God i Skulim Yumi na Dispela i Helpim Gut Yumi
“Mi God [Jehova], Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—AISAIA 48:17.
GOD JEHOVA i save moa long olgeta samting. Tingting na toktok na wok bilong em i winim olgeta narapela. Em i bin wokim yumi, olsem na em i save gut long ol samting yumi mas kisim, na em inapim ol dispela samting long yumi. Na em i save tu long pasin bilong skulim yumi. Sapos yumi bihainim ol tok em i skulim yumi long en, bai yumi stap amamas na stap gut.
2 Ol tok God i skulim yumi long en i kamapim klia olsem God i gat bikpela laik long bagarap i no ken painim yumi na yumi ken bihainim ol lo bilong em na i stap amamas. Sapos lain bilong em long bipo i bin harim tok bilong em, bai em i mekim gut long ol. Em i tokim ol: “Mi God, Bikpela bilong yupela. Oltaim mi skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, . . . na stretpela pasin bilong yupela bai i kamap strong oltaim.”—Aisaia 48:17, 18.
3 Sapos ol i bin bihainim tok na lo bilong God dispela bai helpim ol. Ol Babilon i no inap bagarapim ol. Ol bai stap amamas na bel isi na sindaun gut, na ol stretpela wok bilong ol bai kamap planti tru. Sapos yumi bihainim ol tok God i skulim yumi long en, dispela bai helpim gut yumi tu olsem. Em bai helpim yumi olsem wanem?
Pasin Bilong Man i Senis
4 Jehova i bin skulim planti man na dispela save i kirapim ol long senisim pasin bilong ol. Ol man i bihainim tok bilong em ol i lusim ol “pasin bilong olpela bel,” olsem pasin sem, lotu giaman, mekim wok bilong ol spirit nogut, pait, mangal, na ol i kirap bihainim ol pasin bilong spirit, olsem pasin sori, amamas, bel isi, no les kwik long man, gutpela pasin, bilip, pasin isi, bosim laik bilong skin. (Galesia 5:19-23) Na ol i bihainim tok bilong Efesus 4:17-24, em Pol i tokim ol Kristen long ol i no ken wokabaut long pasin bilong ol man bilong graun em tingting bilong ol i paul olgeta, na save bilong ol i olsem tudak, na ol i stap longwe tru long God. Ol man i bihainim pasin bilong Krais ol i lusim pasin bilong olpela bel na ‘kamap nupela manmeri,’ na ol i bihainim pasin God i save laikim na ‘mekim tok tru tasol.’
5 Sapos yumi bihainim ol tok bilong Jehova yumi inap i stap wanbel wantaim em, olsem Noa i bin mekim, na dispela bai helpim gut yumi. (Stat 6:9; Aisaia 30:20, 21) Ol man bilong graun i “wokabaut . . . long pasin bilong ol haiden” na “tingting bilong ol i paul olgeta, na save bilong ol i olsem tudak.” Wanpela man i bin lukim ol tok nogut ol man i bin raitim long banis long Pompei na nau em i raitim wanpela tok long en olsem: “Sori, banis. Olsem wanem na yu no bin hevi long ol dispela tok nogut na yu no pundaun?” Tasol ol “tok bilong Bikpela” Jehova i narapela kain, na wok bilong autim tok bilong Kingdom i helpim ol man i save laikim tok i tru na ol i kisim gutpela tingting. (Aposel 13:12) Ol i lain long olsem wanem ol i ken lusim pasin nogut i narapela kain long laik bilong God. Nau ol i no stap moa long pasin bilong tudak na ol i no bihainim moa pasin bilong olpela bel i tingting long inapim laik bilong ol yet tasol.
6 Na taim Jehova i skulim yumi, yumi save long pasin bilong em na long ol wok bilong em, na nau yumi ken i stap klostu long em na givim bel long em, na dispela i kirapim yumi long bihainim tok na laik bilong em. Olsem 1 Jon 5:3 i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” Na yumi bihainim lo bilong Jisas tu, long wanem, Jehova i as bilong dispela tu. (Jon 7:16-18) Sapos yumi mekim olsem, bai yumi stap strong long spirit na bai yumi stap amamas.
