Yu Sakim Spirit Bilong Graun?
“Mipela i no bin kisim spirit bilong dispela graun. Nogat. Mipela i kisim Spirit i kam long God.”—1 KORIN 2:12.
LONG wanpela nait long Disemba 1984, samting nogut tru i bin kamap long Bopal, long India. Long dispela biktaun i gat wanpela faktori bilong wokim marasin, na ges nogut bilong wanpela tang i lus. Wantu win i karim bikpela hap ges i go insait long ol haus, na ol famili i slip ol i pulim dispela win nogut long nus. Planti tausen ol i dai pinis, na planti tausen moa i kisim bagarap. Bipo no gat wanpela wok bisnis i bin kamapim kain bikpela bagarap olsem.
2 Ol man i bel hevi taim ol i harim tok long dispela. Tasol i gat wanpela kain win i kilim i dai planti man moa, winim ges nogut bilong Bopal, na ol man long olgeta hap i save pulim dispela win long olgeta de. Baibel i kolim dispela win nogut olsem “spirit bilong dispela graun.” Aposel Pol i stori long en taim em i stori long spirit i kam long God, olsem: “Mipela i no bin kisim spirit bilong dispela graun. Nogat. Mipela i kisim Spirit i kam long God, bai mipela i ken save long olgeta presen God i bin givim long mipela.”—1 Korin 2:12.
3 Wanem dispela ‘spirit bilong graun’? Wanpela buk i tok, wanpela insait bilong tok “spirit” (tok Grik, pneuʹma) em olsem: “Tingting i bosim bel bilong man.” (The New Thayer’s Greek English Lexicon of the New Testament) Sampela man i gat gutpela tingting long bel, na sampela, nogat. (Song 51:10; 2 Timoti 4:22) Yumi ken tok tu, bikpela tingting o pasin bilong wanpela lain em i olsem spirit bilong ol. Aposel Pol i raitim tok long pren bilong em Filemon, olsem: “Marimari bilong Bikpela Jisas Krais i ken i stap wantaim spirit bilong yupela.” (Filemon 25) Olsem tasol ol man bilong dispela graun i gat bikpela tingting o pasin bilong ol, em “spirit bilong dispela graun” Pol i tok long en. Wanpela buk i tok, “spirit bilong dispela graun” i makim “tingting nogut i bosim pasin bilong ol man i no tanim bel i go long God.” (Word Studies in the New Testament, bilong Vincent) Sin i stap long skin bilong ol em i bosim olgeta tingting na pasin bilong ol.
4 Dispela spirit inap bagarapim man, long wanem, em i kam long “hetman i save bosim dispela graun,” em Satan. Baibel i kolim em “hetman bilong ol spirit nogut i stap long skai, em dispela strongpela spirit i wok yet insait long bel bilong ol man i save sakim tok bilong God.” (Jon 12:31; Efesus 2:2) I hatwok long abrusim dispela win nogut o “spirit,” long wanem, em i stap long olgeta hap. Sapos yumi pulim dispela win, bai yumi kisim tingting na laik wankain olsem bilong ol man bilong dispela graun. Bai sin i bosim wokabaut bilong yumi—bai yumi “wokabaut long pasin bilong olpela bel,” na bai yumi dai.—Rom 8:13.
Klia Long Spirit Bilong Dispela Graun
5 Long dispela bagarap long Bopal, ol belo i krai na smel nogut bilong ges i kirapim wanpela Witnes Bilong Jehova long slip. Kwiktaim em i kirapim meri pikinini na ol i lusim haus na ranawe i go ausait. Em i skelim kwik, win i kam long wanem hap, na em wantaim famili i brukim bikpela lain man i paul nabaut long rot, na ol i ranawe i go antap long liklik maunten ausait long taun. Hia ol inap pulim klinpela win i kam long raunwara i stap klostu.
6 Yu ting i gat wanpela maunten yumi ken ran i go long en, na bai yumi klia long ‘win nogut’ bilong dispela graun? Baibel i tok, i gat. Aisaia i tok profet long taim bilong yumi, olsem: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na . . . olgeta lain manmeri bai i kam bung long en. Ol . . . bai i tok olsem, ‘Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ ” (Aisaia 2:2, 3) “Dispela maunten, haus bilong Bikpela i sanap long en,” em lotu i tru. Long dispela ples tasol yumi inap klia long spirit o win nogut bilong dispela graun em i laik bagarapim yumi. Long dispela ples, spirit bilong Jehova i wok strong namel long ol gutpela Kristen.
