“Sakim Satan” Olsem Jisas i Bin Mekim
“Yupela i mas sakim Satan, na em bai i lusim yupela na ranawe.”—JEM. 4:7.
1. Jisas i save husat bai birua long em taim em i stap long graun? Wanem samting i kamap?
JISAS KRAIS i save olsem Satan bai birua long em. Dispela i kamap ples klia long tok God i mekim long snek, em dispela tok i go long dispela bikhet ensel husat i toktok long rot bilong snek. God i tok olsem: “Bai mi mekim yu i stap birua bilong meri [lain bilong Jehova long heven, i olsem meri bilong em], na meri i stap birua bilong yu. Na bai mi mekim ol lain bilong yu i birua long lain bilong meri. Bai ol [Jisas Krais] i krungutim het bilong yu, na bai yu kaikaim lek bilong ol [em].” (Stt. 3:14, 15; KTH 12:9) Dispela tok long ol bai kaikai lek bilong Jisas i makim olsem ol bai kilim em i dai, tasol em bai stap sotpela taim tasol long matmat, long wanem, Jehova bai kirapim em bek na em bai go long heven. Tasol dispela tok long ol bai krungutim het bilong snek i makim olsem Satan bai dai na pinis olgeta, em i no inap kirap bek.—Ritim Aposel 2:31, 32; Hibru 2:14.
2. Bilong wanem Jehova inap bilip tru olsem Jisas bai sakim Satan?
2 Jehova i bilip tru olsem Jisas bai inapim wok em i givim em na Jisas inap sakim Satan taim em i stap long graun. Bilong wanem Jehova i bilip tru olsem? Long wanem Jehova i bin wokim Jisas long heven planti yia i go pinis, na em i bin lukim pasin bilong Jisas na em i save olsem dispela “saveman i bosim wok” na “namba wan pikinini” em i bin wokim, em i save bihainim tok bilong Jehova na i stap gut long em. (Snd. 8:22-31; Kl. 1:15) Olsem na taim God i salim Jisas i kam daun long graun na em i larim Satan long traim em i go inap long taim Jisas i dai, God i bilip strong tru olsem dispela wanpela Pikinini bilong Em inap tru long sakim Satan.—Jo. 3:16.
Jehova i Lukautim Ol Wokman Bilong Em
3. Satan i laik mekim wanem long ol wokman bilong Jehova?
3 Jisas i kolim Satan olsem “hetman i save bosim dispela graun” na Jisas i givim tok lukaut long ol disaipel bilong em olsem ol man bai mekim nogut long ol wankain olsem ol i bin mekim long em. (Jo. 12:31; 15:20) Ol man bilong dispela graun i stap aninit long strong bilong Satan, ol i no laikim ol Kristen tru, long wanem, ol Kristen tru i save lotuim Jehova na ol i man bilong autim tok long stretpela pasin. (Mt. 24:9; 1 Jo. 5:19) Satan i laik bagarapim lain remnan bilong ol Kristen God i bin makim, em bihain ol bai mekim wok king wantaim Krais long Kingdom long heven. Satan i laik bagarapim tu planti Witnes bilong Jehova em ol i gat tingting long kisim laip oltaim long Paradais long graun. Baibel i givim tok lukaut long yumi olsem: “Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.”—1 Pi. 5:8.
4. Wanem samting i kamapim klia olsem lain bilong God i bin sakim Satan long taim bilong yumi?
4 Yumi wanpela lain em God Jehova i sapotim, olsem na yumi inap long sakim Satan. Tingim ol dispela samting: Insait long 100 yia i go pinis, sampela gavman nogut tru winim bilong bipo, ol i bin traim long pinisim ol Witnes Bilong Jehova. Tasol namba bilong ol Witnes i wok yet long i go bikpela na nau namba bilong ol i olsem 7,000,000 long 100,000 kongrigesen long olgeta hap bilong graun. Ol dispela gavman nogut i bin mekim nogut tru long lain bilong Jehova, ol i no i stap moa!
5. Aisaia 54:17 i bin kamap tru long ol wokman bilong Jehova olsem wanem?
5 God i tok promis long lain Israel bilong bipo, em “Jerusalem” i makim, olsem: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu. Long dispela pasin mi save was gut long olgeta wokman bilong mi na mekim ol i win.” (Ais. 54:11, 17) Dispela tok promis i bin kamap tru long ol lain bilong Jehova long olgeta hap bilong graun nau long dispela “taim bilong las de.” (2 Ti. 3:1-5, 13) Yumi wok yet long sakim Satan, na i no gat wanpela samting bilong pait em i mekim wok long en bilong pinisim tru lain bilong God em inap bagarapim yumi, long wanem, Jehova yet i helpim yumi.—Sng. 118:6, 7.
