“Bikpela, Em i God Bilong Yumi”
Buk Draw Close to Jehovah i as bilong ol tok yumi stori long en long dispela tupela stori. Yumi bin kisim dispela buk long kibung distrik ol i bin mekim long olgeta hap long yia 2002 na 2003.—Lukim stori “Em Inapim Wanpela Laik Bilong Bel Bilong Mi,” long pes 20.
“Bikpela, em i God bilong yumi. Yumi bin bilip na wet long em wanpela bai i kisim bek yumi. Em tasol i Bikpela.”—AISAIA 25:9.
1, 2. (a) Jehova i mekim wanem tok long Abraham? Dispela inap kirapim yumi long kamapim wanem askim? (b) Baibel i mekim wanem tok bilong helpim yumi long save olsem yumi inap i go klostu tru long God?
“PREN bilong mi.” Jehova, em Man bilong wokim heven na graun, i bin mekim dispela tok long Abraham. (Aisaia 41:8) Tingim—wanpela man nating i amamas long i stap pren bilong Bikpela King bilong heven na graun! Ating yu gat tingting olsem, ‘Mi inap stap klostu tru long God?’
2 Tok Baibel i kamapim i helpim yumi long save olsem yumi inap i go klostu tru long God. God i larim Abraham i stap klostu tru long em, long wanem, “Abraham em i bilip long God.” (Jems 2:23) Long nau tu, Jehova i save pas gut tru “wantaim ol man i save wokabaut stret.” (Sindaun 3:32) Long Jems 4:8, Baibel i tok: “Yupela i mas i go klostu tru long God, na em bai i kam klostu tru long yupela.” Sapos yumi mekim ol samting bilong i go klostu long em, em tu bai mekim wankain samting. Em bai kam klostu long yumi. Yu ting dispela i makim olsem yumi ol sinman i mas kirap na mekim samting pastaim? Nogat. Yumi inap i stap klostu tru long Jehova, long wanem, gutpela God bilong yumi i mekim pinis tupela bikpela samting.—Song 25:14.
3. Jehova i mekim pinis wanem tupela bikpela samting i larim yumi long amamas long i stap pren bilong em?
3 Namba wan, Jehova i stretim rot bilong Jisas i “givim laip bilong em bilong baim bek planti manmeri.” (Matyu 20:28) Dispela i mekim na yumi inap i go klostu long God. Baibel i tok: “Yumi save laikim ol arapela, long wanem, God i bin laikim yumi pastaim.” (1 Jon 4:19) Tru tumas, God i bin “laikim yumi pastaim,” na dispela i opim rot long yumi kamap pren bilong em. Namba tu samting, Jehova i kamapim pasin bilong em yet long yumi. Taim yumi kamap pren bilong wanpela man, yumi pas gut wantaim em, long wanem, yumi save gut long em, na yumi amamas na laikim tru ol pasin bilong em. Tingim mining bilong dispela tok. Sapos Jehova em i wanpela God i save hait na yumi no inap kisim save long em, orait yumi no inap i go klostu tru long em. Tasol em i no hait long yumi, nogat. Jehova i laik bai yumi save long em. (Aisaia 45:19) Long Baibel, em i kamapim ol pasin bilong em yet long ol tok i no hatwok long yumi kisim—dispela i kamapim olsem em i laikim yumi tru na em i laik bai yumi save long em na laikim em tru olsem Papa bilong yumi long heven.
4. Bai yumi pilim olsem wanem long Jehova taim yumi wok long kisim moa save long ol pasin bilong em?
4 Olsem wanem? Yu bin lukim wanpela liklik pikinini i makim papa bilong em long han na amamas long tokim ol pren bilong em olsem, “Em papa bilong mi”? I gat as na ol man i save lotu long God ol i pilim olsem long Jehova. Baibel i tok profet long wanpela taim bai kamap taim ol man i stap gut long God bai tok: “Bikpela, em i God bilong yumi.” (Aisaia 25:8, 9) Taim yumi save moa long ol pasin bilong Jehova, bai yumi pilim olsem Papa bilong yumi em i nambawan tru na em i Pren i stap klostu tru long yumi. Yes, taim yumi kisim save long ol pasin bilong Jehova, dispela i mekim na i gat planti as na yumi gat laik long i go klostu moa long em. Olsem na yumi laik skelim tok Baibel i mekim long ol bikpela pasin bilong Jehova—em bikpela strong, stretpela pasin, gutpela tingting na save, na pasin laikim. Long dispela stori bai yumi toktok long bikpela strong, stretpela pasin na gutpela tingting na save.
