Nupela Taim Bai Kamap na i No Gat Pen na Hevi Moa

“Ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.”​—Aisaia 65:​17, 18.

SPIRIT bilong God i kamapim dispela tok profet inap olsem 2,500 yia i go pinis. Dispela tok i stori long i stap bilong ol man long nupela taim bihain. Long wanem taim? Taim God i pinisim pasin nogut bilong dispela taim long nau. Planti tok profet i kamapim klia laik bilong God long rausim pasin nogut bilong dispela graun long nau na kamapim nupela taim na bai i no gat pen moa.

I stap bilong ol man bai i narapela kain tru long nupela taim, i winim tru bilong bipo! Tok profet bilong God i tok, bai i no gat pait na pasin nogut, na ol man bai ol i no stap rabis moa, na i no gat narapela i rongim narapela. Ol hatpela gavman, na ol bikpela bisnis olsem kampani bai ol tu i no stap moa. Krai bilong amamas i kisim ples bilong krai bilong bel hevi, long wanem, pasin nogut na ol hevi i pinis olgeta.

Baibel i Tok Profet Bipotaim

Lukim ol samting Baibel i tok profet bai i kamap:

No Gat Pait: “Em i save mekim i dai pait long olgeta hap bilong graun.” (Buk Song 46:9) “Na olgeta lain manmeri bai i no ken pait moa, na bai ol i no skul moa long pait.”​—Aisaia 2:4.

Stretpela Kot Bilong Olgeta Manmeri: “Bai mi mekim stretpela pasin i stap olsem skel bilong skelim pasin bilong yupela, na tok tru bai i stap olsem skel bilong skelim ol tok bilong yupela.”​—Aisaia 28:17.

No Gat Pret Moa: “Na olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” (Maika 4:4) “Na bai ol i stap gut long graun bilong ol yet.”​—Esekiel 34:27.

No Gat Hangre: “Planti rais na wit samting i ken kamap long ol gaden bilong ol manmeri, inap olsem i save kamap long Lebanon.” (Buk Song 72:16) “Ol diwai i save karim kaikai, bai ol i karim planti moa. Na planti kaikai bai i kamap long ol gaden.”​—Esekiel 34:​27.

No Gat Sik o Lapun: “Bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.” (Jop 33:25) “Na long dispela taim, i no gat man . . . bai i tok olsem, ‘Mi gat sik.’ ”​—Aisaia 33:24.

Indai, na Bel Hevi, na Pen i Pinis Olgeta: “[God] bai i mekim drai wara i stap long ai bilong olgeta. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—Kamapim Tok Hait 21:4.

Ol i No Ken Tingim Moa Ol Hevi Bilong Bipo

I no inap wanpela samting i ken bagarapim gutpela sindaun bilong ol manmeri God bai kamapim long nupela taim. Long olgeta wan wan de bai i gat planti gutpela tingting bilong strongim ol na planti gutpela samting bai ol i lain long en, olsem na ol i no tingim moa ol hevi i bin painim ol long bipo. God i tok promis olsem: “Ol man bai i no inap tingim moa ol samting i bin kamap bipo.” Olgeta manmeri bai i “amamas oltaim” long ol samting God i mekim long olgeta hap bilong graun. “Nau olgeta hap graun i ken i stap bel isi gen, na olgeta manmeri i ken singaut amamas.”​—Aisaia 65:​17, 18; 14:7.

Olsem Baibel i tok, long nau “sapos man i ting long kisim wanpela samting na i wet nating longpela taim, bai em i bel hevi moa yet.” Tasol dispela samting bai i narapela kain long nupela taim: “Sapos em i kisim dispela samting, orait em bai i ting laip bilong en i gutpela tru na em i amamas moa yet.” (Sindaun 13:12) Bai i no gat pen moa o wanpela samting yu tingting long kisim na i no kamap na i mekim yu bel hevi. Nogat. I stap bilong yu bai gutpela tru na bai yu stap bel gut na amamas, long wanem, i gat planti gutpela samting God i givim long olgeta manmeri.

Nupela Gavman

I gat nupela kain gavman bai bosim graun long nupela taim, na i no gavman bilong ol man nau ol i bosim graun na ol i no inap kamapim wanpela gutpela samting. God bai pinisim strong bilong ol dispela gavman na ol i no inap bosim gen ol man.

Baibel i tok profet olsem: “Na taim ol dispela king [ol gavman nau ol i stap na bosim graun] i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king, na kingdom bilong en bai i stap oltaim.”​—Daniel 2:44.

Jisas i lainim ol aposel long dispela kingdom taim em i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”​—Matyu 6:10.

Dispela em i nupela gavman bilong bosim ol manmeri​—God bai bosim long heven long rot bilong dispela Kingdom i stap long han bilong Krais. Ol gutpela wokboi bilong God long graun bai lukautim ol samting bilong em long graun na ol bai bihainim rot God i soim long ol. (Aisaia 32:1) Aposel Pita i stori long dispela samting olsem: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Dispela Kingdom em i nambawan tok bilong Baibel.

‘Olgeta Samting Bai Stap Gutpela Tru’

Dispela nupela gavman bai bosim gut graun, olsem na ol samting olsem guria, na bikpela win, na taitwara, na bikpela san, bai ol i no inap kamap na bagarapim ol samting. Jisas i kamapim klia strong bilong em long taim em i stap long graun. Wanpela taim em wantaim ol disaipel ol i kalap long bot na bikpela win tru i kirap na si i laik kapsaitim bot, na Jisas i mekim isi bikpela win na si. Ol disaipel i kirap nogut na ol i tok: “Dispela em i wanem kain man, na win wantaim wara i harim tok bilong em?”​—Matyu 8:​23-27.