6. Tok profet bilong Daniel i tokim yumi long wanem samting bai painim wok bos bilong Satan?
6 Pinis bilong olgeta pasin nogut bilong dispela graun i kam klostu pinis, na olgeta wok bos bilong Satan bai pinis olgeta. Spirit bilong God i kirapim Daniel long mekim dispela tok profet: “Taim ol dispela king i stap yet [long taim bilong yumi] God bai i kirapim wanpela kingdom [long heven] na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king [i stap nau] na kingdom bilong en bai i stap oltaim.” (Dan. 2:44) Taim dispela samting i kamap, wok bos bilong Satan na bilong ol man bai pinis. Olgeta samting bilong dispela graun bilong Satan bai pinis olgeta, na Kingdom Bilong God tasol bai bosim olgeta hap graun.—Ritim 2 Pita 3:7, 13.
7. Olsem wanem yumi save olsem ol wokman bilong Jehova inap long sakim Satan?
7 Yumi ken bilip tru olsem Jehova bai lukautim oganaisesen bilong em na oganaisesen bilong em bai stap gut. (Ritim Song 125:1, 2.) Olsem wanem long yumi? Baibel i tok yumi inap long sakim Satan olsem Jisas i bin mekim. Tok profet Jisas i givim long rot bilong aposel Jon i soim olsem maski Satan i birua long lain bilong Jehova, “planti manmeri tru” bilong ol lain i wet long kisim laip oltaim long graun, ol bai abrusim bagarap long dispela taim. Baibel i tok ol i singaut olsem: “God bilong yumi em i save sindaun long sia king bilong en, na Pikinini Sipsip [Jisas Krais], tupela tasol i save kisim bek yumi na mekim yumi i stap gut.” (KTH 7:9-14) Baibel i stori long ol Kristen God i bin makim olsem ol i winim pait na daunim Satan, na ol poroman bilong ol, em ol “arapela sipsip” ol tu i sakim Satan. (Jo. 10:16; KTH 12:10, 11) Tasol bilong sakim Satan, man i mas wok strong na beten long God i ‘kisim bek em long ol samting nogut.’—Mt. 6:13.
Man i Stap Gutpela Piksa Long Pasin Bilong Sakim Satan
8. Wanem namba wan traim em Satan i givim long Jisas long ples nating? Krais i mekim wanem?
8 Satan i bin traim long bagarapim pasin bilong Jisas long i stap gut long God. Long ples nating, Satan i mekim wok long ol traim bilong pundaunim Jisas na bai Em i sakim tok bilong Jehova. Tasol Jisas i stap gutpela piksa long pasin bilong sakim Satan. Jisas i no bin kaikai inap 40 de na 40 nait, olsem na ating em i gat bikpela laik tru long kisim kaikai. Satan i tokim em: “Sapos i tru yu Pikinini Bilong God, orait yu tok na ol dispela ston i ken tanim na i kamap bret.” Tasol Jisas i no laik mekim wok long strong God i bin givim em bilong helpim em yet, nogat. Em i tok: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ”—Mt. 4:1-4; Lo 8:3.
9. Satan i save mekim wok long ol laik bilong bodi bilong yumi long pulim yumi long mekim rong, olsem na bilong wanem yumi mas sakim dispela?
9 Long nau, Satan i save mekim wok long ol laik bilong bodi bilong pundaunim ol wokman bilong Jehova. Olsem na yumi mas wok strong long sakim pasin pamuk, em long nau planti man i save mekim dispela pasin. Baibel i tok: “Ol man i save mekim pasin nogut, ol bai i no inap i go insait long kingdom bilong God. Ating yupela i no save long dispela, a? Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol maritmeri, na ol man i save mekim ol kain kain pasin i gat sem wantaim ol arapela man, . . . olgeta dispela kain man bai i no inap i go insait long kingdom bilong God.” (1 Ko. 6:9, 10) Dispela i kamapim klia olsem ol manmeri i no save bihainim stretpela pasin long i stap bilong ol na ol i no laik senisim pasin bilong ol, ol bai i no inap stap long nupela taim God bai kamapim.
