bilong yangpela Timoti em i bin i stap long taim bilong ol aposel—na planti tausen yangpela long nau ol i save stap aninit long God—na yu ken mekim wok Kristen bilong autim tok long olgeta de olsem wanpela painia! (Aposel 16:1-3; 1 Tesalonaika 3:2) Tasol i gat sampela bikpela askim bilong dispela, olsem: Sapos yu mekim wok painia, bai yu inap lukautim skin bilong yu yet long kaikai klos samting? Na sapos bihain yu marit, yu gat save long mekim sampela wok na bai yu inap lukautim famili bilong yu long ol samting bilong skin? (1 Timoti 5:8) Ol dispela askim i bikpela samting, na yu mas tingim gut.
As Bilong Kisim Gutpela Skul
9 Nau long dispela taim, ol lain bilong graun i wok long kamapim ol kain kain nupela wok, olsem na yu mas kisim bikpela skul moa bambai yu inap kisim wanpela wok na lukautim yu yet long kaikai samting taim yu mekim wok painia. Ating yu lukim pinis olsem sampela ol i bin skul long yunivesiti, tasol ol i mas skul gen long sampela samting bambai ol inap kisim save long mekim ol nupela kain wok em bos bilong ol kampani i laik bai ol wokman bilong ol i mas mekim long nau. Olsem na yupela ol yangpela i laik mekim ol samting God i laikim, bai yupela i kisim skul i go inap long wanem mak? Taim yu skelim dispela samting, i stret yu mas tingting long dispela tok em spirit holi i bin kamapim, em i tok: “God i bin wokim yumi olgeta. Olsem na long taim yupela i yangpela yet, yupela i mas tingim em.”
10 Na tu, yu mas wok long kisim wanpela kain skul em planti bikman bilong graun i tok em i winim olgeta narapela skul—em skul yumi kisim taim yumi stadi gut long tok bilong Baibel. Wanpela man bilong Jemani em man bilong raitim buk (Johann Wolfgang von Goethe), em i tok: “Taim ol man i wok long kisim bikpela save moa, ol i gat bikpela rot moa long mekim wok long ol tok bilong Baibel olsem as bilong skul ol i kisim, na olsem samting bilong mekim wok long en bilong kisim save.” Tru tumas, taim yu stadi long Baibel, dispela bai inapim yu tru long mekim ol gutpela wok long i stap bilong yu, winim olgeta narapela skul yu inap kisim!—Sindaun 2:6-17; 2 Timoti 3:14-17.
11 Save bilong God inap givim laip long yumi, olsem na nambawan bikpela wok yu inap mekim long nau, em bilong givim dispela save long ol narapela man. (Sindaun 3:13-18; Jon 4:34; 17:3) Tasol bilong mekim gut dispela wok, yu mas kisim sampela skul. Yu mas inap long wokim gut tingting bilong yu, na mekim ol tok i klia na ol man inap kisim gut, na save gut long rit rait—em ol samting ol yangpela i save lainim long skul. Olsem na ol samting yu lain long en long skul, yu mas tingim gut, olsem Tracy i bin mekim—em i wanpela yangpela meri bilong Florida, Yunaitet Stets, em i bin winim haiskul na kisim bikpela mak tru olsem wanpela savemeri. Em i kamapim laik bilong em, olsem: “Long olgeta taim mi bin tingim wanpela mak mi laik winim, em bilong mekim wok bilong God bilong mi, Jehova, long olgeta de, na mi laik bai skul mi bin kisim em inap helpim mi long winim dispela mak.”
12 Yu bin tingting olsem i gat wanem as na yu go long skul? Yu save go long skul bilong inapim yu long kamap wanpela wokman bilong Jehova i mekim gut wok bilong em? Sapos olsem, yu mas tingim gut olsem skul yu kisim em i helpim yu olsem wanem long mekim dispela wok. Taim yu toktok pinis wantaim papamama long dispela samting, ating bai yupela i pasim tok olsem yu mas kisim sampela skul moa, winim mak gavman i putim bilong ol pikinini i ken lusim skul. Sapos yu kisim sampela skul moa olsem, ating em bai helpim yu long kisim wanpela wok mani bambai yu inap lukautim yu yet long ol samting, na yu gat hap taim na strong yet long mekim wok bilong Kingdom long olgeta de.—Matyu 6:33.