“Em i Gat Bikpela Strong”
5. Bilong wanem i stret Baibel i tok Jehova em i “God I Gat Olgeta Strong”? Em i save yusim bikpela strong bilong em long mekim wanem?
5 Jehova “i gat bikpela strong.” (Jop 37:23) Jeremaia 10:6 i tok: “Bikpela, i no gat narapela i olsem yu. Yu gat bikpela strong na biknem.” Jehova i no wankain olsem ol samting em i bin wokim, long wanem, em i gat olgeta strong. Olsem na i stret Baibel i tok em tasol em i “God I Gat Olgeta Strong.” (KTH 15:3) Jehova i save yusim bikpela strong bilong em bilong wokim, bagarapim, lukautim, na stretim bek ol samting. Yumi laik skelim tupela samting tasol—strong bilong em long wokim ol samting na strong bilong em long lukautim ol man.
6, 7. Pawa bilong san i bikpela olsem wanem? Dispela i kamapim wanem bikpela tok i tru?
6 Taim san i strong na yu sanap ausait, skin bilong yu i save pilim wanem samting? Yu pilim hat bilong san. Tasol tru tru yu pilim samting i kamap long rot bilong strong bilong Jehova long wokim ol samting. Pawa bilong san i bikpela olsem wanem? Insait stret bilong san i hat nogut tru, olsem 15 milion digri. Sapos yu inap kisim liklik hap bilong san, kain sais olsem het bilong wanpela nil bilong samap, na yu putim hia long graun, em bai hat nogut tru na yu mas stap longwe long en, olsem 150 kilomita! Long olgeta wan wan sekon, san i save lusim bikpela pawa tru, i wankain olsem pawa bilong planti handet milion bom nuklia i pairap. Tasol graun i raunim san na i stap longwe long en long mak stret bilong en. Sapos em i go klostu tumas olgeta wara bilong graun bai kamap smok tasol; na sapos em i stap longwe tumas graun bilong yumi bai kamap ais. Sapos graun i stap klostu tumas o longwe tumas long san dispela bai mekim na i no gat wanpela samting inap i stap laip hia long graun.
7 Maski yumi mas i gat san bilong i stap laip, planti man i no save tingim bikpela wok san i save mekim. Olsem na ol i no kisim save long ol samting san inap lainim yumi long en. Song 74:16 i stori long Jehova olsem: “Yu putim san . . . i stap antap.” Tru tumas, san i save givim biknem long Jehova, em Man “i bin mekim kamap heven na graun.” (Song 146:6) San em wanpela tasol bilong ol samting Jehova i bin wokim na i lainim yumi long bikpela strong bilong em. Taim yumi kisim sampela save moa long strong bilong Jehova long wokim ol samting, yumi save pilim moa yet bikpela strong bilong em.
8, 9. (a) Wanem tok piksa i makim gut laik bilong Jehova long lukautim na mekim gut long ol man i save lotuim em? (b) Wasman long taim bilong ol man i bin raitim Baibel i bin mekim wanem bilong lukautim ol sipsip bilong em? Dispela i givim wanem save long yumi long Bikpela Wasman bilong yumi?
8 Na tu, Jehova i save mekim wok long bikpela strong bilong em bilong lukautim na mekim gut long ol wokboi bilong em. Baibel i save kamapim sampela gutpela tok piksa i stori long ol promis bilong Jehova long lukautim ol. Lukim tok bilong Aisaia 40:11. Long dispela hap Jehova i tok em i olsem wanpela wasman bilong sipsip, na ol manmeri bilong em, ol i olsem ol sipsip. Em i tok: “Em i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim wokabaut. Na em i save wokabaut isi na soim rot long ol sipsip i gat liklik pikinini.” Olsem wanem? Long ai bilong tingting yu inap lukim samting dispela ves i stori long en?