10. Matyu 4:5, 6 i stori long wanem narapela traim Satan i mekim wok long en bilong pulim Jisas long lusim pasin bilong i stap gut long God?
10 Long wanpela traim i bin painim Jisas long ples drai nating, Baibel i tok: “Satan i kisim em i go long Jerusalem, taun bilong God, na i putim em antap tru long tempel. Na Satan i tokim em olsem, ‘Sapos i tru yu Pikinini Bilong God, orait yu kalap i go daun. Long wanem, buk bilong God i gat tok olsem, “Em bai i tokim ol ensel bilong en long ol i mas was long yu.” Na “Ol bai i karim yu long han bilong ol, nogut wanpela ston i sutim lek bilong yu.” ’ ” (Mt. 4:5, 6) I olsem Satan i tok sapos Jisas i mekim olsem, dispela bai kamapim klia olsem em i Mesaia. Tasol sapos Jisas i bin mekim olsem, em bai i mekim pasin hambak na pasin i no stret, na God i no inap orait long em na i no inap sapotim em. Long dispela taim gen Jisas i stap gut long Jehova na em i kamapim wanpela skripsa bilong bekim tok bilong Satan. Em i tok: “Buk bilong God i tok moa olsem, ‘Yu no ken traim strong bilong God, Bikpela bilong yu.’ ”—Mt. 4:7; Lo 6:16.
11. Satan inap traim yumi long wanem rot? Wanem samting inap kamap?
11 Ating Satan bai wok long pulim yumi long kisim biknem long kain kain rot. Na tu, ating em bai traim long kirapim yumi long bihainim pasin bilong ol man bilong graun long klos na bilas o long insait long sampela kain amamas i no stret. Tasol sapos yumi sakim ol tok bilong Baibel na bihainim ol pasin bilong dispela graun, yu ting i stret yumi ken ting olsem ol ensel bai helpim na lukautim yumi long ol samting nogut em pasin bilong yumi i kamapim? Tru, King Devit i tanim bel long sin em i bin mekim wantaim Batseba, tasol em i no inap abrusim ol hevi i kamap long pasin nogut em i bin mekim. (2 Sml. 12:9-12) Yumi no ken traim Jehova long ol rot i no stret, olsem nogut yumi kirap laikim pasin bilong dispela graun.—Ritim Jems 4:4; 1 Jon 2:15-17.
12. Wanem traim Matyu 4:8, 9 i stori long en? Pikinini Bilong God i tok wanem?
12 Narapela traim Satan i mekim wok long en long ples drai nating, em i tok long em bai givim olgeta gavman bilong dispela graun long Jisas. Satan i soim em olgeta gavman bilong dispela graun na em i tok: “Sapos yu brukim skru na lotu long mi, orait bai mi givim yu dispela olgeta samting.” (Mt. 4:8, 9) Long dispela rot Satan i laik kirapim Jisas long brukim lo bilong Jehova na lotu long Satan, em samting i bilong Jehova wanpela tasol. Satan i laik bai ol man i lotuim em na em i bin tingim tingim long bel dispela laik, na long dispela pasin dispela ensel husat i bin stap gut long Jehova long bipo em i pundaun long sin, long wanem, em i mangal long kisim samting i no bilong em, olsem na em i kamap Satan, em man nogut tru, na man bilong traim ol man. (Jem. 1:14, 15) Tasol Jisas i laik i stap gut long Papa bilong em long heven, olsem na em i tok: “Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” Em nau, Jisas i sakim Satan gen. Pikinini Bilong God i no laik insait long dispela graun bilong Satan na em i no laik lotuim dispela man nogut.—Mt. 4:10; Lo 6:13; 10:20.
“Sakim Satan, na Em Bai i Lusim Yupela”
13, 14. (a) Taim Satan i soim olgeta gavman bilong dispela graun long Jisas, em i laik givim Jisas wanem samting? (b) Long wanem ol rot Satan i laik bagarapim tingting bilong yumi?
13 Taim Satan i soim olgeta gavman bilong graun long Jisas, em i laik givim namba long Jisas, em dispela namba i no gat wanpela man i bin holim long bipo. Satan i ting olsem samting Jisas i lukim bai kirapim Jisas long ting olsem em inap kamap wanpela bikman bilong politik husat i gat bikpela strong. Tru long nau Satan i no tok long givim ol gavman long yumi, tasol em i laik bagarapim tingting bilong yumi long rot bilong ol samting yumi lukim, harim, na tingting long en.