7 Dispela Witnes long Bopal i klia long win nogut, na planti man long nau i klia long spirit bilong dispela graun. Aposel Pol i stori long “ol man i save sakim tok bilong God,” em ol i save pulim win o spirit bilong dispela graun, na em i tok: “Bipo yumi olgeta i bin i stap wantaim dispela lain, na yumi bihainim laik nogut bilong olpela bel bilong yumi tasol. . . . Na long taim yumi bin i stap olsem, yumi inap kisim pe nogut God i redim pinis bilong givim long olgeta manmeri i mekim dispela kain pasin. Tru, rong bilong yumi em i kilim yumi na yumi dai pinis. . . . Tasol marimari bilong God em i pulap tru na . . . em i mekim yumi i stap laip wantaim Krais.” (Efesus 2:3-5) Ol man i pulim win nogut bilong dispela graun tasol, long ai bilong God i olsem ol i dai pinis. Tasol yumi mas tenkyu long Jehova, long wanem, sampela milion manmeri long nau ol i ranawe i go long ‘maunten bilong em,’ em lotu i tru, na ol i abrusim bagarap.
Ol Pasin ‘Spirit Bilong Graun’ i Kamapim
8 Win nogut bilong Satan i stap long olgeta hap. Olsem na yumi mas was gut. Nogut yumi slek na yumi lusim “maunten” na i go bek gen insait long pasin bilong dispela graun, na bai yumi bagarap long ol samting bilong spirit. Yumi mas was gut oltaim. (Luk 21:36; 1 Korin 16:13) Tingim dispela samting: Olgeta Kristen i save Jehova i tambuim pasin pamuk, na bagarapim marit, na pasin sodom, na ol i no orait liklik long ol dispela pasin. Tasol long olgeta yia, inap olsem 40,000 manmeri i raus long lain bilong Jehova, long wanem, ol i mekim ol dispela pasin doti. Dispela i kamap olsem wanem?
9 Long wanem, yumi olgeta i gat sin i stap long skin bilong yumi na oltaim yumi mas wok strong long daunim ol laik nogut i save kamap long bel. (Saveman 7:20; Jeremaia 17:9) Tasol spirit bilong dispela graun i kirapim ol man long bihainim ol dispela laik nogut bilong olpela bel. Planti man bilong dispela graun i ting, i no gat rong long pasin pamuk, na ol i orait long kain kain pasin sem. Sapos yumi no was gut, bai yumi kisim dispela kain tingting kranki, na dispela inap kamapim laik nogut long bel bilong yumi, na ating dispela bai pulim yumi, na bai yumi mekim bikpela rong. (Jems 1:14, 15) Olsem bai yumi lusim ‘maunten bilong Jehova,’ em lotu i tru, na yumi kam daun long ples nogut bilong Satan. Ol man i stap long dispela ples long laik bilong ol yet, ol i no inap kisim laip i stap oltaim.—Efesus 5:3-5, 7.
10 Spirit bilong graun i stap long olgeta hap. Olsem: Planti man i no tingting gut; ol i save tok pilai na hambak nabaut. Ol i lukim ol bikman bilong politik i giaman na pamuk na i no mekim gut wok, na ol bikman bilong lotu i mangalim mani, olsem na ol i les, na ol i mekim tok bilas long ol bikpela samting tu. Yumi mas was gut. I no gat rong long yumi lap na amamas long gutpela samting, tasol insait long kongrigesen, yumi mas harim gut tok; nogut yumi tok pilai nabaut na mekim ol tok bilas. Ol tok bilong yumi i mas kamapim klia olsem yumi daun long Jehova na yumi gat klinpela bel. (Jems 3:10, 11; lukim tu Sindaun 6:14.) Maski yumi yangpela o lapun, oltaim yumi mas tingting gut na “mekim gutpela tok tasol.”—Kolosi 4:6.
11 Spirit bilong graun i kamapim narapela pasin tu, em pasin birua. Ol man bilong dispela graun i save birua long ol man bilong narapela skin na lain na kantri na pasin, na ol i bruk bruk. Tasol spirit bilong God i save kirapim ol man long bihainim gutpela pasin! Pol i tok: “Yupela i no ken bekim pasin nogut . . . Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man. . . . ‘[God bai] bekim rong bilong ol na mekim save long ol. Tasol sapos birua bilong yu em i hangre, orait yu mas givim kaikai long em. Sapos em i dai long wara, orait yu mas givim wara long em. Sapos yu mekim olsem, bai yu mekim em i sem tru long ol pasin nogut bilong em.’ Yu no ken larim pasin nogut i winim yu. Nogat. Yu mas mekim gutpela pasin na bai yu daunim pasin nogut.”—Rom 12:17-21.