13 Sampela yangpela em ol i wok long kisim sampela kain skul moa, ol i save mekim wok bilong autim tok long olgeta de, maski ol i skul yet. Tingim Nadia na Marina, em tupela yangpela meri bilong Mosko, long Rasia. Tupela wantaim i bin kisim baptais long Epril 1994 na ol i kirap mekim wok olsem painia haptaim. Bihain liklik, ol i winim haiskul na ol i putim nem bilong ol long mekim wanpela kos inap tupela yia bilong lain long wok akaun. Long Me 1995 tupela i kirap mekim wok painia oltaim, tasol ol i wok yet long kisim bikpela mak olsem A long dispela kos ol i mekim. Na taim tupela i skul yet, ol i mekim olsem 14 Baibel-stadi. Tupela yangpela meri hia ol i laik bai dispela skul ol i kisim long wok akaun em bai helpim ol long kisim wanpela wok mani bambai ol inap lukautim ol yet long kaikai na klos samting taim ol i mekim wok bilong autim tok long olgeta de.
14 Sapos yu wok long kisim sampela skul moa, winim mak gavman i putim bilong ol pikinini i ken lusim skul, i gutpela sapos yu skelim gut olsem i gat wanem as na yu mekim olsem. Yu tingting long kisim bikpela nem na planti mani kago? (Jeremaia 45:5; 1 Timoti 6:17) O yu tingting olsem yu kisim dispela skul bambai yu ken insait moa yet long wok bilong Jehova? Lydia, em wanpela yangpela meri i bin tingting long kisim sampela skul moa, em i kamapim gutpela tingting bilong em long ol samting bilong spirit, em i tok: “Sampela ol i bin wok long kisim sampela skul moa na ol i larim pasin bilong tingim mani samting i pulim ol na ol i lusim tingting long God. Tasol mi laik pas gut wantaim God—dispela em i bikpela samting tru long mi.” Em gutpela tingting tru yumi olgeta i ken bihainim!
15 Yumi ken tingim ol Kristen long taim bilong ol aposel, sampela i kisim bikpela skul, na sampela i kisim liklik skul tasol. Ol man i bin tingim aposel Pita na aposel Jon em ol man “i no bin skul. Tupela i man nating tasol.” Ol i bin ting olsem, long wanem, tupela i no bin skul long ol bikpela skul bilong ol tisa bilong lotu Juda. (Aposel 4:13) Tasol aposel Pol i bin skul long ol bikpela skul, olsem ol skul yunivesiti bilong nau. Tasol dispela bikpela skul Pol i bin kisim, em i no mekim wok long en bilong kisim biknem, nogat. Dispela skul em i bin kisim i helpim em gut taim em i autim tok long ol kain kain man, em sampela i gat bikpela save na namba. (Aposel 22:3; 1 Korin 9:19-23; Filipai 1:7) Na Manain, “em wanpela poroman [olsem wanskul] bilong namba wan gavman Herot,” em wanpela man bilong go pas long skulim ol manmeri long kongrigesen Antiok.—Aposel 13:1.
Bilong Wanem Yu Mas Skelim Gut Mani Bilong Yu?
16 Sapos yu no bihainim savepasin na skelim gut mani bilong yu, ating bai yu hatwok long tingim Man bilong wokim yu na mekim ol samting em i save laikim. Long wanem, sapos yu mas kisim dinau, orait nau i olsem yu gat nupela bos. Baibel i tok: “Ol man i gat dinau, ol i stap olsem wokboi nating bilong ol man i givim dinau.” (Sindaun 22:7) Wanpela tok piksa bilong Jisas i kamapim klia olsem taim yumi laik tromoi mani long wanpela samting, yumi mas tingting gut pastaim. Em i tok: “Sapos wanpela bilong yupela i laik wokim wanpela haus . . . , orait ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat. Sapos em i no mekim olsem pastaim, na em i putim simen na bihain em i no inap pinisim dispela haus, orait olgeta man i lukim, ol bai i tok bilas long em.”—Luk 14:28, 29.
