“Baim Tok i Tru na No Ken Salim”

1, 2. (a) Wanem samting i dia tumas long yumi? (b) Wanem ol tok i tru i dia tumas long yumi? Bilong wanem? (Lukim ol piksa long kirap bilong stadi.)

WANEM samting i dia tumas long yu? Yu redi long senisim na kisim narapela samting we pe bilong en i daun tru? Ol lain i dediket long Jehova, ol i save long bekim bilong ol dispela askim. Pasin pren bilong yumi wantaim Jehova em samting i dia tumas, na yumi no inap senisim bilong kisim narapela samting. Na tu, tok i tru bilong Baibel em samting i dia tumas long yumi, bikos em i opim rot long yumi inap pas gut wantaim Papa bilong yumi long heven.—Kol. 1:9, 10.

² Tingim olgeta samting em Nambawan Bikpela Tisa i skulim yumi long en long rot bilong Baibel! Em i tokaut long ol gutpela pasin bilong em na mining i stap long nem bilong em. Em i tokim yumi long ofa bilong baim bek yumi—em bikpela samting tru em i kamapim long rot bilong Jisas. Na tu, Jehova i tokim yumi long Kingdom Bilong Mesaia, gutpela pe em ol Kristen em i anointim bai kisim long heven, na laip oltaim em “ol arapela sipsip” bai kisim long graun. (Jon 10:16) Em i skulim yumi long ol pasin yumi mas bihainim. Ol dispela tok i tru em samting i dia tumas long yumi bikos ol i helpim yumi long i go klostu long Krieta bilong yumi. Taim yumi kisim save long ol dispela tok i tru, yumi inap pilim olsem laip bilong yumi i gat as bilong en.

 3. Long sait bilong baim tok i tru, God i no tokim yumi long mekim wanem?

³ Jehova em God i gat pasin bilong givim ol samting. Em i save givim ol gutpela samting long ol man i painim tok i tru. Na tu, Jehova i givim laip bilong Pikinini bilong em olsem presen bilong helpim yumi. God i no inap tokim yumi long givim mani long baim tok i tru. Taim Saimon i laik givim mani long aposel Pita long baim presen bilong oraitim ol man, Pita i krosim em na i tok: “Silva mani bilong yu i ken bagarap wantaim yu, long wanem, yu ting olsem long rot bilong mani yu bai kisim dispela presen i kam long God.” (Apo. 8:20) Olsem na wanem mining bilong dispela tok: “Baim tok i tru”?

 4. Long dispela stadi, yumi bai kisim wanem save long tok i tru?

⁴ Ritim Provep 23:23. Yumi mas wok hat bambai yumi inap painim tok i tru i stap long Baibel. Yumi mas redi long lusim olgeta samting yumi mas lusim. Man bilong raitim Buk Provep i tok, taim yumi “baim” o kisim “tok i tru,” yumi mas was gut bambai yumi no ken “salim” o lusim. Yumi ken stori long rot bilong “baim” tok i tru, na ol samting yumi mas givim olsem pe. Dispela bai kirapim yumi long laikim moa yet tok i tru na bai yumi tingting strong olsem yumi no inap tru long “salim.” Maski yumi mas lusim wanem ol samting bilong kisim tok i tru, hatwok bilong yumi i no inap lus nating.

5, 6. (a) Wanem tok piksa i soim olsem yumi inap baim tok i tru maski em i no samting bilong baim long mani? (b) Tok i tru i helpim yumi olsem wanem?

⁵ Maski wanpela samting i fri, ol man i no inap kisim nating. Tok Hibru ol i tanim olsem “baim” long Provep 23:23 inap makim tu pasin bilong “kisim” samting. Dispela tupela tok wantaim i makim pasin bilong wok hat o senisim wanpela samting bilong kisim narapela samting i gat bikpela pe. Yumi ken mekim dispela tok piksa: Wanpela maket i putim toksave olsem, “Fri Banana.” Yu ting ol dispela banana bai kam ol yet na stap long tebol bilong yumi? Nogat. Yumi yet i mas go long maket long kisim ol dispela banana. Yu ting ol dispela banana i no gat pe? Yes, ol i no gat pe, tasol yumi mas wok hat na lusim sampela haptaim long i go long maket. Olsem tasol, yumi no nidim mani long baim tok i tru. Tasol yumi mas wok hat long kisim tok i tru.