Bihainim Gutpela Rot
7 Ol tok Jehova i skulim yumi long en i helpim yumi long bihainim gutpela rot tasol na long olgeta de yumi ken mekim gutpela wok. Man i save stap inap 70 yia samting, olsem 25,550 de, na sapos em i gat 50 krismas, bikpela hap taim bilong em i lus pinis, olsem 18,250 de, na ating em i gat 7,300 de tasol bilong em i ken i stap, na i no planti. Olsem na em i ken pilim tru beten bilong Moses, em i bin beten long Jehova olsem: “Yu skulim mipela gut bai mipela i ken save olsem mipela i no inap i stap longpela taim long graun. Olsem na bai mipela i gat gutpela save tru.”—Song 90:12.
8 Tasol i no olsem Jehova i makim stret hamas de yumi ken i stap. Nogat. Song 90:9, 10 i toktok long 70 o 80 yia samting, em skel bilong yumi—em sotpela taim tasol. Olsem na long Song 90:12 Moses i askim Jehova long skulim gut lain bilong em na bai ol i ken bihainim gutpela tingting na mekim laik bilong Jehova long olgeta de. Orait, olsem wanem long yumi? Yumi tenkyu long Jehova long olgeta wan wan de yumi stap laip? Yumi bihainim gutpela tingting na long olgeta de yumi mekim laik bilong Jehova na litimapim nem bilong em na bai dispela Nambawan Tisa i ken amamas long yumi? Ol tok em i skulim yumi long en bai helpim yumi long mekim olsem.
9 Sapos long olgeta de yumi mekim ol samting i givim biknem long Jehova, ating yumi inap mekim i go na dai i no ken katim na bai sampela de i lus. Long wanem, ol tok Jehova i skulim yumi long en i givim save long yumi na bai yumi ken i stap oltaim. Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Ol save bilong dispela graun i no inap helpim yumi long i stap oltaim. Tasol sapos yumi kisim save long Jehova na Jisas, na yumi mekim wok long dispela save, na yumi bilip tru na kamapim dispela bilip, yumi inap i stap oltaim.
10 Maski yumi bin i stap hamas yia, yumi mas tingim bikpela samting olsem: Ol man i bihainim tok Jehova i skulim ol long en, ol inap pilim tru olsem i stap bilong ol i gat as bilong en. Wanpela buk (The World Book Encyclopedia) i tok: ‘Skul i bilong helpim ol man long kamapim gutpela wok i save helpim ol man, na sindaun gut na i stap amamas.’ Na i olsem tu long skul yumi kisim long Jehova. Ol save em i givim long yumi i helpim yumi na yumi amamas long i stap insait long lain bilong em, na long mekim wok bilong helpim ol man bilong olgeta hap.
Wok Bilong Skulim Ol Man
11 Jehova i gat wanpela gutpela rot tru bilong skulim ol man na givim save long ol na bai ol i no stap longlong. I no gat narapela skul olsem bilong Jehova long skulim ol man na givim save long ol. Tomas Jefason i save skul i bikpela samting. Em i namba 3 presiden bilong Yunaitet Stets, na long Ogas 13, 1786, em i salim pas long pren bilong em, em Jos Wait, em tupela i bin sainim Dekleresen Bilong Independens, na Tomas Jefason i tok: “Mi ting ol man i mas kisim save long ol samting. Dispela i namba wan samting bilong helpim ol man na bai ol i ken i stap fri na i stap amamas. Yu mas tokaut strong long ol i mas skul bambai ol i no ken i stap longlong, na strongim lo i tok long skulim ol man. Ol i mas save, takis ol i tromoi bilong baim skul i samting nating, long wanem, sapos i no gat skul na ol i stap longlong, ol king na pris na bikman bai kamap namel long yumi na ol man i mas tromoi bikpela takis tru long ol.”
