Go Klostu Long God
“Bikpela Em i Holi, Em i Holi, Em i Holi”
SAPOS yu mas kolim wanpela tok tasol bilong makim pasin tru bilong God Jehova, yu bai kolim wanem tok? Long yia 770 B.C.E. samting, profet Aisaia i lukim wanpela driman we em i harim ol ensel i litimapim nem bilong Jehova na ol i kolim tok i makim tru nambawan pasin bilong Jehova—em pasin holi. Samting Aisaia i harim na lukim long driman i mas kirapim yumi long daun tru long Jehova na i go klostu moa long em. Taim yumi skelim tok bilong Aisaia 6:1-3, piksaim long tingting olsem yu yet i sanap wantaim em.
Aisaia i lukim wanem samting? Em i tok: “Mi lukim Bikpela i sindaun i stap long sia king bilong en. Sia king bilong en i stap antap tru.” (Ves 1) I no olsem Aisaia i lukim stret Bikpela King Jehova, nogat. Long wanem, ai tru tru bilong man i no inap lukim ol samting long ples spirit. Baibel i tokaut stret olsem: “I no gat wanpela man i bin lukim God long wanpela taim.” (Jon 1:18) Samting Aisaia i lukim em wanpela driman.a Tasol dispela driman i klia tru na i kirapim bel bilong em na em i mekim pasin olsem em i lukim Jehova tru tru long ai bilong em.
Bihain Aisaia i lukim wanpela samting we i no gat narapela man bilong graun i bin lukim long driman. Em i tok: “Bikpela lain ensel [“serafim,” NW ] i raunim em [Jehova] i stap. Olgeta wan wan ensel i gat 6-pela wing. Na olgeta wan wan i karamapim pes bilong ol long tupela wing, na long arapela tupela wing ol i karamapim bodi bilong ol, na long arapela tupela wing ol i flai.” (Ves 2) Ol serafim em ol spirit i gat bikpela namba. Aisaia wanpela tasol i bin stori long ol dispela ensel. Ol serafim i save redi oltaim long mekim ol samting Jehova i askim ol long mekim. Ol i karamapim pes na lek bilong ol, na long dispela rot ol i soim rispek long dispela Man ol i mekim wok bilong em.
Aisaia i pilim tru samting em i lukim, na samting em i harim. Ol serafim i singim song long naispela kwaia. Aisaia i tok: “Ol i singaut long ol yet olsem, ‘Bikpela em i holi, em i holi, em i holi. Bikpela I Gat Olgeta Strong em i holi.’ ” (Ves 3) Tok Hibru ol i tanim olsem “holi” i makim pasin bilong i stap klin tru. Dispela tok i makim tu “pasin bilong i stap fri tru na stap longwe olgeta long ol samting i gat sin.” Ol serafim i singim song na kolim dispela tok “holi” 3-pela taim bilong strongim olsem Jehova em i holi tru. (Revelesen 4:8) Olsem na pasin holi em i pasin tru bilong Jehova. Tru tumas, Jehova em i klin tru na em i no gat asua long wanpela samting.
Yumi save olsem Jehova i holi na dispela i mas kirapim yumi long i go klostu moa long em. Bilong wanem? Long wanem, ol hetman bilong graun inap mekim pasin korapsen na mekim nogut long ol man, tasol Jehova i no inap tru long mekim ol dispela pasin i gat sin. Em i holi na dispela i makim olsem oltaim em bai stap gutpela Papa, stretpela King, na stretpela Jas. I gat as na yumi ken bilip tru olsem dispela God husat i gat pasin holi em bai i no inap tru long mekim yumi bel hevi.
Baibel ritim bilong Disemba:
[Futnot]
a Buk Insight on the Scriptures i tok: “Taim man i no slip na em i lukim samting olsem driman i kam long God, orait samting em i lukim i save pas strong long tingting. Bihain, dispela man bai tingim bek driman bilong em na long toktok bilong em yet em bai raitim o stori gut long en.”—Ol Witnes Bilong Jehova i wokim.
[Rait long pes 26]
Yumi save olsem Jehova i holi na dispela i mas kirapim yumi long i go klostu long em