Bihainim Pasin Bilong Jehova Taim Yu Skulim Pikinini Bilong Yu

“Wanem pikinini i stap na papa bilong en i no save stretim em? Nogat.”​—⁠HIBRU 12:⁠7.

1, 2. Bilong wanem ol papamama i gat hatwok long mekim bikpela long ol pikinini long nau?

WANPELA lain long Japan i bin toktok wantaim sampela man na meri i bikpela pinis na ol i kamapim ripot olsem: Inap 50 pesen i ting ol papamama na pikinini bilong ol i no save toktok gut wantaim, na ol papamama i isi tumas long ol pikinini. Long narapela wok olsem long dispela kantri, inap 25 pesen i tok ol i no save long pasin bilong toktok gut wantaim ol pikinini bilong ol. Dispela pasin i no kamap long Esia tasol. Wanpela nius (The Toronto Star) i tok: “Planti papamama long Kanada i tokaut olsem ol i no klia gut long pasin bilong i stap olsem gutpela papamama.” Long olgeta hap, ol papamama i gat hatwok long mekim bikpela long ol pikinini.

² Bilong wanem ol papamama i gat hatwok long mekim bikpela long ol pikinini? Wanpela as, em yumi stap long “taim bilong las de,” na i gat “planti hevi nogut tru” i kamap. (2 Timoti 3:⁠1) Na Baibel i tok, “stat long taim ol manmeri i yangpela yet ol i save tingting long mekim ol pasin nogut.” (Stat 8:21) Na Satan i raun olsem “wanpela laion i singaut strong,” na em i wok long painim ol manmeri i no gat save long ol trik bilong em, olsem na ol yangpela i olsem abus tru bilong em. (1 Pita 5:⁠8) I gat planti samting bilong pasim rot bilong ol papamama Kristen em ol i laik “stretim gut ol pikinini bilong [ol] na skulim ol long tok bilong Bikpela.” (Efesus 6:⁠4) Olsem wanem ol inap helpim ol pikinini long kamap strongpela man na meri bilong lotuim Jehova taim ol i bikpela pinis, na ol inap skelim “wanem ol pasin i gutpela na wanem ol pasin i nogut”?​—⁠Hibru 5:⁠14.

 3. Bilong wanem papamama i mas skulim na stiaim ol pikinini bambai wok bilong ol long mekim bikpela long pikinini i ken kamap gutpela?

³ Saveman King Solomon i tok: “Ol pikinini i save mekim olkain longlong pasin.” (Sindaun 13:1; 22:15) Bilong rausim pasin longlong long bel bilong ol, papamama i mas stretim ol long pasin sori. Tasol sampela taim ol yangpela i no laik bai papamama i stretim ol. Ol i save bel nogut long tok bilong stretim ol, maski husat i givim dispela tok long ol. Olsem na ol papamama i mas lain long “skulim pikinini bilong [ol] long bihainim gutpela pasin.” (Sindaun 22:⁠6) Taim ol pikinini i kisim na holimpas ol tok bilong stretim ol, dispela inap helpim ol long kisim laip. (Sindaun 4:13) Olsem na papamama i mas save gut long ol samting ol i mas mekim bilong skulim pikinini!

Pasin Bilong Stretim Pikinini

 4. Long Baibel, planti taim dispela tok “stretim” i makim wanem samting?

⁴ Sampela papamama i pret long stretim pikinini, nogut ol man i sutim tok long ol olsem ol i mekim nogut long em, olsem paitim em tumas o toknogutim em. Tasol yumi no ken pret long dispela. Long Baibel, dispela tok “stretim” i no makim pasin bilong paitim strong o mekim nogut long pikinini na givim pen long em, nogat. Tok Grik ol i tanim olsem “stretim,” planti taim em i makim pasin bilong skulim, givim save, na stretim pikinini, na sampela taim ol i mas givim strongpela tok long em, tasol ol i mas mekim long pasin sori.

 5. Pasin Jehova i bin mekim long lain bilong em, dispela inap helpim yumi olsem wanem?

⁵ God Jehova em i nambawan piksa tru long pasin bilong stretim pikinini. Aposel Pol i skelim pasin bilong Jehova wantaim pasin bilong ol papa long graun, na em i tok: “Wanem pikinini i stap na papa bilong en i no save stretim em? . . . Ol papa bilong yumi long graun ol i bin stretim pasin bilong yumi sotpela taim tasol, inap long laik bilong ol. Tasol God i save stretim yumi bilong helpim yumi tru, bai yumi ken kisim pasin holi bilong em yet.” (Hibru 12:​7-10) Yes, Jehova i save stretim lain bilong em bambai ol i ken i stap holi. Pasin bilong Jehova long skulim lain bilong em, dispela inap lainim yumi gut long pasin bilong stretim ol pikinini.​—⁠Lo 32:4; Matyu 7:11; Efesus 5:⁠1.