12 Taim Jehova i skulim ol man, dispela i namba wan rot bilong helpim ol man bilong olgeta hap em ol i gat gutpela bel, na ol inap kisim stretpela save na ol i no ken i stap longlong moa. Fifti yia bipo, taim Namba 2 Pait i stap yet, Komiti Bilong Edukesen long Yunaitet Stets i tok, ol man bilong olgeta hap i mas lain na kisim save. Long nau tu i olsem. Ol man i sot long gutpela save na ol i mas lain na kisim gutpela skul. Tasol skul bilong Jehova tasol inap helpim ol manmeri bilong olgeta hap long kisim stretpela save. Ol tok Jehova i skulim ol long en i helpim ol long karim ol hevi bilong nau na helpim ol long bihainim pasin i stret na kamap strong long ol samting bilong spirit na lusim ol pasin hambak na pasin birua. Ol save ol i kisim i helpim ol na bai ol i ken i stap laip oltaim. Nau ol man bilong olgeta hap ol i wok long kisim dispela kain save na ol i lain long mekim wok bilong God Jehova.
13 Long nau ol tok Jehova i skulim ol man long en i helpim planti nupela man em ol i wok long kam insait long lain bilong em na ol i kamap wokman bilong God. Ol i pilim olsem ol i mas kisim ol gutpela save i kam long God, na ol i pilim olsem bikpela de bilong Jehova klostu bai kam. (Matyu 5:3; 1 Tesalonaika 5:1-6) Baibel i tok long “wanpela taim bai i kamap bihain.” Dispela “taim” em i kamap pinis na nau yumi stap long en, na ol dispela nupela man i wok long kam insait long “dispela maunten, haus bilong Bikpela i sanap long en,” olsem gutpela lotu bilong Jehova. Dispela lotu i kamap strong pinis na i antap long olgeta lotu i no bihainim laik bilong Jehova. (Aisaia 2:2-4) Sapos yu wanpela Witnes Bilong Jehova na yu dediket pinis, ating yu amamas long i stap insait long dispela bikpela lain ol i kam insait na ol i lotu long Jehova na kisim ol gutpela save bilong helpim ol, a? Tru tumas, yumi amamas long i stap insait long dispela lain i save “litimapim nem bilong Bikpela” Jehova!—Song 150:6.
Skul i Stretim Pasin Bilong Yumi
14 Ol tok Jehova i lainim yumi long en i stretim tingting na pasin bilong yumi na bai yumi tingting long ol samting i stret tasol na ol samting i gutpela tru na ol samting yumi ken litimapim nem bilong en. (Filipai 4:8) Ol tok yumi kisim long Jehova i helpim yumi long bihainim tok bilong Pol, em i tok: “Long olgeta kain pasin nogut yupela i mas i stap olsem ol liklik pikinini. Tasol tingting bilong yupela i mas i stap olsem tingting bilong ol bikpela man.” (1 Korin 14:20) Sapos yumi bihainim dispela tok yumi no ken wok long kisim save long ol pasin nogut. Pol i tok moa: “Rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut.” (Efesus 4:31) Sapos yumi bihainim dispela tok bai yumi abrusim pasin pamuk na ol narapela kain pasin nogut, na dispela bai helpim skin na tingting bilong yumi, na yumi save Jehova i amamas long yumi, olsem na yumi tu i ken amamas.