⁶ Ritim Aisaia 55:1-3. Tok bilong Jehova em profet Aisaia i raitim i helpim yumi long kliagut moa long rot bilong baim tok i tru. Tok bilong Jehova i olsem wara, milk, na wain. Wankain olsem kolwara, ol tok i tru bilong God i save givim nupela strong long yumi. Milk i save strongim bodi na helpim ol pikinini long gro, na olsem tasol, ol gutpela tok bilong Jehova i save strongim yumi na helpim yumi long kamap strong long bilip. Bilong wanem Baibel i kolim tok bilong Jehova olsem wain? Wain i save mekim ol man i amamas. (Sng. 104:15) Olsem na taim Jehova i tokim ol manmeri bilong em long “kisim wain,” em i kirapim yumi long luksave olsem sapos yumi bihainim ol tok bilong em, yumi bai stap amamas. (Sng. 19:8) Ol dispela naispela tok i helpim yumi long luksave long ol gutpela samting bai kamap taim yumi kisim save long ol tok i tru bilong God na yumi bihainim! Taim yumi mekim olsem, i olsem yumi givim pe bilong baim tok i tru. Yumi ken skelim 5-pela rot bilong baim tok i tru.

7, 8. (a) Bilong wanem yumi mas lusim sampela haptaim long baim tok i tru? (b) Wanpela sumatin i redi long lusim wanem ol samting olsem pe bilong baim tok i tru? Wanem gutpela samting i kamap?

⁷ Taim. Dispela em samting olgeta man i mas lusim bilong baim tok i tru. Man i mas lusim sampela haptaim bilong putim yau long tok bilong Kingdom, ritim Baibel na ol nius bilong Baibel, mekim stadi bilong em yet long Baibel, na redim ol samting bilong miting na go long miting. Yumi mas “baim” o kisim dispela haptaim long sampela narapela wok we i no bikpela samting. (Ritim Efesus 5:15, 16, na futnot.) Yumi mas lusim hamas haptaim bilong kisim stretpela save long ol bikpela tok bilong Baibel? Sindaun bilong yumi i narapela narapela, olsem na yumi no inap lusim wankain haptaim. I no gat mak bilong save yumi laik kisim long savetingting, pasin, na ol samting Jehova i bin mekim. (Rom 11:33) Fes Wastaua i kolim tok i tru olsem “wanpela liklik plaua” na i tok: “Taim yu kisim pinis wanpela plaua bilong tok i tru, no ken ting dispela tasol em inap long yu. I gat planti plaua bilong tok i tru, olsem na no ken kisim wanpela plaua tasol. Wok yet long kisim planti moa plaua.” Yumi ken askim yumi yet olsem, ‘Mi bungim pinis hamas plaua bilong tok i tru?’ Yumi bai stap laip inap oltaim oltaim, olsem na oltaim save bilong yumi long Jehova bai wok yet long kamap bikpela moa. Long nau, em i bikpela samting long yumi yusim gut taim bilong yumi bambai yumi inap baim planti moa tok i tru. Tingim stori bilong wanpela meri husat i gat bikpela laik long save long tok i tru.

⁸ Marikoa em wanpela yangpela meri long Japan. Em i go skul long New York Siti long Amerika. Em i save go long wanpela lotu we i stat long Japan long yia 1959. Wanpela painia sista i bungim Mariko taim em i go long ol haus na autim tok. Taim Mariko i lainim tok i tru bilong Baibel, em i amamas tru na em i tokim sista long stadi wantaim em 2-pela de long wik. Maski Mariko i gat planti skul wok na em i mekim tu wanpela haptaim wok, kwiktaim em i stat long i go long ol miting. Na tu, em i stop long mekim sampela samting bilong kisim amamas bambai em inap yusim gut taim bilong em long kisim save long tok i tru, olsem na kwiktaim em i kamap strong long bilip. Em i kisim baptais insait long wankain yia em i kirap stadi long en. Sikspela mun bihain, long 2006, em i mekim wok painia na em i mekim yet dispela wok long nau.

9, 10. (a) Taim yumi baim tok i tru, dispela bai mekim wanem long tingting yumi holim long mani kago? (b) Wanpela yangpela meri i lusim wanem ol samting? Em i pilim olsem wanem long ol samting em i lusim?

⁹ Mani kago. Ating yumi holim gutpela wok mani, na yumi mas lusim dispela wok bambai yumi inap baim tok i tru. Pita na Andru em ol man bilong kisim pis, na taim Jisas i tokim ol long kamap “ol man bilong kisim ol manmeri,” tupela i “lusim umben bilong ol” na bihainim em. (Mat. 4:18-20) Ol lain i kisim save long tok i tru long nau, ol i no inap lusim nating wok mani bilong ol. Ol i gat wok em Baibel i tok long ol i mas mekim. (1 Tim. 5:8) Tasol planti taim, ol lain i kisim save long tok i tru i mas senisim tingting ol i holim long mani kago na skelim wanem ol samting i bikpela samting moa. Jisas i tok: “Lusim pasin bilong bungim ol gutpela gutpela samting bilong yupela long graun, . . . Mobeta yupela i bungim ol gutpela gutpela samting bilong yupela long heven.” (Mat. 6:19, 20) Tingim eksampel bilong wanpela yangpela meri.