12 Na spirit bilong graun i kirapim ol man long laikim tumas mani kago. Tok gris bilong ol man bilong bisnis i mekim na bel bilong planti manmeri i skrap long kisim ol nupela nupela masin, na klos, na ka samting. Pasin bilong “aigris” i kalabusim ol. (1 Jon 2:16) Sapos ol i gat bikpela haus o planti mani, ol i ting wok bilong ol i kamap gutpela. Tasol ol Kristen tru i sakim dispela pasin; ol i stap long “maunten” bilong Jehova, em lotu tru bilong em, na ol i pulim klinpela win bilong spirit. Ol i save, pasin bilong wok strong long kisim planti samting bilong skin inap bagarapim ol. (1 Timoti 6:9, 10) Jisas i tokim ol disaipel: “Maski yu yet yu gat planti samting moa, tasol yu no inap kisim laip long ol dispela samting bilong yu.”—Luk 12:15.
13 ‘Win nogut’ bilong dispela graun i kamapim ol narapela pasin tu, olsem pasin bikhet. (2 Timoti 3:1-3) Ol man i no daun moa long ol man i gat wok long bosim ol, a? Long ples wok, sapos i no gat man i was, ol wokman i no wok. Yu lukim dispela pasin, a? Hamas man yu save long ol, em ol i bin brukim lo, olsem ol i no baim stret takis o ol i stil long ples wok? Sapos yu skul yet, ating sampela taim yu no laik wok strong, long wanem, ol wanskul i save tok bilas long manki i givim bel long skul? Spirit bilong graun i kamapim olgeta dispela pasin, na ol Kristen i mas sakim.
Rot Bilong Sakim Spirit Bilong Graun
14 Tasol yumi stap long dispela graun, orait olsem wanem yumi ken sakim spirit bilong en? Yumi mas save, maski yumi stap long wanem hap, long ol samting bilong spirit yumi no bilong dispela graun. (Jon 17:15, 16) Wok yumi laik mekim na tingting bilong yumi i no wankain olsem bilong ol man bilong dispela graun. Yumi tingim ol samting bilong God. Tingting na toktok bilong yumi “i no kam long save bilong man. Nogat. Holi Spirit yet i bin skulim [yumi].”—1 Korin 2:13.
15 Sapos man i stap long ples i gat ges nogut long en, em i ken mekim wanem? Em i ken mekim samting bilong kisim klinpela win, o klia long dispela ples. Bilong abrusim win nogut bilong Satan, yumi mas mekim dispela tupela samting. Yumi mas klia long olgeta samting i givim rot long spirit bilong dispela graun na bai em i no ken paulim tingting bilong yumi. Olsem na yumi save klia long ol poroman nogut, na long olgeta kain amamas i kamapim pasin pait, pasin pamuk, olkain posin, pasin bikhet, o narapela pasin bilong olpela bel. (Galesia 5:19-21) Tasol yumi stap long dispela graun na i hatwok long klia olgeta long win nogut bilong en. Olsem na sapos yumi gat gutpela tingting bai yumi mekim tu ol samting bilong kisim klinpela win—bai yumi go oltaim long ol miting, na stadi, na mekim ol wok Kristen, na poromanim ol Kristen, na beten. Long dispela rot, sapos liklik hap win bilong Satan i kam long yumi, bai spirit bilong God inap strongim yumi long sakim.—Song 17:1-3; Sindaun 9:9; 13:20; 19:20; 22:17.
16 Spirit bilong God i mekim na ol Kristen i stap narapela kain long ol man bilong dispela graun. (Rom 12:1, 2) Pol i tok: “Holi Spirit i save kirapim yumi long mekim ol gutpela pasin,” olsem pasin bilong laikim tru ol narapela, na amamas, na bel isi, na i no belhat kwik, na helpim ol man, na mekim gutpela pasin long ol, na bilip, na i stap isi, na bosim gut skin. (Galesia 5:22, 23) Na spirit bilong God i givim gutpela save long yumi. Pol i tok: “I no gat wanpela man i save long tingting bilong God. Spirit bilong God yet, em tasol i save.” (1 Korin 2:11) Dispela “tingting bilong God” em ol tok i tru long ofa bilong Krais, na long Kingdom bilong God, na tok promis long laip oltaim, na pasin nogut bilong graun bai pinis klostu nau. Spirit bilong God i helpim ol Kristen long save long ol dispela tok i tru na bilip long en, olsem na tingting bilong ol i narapela kain long tingting bilong ol man bilong dispela graun. Ol i stap isi na amamas long mekim wok bilong Jehova long nau, na ol i save, long dispela rot bai ol inap mekim wok bilong em long olgeta taim bihain.