15 Na bilong helpim yumi long tingim ol samting i stret tasol, yumi no ken ‘poroman wantaim ol man nogut, em ol bai i bagarapim gutpela pasin bilong yumi.’ (1 Korin 15:33) Yumi Kristen i no save bung wantaim ol manmeri i mekim pasin pamuk o narapela rong, a? Olsem na yumi no ken lukim ol buk o piksa o televisen i gat pasin sem, long wanem, i olsem yumi poroman wantaim ol man nogut. Bel i save giamanim yumi na em inap kirapim yumi long laikim ol samting nogut, na dispela laik inap pulim yumi long mekim ol dispela samting. (Jeremaia 17:9) Yumi mas abrusim ol dispela samting na yumi pas long tok bilong Jehova tasol. Dispela bai mekim na yumi ol man i “laikim tru” Jehova bai yumi ‘no laikim pasin nogut.’—Song 97:10.
16 Pol i tokim wanwok bilong em Timoti: “Bikpela i ken i stap wantaim spirit bilong yu. Na marimari bilong en i ken i stap wantaim yupela olgeta.” (2 Timoti 4:22) Long rot bilong Jisas, Pol i laik bai God i ken orait long dispela strong i save kirapim Timoti na ol narapela Kristen. Ol tok bilong God i save helpim yumi long mekim gutpela pasin sori na pasin isi long ol man. (Kolosi 3:9-14) Nau long taim bilong las de planti man i no gat gutpela pasin olsem. Ol i gat pasin antap, na pasin bikhet, na ol i no tenkyu long ol samting, na ol i no gat pasin sori; ol i bihainim tingting na laik bilong ol yet, na givim bel long ol amamas nabaut, na ol i no laikim God. (2 Timoti 3:1-5) Tasol taim yumi bihainim ol tok bilong God, pasin bilong yumi i kamap gutpela na God wantaim ol narapela man i save laikim yumi.
Stap Gut Wantaim Ol Narapela
17 Na God i skulim yumi long wok gut wantaim ol wanlotu. (Song 138:6) Planti man i no bihainim ol gutpela lo. Tasol yumi no olsem. Taim ol elda i toktok wantaim long ol samting bilong tok i tru, narapela i daun long narapela na harim tok bilong em. Ol i no tok kros o tok pait na bagarapim pasin wanbel i stap namel long ol. Sapos yumi olgeta bilong kongrigesen i bihainim tok God i skulim yumi long en, bai yumi wok gut wantaim na i stap wanbel, na dispela bai helpim gut yumi.—Song 133:1-3.
18 Na God i skulim yumi na bai yumi ken laikim ol narapela wanbilip. Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam.” (Jon 6:44) Kirap long 1919 Jehova i salim lain bilong em long i go autim tok bilong em na tokim ol man long strafe bilong em bai painim ol man bilong dispela graun, na lain bilong Satan i guria taim ol i harim dispela toksave. Tasol ol man i daun long God ol i lusim pasin bilong graun na ol i kam long Jehova. Ol i helpim lain remnan long autim tok na helpim sampela gutpela man moa long kam insait long “haus” bilong Jehova na lotu long em. (Hagai 2:7) Yumi mas amamas long God i kisim ol i kam, na yumi mas laikim ol tru.
19 Yumi olgeta i no gutpela tumas, olsem na ating sampela hevi i mas kamap. Taim Pol i laik mekim namba 2 raun long wok misineri, Barnabas i laik kisim Mak tu i go, tasol Pol i tok, Mak “i bin lusim mitupela long provins Pamfilia, na em i no laik . . . mekim wok.” Olsem na “tupela i tok kros,” na Barnabas i kisim Mak i go long Saiprus, na Pol i kisim Sailas i go long Siria na Silisia. (Aposel 15:36-41) Yumi save bihain Pol tupela Barnabas i stretim pinis kros, long wanem, bihain Mak i stap wantaim Pol long Rom na Pol mekim gutpela tok long em. (Kolosi 4:10) God i lainim yumi long pasin bilong stretim kros i kamap namel long yumi ol Kristen, olsem long bihainim tok bilong Jisas long Matyu 5:23, 24 na Matyu 18:15-17.
