Tok i Tru i Pulap Long Wanpela Ples i Gat Planti Wara
WANPELA ples i gat nem long wanem i gat planti wara, tasol ol man bilong dispela hap i dai long wara! Em narapela kain samting tru! Wanpela samting tasol inap stretim dispela nek drai, em wara bilong tok i tru i stap long Baibel. Dispela em i stori bilong Rabe, em wanpela liklik ples i gat 2,200 manmeri tasol i stap long en. Em i stap long ples maunten long hap bilong not bilong Lebanon, na em i stap longwe long Beirut inap 130 kilomita.
Long tok ples Arap, dispela tok Rabe i makim ‘ples i no pas pas.’ Na dispela nem i stret, long wanem ol i wokim ol haus antap long tupela bikpela maunten i stap antap long mak bilong solwara inap 600 mita. Long taim bilong kol na bihain liklik long taim bilong kol, yu inap lukim ais i stap antap long ol maunten long hap bilong is. I gat 360 bikpela na liklik hul wara long Rabe, na dispela wara i ran i go daun long ol ples daun, na wit na diwai prut na gaden wain i save karim gutpela kaikai.
Rabe Long Bipo na Long Nau
Planti samting long Rabe long nau i wankain olsem long bipo. Ol haus i stap klostu klostu. Ol rot i liklik na i baut baut, na planti donki na bulmakau i wokabaut i go i kam. I gat wan wan ka, tasol ol ka i mas wetim ol animal i wokabaut pastaim. Planti taim papa bilong donki na bulmakau i save putim ol samting long baksait bilong ol donki na bulmakau na animal yet i wokabaut i go long haus. Ol animal i save bihainim ol liklik rot i baut i go i kam bambai ol inap i go bek long haus bilong papa bilong ol. Ating Aisaia i tingim dispela samting taim em i tok: “Ol bulmakau i save long papa bilong ol, na ol donki i save long ples papa bilong ol i save givim kaikai long ol.”—Aisaia 1:3.
Long Rabe, yu inap painim ol man i bin i go long ol bikpela skul na ol man nating i no bin i go long biktaun. Yu inap lukim ol bikpela haus i gat ol naispela gaden, na i gat ol liklik haus i gat ol animal i stap klostu long en. Klostu olgeta haus i gat samting bilong mekim wok long paua, tasol sampela taim i no gat paua. Olsem na sampela haus i gat jenareta bilong ol yet. Ol i putim ston long olgeta rot insait long ples, tasol ol rot i go long ol gaden em i no gutpela olsem. Olsem na i gat wanpela rot tasol bilong kisim ol kaikai samting long gaden, em long rot bilong bulmakau na donki samting. Ating bai yu lukim wanpela donki i wokabaut i go na i gat wanpela jenareta i stap long baksait bilong em, bambai ol man inap mekim wok long dispela jenareta bilong kirapim ol masin bilong wokim gaden. Ol i mekim wok long ol dispela masin na ol bulmakau na donki tu bilong wokim gaden.
Sindaun bilong ol man long ples i no senis. Sapos yu stap wanpela nait long dispela ples, bai yu harim krai bilong kakaruk long 2 klok o 3 klok long moningtaim na bai yu kirap. Ol man i save kirap hariap long moningtaim, olsem na yu no kirap nogut sapos em tudak yet na yu harim ol man i singaut na wok long redim ol animal samting bilong i go long gaden samting. Long tulait bai yu lukim planti manmeri, em kago i pulap pinis long baksait bilong ol animal bilong ol, na ol i wokabaut i go long gaden o long ol maket bilong salim kaikai bilong ol.
Bihain liklik bai yu lukim ol pikinini i pilai long rot na ples bung. Yu inap harim pairap bilong ol taim ol i lap. Em i wankain liklik long taim profet Sekaraia i stori long ol samting i kamap long Jerusalem bilong bipo, em i tok: “Ol liklik manki bai i pulap long taun, na ol bai wok long pilai pilai i stap.” (Sekaraia 8:5) Ol manmeri i amamas long toktok wantaim yu, na ol i laik save gut long yu. Yu mas gude long olgeta man yu bungim, long wanem ol i laik save yu husat na yu bilong wanem hap, na bilong wanem yu kam long ples bilong ol, na yu laik i go we. Ol manmeri bilong dispela hap ol i save gut long narapela narapela.