14 Satan i bosim dispela graun. Olsem na em i bosim ol nius na TV samting tu. Yumi no kirap nogut olsem ol dispela samting i gat pasin pamuk na pasin bilong pait na bagarapim man i pulap long en. Ol kampani i save putim ol toksave bilong kirapim yumi long baim planti samting em yumi no gat wok long ol. Long rot bilong ol dispela samting, Satan i save traim yumi long kisim ol mani kago na gutpela sindaun, em ol samting i save pulim ai, yau, na tingting bilong yumi. Tasol taim yumi no ritim ol buk, lukim ol piksa long TV, na harim ol musik we i no stret wantaim tok bilong Baibel, i olsem yumi tok: “Satan, yu klia!” Taim yumi mekim olsem, yumi bihainim pasin bilong Jisas long strong long sakim ol pasin nogut bilong dispela graun em Satan i as bilong en. Na tu, yumi kamapim long ples klia olsem yumi no bilong dispela graun bilong Satan taim yumi no pret long tokaut long ples wok, long skul, long ol man i sindaun klostu long yumi, na ol wanblut bilong yumi olsem yumi Witnes bilong Jehova na yumi save bihainim pasin bilong Krais.—Ritim Mak 8:38.
15. Bilong wanem pasin bilong sakim Satan i makim olsem yumi mas wok yet long was i stap?
15 Bihain long Jisas i sakim Satan namba tri taim, “Satan i lusim em.” (Mt. 4:11) Tasol Satan i no stop long traim Jisas, long wanem, Baibel i tok: “Satan i traim Jisas long ol kain kain traim pinis [long ples drai nating], orait em i lusim Jisas na i wetim narapela taim.” (Lu. 4:13) Taim yumi sakim Satan, yumi mas tenkyu long Jehova. Tasol yumi mas wok yet long askim God long helpim yumi, long wanem, Satan bai traim yumi gen long wanpela taim i stret long em—i no long wanpela taim we yumi ting em bai traim yumi. Olsem na yumi mas was gut i stap long olgeta taim, na redi oltaim long mekim wok bilong Jehova maski wanem kain traim i painim yumi.
16. Jehova i givim wanem strongpela samting long yumi? Bilong wanem yumi mas beten long kisim dispela samting?
16 Bilong helpim yumi long sakim Satan, yumi mas beten long God i givim holi spirit long yumi, na em bai givim dispela nambawan bikpela strong long yumi. Em bai helpim yumi long mekim ol samting yumi i no inap mekim long strong bilong yumi yet. Jisas i mekim gut bel bilong ol disaipel bilong em taim em i tok olsem God bai salim holi spirit bilong em i kam: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Lu. 11:13) Olsem na yumi mas wok yet long beten long Jehova long givim holi spirit bilong em. Dispela nambawan bikpela strong bai helpim yumi long sakim Satan. Na tu, yumi mas pasim olgeta klos pait bilong spirit i kam long God na bai yumi inap “long sanap strong na sakim olgeta kain pasin trik na giaman Satan i save hait na mekim.”—Ef. 6:11-18.
17. Wanem samting i helpim Jisas long sakim Satan?
17 I gat narapela samting tu i bin helpim Jisas long sakim Satan, na em i ken helpim yumi tu. Baibel i tok: “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai . . . Na nau em i sindaun long han sut bilong sia king bilong God.” (Hi. 12:2) Yumi inap kisim wankain amamas taim yumi stap gut long wok bos bilong Jehova, na givim ona long nem holi bilong em, na tingim laip oltaim bai yumi kisim. Yumi bai amamas tru taim Satan na olgeta wok bilong em i pinis olgeta na “ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Sng. 37:11) Olsem na wok yet long sakim Satan, olsem Jisas i bin mekim.—Ritim Jems 4:7, 8.
Bai Yu Bekim Olsem Wanem?
• Wanem samting i soim olsem Jehova i save lukautim ol lain bilong em?
• Olsem wanem Jisas i stap gutpela piksa long pasin bilong sakim Satan?
• Long wanem ol rot yu ken sakim Satan?
[Piksa long pes 29]
Pasin bilong laikim ol samting bilong dispela graun bai mekim yumi i stap birua bilong God
[Piksa long pes 31]
Jisas i sakim traim bilong Satan long em i laik givim em olgeta gavman bilong graun