17 Olsem na i gutpela yu bihainim savepasin na wok strong long bihainim ol lo bilong Baibel olsem yumi “no ken larim wanpela dinau bilong [yumi] i stap. Dispela wanpela dinau tasol i save stap oltaim, em dinau bilong givim bel bilong yumi long ol arapela.” (Rom 13:8) Tasol i hatwok long mekim olsem, na i hatwok moa taim yumi lukim ol nupela nupela samting ol i save wokim, na ol i putim toksave olsem yumi mas i gat ol dispela samting. Wanpela papa i laik helpim ol pikinini bilong em long bihainim savepasin long dispela samting, em i tok: “Mipela i bin lusim bikpela hap taim bilong toktok long wanem ol samting em samting yumi mas kisim na wanem ol samting em samting yumi gat laik tasol long kisim.” Ol skul i no bin skulim ol yangpela long ol dispela samting, na ol i no bin skulim ol long pasin bilong skelim gut mani na no ken tromoi nating. Wanpela meri i mekim wok olsem welfe em i tok: “Taim yumi lusim haiskul pinis, yumi gat bikpela save long isosceles triangle, tasol yumi no gat bikpela save long pasin bilong lukautim gut mani.” Orait, wanem samting inap helpim yu na bai yu bihainim savepasin long baim ol samting?
18 Sapos yu putim gut yau long dispela tok, “Taim yupela i yangpela yet, yupela i mas tingim [God],” dispela bai helpim yu long bihainim savepasin na skelim gut mani bilong yu. Long wanem, taim yu bihainim dispela tok, nambawan tingting bilong yu em bilong mekim ol samting Jehova i save laikim; na yu laikim em tumas, na dispela bai stiaim tingting bilong yu taim yu tromoi mani long baim ol samting. Olsem na bai yu wok strong bambai yu no ken larim ol laik bilong yu long baim ol samting i pasim yu long givim bel olgeta long God. (Matyu 16:24-26) Bai yu wok strong bambai “ai bilong yu i gutpela,” olsem ai bilong yu i lukluk stret i go long Kingdom bilong God na long mekim wok bilong em. (Matyu 6:22-24) Taim yu mekim olsem, bai yu tingim dispela tok bilong God long “givim [ol gutpela samting bilong yu] long Bikpela olsem ofa,” em i wanpela gutpela wok bilong amamas.—Sindaun 3:9.
Ol Yangpela i Stap Olsem Gutpela Piksa
19 Gutpela tru, i gat planti yangpela long bipo na long nau tu, ol i bin tingim Man bilong wokim ol. Liklik manki Samuel i bin sanap strong long wok bilong em long haus bilong God, maski ol wanwok bilong em ol i mekim pasin pamuk. (1 Samuel 2:12-26) Meri bilong Potifar i no inap grisim yangpela man Josep long mekim pasin pamuk wantaim em, maski meri i wok strong long pulim em. (Stat 39:1-12) Jeremaia em i “yangpela tumas,” tasol em i strongim bel na autim tok, maski ol man i birua nogut tru long em. (Jeremaia 1:6-8) Wanpela pikinini meri Israel em i no pret long stiaim namba wan ofisa long ami bilong Siria long kisim helpim long Israel na bai em inap kisim save long Jehova. (2 King 5:1-4) Yangpela man Daniel wantaim ol poroman bilong em ol i sanap strong long bilip, taim wanpela traim i kamap long ol lo bilong God long kaikai. Na 3-pela yangpela, em Satrak na Mesak na Abetnego, ol i larim ol man i tromoi ol i go insait long bikpela paia, long wanem, ol i no laik brukim skru long wanpela imis na lusim pasin bilong i stap gut long God.—Daniel 1:8, 17; 3:16-18; Kisim Bek 20:5.
20 Long nau, winim 2,000 yangpela i gat 19 krismas i go inap 25 krismas, ol i wok long nambawan ofis bilong ol Witnes Bilong Jehova long Provins Nu Yok, long Yunaitet Stets. Dispela em i liklik hap lain tasol bilong planti tausen yangpela i stap long olgeta hap, em ol i wok long tingim Man bilong wokim ol. Olsem Josep i bin mekim bipo, ol i no laik lusim stretpela pasin bilong ol na mekim pasin pamuk samting. Na planti ol i bihainim tok bilong God na ol i putim tok bilong man i nambatu, taim ol man i laik subim ol long makim husat ol bai lotu long en. (Aposel 5:29) Long Polan long 1946, wanpela yangpela meri i gat 15 krismas, nem bilong em Henryka Zur, em i no laik mekim wanpela pasin bilong lotuim god giaman, olsem na ol man i mekim nogut tru long em na givim bikpela pen long em. Wanpela bilong dispela lain i tok: “Long bel yu ken bilip long wanem samting yu laik bilip long en, tasol mipela i laik bai yu mekim mak bilong kruse, em mak bilong ol Katolik.” Yangpela meri i no laik mekim, olsem na ol i holim em na pulim em i go insait long bus na ol i sutim em long gan. Tasol ol i no inap daunim bilip bilong em long samting em i wet long kisim, em laip i stap oltaim!b
21 Taim Jehova i lukim ol yangpela bilong bipo na i kam inap long nau em ol i bin tingim em, yumi save dispela i save mekim gut tru bel bilong em! Olsem wanem long yu? Bai yu bihainim dispela singaut olsem, “Taim yupela i yangpela yet, yupela i mas tingim [God]”? Tru tumas, Bikpela Man bilong wokim yu em inap tru long yu ken tingim em! Long olgeta de yu mas tingim ol samting em i bin mekim bilong helpim yu, na ol samting bihain em bai mekim, na bihainim singaut bilong em, olsem: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”—Sindaun 27:11.
