Autim Tok i Tru Bilong Baibel Long Potugal

KIRAP long Kaminha long hap not na i kam inap long Vila Real de Santo Antonio long hap saut, planti tausen liklik bot i gat kala kala, em ol bot bilong kisim pis, ol i stap long nambis bilong Potugal long hap bilong solwara Atlantik, em nambis inap olsem 800 kilomita. Inap planti handet yia pinis, ol man bilong kisim pis ‘ol i go long solwara,’ olsem na pis em i nambawan kaikai bilong ol Potugal.​—⁠Song 107:⁠23.

Inap 70 yia pinis i gat narapela kain wok bilong kisim pis i kamap long Potugal. Ol Witnes Bilong Jehova i bin wok strong long bringim gutnius i go long planti tausen man, olsem ol “pis.” (Matyu 4:19) Long Me 1995, i gat 44,650 manmeri ol i autim tok bilong Kingdom​—⁠em i olsem wanpela long olgeta 210 manmeri bilong Potugal. Long sampela biktaun long Potugal, em inap olsem wanpela long olgeta 105 manmeri.

I gat planti man tru bilong autim tok, olsem na long planti hap, ol i save pinisim teritori bilong ol insait long wanpela wik samting, na ol i mas mekim gen long olgeta wik. Olsem na ol Witnes long Potugal i save traim kain kain pasin bilong kirapim tok long ol man na bai ol i ken givim gutnius bilong Baibel long ol. Ol i save, em i bikpela samting long ol i mas painim kain kain rot bilong autim tok i tru bilong Baibel.​—⁠1 Korin 9:​20-23.

Helpim Ol Man i Tingim Lotu

Long 1991 gavman i skelim hamas hamas man i insait long ol lotu, na ol i tok, inap 70 pesen bilong ol manmeri bilong Potugal i bikpela pinis ol i tok ol i bilong lotu Katolik. Tasol ol man i no gat liklik save long tok bilong Baibel. Wanpela nius (Jornal de Notícias) i tok: “Wanpela bikpela hevi tru long ol lain bilong lotu Katolik em olsem: Ol i no gat save long Baibel!” Bilong wanem i olsem? Nius Expresso bilong Potugal i kamapim as bilong dispela. Dispela nius i stori long wanpela miting bilong 500 pris long Fatima, na nius i tok: “Olsem bisop i tok, pris i mas lusim ol planti planti narapela wok em i save mekim na bai em i ken kirap gen long mekim wok bilong em olsem ‘man bilong autim tok.’ . . . Sapos pris i givim bel olgeta long autim Gutnius, bai em i no gat taim bilong mekim ol narapela wok.”

Tasol ol Witnes Bilong Jehova long Potugal ol i save wok strong long autim tok i tru bilong Baibel na ol i mekim long kain kain rot. Olsem na planti Katolik i gat gutpela bel ol i wok long kisim save long Baibel.

Pastaim Carlota em i wanpela strongpela Katolik na em i insait long wanpela lain bilong lotu em bilong ol yangpela. Na em i wanpela tisa bilong skulim ol liklik pikinini, na Antônio, em wanpela Witnes, em i wok long dispela ples. Antônio i save autim tok bilong Baibel long olgeta de, olsem painia oltaim, olsem na long olgeta taim long belo kaikai em i wok long painim rot bilong toktok wantaim ol wanwok long Baibel. Wanpela taim Carlota i askim em long ol bilip olsem bikpaia na lotuim Maria. Antônio i soim em long ol tok bilong Baibel long ol dispela samting, na kirap long dispela taim tupela i toktok planti taim long ol tok bilong Baibel. Taim Carlota i go long miting long Haus Kingdom long namba wan taim, em i laikim tru. Tasol ol miting i save kamap long wankain taim olsem ol miting bilong dispela lain bilong lotu em i insait long en. Nau em i save, em i mas tingim gut dispela samting. Bai em i mekim wanem?

Carlota i bungim dispela lain yangpela na em i kamapim tok bilong Baibel long ol na tokaut long as na em i laik lusim dispela lain. Olgeta i sutim tok long em long samting em i laik mekim, tasol wanpela yangpela meri, nem bilong em Stela, em i putim gut yau long tok bilong Carlota na em i no sutim tok long em. Bihain Carlota i toktok wantaim Stela na em i givim planti askim long Carlota long ol samting i gat laip i kamap olsem wanem, na yumi stap bilong mekim wanem. Carlota i givim buk long em, nem bilong en, Life​—⁠How Did It Get Here? By Evolution or by Creation?a na em i kirapim Baibel-stadi wantaim Stela.

Carlota i wok long kamap strong long spirit na em i kisim baptais long Jun 1991, na 6-pela mun bihain em i kirap mekim wok painia oltaim. Long Me 1992, em wantaim Antônio i marit na tupela i wok painia wantaim long wanpela kongrigesen i stap klostu liklik, i no gat planti man bilong autim tok. Na olsem wanem long Stela? Em i kisim baptais long Me 1993, na nau em i mekim wok painia oltaim.

