Givim Gutpela Tingting Long Man

Olsem wanem? Wanpela i bin askim yu long givim sampela tingting long em? Ating ol i givim kain askim olsem: ‘Mi mas mekim wanem? I stret mi go long dispela bung? Gutpela sapos mi mekim dispela wok skin? I gutpela mi prenim dispela man?’

Ating narapela bai askim yu long helpim em long wokim wanpela disisen em inap stiaim pasin bilong em long pas gut wantaim ol pren bilong em, ol famili, o long Jehova. Bai yu kamapim tingting bilong yu yet o bilong Baibel? Yu save mekim wanem bilong helpim man long wokim disisen bilong em yet? Maski yu ting askim bilong man i bikpela samting o nogat, Sindaun 15:28 i tok: “Stretpela man i save tingting gut pastaim, na bihain em i bekim tok long arapela man.” Tingim olsem wanem dispela 5-pela stiatok bilong Baibel i ken helpim yumi long givim gutpela tingting long man.

 1 Kliagut Pastaim.

“Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin na yu gat sem.”—SND. 18:13.

Sapos yumi laik givim gutpela tingting long wanpela man, yumi mas kliagut long tingting na i stap bilong em. Olsem, sapos wanpela i ringim yu na i laik save long rot bilong kam long haus bilong yu, orait bilong helpim em yu mas save long wanem samting? Yu mas save em i stap we na bai yu ken makim stret rot em i mas bihainim. Olsem tasol, sapos yu laik givim gutpela tingting long man, yu mas kliagut long i stap na tingting bilong em. Nogut i gat sampela samting yu no save long en na dispela inap senisim tok yu laik givim long em. Sapos yumi no kliagut long i stap bilong wanpela, ating yumi bai kamapim tok na em bai paul.—Luk 6:39.

Em i Mekim Wok Painimaut o Nogat? Em savetingting long askim man olsem: “Wanem stiatok bilong Baibel inap helpim yu long wokim disisen?” “Wanem gutpela na nogut bilong ol samting yu inap mekim?” “Yu mekim pinis wanem wok painimaut?” “Ol arapela, olsem ol elda, papamama, o Baibel stadi kondakta, i bin givim wanem helpim long yu?”

Bekim bilong man long ol dispela askim inap helpim yumi long save olsem em yet i bin mekim wanem bilong kisim gutpela tingting o em i bin askim sampela arapela long givim tingting long em, o nogat. Na ating yumi inap luksave olsem man i laik bai yu mekim tok we em yet i laik harim.—2 Tim. 4:3.

 2 No Ken Bekim Kwik Tok.

“Olgeta man i mas putim yau kwik long harim tok, na ol i no ken hariap long mekim toktok.”—JEMS 1:19.

Sampela taim yumi inap ting sapos yumi bekim kwik tok, dispela inap helpim man. Tasol planti taim pasin bilong bekim kwik tok i no gutpela, moa yet sapos yumi no bin mekim wok painimaut long dispela askim bilong man. Buk Sindaun 29:20 i tok: “Sapos man i no tingting gut pastaim na i toktok, orait bai yumi hat tru long helpim em.”

Savetingting i kam long Baibel i mas as bilong tok yu givim long man. Askim yu yet, ‘Tingting na pasin bilong dispela graun i kirap stiaim tingting bilong mi?’ (1 Kor. 2:12, 13) Taim Jisas i tok em i mas karim pen na i dai, Pita i tokim em: “Bikpela, marimari long yu yet, dispela samting i no ken kamap long yu.” Yu kisim wanem skul long bekim bilong Pita? Sapos yu no was gut, yu bai kamapim tingting “i no wankain olsem tingting bilong God, nogat, tingting bilong yu i wankain olsem tingting bilong ol man.” (Mat. 16:21-23) Yumi laik helpim man, tasol yumi no ken lusim tingting olsem savetingting bilong God i winim save bilong yumi. So em bikpela samting long wokim tingting paslain long yumi toktok.—Jop 38:1-4; Snd. 11:2.

 3 Mekim Pasin Daun na Bihainim Tok Bilong God.

“Mi no save mekim wanpela samting long tingting bilong mi yet, nogat. Tasol olsem Papa i bin skulim mi long en, mi save autim ol dispela samting.”—JON 8:28.

Olsem wanem? Bilong bekim askim, bai yu tok, “Sapos em mi, bai mi mekim olsem . . . ”? Maski sapos i no hatwok long bekim askim, i gutpela long bihainim pasin bilong Jisas na mekim pasin daun. Savetingting bilong Jisas i winim olgeta arapela man, tasol em i tok: “Mi no autim tok long tingting bilong mi yet, nogat. Papa . . . yet i tokim mi long olgeta tok mi mas mekim na autim.” (Jon 12:49, 50) Laik bilong Papa i as bilong ol bilip na ol tok Jisas i kamapim.

Olsem, long Luk 22:49 ol disaipel bilong Jisas i askim em olsem ol i mas pait taim ol birua i laik arestim em, o nogat. Wanpela disaipel i yusim bainat bilong en bilong sakim ol birua bilong Jisas. Matyu 26:52-54 i stori tu long dispela samting na i tok Jisas i lusim haptaim bilong helpim dispela disaipel long kliagut long laik bilong Jehova. Jisas i save long stiatok i stap long Stat 9:6 na ol tok profet i stap long Buk Song 22 na Aisaia 53, olsem na em inap givim gutpela tingting long ol we Jehova i amamas long en, na tu, i no gat wanpela i dai.

