LESEN 20

Hau Jehova i Stiaim Kongrigesen Long Rot Bilong Jisas?

Prin Edisen

Jehova em God i no save mekim ol samting i paul nabaut. (1 Korin 14:33) So yumi save olsem em bai oganaisim gut lain bilong em. Hau Jehova i stiaim kongrigesen long rot bilong Jisas? Olsem wanem yumi sapotim kongrigesen?

1. Husat i het bilong kongrigesen?

“Krais i stap het bilong kongrigesen.” (Efesus 5:23) Long heven, em i stiaim wok bilong lain bilong Jehova long olgeta hap bilong graun. Jisas i makim “gutpela wokboi i gat savetingting”—wanpela liklik grup bilong ol elda, em Gavening Bodi. (Ritim Matyu 24:45-47.) Wankain olsem ol aposel na ol hetman long Jerusalem long bipo, Gavening Bodi i save givim tok bilong stiaim ol kongrigesen long olgeta hap bilong graun. (Aposel 15:2) Tasol ol dispela man ol i no lida bilong oganaisesen bilong mipela. Ol i lukluk i go long Jehova na Tok bilong em long stiaim ol, na ol i daun long Jisas em het bilong ol.

2. Wanem wok bilong ol elda?

Ol elda ol i man Kristen em ol i stap gut long God inap planti yia. Ol i skulim lain bilong Jehova long Baibel, na helpim na strongim ol. Ol i no kisim pe long wok bilong ol, nogat. Ol i ‘amamas long mekim olsem long ai bilong God. Ol i no mekim bilong kisim ol samting bilong helpim ol yet, nogat. Ol i gat bikpela laik long mekim dispela wok.’ (1 Pita 5:1, 2) Ol kongrigesen sevan i save helpim ol elda, na bihain ol kongrigesen sevan inap winim mak long kamap elda tu.

Gavening Bodi i makim sampela elda long kamap wasman sekit. Ol wasman sekit i save raun lukim ol kongrigesen na givim ol tok bilong stiaim na strongim ol. Ol i save makim ol nupela elda na kongrigesen sevan, husat i winim ol mak em Baibel i kolim long mekim ol dispela wok.—1 Timoti 3:1-10, 12; Taitus 1:5-9.

3. Wanem wok bilong olgeta wan wan Witnes?

Olgeta insait long kongrigesen i “preisim nem bilong Jehova” long rot bilong givim tok o mekim ol soim, bekim tok, na singsing long ol kongrigesen miting, na mekim autim tok inap long skel bilong olgeta wan wan.—Ritim Buk Song 148:12, 13.

KISIM SAMPELA SAVE MOA

Kisim save long Jisas em wanem kain lida, olsem wanem ol elda i traim long bihainim pasin bilong em, na olsem wanem yumi ken bihainim tok bilong Jisas na wok gut wantaim ol elda.

4. Jisas em lida i gat gutpela pasin

Jisas i singautim yumi long kam long em. Ritim Matyu 11:28-30, na stori long dispela askim:

Jisas i laik yumi pilim olsem wanem long wok bos bilong em?

Olsem wanem ol elda i ken bihainim pasin bilong Jisas? Pilaim VIDIO.

VIDIO: Ol Elda i Helpim Ol Brata Long Nepal Long Taim Bilong Bikpela Guria (4:56)

Baibel i stori long olsem wanem ol elda i mas mekim wok bilong ol.

Ritim Aisaia 32:2; 1 Pita 5:1-3, na stori long ol dispela askim:

Yu pilim olsem wanem long save olsem ol elda i wok strong long givim nupela strong long ol bratasista, olsem Jisas i bin mekim?
Wanem sampela narapela rot ol elda i bihainim pasin bilong Jisas?

5. Pasin bilong ol elda i givim skul long yumi

Jisas i laik bai ol elda i gat wanem kain tingting long wok bilong ol? Pilaim VIDIO.

VIDIO: Ol Elda i Go Pas! (7:39)

Jisas i stap gutpela piksa bilong ol man i go pas long wok insait long kongrigesen. Ritim Matyu 23:8-12, na stori long dispela askim:

Baibel i kolim wanem ol pasin ol elda i mas bihainim? Yu ting ol bikman bilong lotu i bihainim tok Baibel i mekim?

A. Ol piksa: Wanpela elda i mekim stadi bilong em yet, na tu, stadi wantaim famili bilong em. 1. Em i beten paslain long em i stadi. 2. Em i skulim liklik gel bilong em na meri bilong em i helpim em.

Dispela elda na meri bilong em i go lukim wanpela sista long kongrigesen bilong ol husat i sik na slip long haus sik.

Ol elda i save mekim ol samting bilong strongim pasin pren bilong ol wantaim Jehova na ol i helpim ol famili bilong ol tu long mekim olsem
Ol elda i save lukautim olgeta insait long kongrigesen
Ol elda i save autim tok long olgeta taim
Ol elda i mekim wok tisa. Na tu, ol i helpim wok bilong klinim Haus Kingdom na mekim ol narapela wok

6. Yumi ken wok gut wantaim ol elda

Baibel i kolim nambawan as na yumi mas wok gut wantaim ol elda. Ritim Hibru 13:17, na stori long ol dispela askim:

Wai na Baibel i tok yumi mas bihainim tok bilong ol man i go pas long yumi na stap aninit long ol? Wai na yu ting olsem, o wai na yu ting nogat?

Ritim Luk 16:10, na stori long dispela askim:

Wai na i bikpela samting long bihainim tok bilong ol elda, maski sapos yumi ting wanpela samting i no bikpela samting?

SAMPELA MAN I TOK: “I no gat wok long yu bung wantaim ol narapela long wanpela oganaisesen na lotu.”

Wai na yu ting em gutpela long bung wantaim wanpela kongrigesen na lotuim God?

OL BIKPELA POIN

Jisas i stap het bilong kongrigesen. Yumi amamas long wok gut wantaim ol elda husat i stap aninit long em, bikos ol i givim yumi nupela strong na yumi kisim skul long pasin bilong ol.