Yangpela man Francisco em i givim bel tru long lotu. Long olgeta Sande em i save go long Misa long moningtaim, na long apinun em i save go mekim ol beten bilong Korona. Em i mekim wok bilong helpim ol pris long taim ol i mekim Misa. Na em i bin beten long God long em i laik kamap wanpela “santu” bihain!

Francisco i laik tru long kisim wanpela Baibel, na bihain wanpela pren bilong em i givim wanpela long em bilong holim inap liklik taim. Em i kirap nogut long lukim olsem God i gat wanpela nem, em Jehova. (Kisim Bek 6:​3, long sta daunbilo; Song 83:​18, NW) Taim em i kaunim tok bilong Kisim Bek 20:​4, 5 olsem God i tambuim pasin bilong mekim wok long ol piksa insait long lotu, em i kirap nogut tru! Ol piksa, olsem imis, i pulap tru long haus lotu bilong em, olsem na em i beten strong na askim God long helpim em long stretim tingting bilong em long dispela samting. Sampela de bihain em i bungim wanpela man bipo em i wanskul bilong em, na em i askim dispela man, bilong wanem em i bin lusim skul em i save go long en long apinun.

Pren bilong em i tok: “Nau mi save go long wanpela skul i winim dispela.”

Francisco i askim em: “Em wanem skul? Na yu stadi long wanem samting?” Em i kirap nogut long bekim bilong pren bilong em.

Pren bilong em i tok: “Mi save stadi long Baibel long Haus Kingdom bilong ol Witnes Bilong Jehova. Yu laik kam wantaim mi?”

Francisco i kirap nogut long samting em i lukim long namba wan miting bilong em​—⁠pes bilong ol man i amamas na ol i lap; narapela i toktok wantaim narapela olsem pren bilong ol; ol pikinini i sindaun wantaim papamama na ol i putim gut yau long ol tok i kamap long miting.

Francisco i tok: “Ol i no save liklik long mi, tasol mi pilim olsem mi insait long famili bilong ol!” Kirap long dispela taim em i save go oltaim long miting. Nau Francisco i mekim wok elda long kongrigesen, na em wantaim meri na tupela pikinini bilong em ol i amamas long tingim ol gutpela tok promis bilong Kingdom i stap long Baibel.

Autim Tok i Tru Long Famili

Manuela, em wanpela painia oltaim long Lisbon, em i bin kisim planti “pis,” long wanem, em i no les long autim tok long olgeta man, na famili bilong em tu. Wanpela em brata tru bilong em, nem bilong em José Eduardo, em i bin lain long karate samting, na long mekim wok long ol naip na gan samting. Em i bin brukim lo planti planti taim, olsem na bihain ol i sanapim em long kot na em i kisim 20 yia long kalabus. Em i man bilong pait nogut tru, na ol wankalabus bilong em ol i pret long em, olsem na ol i putim em i stap wanpis insait long rum kalabus bilong ol man nogut tru.

Inap 7-pela yia Manuela i go lukim José Eduardo, tasol oltaim em i sakim tok bilong Baibel Manuela i autim long em. Orait bihain ol i wokim buk Life​—⁠How Did It Get Here? By Evolution or by Creation? na em i kisim wanpela, na nau em i kirap stadi long Baibel wantaim ol Witnes. Kwiktaim em i kirap long senisim pasin bilong em. Wanpela wik bihain em i autim tok long 200 kalabus, na long wik bihain long en em i autim tok long 600 moa. Na em i kisim tok orait long ol bos bilong haus kalabus long autim tok long ol kalabus i stap long ol narapela hap bilong haus kalabus. Ol i lukim pasin bilong em i senis olgeta, olsem na ol i katim hap taim bilong kalabus na makim 15 yia bilong em. Em i pinisim 10-pela yia long kalabus na ol i larim em i lusim kalabus. Nau 5-pela yia i go pinis na José Eduardo em i wanpela Witnes Bilong Jehova i baptais pinis, na em i wanpela wokman bilong kongrigesen. I olsem Baibel i tok: “Ol wel dok na ol pikinini sipsip bai i stap gut wantaim”!​—⁠Aisaia 11:⁠6.

Manuela i wok strong long autim tok long famili bilong em, olsem na em i helpim man bilong em na 4-pela moa long famili long kirap mekim wok bilong Jehova. Nau man bilong em i wanpela wokman bilong kongrigesen.