[Ol Futnot]
a Wastaua (tok Inglis), Disemba 15, 1953, pes 750.
b Lukim yiabuk bilong ol Witnes Bilong Jehova bilong 1994, (tok Inglis), pes 217-218, em Sosaiti Wastaua bilong Nu Yok i wokim.
Yu Inap Tingim?
◻ Olsem wanem yumi inap helpim ol yangpela long tingim God em i wanpela man i stap tru?
◻ Wanem insait bilong dispela tok olsem yu mas tingim Man bilong wokim yu?
◻ Yumi mas ting olsem skul yumi kisim i bilong helpim yumi long mekim wanem?
◻ Bilong wanem yumi mas skelim gut mani bilong yumi?
◻ Wanem ol yangpela ol inap tru long yu ken bihainim pasin bilong ol?
[Askim Bilong Stadi]
1. Wanpela manki i gat 11-pela krismas em i tok wanem na yumi save, em i tingim Man bilong wokim yumi em i wanpela man i stap tru?
2. (a) Yu ken mekim wanem na bai yu tingim Man bilong wokim yu em i wanpela man i stap tru? (b) Olsem wanem ol papamama inap helpim ol pikinini bilong ol long pilim tru olsem God em i wanpela man i stap tru?
3, 4. Wanem samting inap helpim yu long tingim Jehova em i wanpela man i stap tru?
5. Wanem sampela stori long Baibel i soim yumi, bilong tingim wanpela man, yumi no ken tingim nem tasol bilong em?
6. Wanpela tok Hibru yumi tanim olsem “tingting” o “tingim,” olsem wanem dispela i makim olsem yumi laikim dispela samting o dispela man yumi tingim?
7. Sapos yumi laikim tumas God na yumi tingim em, dispela bai mekim wanem long pasin na wokabaut bilong yumi?
8. (a) Wanem wok bai makim olsem yumi laikim tumas Jehova na yumi tingim em? (b) Wanem sampela askim ol yangpela i ken tingim?
9. Ol yangpela i mas skelim wanem samting long kisim skul bilong graun?
10. Wanem kain skul yumi inap kisim, em i winim olgeta narapela skul?
11. (a) Wanem nambawan bikpela wok yumi inap mekim? (b) I gat wanem as na wanpela yangpela i laik kisim sampela skul?
12. Sapos yangpela i tingting long kisim sampela skul moa, dispela inap helpim em long mekim wanem?
13. Tupela Kristen bilong Rasia i bin kisim sampela skul moa, ol i mekim wanem na dispela i kamapim klia wok tru ol i laik mekim long i stap bilong ol?
14. Maski wanem kain skul bilong graun yumi tingting long kisim, wanem samting i mas i stap olsem nambawan bikpela samting long yumi?
15. Olsem wanem long skul ol Kristen i bin kisim long taim bilong ol aposel?
16. (a) Sapos yumi gat dinau, olsem wanem dispela bai mekim na yumi hatwok long tingim Man bilong wokim yumi? (b) Olsem wanem wanpela tok piksa bilong Jisas i kamapim klia olsem taim yumi laik tromoi mani long wanpela samting, yumi mas tingting gut pastaim?
17. Bilong wanem planti taim i hatwok long skelim gut mani bilong yumi na bai yumi no tromoi nating?
18. Wanem wanpela samting inap helpim yumi long skelim gut mani bilong yumi? Bilong wanem em inap helpim yumi olsem?
19. Sampela yangpela bilong bipo i bin mekim wanem na ol i tingim Man bilong wokim ol?
20. Long nau tu, planti yangpela i bin mekim wanem na ol i tingim Man bilong wokim ol?
21. I gutpela yu bihainim wanem singaut? Wanem samting bai kamap sapos yu mekim olsem?
[Piksa long pes 17]
Yu bin tingting olsem i gat wanem as na yu save go long skul?