God i Helpim Yumi Long Winim Hevi
20 Dispela stori hia i bin toktok long olsem wanem ol tok God i skulim yumi long en i win tru na em i ken helpim gut yumi. Olsem na nau yumi pilim tru olsem yumi mas wok strong long bihainim ol dispela tok. Yumi mas larim dispela Nambawan Tisa i skulim yumi olsem long olgeta taim, na yumi mas daun na harim tok bilong em. Klostu nau na skul bilong God bai win moa yet, taim olgeta saveman bilong dispela graun i pinis. (Lukim 1 Korin 1:19.) Planti milion man moa bai putim yau na lain long bihainim laik bilong God, na save bilong em bai pulap long graun olsem solwara i pulap long hap bilong en. (Aisaia 11:9) Dispela bai helpim gut ol man bilong bihainim tok, na litimapim nem bilong Jehova, em Nambawan King bilong heven na graun!
21 Ol save i kam long Jehova bai helpim ol man long olgeta taim. Olsem wanem long yu? Bai yu wok strong long kisim save long Baibel na larim tok bilong en i stiaim wokabaut bilong yu? Yu save bihainim tok bilong Baibel na autim tok tru bilong en long ol narapela man? Sapos olsem, orait, bihain bai yu lukim ol tok bilong God i win, na dispela bai litimapim nem bilong dispela Nambawan Tisa, em Bikpela King Jehova.
Yu Lainim Wanem Samting?
◻ Ol save yumi kisim long God inap helpim yumi olsem wanem?
◻ Olsem wanem tok bilong Jehova i gutpela bilong skulim ol man long en?
◻ Ol save yumi kisim long God i ken mekim wanem long tingting na pasin bilong yumi?
◻ Olsem wanem ol tok God i skulim yumi long en i ken helpim yumi long i stap gut wantaim ol narapela?
[Askim Bilong Stadi]
1. Sapos yumi bihainim ol tok God i skulim yumi long en, bai yumi stap olsem wanem?
2, 3. (a) Olsem wanem long lain bilong God long bipo sapos ol i bin bihainim tok bilong em? (b) Na olsem wanem long yumi sapos yumi bihainim ol tok God i skulim yumi long en?
4. Wanem senis i kamap long ol man i bihainim tok bilong God?
5. Ol tok i kam long Jehova i mekim wanem long wokabaut bilong ol man?
6. Yumi mas mekim wanem long ol tok Jehova i givim long yumi na bai yumi ken i stap amamas?
7, 8. (a) Wanem insait bilong tok bilong Song 90:12? (b) Wanem gutpela tingting yumi ken bihainim?
9. Yumi inap mekim wanem sapos yumi givim biknem long Jehova long olgeta de?
10. Skul i bilong mekim wanem wok, olsem wanpela buk i tok? Na olsem wanem long skul bilong Jehova?
11. Tomas Jefason i tok wanem long ol man i mas kisim save?
12. Olsem wanem ol save i kam long Jehova i winim ol narapela kain save ol man i kisim?
13. Wanem samting i kamap long nau na i truim tok bilong Aisaia 2:2-4?
14. Sapos yumi bihainim tok bilong 1 Korin 14:20 dispela bai helpim yumi olsem wanem?
15. Yumi mas mekim wanem na bai yumi tingting long ol samting i stret tasol?
16. Ol tok God i skulim yumi long en i save mekim wanem long pasin bilong yumi?
17. Bilong wanem yumi mas i gat pasin daun na wok gut wantaim ol narapela?
18. Ol save yumi kisim long God i helpim yumi long ting olsem wanem long ol narapela brata?
19. Tok bilong God i tok wanem long pasin bilong stretim ol hevi o kros i kamap namel long ol Kristen?
20, 21. Yumi bin toktok long ol samting God i bin skulim yumi long en na dispela i mas kirapim yumi long mekim wanem?
[Piksa long pes 15]
Ol tok God i skulim yumi long en i lainim yumi long i stap gut wantaim em olsem Noa i bin mekim
[Piksa long pes 17]
Ol man bilong olgeta hap i wok long i kam long maunten bilong Jehova