Wara Bilong Tok i Tru i Kamap Long Rabe
Ol manmeri i pas gut wantaim, olsem na kwiktaim tasol tok bilong wanpela samting i go kamap long ol narapela. Dispela samting i bin kamap taim Asad Yunis i lusim Amerika long 1923 na i go bek long Rabe. Wantok bilong Asad, em Abdala Blel, em i laik save, taim Asad i stap long Amerika em i kamap maniman o nogat, olsem na em i go lukim Asad. Tasol ol i no stori long mani, Asad i givim wanpela buk long em, nem bilong en long tok Inglis em The Harp of God. Asad i tokim Abdala: “Dispela samting i winim tru mani.” Pastaim Abdala em i bilong lotu Talatala, na em i kaunim gut dispela buk i kamapim ol tok bilong Baibel, na em i laikim tru. Asad i no givim bel tumas long dispela tok, tasol Abdala em i laikim tru ol tok em i kisim save long en, na em i tokim ol narapela man olsem em i painim pinis tok i tru.
Bihain liklik, Abdala i go i stap long Tripoli, em nambawan biktaun bilong Lebanon long hap bilong not. Taim em i kamap long dispela hap em i bungim ol Witnes Bilong Jehova, na em i wok long stadi Baibel wantaim ol. Bihain em i go bek long Rabe, long wanem em i laik tokim ol manmeri bilong dispela hap long ol gutpela samting em i bin kisim save long en. Em i save toktok wantaim ol man bilong ples long ol tok bilong God Triwan, na ol man i gat tewel o nogat, na hel em i ples paia o nogat, na wok bilong ol pris, na Misa, na pasin bilong mekim wok long ol imis na piksa bilong lotu, na em i kamapim ol tok bilong Baibel bambai ol inap save, Baibel i tok wanem long ol dispela samting.
Sampela ol i harim tok. Tripela o fopela i wok wantaim Abdala long autim tok. Na ol i kirap mekim miting long Sande. Taim ol i bung, ol i save harim plet singsing i gat ol tok bilong Baibel long en o ol i kaunim Baibel, na bihain ol i stori long ol tok ol i harim. Bihain ol i mekim wok long sampela buk bilong Baibel, olsem buk The Harp of God na Riches na “Let God Be True.” Tenpela manmeri tasol i save kam long dispela bung. I no olsem ol i laik kisim save long tok i tru na ol i kam, tasol ol i laik save wanem samting i kamap long dispela bung. Taim ol i bung pinis, ol i save kaikai wantaim, na ating sampela i kam bilong kisim kaikai tasol.
Namel long yia 1940 na 1949, Abdala Blel i kisim wok long lukautim dispela liklik grup long Rabe. Em i givim bel long wok bilong Jehova na em i stap gut long dispela wok, na em i makim gutpela pasin ol narapela i ken bihainim. Wanpela man Abdala i bin helpim, em Brata Matar. Brata Matar i tingim dispela taim, na em i tok: “Long dispela taim bipo i no gat ka, olsem na mitupela Brata Blel i wokabaut long lek i go long ol liklik ples i stap klostu. Mi karim pikap na ol plet singsing i gat ol tok bilong Baibel long en, na Brata Blel i go pas long toktok. Mipela save raun inap tupela o tripela de na bihain mipela i save kam bek long ples.” Brata Blel i stap gut long wok bilong Jehova i go inap long taim em i dai long 1979, taim em i gat 98 krismas.
Wok i Kamap Gutpela na Sampela i Kros
Wok i kamap gutpela na nau sampela man i givim hevi long ol brata. Long 1950, pris bilong ples i kirapim ol man long mekim nogut long ol brata long Rabe. Pris i tok ol brata i toknogutim lotu na ol i bagarapim ol samting i holi. Sampela man i belhat tru na ol i wok long tromoi ston long ol brata, na ol i kotim sampela brata na kalabusim ol. Tasol bihain ol i kisim save olsem tok bilong ol man bilong ples i giaman. Maski ol brata i no bin mekim rong, tasol ol i kalabus i stap inap sampela de.
Narapela man i kros long ol brata, na em i kirapim ol man bilong ples long raitim nem bilong ol long wanpela pepa bilong makim olsem ol brata i bin mekim samting nogut, olsem ol i kam oltaim long haus bilong ol man na bagarapim sindaun bilong ol. Planti man bilong ples i no save rit rait, olsem na ol i no save wanem samting tru i stap long dispela pepa. Dispela man i laik kirapim planti man long putim nem bilong ol long dispela pepa em i bin raitim, olsem na em i giaman na tokim ol, dispela pepa i makim olsem ol i laik bai wanpela man bilong wok i mas i kam bek long ples bilong ol. Tasol taim ol man bilong ples i save dispela pepa i laik bagarapim nem bilong ol Witnes, ol i rausim nem bilong ol long dispela pepa. Taim kain samting olsem i kamap, dispela i opim rot long ol brata inap autim tok long ol bikman bilong dispela hap.