¹⁰ Taim Maria i liklik yet, em i kirap long pilai golf paslain long em i winim krismas bilong i go long skul. Em i kamap gutpela moa long pilai golf taim em i stap long haiskul, na em i winim skolasip bilong i go long yunivesiti. Em i laikim tru dispela spot, na em i putim mak long kamap savemeri tru bilong pilai golf. Bihain Maria i stadi long Baibel na em i laikim tumas ol tok i tru em i lainim. Em i amamas long ol senis we tok i tru i stiaim em long mekim. Maria i tok: “Taim mi bihainim ol lo bilong Baibel na mekim sampela senis long tingting na wokabaut bilong mi, amamas bilong mi i kamap bikpela moa.” Maria i luksave olsem em i no inap mekim wok bilong Kingdom na bungim mani kago long wankain taim. (Mat. 6:24) Pastaim em i bin putim mak long kamap hapmeri bilong pilai golf na kisim mani kago na biknem, tasol em i sakim dispela laik. Long dispela rot, i olsem em i baim tok i tru. Long nau em i mekim wok painia, na em i tok “mi stap amamas tru na laip bilong mi i gat as tru bilong en.”

11. Taim yumi baim tok i tru, sampela pren na ol wanfamili inap mekim wanem?

¹¹ Ol wanfamili na ol pren. Taim yumi mekim disisen long bihainim ol tok i tru bilong Baibel, sampela senis inap kamap long pasin bilong yumi long pas gut wantaim ol pren na ol wanfamili. Jisas i beten askim God long helpim ol disaipel bilong em, na em i tok: “Mekim ol i kamap holi long rot bilong tok i tru. Tok bilong yu em i tok i tru.” (Jon 17:17) Dispela tok “mekim ol i kamap holi” inap makim pasin bilong i stap narapela kain. Taim yumi kisim save long tok i tru, yumi stap narapela kain long ol manmeri bilong graun bikos yumi no bihainim pasin bilong ol. Ol manmeri i kisim narapela tingting long yumi bikos yumi larim sampela lo i stiaim yumi—em ol lo bilong Baibel. Sampela pren na ol wanfamili inap abrusim yumi o birua long yumi. Yumi no kirap nogut long dispela bikos Jisas i tok: “Tru tumas, ol wanhaus bilong man bai kamap birua bilong em.” (Mat. 10:36) Jisas i tok taim yumi baim tok i tru, ol blesing yumi kisim bai gutpela moa winim ol samting yumi bin lusim.—Ritim Mak 10:28-30.

12. Wanpela man Juda i karim wanem ol hevi bambai em inap kisim save long tok i tru?

¹² Aaron em wanpela bisnisman na em i bilong lain Juda. Taim em i yangpela yet, em i kisim skul olsem i tambu long kolim nem bilong God. Tasol Aaron i gat bikpela laik long save long tok i tru. Em i amamas tru taim wanpela Witnes i soim em olsem i gat rot bilong putim ol narapela leta namel long 4-pela leta Hibru na kolim nem bilong God olsem “Jehova.” Em i amamas tru, olsem na em i go long sinagog long tokim ol tisa bilong lotu long nupela save em i kisim. Aaron i kirap nogut long pasin ol i mekim. Ol i no pilim amamas bilong em long kisim save long nem bilong God, nogat, ol i spetim em na rabisim em. Famili bilong em i birua long em. Tasol Aaron i no surik, nogat. Em i lusim sampela samting bambai em inap baim tok i tru, na em i stap strongpela Witnes Bilong Jehova long laip olgeta bilong em. Olsem Aaron, sapos yumi laik bihainim tok i tru, yumi mas redi long karim hevi taim ol pren na ol wanfamili i birua long yumi.

13, 14. Yumi mas mekim wanem ol senis long tingting na pasin bilong yumi bambai yumi inap baim tok i tru? Stori long wanpela ekspiriens.

¹³ Tingting na pasin i no stret. Sapos yumi laik kisim tok i tru na bihainim ol stretpela lo bilong Baibel, yumi mas redi long mekim sampela senis long tingting na pasin bilong yumi. Tingim tok Pita i mekim: “Yupela i stap olsem pikinini bilong harim tok, olsem na no ken bihainim moa ol laik em yupela i bin i gat long bipo taim yupela i no bin save long God . . . yupela i mas kamap holi long olgeta wokabaut bilong yupela.” (1 Pita 1:14, 15) Korin em wanpela siti we i pulap tru long pasin nogut, olsem na ol manmeri i mas mekim bikpela senis long laip bilong ol bambai ol i ken baim tok i tru. (1 Kor. 6:9-11) Olsem tasol, ol manmeri long nau i mas givim baksait long ol pasin nogut bambai ol inap baim tok i tru. Pita i tok moa long ol Kristen long taim bilong em olsem: “Yupela i wokabaut inap pinis long pasin bilong ol manmeri bilong graun, em ol pasin olsem, pasin bikhet na i no sem, na i no bosim liklik olgeta kain laik bilong bodi, dring planti tumas strongpela dring, mekim ol pati i gat planti pairap, pasin bilong dring spak, na ol pasin nogut tru bilong lotuim ol imis.”—1 Pita 4:3.