9 Ol sipsip ol man i save lukautim i no gat bikpela strong bilong lukautim ol yet. Long taim bilong ol man i bin raitim Baibel ol wasman i mas strongim bel na no ken pret bilong lukautim ol sipsip bilong ol na bai ol wel dok, ol bea, na ol laion tu i no ken kisim ol. (1 Samuel 17:34-36; Jon 10:10-13) Tasol sampela taim wasman i mas mekim pasin isi bilong lukautim ol sipsip. Olsem: Taim wanpela sipsip i stap longwe long ol narapela na i karim pikinini, orait wasman i mas mekim wanem bilong lukautim liklik pikinini sipsip nau tasol mama i karim? Wasman bai karim pikinini sipsip, inap sampela de, long “bros”—olsem insait long klos bilong em klostu long bros. Tasol olsem wanem pikinini sipsip inap stap long “bros” bilong wasman? Ating pikinini sipsip inap kam klostu long wasman na subim lek bilong em liklik. Tasol wasman yet i mas apim pikinini sipsip na putim em long bros bilong em. Dispela i makim gutpela pasin isi na laik bilong Bikpela Wasman bilong yumi long lukautim na mekim gut long ol wokman bilong em!
10. Jehova i save mekim wanem bilong lukautim yumi long nau? Bilong wanem dispela em i bikpela samting?
10 Jehova i no promis tasol long lukautim ol wokboi bilong em. Long taim bilong ol man i bin raitim Baibel, em i kamapim ol mirakel i soim olsem em inap long “kisim bek” ol manmeri bilong em. (2 Pita 2:9) Olsem wanem long nau? Yumi save olsem em i no yusim strong bilong em long lukautim yumi long olgeta hevi i laik painim yumi, nogat. Tasol em i save givim samting em i bikpela samting moa—em i lukautim yumi long ol samting bilong spirit. Bilong lukautim yumi long ol samting bilong spirit, God bilong yumi i save givim yumi ol samting bilong karim ol hevi na bilong pas gut wantaim em. Olsem Luk 11:13 i tok: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” Holi spirit inap strongim yumi na yumi inap karim o winim olgeta traim na hevi i painim yumi. (2 Korin 4:7) Olsem na Jehova i save lukautim laip bilong yumi, i no long sampela yia tasol, nogat, long oltaim oltaim. Taim yumi tingim dispela, ating yumi mas kisim tingting olsem ol hevi na traim “ol i no bikpela tumas, na ol bai i stap sotpela taim tasol.” (2 Korin 4:17) Yumi laik i go klostu long wanpela God i save yusim strong bilong em long helpim yumi, a?
‘Jehova i Save Laikim Tumas Stretpela Pasin’
11, 12. (a) Bilong wanem stretpela pasin bilong Jehova i kirapim yumi long i go klostu long em? (b) Devit i kisim wanem tingting long stretpela pasin bilong Jehova? Olsem wanem ol dispela tok i ken mekim gut bel bilong yumi?
11 Jehova i save mekim pasin i stret, na em i save mekim long olgeta taim na long olgeta kain man. Stretpela pasin bilong God i no olsem em i no tingim man na em i mekim hatpela pasin i save kirapim yumi long i stap longwe long em, nogat, stretpela pasin i save kirapim yumi long i go klostu long Jehova. Baibel i kamapim klia olsem wanem dispela pasin i save mekim gut bel bilong man. Olsem na yumi laik stori long 3-pela rot Jehova i save kamapim stretpela pasin bilong em.
12 Namba wan, stretpela pasin bilong Jehova i save kirapim em long i stap gut long ol wokboi bilong em. Ol samting i bin painim Devit yet i kirapim em long tingim tru dispela pasin bilong Jehova. Devit i kisim wanem tingting long ol samting i bin painim em yet na stadi em i mekim long pasin bilong God long mekim ol samting? Em i tok: “God i save laikim tumas stretpela pasin. Em i no inap larim ol manmeri bilong en i lus. Oltaim Bikpela i save lukautim ol manmeri i wokabaut stret.” (Song 37:28) Man! Dispela tok i strongim tru bel bilong yumi! God bilong yumi i no inap lusim ol man i save stap gut long em. Olsem na yumi ken bilip olsem em bai stap klostu long yumi na lukautim yumi. Yumi ken bilip olsem, long wanem, em i save bihainim stretpela pasin tasol!—Sindaun 2:7, 8.
13. Olsem wanem Lo Jehova i givim long ol Israel i kamapim klia olsem em i tingim ol man i gat hevi?
13 Namba tu, stretpela pasin bilong God i save kirapim em long tingim ol samting ol man i gat hevi i mas kisim. Lo em i bin givim long lain Israel i kamapim klia olsem em i save tingim ol man i sot long samting. Olsem, Lo i stretim rot bilong lukautim ol pikinini i no gat papamama na ol meri man bilong ol i dai pinis. (Lo 24:17-21) Jehova i luksave long hatwok bilong ol kain famili olsem, olsem na em i kamap olsem Jas na Man bilong lukautim ol na em i mekim long pasin bilong wanpela papa. (Lo 10:17, 18) Em i tokaut long lain Israel olsem sapos ol i mekim pasin i no stret long ol meri na pikinini i no gat man bilong helpim ol, em bai harim singaut bilong ol. Long Kisim Bek 22:22-24 em i tok: “Bai mi belhat.” Belhat i no wanpela bikpela pasin bilong God, tasol taim ol man i mekim pasin i no stret long ol lain i no gat strong bilong lukautim ol yet, orait dispela i save kirapim God long belhat.—Song 103:6.