Pasin Sori i Mas Kirapim Ol

 6. Bilong wanem sampela taim papamama i hatwok long bihainim pasin sori bilong Jehova?

⁶ Aposel Jon i tok, “God yet em i as bilong dispela pasin bilong laikim ol arapela.” Olsem na taim Jehova i skulim lain bilong em, pasin sori i save kirapim em long mekim. (1 Jon 4:8; Sindaun 3:​11, 12) Ol papamama i save laikim tru ol pikinini bilong ol, olsem na ating bai ol i no gat hatwok long bihainim pasin bilong Jehova taim ol i skulim ol pikinini, a? Nogat, i no olsem. Pasin sori bilong God i gat lo i bosim. Na wanpela saveman bilong tok Grik i tok, ‘sampela taim dispela kain pasin sori i no wankain olsem ol tingting i stap long bel.’ God i no save larim bel sori nating i stiaim ol samting em i mekim, nogat. Em i save tingim wanem samting inap helpim tru lain bilong em.​—⁠Aisaia 30:20; 48:⁠17.

7, 8. (a) Olsem wanem Jehova i stap olsem gutpela piksa long mekim pasin sori long lain bilong em? (b) Olsem wanem papamama i ken bihainim pasin bilong Jehova taim ol i helpim ol pikinini long kisim pasin bilong bihainim ol lo bilong Baibel?

⁷ Tingim pasin sori Jehova i bin mekim long ol Israel. Moses i mekim naispela tok piksa long pasin bilong Jehova long laikim tru nupela lain Israel. Em i tok: “God i helpim ol Israel gut . . . olsem tarangau i lainim pikinini bilong en long flai, na taim pikinini i laik pundaun tarangau i save go aninit na karim em long wing na pikinini i no bagarap.” (Lo 32:​9, 11, 12) Bilong lainim ol pikinini long flai, mama tarangau i save paitim strong wing bilong en bilong kirapim ol pikinini bilong en long flai. Planti tarangau i save wokim haus antap tru long maunten ston, na taim pikinini i lusim haus na i kirap long flai, mama i save flai klostu tru long en. Sapos em i lukim olsem pikinini i laik pundaun long graun, em i save go aninit long en na “karim em long wing” bilong en. Long pasin sori Jehova i mekim wankain pasin long lukautim nupela lain Israel. Em i givim Lo Bilong Moses long ol. (Song 78:​5-7) Orait nau God i was gut long ol na em i redi long kam helpim ol taim hevi i painim ol.

⁸ Orait olsem wanem ol papamama Kristen i ken bihainim pasin sori bilong Jehova? Namba wan samting, ol i mas skulim ol pikinini long ol lo bilong Jehova i stap long Baibel. (Lo 6:​4-9) Mak papamama i laik winim i olsem: Ol i laik helpim ol pikinini long lain long skelim gut ol samting ol i mas mekim na i stret wantaim ol lo bilong stiaim tingting i stap long Baibel. Taim papamama i mekim olsem, ol i mekim pasin olsem ol dispela mama tarangau i save flai klostu tru long pikinini​—⁠ol i save lukluk long pasin bilong pikinini long bihainim ol dispela lo em i bin lain long en. Taim pikinini i wok long i go bikpela na papamama i larim em yet i tingim sampela samting em i laik mekim, papamama i redi long “go aninit” long pikinini na “karim em long wing” bilong ol taim bagarap i laik painim em. Wanem kain bagarap inap painim em?

 9. Wanem samting inap bagarapim pikinini na papamama i mas was gut long dispela? Stori long dispela samting.

⁹ God Jehova i bin toksave long ol Israel long ol hevi bai kamap sapos ol i poroman wantaim ol lain i no gat gutpela pasin. (Namba 25:​1-18; Esra 10:⁠10-⁠14) Long nau tu, sapos yumi poroman wantaim ol lain i no gat gutpela pasin, dispela inap bagarapim yumi. (1 Korin 15:33) Ol papamama Kristen i mas bihainim pasin bilong Jehova long dispela samting. Yangpela meri Lisa i gat 15 krismas na em i laikim wanpela yangpela man i no gat wankain tingting olsem famili bilong em long stretpela pasin bilong marit o ol samting bilong spirit. Lisa i tok: “Kwiktaim papamama i lukim olsem pasin na tingting bilong mi i senis na ol i tingting planti. Sampela taim tupela i stretim mi na sampela taim ol i givim tok long mi long pasin isi tru bilong strongim bel bilong mi.” Tupela i putim yau long tok bilong Lisa, na long dispela rot ol i helpim em long stretim samting ol i ting i as bilong dispela hevi​—⁠em i laik bai ol wankrismas i ken laikim em.a