¹⁴ Inap planti yia, Devynn na Jasmine i save dring spak. Devynn em saveman bilong mekim wok akaunten, tasol pasin bilong dring spak i mekim na em i no inap holim wok mani. Jasmine i gat pasin bilong belhat na kros pait. Wanpela taim Jasmine i spak na wokabaut long strit na em i bungim 2-pela Witnes em ol i misineri. Tupela i pasim tok wantaim Jasmine long mekim Baibel stadi, tasol taim ol i go long haus bilong Devynn long wik antap, ol i lukim olsem Jasmine na Devynn i spak. Tupela i ting olsem ol dispela misineri i no inap tingim ol na go long haus bilong ol. Jasmine na Devynn i pilim nogut tru, olsem na taim ol misineri i go bek gen long lukim ol, tupela i redi na wet i stap. Kirap long fes stadi, Jasmine na Devynn i givim bel tru long stadi long Baibel na ol i bihainim ol tok ol i lainim. Insait long 3-pela mun, tupela i lusim pasin bilong dring alkohol na tupela i stretim marit. Ol wanples bilong ol i luksave long ol senis tupela i mekim, na dispela i kirapim planti bilong ol long stadi long Baibel.

15. Planti man i pilim hatwok tumas long lusim wanem samting taim ol i laik baim tok i tru? Bilong wanem?

¹⁵ Ol kastam na ol pasin em Baibel i tambuim. Taim ol man i laik baim tok i tru, planti bilong ol i save pilim hatwok tumas long lusim ol kastam na ol pasin em Baibel i tambuim. Sampela man i redi long bihainim tok bilong Baibel na lusim ol dispela kastam na pasin. Tasol sampela inap surik long mekim olsem bikos ol wanfamili, ol wanwok, na ol gutpela pren i putim presa long ol. Man inap pilim bikpela sore taim wanblut i dai, olsem na em inap pilim hatwok tru long lusim ol kastam bilong onarim ol wanblut i dai pinis. (Lo 14:1) Taim yumi tingim eksampel bilong ol narapela husat i bin strongim bel na lusim ol kain kastam olsem, dispela inap strongim yumi tu long mekim olsem. Tingim eksampel bilong ol manmeri long taun Efesus bilong bipo.

16. Sampela long Efesus i mekim wanem bambai ol inap baim tok i tru?

¹⁶ Taun Efesus i gat nem long kain kain wok mejik. Ol manmeri husat i kamap Kristen, pastaim ol i bin mekim wok mejik. Ol i mekim wanem bilong lusim ol dispela pasin na baim tok i tru? Baibel i tok: “Planti bilong ol husat i save wokim ol kain kain marila posin samting, ol i karim ol buk bilong ol i kam na kukim long ai bilong olgeta manmeri. Ol i kaunim pe bilong ol dispela buk na em inap olsem 50,000 mani silva. Olsem na tok bilong Jehova i wok long i go bikpela na i win.” (Apo. 19:19, 20) Ol Kristen i lusim ol dispela samting i gat bikpela pe na ol i kisim ol gutpela blesing tru.

17. (a) Yumi mas lusim wanem ol samting bambai yumi inap baim tok i tru? (b) Yumi bai skelim wanem ol askim long neks stadi?

¹⁷ Yu yet i bin lusim wanem samting bilong baim tok i tru? Long wankain pasin olsem yumi lusim sampela haptaim long bungim ol plaua, yumi lusim sampela haptaim long bungim ol tok i tru. Sampela i lusim pasin bilong bungim planti mani kago na ol i karim hevi taim ol pren na ol wanfamili i no laik pas gut moa wantaim ol. Planti i mas mekim sampela senis long tingting na pasin bilong ol, na lusim ol kastam na ol pasin em Baibel i tambuim. Maski yumi lusim wanem ol samting, yumi bilip tru olsem tok i tru bilong Baibel i winim tru ol samting yumi bin lusim. Tok i tru bilong Baibel i opim rot long yumi inap kisim wanpela samting we i dia tumas—yumi inap pas gut wantaim Jehova. Taim yumi tingim tingim ol blesing yumi kisim long rot bilong tok i tru, yumi bai no laik tru long salim tok i tru na ol narapela i baim. Olsem wanem yumi inap salim tok i tru? Olsem wanem yumi inap holimpas tok i tru? Yumi bai skelim ol dispela askim long neks stadi.