“Bai Mi Kikim Ol na Paitim Ol Long Rop na Rausim Ol”

Maria do Carmo em i sindaun long hap bilong Lisbon taim ol Witnes Bilong Jehova i go long haus bilong em. Em i laikim dispela tok ol i autim long em, na em i tokim man bilong em, Antônio, em i laik bai ol i stadi wantaim em long Baibel long haus bilong em. Man i tokim em: “Yu no ken tingting liklik long mekim olsem! Sapos mi painim wanpela Witnes Bilong Jehova long haus bilong yumi, bai mi kikim ol na paitim ol long rop na rausim ol.” Antônio em i wanpela tisa bilong skulim ol man long karate, na em i holim namba olsem saveman tru bilong dispela wok. Olsem na Maria do Carmo i tingting long stadi long Baibel long narapela hap.

Bihain Antônio i mas i go long Inglan bilong mekim kos bilong karate inap 8-pela de, na Maria do Carmo i pulimapim wanpela buk long switkes bilong em, em Baibel Stori Buk Bilong Mi.b Long Inglan Antônio i no gat planti wok, olsem na em i kaunim dispela buk. Taim em i lusim Inglan bilong go bek long ples, bikpela win na ren i kamap na balus i seksek nogut tru na em i hatwok long pundaun long ples balus. Nau Antônio i beten long Jehova​—⁠em namba wan taim bilong em long mekim olsem.

Taim Antônio i kamap long haus, Witnes i stadi wantaim meri bilong em i singautim em i go long wanpela miting. Em i go na i lukim olsem olgeta i mekim gutpela pasin pren long em. Ol i stretim tok long stadi wantaim em long Baibel, na i no longtaim na em i save em i mas tingim gut sampela samting em i mas mekim. Orait bihain em i lusim wok bilong skulim ol man long karate, na em i kirap skulim ol sumatin bilong em long olsem wanem ol i ken i stap bel isi nau na i go inap oltaim oltaim long bihain. Wanpela sumatin, em tu i holim namba olsem saveman bilong karate, nau em i wanpela Kristen i baptais pinis.

Antônio i kisim baptais long Epril 1991. Long de bihain long baptais, em i kirap mekim wok painia haptaim. Inap 6-pela mun bihain em i kirap mekim wok painia oltaim, na i no longtaim na em i gat 12-pela Baibel-stadi. Long Julai 1993 ol i makim em long kamap wokman bilong kongrigesen.

Long Hap Ol i Autim Tok Planti Taim Long En

Long planti hap bilong Potugal, ol i save pinisim teritori bilong ol long autim tok insait long wanpela wik samting, na nau ol i save mekim gen. Ol Witnes i mekim wanem na wok bilong ol long “kisim pis” i karim kaikai?

João i save wok strong bambai em i ken autim tok long olgeta man insait long olgeta wan wan haus. Wanpela taim em i autim tok long wanpela meri na em i askim meri, i gat sampela moa i stap long haus o nogat. Meri i tok, man bilong em wantaim tupela pikinini man ol i save sindaun long dispela haus, tasol i hatwok long bungim ol, long wanem, ol i save go long wok na ol i kam bek long haus long apinun tru. Orait, João i lusim em na i go long ol narapela haus. Inap olsem wanpela aua hap bihain, wanpela man i kam long em.

Em i tokim João: “Yu bin tok, yu laik toktok wantaim mi. Yu laik tokim mi long wanem samting?”

João i kirap nogut na em i tok: “Sori, mi no save long yu. Yu husat?”

Man i tok: “Mi Antônio, na haus bilong mi i stap long dispela rot tasol. Yu bin tokim mama bilong mi olsem yu laik toktok wantaim ol narapela bilong famili. Olsem na mi kam bilong save, yu laik tokim mipela long wanem samting.”

João i autim tok long Antônio na em i kirapim Baibel-stadi wantaim em. Long namba 2 stadi, Antônio i tok em i laik stadi tupela taim long olgeta wik. Inap 4-pela mun bihain, em i go wantaim João na em i autim gutnius long hap em i sindaun long en. Inap 3-pela mun bihain em i kisim baptais. Nau long dispela taim mama bilong em tu i kirap stadi long Baibel. Em nau, em i bikpela samting long yumi mas wok strong long autim tok long olgeta man i stap long haus!

Ol dispela gutpela stori i kamapim klia olsem i gat planti wok moa bilong “kisim pis” long hap bilong Potugal. Ol Witnes bilong dispela hap ol i wok strong tru na Jehova i mekim gut long ol na ol i gat planti tausen Baibel-stadi i wok long kamap strong. Ol i wok yet long painim kain kain rot moa bilong autim tok i tru bilong Baibel long olgeta man, olsem na wanpela tok Pol i bin givim long ol Kristen long Filipai i kamap tru long Potugal, em i tok: “Olgeta dispela man i save autim tok bilong Krais.”​—⁠Filipai 1:⁠18.

[Ol Futnot]

[Mep long pes 23]

(Bilong save ol dispela rait i stap we long pes, lukim buk o magasin)

SPEN

POTUGAL

[Ol Piksa long pes 24, 25]

Ol Witnes long Potugal i save autim tok i tru bilong Baibel long kain kain rot