Toktok Gut Wantaim Pikinini

10. Long wanem ol rot Jehova i stap olsem gutpela piksa long toktok gut wantaim ol Israel?

¹⁰ Bilong mekim gutpela wok long skulim ol pikinini, papamama i mas larim rot i op long toktok gut wantaim ol. Jehova i save pinis long ol tingting i stap long bel bilong yumi, tasol em i laik bai yumi toktok wantaim em. (1 Stori 28:⁠9) Taim Jehova i givim pinis Lo long ol Israel, em i givim wok long lain Livai long skulim ol, na em i salim ol profet i go long ol bilong toktok gut wantaim ol na stretim ol. Na tu, em i amamas long harim beten bilong ol.​—⁠2 Stori 17:​7-9; Song 65:2; Aisaia 1:​1-3, 18-20; Jeremaia 25:4; Galesia 3:​22-24.

11. (a) Olsem wanem papamama i ken kirapim pikinini long toktok gut wantaim ol? (b) Taim papamama i toktok wantaim pikinini, bilong wanem ol i mas putim gut yau long tok bilong em?

¹¹ Olsem wanem papamama i ken bihainim pasin bilong Jehova taim ol i toktok gut wantaim ol pikinini? Nambawan samting tru, em ol i mas makim hap taim bilong toktok wantaim ol. Na papamama i mas abrusim kain tok i no gat gutpela tingting long en, olsem: “Em dispela liklik tok tasol yu laik mekim? Mi ting yu laik toktok long wanpela bikpela samting”; “Em i pasin longlong”; “Yu no ken ting narapela kain samting bai kamap. Yu pikinini tasol.” (Sindaun 12:18) Bilong kirapim ol pikinini long toktok, papamama i gat gutpela tingting bai wok strong long putim gut yau long tok bilong ol pikinini. Sapos papamama i givim baksait long pikinini taim em i liklik yet, orait taim em i bikpela em bai givim baksait long papamama. Long olgeta taim Jehova i bin amamas long putim yau long tok bilong lain bilong em. Em i redi long putim yau long beten bilong olgeta man i mekim pasin daun na i laik kam long em.​—⁠Song 91:15; Jeremaia 29:12; Luk 11:​9-13.

12. Wanem ol pasin bilong papamama inap mekim na pikinini i no hatwok long toktok wantaim tupela?

¹² Na yumi ken tingim tu sampela pasin bilong God i mekim na lain bilong em i no pret long toktok wantaim em long rot bilong beten. Olsem: King Devit bilong Israel i mekim bikpela rong tru taim em i slip wantaim Batseba. Devit em man bilong graun tasol na em i bin mekim ol narapela bikpela rong​—⁠i no dispela rong tasol. Tasol long olgeta taim em i beten askim Jehova long lusim rong bilong em na stretim em. Pasin sori na marimari bilong God i mekim na Devit i no hatwok long kam bek long Jehova. (Song 103:⁠8) Sapos papamama i bihainim pasin sori na marimari bilong God, tupela inap toktok gut wantaim pikinini long olgeta taim, na long taim pikinini i mekim rong tu.​—⁠Song 103:13; Malakai 3:⁠17.

Isi Isi Long Ol

13. Wanem wanpela insait bilong dispela tok “isi isi”?

¹³ Taim papamama i putim yau long tok bilong ol pikinini, tupela i mas isi isi long ol na bihainim “gutpela tingting na save i kam long God.” (Jems 3:17) Pol i tok: “Yupela i mas isi isi long olgeta man.” (Filipai 4:⁠5) Long tok Grik, wanpela insait bilong tok ol i tanim olsem “isi isi” i olsem, “no ken strong long ol i mas bihainim stret olgeta liklik liklik samting bilong wanpela lo.” Tru, papamama i mas strong long ol pikinini i bihainim lo bilong stretpela pasin na bilong ol samting bilong spirit, tasol olsem wanem ol i ken isi isi long ol pikinini?