Ol man i mekim nogut long ol brata na ol i mas karim dispela hevi, tasol narapela hevi tu i painim ol. Ol i stap long wanpela liklik ples, na narapela i save gut long narapela, olsem na ‘pasin bilong pret long narapela man’ inap givim hevi long ol, olsem Sindaun 29:25 i tok. Olsem na ol i mas strongim bel bambai ol inap autim tok long ol man i stap klostu long ol, na ol wantok na famili bilong ol, em ol i save tok bilas na lap long ol. Olsem na yumi save, tok bilong Jisas long Matyu 10:36 i stret, em i tok: “Ol famili bilong man yet bai i kamap birua bilong en.” Tasol Sindaun 29:25 i tok moa, olsem: “Sapos man i bilip long Bikpela, bai em i stap gut.” Ol brata i stap strong long bilip na gutpela samting tru i bin kamap.
Tok i Tru i Pulap Long Rabe
Ol Witnes Bilong Jehova i stap longtaim long dispela ples, na ol man bilong ples i pilim tru gutpela pasin bilong ol, olsem na planti ol i kam insait long lain bilong Jehova. Long 1969, ol i kirapim namba tu kongrigesen long Rabe, na ol brata i amamas tru. Na ol i wok strong i go. Planti ol i kirap mekim wok painia, olsem autim tok long olgeta de, na sampela i go long ol narapela hap bilong autim tok, na sampela i go long biktaun Beirut tu. Jehova i blesim hatwok bilong ol, na long 1983 ol i kirapim namba 3 kongrigesen long Rabe. Tasol planti brata i wok long lusim Rabe na i go i stap long ol biktaun na long ol narapela hap. Tasol lain bilong Jehova i wok long i go bikpela, na ol i kirapim namba 4 kongrigesen long Rabe long 1989, na long 1990 ol i kirapim namba 5 kongrigesen.
Long nau, long olgeta wan wan famili long ples, ating wanpela bilong ol em i wanpela Witnes, o wanpela pren bilong ol em i wanpela Witnes. Pastaim ol i save krosim ol Witnes, tasol long nau ol i no save mekim moa. Ol manmeri i save gut long ol Witnes. Olsem na sampela tok, olsem “elda,” “painia,” “wasman sekit,” “kibung,” “Armagedon,” ol i kamap olsem hap tok bilong ol manmeri bilong ples. Long sampela bikpela de, olsem taim wasman sekit i kam lukim kongrigesen, o long taim bilong Memorial, bai yu no lukim wanpela man i wokabaut long rot, long wanem ol i pulap long ol Haus Kingdom. Na sampela kongrigesen i save putim ol bikpela spika long veranda bambai ol narapela man tu inap harim tok.
Nau i gat 250 pablisa bilong Kingdom long Rabe. Long olgeta 8-pela 8-pela manmeri, wanpela em i Witnes Bilong Jehova! Wanpela kongrigesen i gat 51 pablisa, na ol i gat 76 haus tasol bilong autim tok long en, olsem na long olgeta wik ol i save autim tok long ol dispela haus. Tingim ol samting i bin kamap long mun Mas na Epril long yia i go pinis. Long dispela taim 98 bilong ol 250 pablisa i bin mekim wok painia haptaim, na ol i wok wantaim ol 13 painia oltaim long Rabe. Olsem na long olgeta wik, ol i autim tok planti taim long olgeta hap teritori bilong ol. Insait long wanpela de tasol bai tupela o tripela lain pablisa i go long wanpela haus tasol, na sampela taim olgeta i kamap long dispela wanpela haus long wankain taim tasol. Ol man bilong ples i lain pinis long dispela samting na ol i no gat tok long en. Tasol taim wanpela man i tok em i no amamas long dispela samting, wanpela pablisa i tok: “Sapos yu orait long mipela stadi Baibel wantaim yu, bai mipela i kam lukim yu wanpela taim tasol long wik.” Taim ol Witnes i raun autim tok, ol i save toktok wantaim olgeta man ol i bungim, maski ol i wok long gaden o ol i sindaun long donki samting.
Tru tumas, tok i tru i go kamap long olgeta hap bilong Rabe, em dispela ples i gat planti wara. Ol narapela ples klostu i save kisim wara long Rabe, na ol i kisim tu wara bilong givim laip, em tok i tru. Ol pablisa bilong Rabe i save wokabaut long lek long ol ples i stap klostu liklik na raun long ka bilong i go autim tok long ol ples i stap longwe liklik. Sampela pablisa i save go i stap long ol narapela biktaun bilong autim tok. Jehova bai blesim dispela wok, olsem na yumi save sampela manmeri moa bai kam bung wantaim lain bilong Em, na dispela samting bai litimapim nem bilong Papa bilong yumi long heven, em Jehova.
[Piksa long pes 26]
Wanpela rot long Rabe