17 Jisas em i nambawan gutpela piksa long pasin bilong sakim spirit bilong dispela graun. Em i kisim baptais pinis na kwiktaim Satan i laik pulim em bai em i lusim Jehova. Satan i putim tripela traim long em. (Matyu 4:1-11) Laspela traim i givim rot long Jisas bilong kisim wok bilong bosim olgeta hap bilong graun. Sapos em i brukim skru wanpela taim tasol na lotu long Satan, em inap kisim. Jisas inap tingting olsem: ‘Mi ken mekim na taim mi kisim pinis dispela wok, mi ken tanim bel na lotu gen long Jehova. Nau mi kamda nating long Nasaret, tasol sapos mi bosim olgeta hap bilong graun, bai mi inap helpim gut ol man.’ Tasol Jisas i no tingting olsem. Em i wetim Jehova i givim dispela wok long em. (Song 2:8) Long dispela taim, na long ol narapela taim tu, em i sakim win nogut bilong Satan. Long dispela rot em i winim strong bilong dispela graun i bagarap long spirit.—Jon 16:33.
18 Aposel Pita i tok, yumi mas bihainim gut lek bilong Jisas. (1 Pita 2:21) Jisas em i gutpela piksa tru. Nau long las taim, spirit bilong dispela graun i mekim na pasin bilong ol man i go nogut moa yet. Gutpela tru, long dispela ples nogut lotu bilong Jehova i stap antap na i stap klin tru! (Maika 4:1, 2) Strong bilong spirit bilong God i kamap ples klia long ol milion milion manmeri i wokabaut i go long lotu bilong em, em ol i sakim spirit bilong dispela graun i stap long olgeta hap, na ol i litimapim nem bilong Jehova! (1 Pita 2:11, 12) Yumi olgeta i mas strong long i stap long dispela “maunten” i go inap long taim King Krais Jisas, em Jehova i makim, em i pinisim dispela graun nogut na kalabusim Satan na ol spirit nogut long hul i no gat as. (KTH 19:19–20:3) Long dispela taim bai spirit bilong dispela graun i pinis olgeta. Em bai gutpela taim tru!
Yu Inap Stori Long Dispela?
◻ Wanem dispela spirit bilong graun?
◻ Spirit bilong dispela graun i kirapim ol man long mekim wanem?
◻ Wanem sampela pasin em spirit bilong graun i kamapim? Olsem wanem yumi ken klia long en?
◻ Olsem wanem yumi kamapim klia olsem spirit bilong God i stap long yumi?
◻ Ol man i sakim spirit bilong dispela graun, ol i kisim wanem ol blesing?
[Askim Bilong Stadi]
1, 2. Wanem bikpela bagarap long ges nogut i bin kamap long Bopal, long India? Tasol ol man long olgeta hap i pulim wanem win i moa nogut?
3. Wanem dispela ‘spirit bilong graun’?
4. Husat i as bilong spirit bilong dispela graun? Dispela spirit i kirapim ol man long mekim wanem?
5. Long bagarap long Bopal, olsem wanem wanpela Witnes i bihainim gutpela tingting?
6. Yumi ken i go we bilong klia long spirit bilong dispela graun?
7. Planti man i mekim wanem na spirit bilong dispela graun i no bagarapim ol?
8, 9. (a) Olsem wanem na yumi mas was gut oltaim long spirit bilong graun? (b) Spirit bilong Satan inap paulim yumi olsem wanem?
10. Wanem wanpela pasin em spirit bilong Satan i kamapim? Bilong wanem ol Kristen i mas klia long dispela pasin?
11. (a) Spirit bilong graun i kamapim wanem narapela pasin? (b) Ol Kristen i bihainim wanem pasin i narapela kain tru long dispela pasin?
12. Bilong wanem ol Kristen i sakim pasin bilong laikim tumas mani kago?
13. Wanem sampela pasin moa em spirit bilong dispela graun i kamapim?
14. Olsem wanem ol Kristen i narapela kain long ol man i no Kristen?
15. Olsem wanem yumi inap sakim spirit bilong dispela graun?
16. Yumi mekim wanem na dispela i kamapim klia olsem spirit bilong God i stap long yumi?
17. Husat i gutpela piksa tru long pasin bilong sakim spirit bilong dispela graun? Em i mekim wanem na em i stap gutpela piksa olsem?
18. Taim yumi sakim spirit bilong dispela graun, olsem wanem dispela i litimapim nem bilong God?
[Piksa long pes 16,17]
Satan em i as bilong spirit bilong graun
Bilong abrusim spirit bilong dispela graun, yu mas ran i go long “maunten” bilong Jehova, em lotu bilong em