14. Olsem wanem Jehova i mekim pasin bilong isi isi long Lot?

¹⁴ Jehova i stap olsem gutpela piksa tru long isi isi long ol man. (Song 10:17) Taim em i laik bagarapim taun Sodom, em i tokim Lot wantaim lain bilong em long lusim dispela ples, tasol Lot “i tingting planti na em i no hariap.” Bihain ensel bilong Jehova i tokim Lot long ranawe i go long ples maunten, tasol Lot i tok: “Ol maunten i stap longwe tumas, na mi no inap kamap hariap long ol. . . . Taun [Soar] . . . i klostu, na mi inap kamap hariap long en. Em i liklik taun tasol. Yu larim mi i go long dispela taun na abrusim dispela bagarap.” Orait Jehova i mekim wanem? Em i tok: “Em i orait. Bai mi no bagarapim dispela taun.” (Stat 19:​16-21, 30) Jehova i orait long Lot i ken mekim samting em i bin askim long en. Tru, papamama i mas holimpas ol lo em God Jehova i bin putim long Baibel. Tasol sampela taim ating ol i ken orait long wanpela laik bilong pikinini sapos dispela i no kalapim sampela lo bilong Baibel bilong stiaim tingting.

15, 16. Tok piksa i stap long Aisaia 28:​24, 25 inap skulim ol papamama long wanem samting?

¹⁵ Wanpela rot bilong isi isi long ol pikinini, em papamama i ken redim tingting bilong ol bambai ol i ken redi long kisim ol tok bilong stretim ol. Aisaia i tok piksa long Jehova olsem man bilong wokim gaden, na em i tok: “Taim wanpela man i brukim graun bilong planim ol pikinini kaikai, ating em i save wok tasol long brukim graun na em i no planim ol pikinini kaikai, a? Nogat tru. Taim em i brukim na stretim graun pinis, em i save planim ol liklik sayor long en. Em i save planim ol pikinini wit long ol stretpela lain na em i planim ol pikinini bali long hap bilong en.”​—⁠Aisaia 28:​24, 25.

¹⁶ Jehova i save “brukim graun bilong planim ol pikinini kaikai” na “stretim graun.” Olsem na taim em i laik stretim lain bilong em, pastaim em i redim bel bilong ol. Orait taim papamama i laik stretim pikinini, olsem wanem ol i ken ‘brukim na stretim graun,’ olsem bel bilong pikinini? Wanpela papa i bihainim pasin bilong Jehova taim em i stretim pikinini man i gat 4-pela krismas. Taim pikinini i bin paitim wanpela liklik manki, papa i stap isi na putim yau long stori bilong pikinini, em i laik tok olsem i no asua bilong em. Orait nau papa i laik ‘brukim na stretim’ bel bilong pikinini na em i stori long wanpela liklik manki em i bin kisim nogut long han bilong wanpela bikhet manki bilong pait. Orait taim pikinini i harim dispela stori, dispela i kirapim em na em i tok, bikhet manki i mas kisim strafe. Em nau, pasin bilong papa long ‘brukim na stretim’ graun i bin redim bel bilong pikinini na em inap luksave olsem pasin bilong em long paitim liklik manki, em pasin bilong ol manki bilong pait na i no stret.​—⁠2 Samuel 12:​1-14.

17. Aisaia 28:​26-29 i gat wanem tok bilong skulim ol papamama long pasin bilong stretim pikinini?

¹⁷ Na Aisaia i skelim pasin bilong Jehova long stretim man wantaim pasin bilong rausim wit long stik bilong en. Fama i save mekim wok long kain kain samting bilong rausim pikinini bilong wit na sayor samting. Em i save kisim liklik stik tasol bilong paitim pikinini bilong sayor bilong kisim pikinini bilong en. Tasol ol samting olsem wit i gat strongpela stik bilong en, em i save krungutim long wilkar em ol hos i pulim. Tasol maski wit i strong, em i was gut, nogut wilkar i brukim na bagarapim wit. Na Jehova i mekim wankain pasin taim em i laik rausim sampela pasin i no stret long lain bilong em. Em i save mekim long narapela narapela kain pasin i stret long helpim ol na i stret long pasin bilong ol. Em i no save daunim ol o mekim pasin olsem hatpela bos tru, nogat. (Aisaia 28:​26-29) Sampela pikinini, sapos papamama i lukluk tasol long ol, ol bai pilim rong bilong ol na i no gat wok long mekim narapela samting long ol. Tasol sampela pikinini, long olgeta taim ol i mas kisim tok bilong kirapim gen tingting bilong ol, na sampela i mas kisim strongpela samting moa bilong stretim ol. Ol papamama i save isi isi long pikinini, ol bai stretim em long pasin inap helpim em tru.