 4 Yusim Ol Buk na Nius.

“Husat tru em i gutpela wokboi i gat savetingting? Bosman bilong en i bin makim em long lukautim ol arapela wokboi na givim kaikai long ol long taim stret.”—MAT. 24:45.

Jisas i makim gutpela wokboi i gat savetingting long givim ol buk na nius bilong Baibel long yumi. Olsem wanem? Paslain long yu givim gutpela tingting long man long ol bikpela samting, yu save mekim wok painimaut long ol buk na nius bilong Baibel?

Yumi inap painim planti gutpela tok i stap long Watch Tower Publications Index na Watchtower Library.a No ken lusim tingting long yusim ol dispela tul. Ol i gat lista bilong planti tausen tok na planti stori bilong helpim man long painim gutpela tingting. Olsem wanem? Yu inap helpim ol arapela long yusim ol dispela tul long stadi na skelim ol stiatok bilong Baibel bambai ol i ken mekim ol gutpela disisen? Mep inap helpim man long makim rot na bai em i ken kamap long hap em i laik go long en, long wankain pasin, ol buk na nius inap helpim man long wokim ol disisen i helpim em long winim mak bilong stap laip oltaim.

Planti elda i bin soim ol pablisa long hau ol i ken yusim Index o Watchtower Library. Dispela i helpim ol pablisa long painim ol tok em ol i ken stadi long en na skelim wantaim Baibel taim ol i mekim ol disisen. Ol pablisa i lain long mekim wok painimaut na bihainim tok i stap long ol buk na nius i kam long Jehova. Ol i mekim olsem long taim ol i laik stretim hevi na long taim ol i mekim ol wok bilong ol long ol wan wan de. Long dispela rot, ol i “lainim gut tingting bilong ol long kliagut long wanem samting i stret na wanem samting i no stret.”—Hib. 5:14.

 5 No Ken Wokim Disisen Bilong Ol Arapela.

“Olgeta wan wan i mas mekim ol samting em ol yet i gat wok long mekim.”—GAL. 6:5.

Jehova i larim yumi olgeta long makim olsem yumi laik bihainim ol stiatok bilong em o nogat. (Lo 30:19, 20) Sampela taim man i mas mekim wok long planti stiatok bilong Baibel we i stret long samting i painim em, tasol em yet i mas wokim disisen long samting em bai mekim. Sapos man i askim yumi long givim sampela tingting long em, yumi mas askim yumi yet olsem, ‘Em wok bilong mi long bekim dispela askim?’ Ating sampela taim em gutpela moa sapos ol elda i helpim em. O sapos em wanpela yangpela, orait i gutpela moa long papamama i helpim em.

[Futnot]

[Blok/Piksa long pes 8]

Skelim Long Famili Lotu

Wanpela samting yu ken mekim long taim bilong famili lotu em long mekim wok painimaut long bekim bilong askim em man i bin givim long yu. Yu ken kamapim wanem stori i stap long ol buk samting na ol stiatok bilong Baibel we em inap helpim man long bekim askim bilong em? Olsem, brata o sista i gat tingting long wanpela husat ol i laik prenim na ating maritim, na ol i laik bai yu givim sampela tingting long ol. Long Index o long Watchtower Library, yu inap lukim het tok “Dating” o “Marriage.” Nau painim liklik het tok i stori stret long askim bilong dispela brata o sista. Daunbilo long bikpela het tok yu inap lukim dispela tok “See also.” Dispela tu inap helpim yu long painim sampela gutpela tok, long wanem, dispela inap stiaim yu i go long narapela hap we i stret moa long askim bilong em.

[Blok long pes 9]

Yumi tenkyu long Jehova i yusim oganaisesen bilong en long helpim yumi na yumi inap givim na kisim gutpela tingting. Saveman 12:11 i tok: “Tok bilong ol saveman i olsem ol stik i gat sap, . . . Na sapos saveman i bungim ol gutpela tok long wanpela buk, bai dispela tok i stap longtaim, olsem ol nil i pas strong long plang. God, wasman bilong yumi olgeta, i bin givim ol dispela tok long yumi.” Ol i bin yusim “ol stik i gat sap” long stiaim ol animal. Olsem tasol ol gutpela tok i olsem stik bilong stiaim yumi long stretpela rot. Ol nil i mekim haus i stap strong. Long wankain pasin, gutpela tingting yu givim long narapela inap helpim em long mekim ol gutpela disisen. Ol man i gat savetingting i save amamas long bihainim “ol gutpela tok” i kam long ‘wasman bilong ol,’ em Jehova.

Taim yumi laik givim gutpela tingting long narapela, yumi mas bihainim pasin bilong Wasman bilong yumi, Jehova. Yumi amamas long putim yau long ol man i askim yumi long helpim ol na givim gutpela tingting long ol. Sapos ol stiatok bilong Baibel i as bilong ol tok yumi givim long ol, orait dispela bai helpim ol long stap gut na kisim laip oltaim.