14. Wanem samting i narapela kain na i soim olsem Jehova i no save tingim namba, mani, o skin bilong man?
14 Namba tri, long Lo 10:17, Baibel i tok Jehova “i no save bihainim wantok pasin na em i no save larim ol manmeri i grisim em long wanpela samting.” Jehova i no wankain olsem sampela man i gat namba, em ol i tingim mani o skin bilong man. Em i no save mekim gut long sampela tasol. Wanpela samting i makim tru olsem em i no mekim gut long sampela tasol em i olsem: Em i no givim rot long wan wan man tasol long kamap ol man i lotu tru long em na kisim laip oltaim. Nogat. Aposel 10:34, 35 i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” Rot i op long olgeta man maski ol i bilong wanem skin, o ol i sindaun long wanem kantri, o ol i gat nem o nogat. Dispela em i stretpela pasin tru, a? Tru tumas, yumi kisim sampela save moa long stretpela pasin bilong Jehova na dispela i mekim yumi i go klostu long em!
‘Ol Gutpela Tingting na Save Bilong God i Pulap Tru!’
15. Pasin bilong gutpela tingting na save em i wanem samting? Jehova i save kamapim dispela pasin olsem wanem?
15 Aposel Pol i tokaut long Rom 11:33 olsem: “Olaman! Ol gutpela . . . tingting na save bilong [God] i pulap tru, na i daun tumas.” Yes, taim yumi tingting long ol samting bilong bikpela save na tingting bilong Jehova yumi kirap nogut tru na pret. Bai yumi mekim wanem tok bilong kamapim gut mining bilong dispela pasin? I olsem gutpela tingting na save i bungim save, na pasin bilong skelim gut ol samting na gutpela tingting wantaim bilong mekim gutpela wok. Jehova i yusim bikpela save na gutpela tingting bilong em bilong makim nambawan rot bilong mekim ol samting, na taim em i kirap long mekim ol samting em i save bihainim rot i nambawan tru long mekim.
16, 17. Olsem wanem ol samting Jehova i bin wokim i kamapim gutpela tingting na save bilong em? Stori long dispela.
16 Wanem sampela samting i save kamapim ples klia gutpela tingting na save bilong Jehova? Song 104:24 i tok: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.” Taim yumi kisim sampela save moa long ol samting Jehova i bin wokim, yumi kirap nogut tru long gutpela tingting na save bilong em. Tru tumas, ol saientis i bin kisim planti save taim ol i skelim ol samting Jehova i bin wokim! I gat sampela ensinia ol i save skelim gut ol animal na binatang samting na ol dispela ensinia i wok long bihainim pasin bilong ol animal na binatang long wokim ol samting.
17 Olsem: Ating yu bin lukim haus bilong spaida na yu kirap nogut long en. Pasin bilong wokim dispela em i gutpela tru. Ol dispela liklik rop bilong en i strong tru maski i luk olsem i no strong tumas. Em i strong olsem wanem? Sapos ol rop bilong haus spaida i wankain sais olsem ol rop bilong umben bilong ol man i save kisim pis, orait dispela umben inap stopim wanpela balus i ran long antap! Yes, Jehova i bin bihainim “gutpela tingting na save” taim em i wokim ol kain samting olsem.
18. Jehova i yusim ol man bilong graun bilong raitim Baibel. Olsem wanem dispela i kamapim gutpela tingting na save bilong em?