Famili i Amamas na Toktok Wantaim

18. Olsem wanem papamama i ken makim hap taim bilong mekim famili-stadi long Baibel long olgeta wik?

¹⁸ Gutpela rot tru bilong skulim ol pikinini bilong yu, em rot bilong mekim famili-stadi long olgeta wik, na skelim sampela tok bilong Baibel long olgeta de. Famili-stadi bai mekim gutpela wok sapos famili i mekim long olgeta wik. Sapos ol i mekim nating tasol na i no makim stret taim, ol bai mekim wan wan taim tasol o ol i no inap mekim. Olsem na papamama i mas lusim wanpela wok samting na makim dispela hap taim bilong mekim stadi. (Efesus 5:​15-17) Tru, sampela taim i hatwok long makim wanpela taim i stret long olgeta insait long famili. Wanpela papa i bin lukim olsem taim ol pikinini i wok long go bikpela, ol i gat ol narapela narapela samting ol i mas mekim, na i hatwok long bungim olgeta long famili. Tasol long ol nait bilong go long ol miting bilong kongrigesen, famili olgeta i save stap wantaim. Olsem na papa i stretim rot bilong mekim famili-stadi long wanpela nait i gat miting. Dispela pasin i wok gut. Long nau, 3-pela pikinini olgeta i baptais pinis na ol i mekim wok bilong Jehova.

19. Olsem wanem papamama i ken bihainim pasin bilong Jehova taim ol i lukautim famili-stadi?

¹⁹ Tasol taim ol i mekim stadi, sapos ol i kamapim sampela tok bilong stadi na ol i no kamapim gut insait bilong en, dispela i no inap. Taim ol Israel i kam bek pinis long ples, Jehova i bin skulim ol long rot bilong ol pris, em ol i bin “autim as bilong lo long ol” bambai “ol manmeri i ken save gut.” (Nehemia 8:⁠8) Wanpela papa i bin helpim gut olgeta 7-pela pikinini bilong em long laikim tru Jehova, em i bin mekim olsem: Taim em i laik mekim famili-stadi, pastaim em i save go long rum bilong em na redim gut ol tok bilong stadi na tingim wanem wanem tok inap helpim olgeta wan wan pikinini. Na em i mekim stadi long pasin ol pikinini i kisim amamas long en. Wanpela pikinini man i bikpela pinis, em i tok: “Oltaim mipela i kisim amamas long mekim stadi. Sapos mipela i stap ausait na pilai bal na papa i singautim mipela long kam stadi, wantu mipela i save putim bal long ples bilong en na ran i go insait bilong mekim stadi. Em wanpela nait mipela save kisim gutpela amamas tru.”

20. Wanem hevi inap kamap long wok bilong mekim bikpela long ol pikinini na yumi mas toktok long dispela samting?

²⁰ Man bilong raitim Song i tok: “God i mekim gut long yumi na givim yumi ol pikinini olsem presen. Ol i gutpela blesing tru yumi kisim long God.” (Song 127:⁠3) Bilong skulim ol pikinini bilong yumi, yumi mas lusim bikpela hap taim na strong, tasol sapos yumi mekim gut dispela wok, em inap helpim ol pikinini long kisim laip i stap oltaim. Em wanpela gutpela blesing tru ol inap kisim, a? Olsem na yumi mas givim bel long bihainim pasin bilong Jehova taim yumi skulim ol pikinini bilong yumi. Tru, Jehova i bin givim wok long ol papamama long “stretim gut ol pikinini bilong [ol] na skulim ol long tok bilong Bikpela,” tasol dispela wok bilong yumi bai kamap gutpela o nogat, em yumi no save tru. (Efesus 6:⁠4) Maski papamama i lukautim gut tru wanpela pikinini, em inap kamap bikhet na lusim wok bilong Jehova. Sapos olsem, papamama i ken mekim wanem? Bai yumi toktok long dispela samting long stori i kamap bihain long dispela.

[Futnot]

Wanem Bekim Bilong Yu?

• Olsem wanem ol papamama i ken bihainim pasin sori bilong Jehova olsem Lo 32:​11, 12 i stori long en?

• Pasin bilong Jehova long toktok gut wantaim ol Israel i bin skulim yu long wanem samting?

• Jehova i bin putim gut yau long tok bilong Lot na dispela i skulim yumi long wanem samting?

• Aisaia 28:​24-29 i bin skulim yu olsem wanem long pasin bilong stretim pikinini?

[Piksa long pes 8, 9]

Moses i tok, pasin bilong Jehova long skulim lain bilong em i kain olsem pasin tarangau i save mekim long skulim ol pikinini bilong en

[Ol Piksa long pes 10]

Papamama i mas makim hap taim bilong toktok wantaim ol pikinini

[Piksa long pes 12]

“Em wanpela nait mipela save kisim gutpela amamas tru”