18 Nambawan samting i kamapim gutpela tingting na save bilong Jehova em ol tok i stap long Baibel. Ol gutpela tok i stap long en i soim yumi nambawan rot long bihainim. (Aisaia 48:17) Tasol yumi inap luksave long gutpela tingting na save bilong Jehova taim yumi skelim olsem wanem ol i bin raitim Baibel. Em i mekim olsem wanem? Jehova i bihainim gutpela tingting na save bilong em taim em i makim ol man bilong graun long raitim Baibel. Yu ting wanem? Bai yumi amamas long ritim Baibel sapos Jehova i bin makim ol ensel long raitim Baibel? Tru, long bikpela save ol i holim, ol ensel inap stori long pasin bilong Jehova na tokaut long pasin bilong ol yet long givim bel long em. Tasol ol ensel ol i gutpela olgeta, na save bilong ol na ol samting i bin painim ol na strong bilong ol, i winim tru ol dispela samting bilong yumi, olsem na yu ting yumi inap pilim tru tingting bilong ol ensel?—Hibru 2:6, 7.
19. Wanem stori long Baibel i soim olsem taim Jehova i yusim ol man bilong graun long raitim Baibel, dispela i mekim na ol man inap pilim tru ol tok bilong en na ol i laik harim?
19 Taim Jehova i yusim ol man bilong graun long raitim Baibel, dispela i mekim na ol man inap pilim tru ol tok bilong en na ol i laik long harim. Ol man i raitim Baibel ol i wankain olsem yumi. Ol i no gutpela olgeta, olsem na ol traim na hevi i painim ol i wankain olsem i save painim yumi. Sampela taim, ol i raitim ol tok i kamapim bel na tingting bilong ol yet long ol hevi i painim ol. (2 Korin 12:7-10) Olsem na ol i kamapim ol tok ol ensel i no inap pilim na kamapim. Olsem tok Devit i mekim i stap long Song 51. Het-tok bilong dispela Song i tok Devit i bin kamapim dispela tok bihain long taim em i bin mekim bikpela rong. Em i kamapim bel bilong em, olsem em i bel hevi nogut tru na em i singaut strong long God i mas lusim rong bilong em. Ves 2 na 3 i tok: “Yu mas wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin. Mi save mi mekim rong pinis. Mi no inap lusim tingting long sin bilong mi.” Lukim ves 5: “Yu save pinis, taim mama i karim mi, mi kamap man bilong mekim pasin nogut. Taim mi stap yet long bel bilong mama, mi man bilong mekim sin.” Na ves 17 i tok: “God, mi daunim mi yet na mi stap aninit long yu. Dispela em i ofa bilong mi. Mi save, yu no givim baksait long man i pilim hevi long sin na i daunim em yet.” Ating yu inap pilim tru bel hevi bilong man i raitim dispela tok, a? Wanpela sinman tasol inap kamapim kain tok olsem, a?
20, 21. (a) Maski ol man bilong graun i bin raitim Baibel, olsem wanem yumi ken tok gutpela tingting na save bilong Jehova i stap long Baibel? (b) Bai yumi stori long wanem samting long stori i kamap bihain long dispela?
20 Jehova i yusim ol man i no gutpela olgeta, na long dispela rot em i givim yumi ol samting yumi mas kisim—em ol tok “spirit bilong God yet i bin kamapim,” tasol man bilong graun i bin raitim. (2 Timoti 3:16) Yes, holi spirit i bin stiaim ol man i bin raitim Baibel. Olsem na ol i bin raitim gutpela tingting na save bilong Jehova, i no bilong ol yet. Yumi inap bilipim tru dispela gutpela tingting na save. Dispela gutpela tingting na save i winim tru tingting na save bilong yumi, olsem na God i kirapim yumi olsem: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:5, 6) Taim yumi bihainim dispela gutpela tok, yumi go klostu moa long God bilong yumi, em God i gat olgeta gutpela save na tingting.
21 Nambawan gutpela pasin bilong Jehova em pasin bilong laikim tru ol narapela. Long stori i kamap bihain long dispela bai yumi stori long olsem wanem Jehova i bin kamapim dispela pasin.
Yu Inap Tingim?
• Bilong yumi ken i go klostu tru long em, Jehova i mekim pinis wanem tupela bikpela samting?
• Kolim sampela samting i soim strong bilong Jehova long wokim ol samting na strong bilong em long lukautim ol man?
• Jehova i save mekim wanem bilong kamapim stretpela pasin bilong em?
• Olsem wanem ol samting Jehova i wokim i kamapim gutpela tingting na save bilong em? Olsem wanem tok bilong Baibel i kamapim gutpela tingting na save bilong em?
[Piksa long pes 10]
Olsem wasman i karim pikinini sipsip long bros bilong em, Jehova i save lukautim na mekim gut long ol sipsip bilong em
[Piksa long pes 13]
Yumi inap luksave long gutpela tingting na save bilong Jehova taim yumi skelim olsem wanem ol i bin raitim Baibel