Olsem na graun wantaim ol manmeri i stap long en, bai i stap gutpela tru. “Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God. Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.”​—Rom 8:​21, 22.

Olsem wanem? Yumi ken bilip tru olsem wok bos bilong ol man bai i pinis na nupela gavman bilong God bai bosim graun? Yumi ken bilip tru long dispela, long wanem Bikpela King bilong heven na graun i tok promis pinis: “Sapos mi laik mekim wanpela samting, orait mi save mekim tasol. Na i no gat wanpela samting inap pasim mi long mekim . . . Mi tok pinis long mekim dispela ol samting, na bai mi mekim ol i kamap olsem mi tok. Ol samting mi makim pinis bilong mekim, em bai mi mekim.”​—Aisaia 46:​10, 11.

Taim God i Makim

Dispela samting bai kamap olsem wanem? Wanem taim em bai kamap? Baibel i tok: “Olgeta samting i kamap long dispela graun, i save kamap long taim bilong em yet.” (Saveman 3:1) Tu, dispela i makim taim bilong God long tok “em inap!” na em bai pinisim pasin nogut na pen na hevi. Daniel i bin tok long “taim God i makim pinis bilong las de.” (Daniel 8:19) Jisas tu i stori long “taim God i makim pinis bilong las de.”​—Mak 13:​32, 33.

Yes, God i makim pinis wanpela de bilong stretim ol samting bilong ol man, na pinisim olgeta pasin nogut, na ol gavman ol i save laik long bosim ol man na ol i sakim God. “Long taim God i kotim ol manmeri, em bai i makim taim bilong skelim olgeta pasin bilong ol stretpela man na bilong ol man nogut.” (Saveman 3:17) God i larim hevi na pen i stap inap longtaim pinis na dispela taim em i laik pinis nau, olsem Baibel i tok profet long en. God bai bagarapim olgeta dispela gavman bilong ol man ol i stap bos inap planti tausen yia na ol i no kamapim wanpela gutpela samting, tasol ol i givim planti pen na hevi long ol manmeri.​—Matyu 24:​3-14; 2 Timoti 3:​1-5, 13; Kamapim Tok Hait 19:​11-21.

Taim God i kamapim kot bilong em long ol man, wanem samting bai painim ol man i daun long wok king bilong em, na wanem samting bai painim ol man i sakim wok king bilong em? Baibel i tok: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.” “Tasol ol pikinini bilong ol man nogut bai i bagarap tru. Ol stretpela man bai i kisim graun God i givim ol, na bai ol i stap oltaim long en.” “Lukim stretpela man. Man i save sindaun isi wantaim ol arapela manmeri, lain bilong en bai i stap oltaim. Tasol Bikpela i save bagarapim tru ol man bilong mekim sin.”​—Buk Song 37:​10, 11, 28, 29, 37, 38; lukim Sindaun 2:​21, 22; Matyu 5:5.

Tasol olsem wanem long planti tausen milion manmeri i dai pinis? Olsem wanem ol inap kisim ol gutpela samting long nupela taim? Bai ol i kirap bek, na bai ol inap kisim laip hia long graun. Ol bai lusim matmat na kam ausait na ol i gat rot long kisim laip i stap oltaim. Baibel i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Jisas i soim dispela samting taim em i kirapim bek sampela man i dai pinis, olsem Lasarus na pikinini bilong meri Nain, em man bilong em i dai pinis.​—Jon 11:​38-44; Luk 7:​11-16.

Gutpela “Bekim”

Taim yu kisim save long laik bilong God long pinisim ol pen na hevi na kamapim stretpela pasin long graun, dispela i ken mekim gut bel bilong yu! Tingim yu yet​—yu inap i stap planti milion yia​—yes, bai yu inap i stap oltaim oltaim. Bai yu gat gutpela skin, na bai yu stap amamas tru long paradais, na pasin nogut na ol kain hevi na pen bai i olsem ol samting bilong bipo tasol!

Yu amamas long dispela gutpela ‘pe bilong bekim long man’ em God bai i givim long ol man long graun​—bilong i stap oltaim oltaim? Dispela i winim tru dispela sampela tausen yia em i larim pasin nogut na hevi i stap! Na tu em i winim tru dispela sotpela taim olsem 70 o 80 krismas em yumi ol man i stap laip na yumi karim pen na hevi na bihain dai i painim yumi.

Bipo Yet Em i Tingim

Em bikpela samting long Man bilong wokim yumi i tingim ol samting em i mas stretim, olsem em i mas stretim bek nem bilong em, i stret em i mas i stap King na bosim olgeta samting long heven na long graun. Em i bin givim rot long ol man long tingim wanem rot ol i laik bihainim. Tasol pasin bilong ol man long mekim nabaut long dispela samting na ol i laik bosim wokabaut bilong ol yet, em narapela bikpela samting em i mas stretim. Olgeta samting em i wokim i gutpela olgeta, olsem na em i mas kamapim long ples klia olsem ol man inap givim bel long aninit long em na bihainim ol stretpela lo bilong em long taim traim na hevi i painim ol long han bilong ol birua bosman bilong dispela graun. Jisas yet em i stap gutpela piksa bilong dispela samting taim em i stap long graun.

Taim God i stretim pinis olgeta samting, bai em i no larim pasin nogut i kamap gen na bagarapim gutpela sindaun bilong ol manmeri. Baibel i tok: “I no gat wanpela man inap bikhet long em tupela taim. Nogat tru.”​—Nahum 1:9.

Olsem na long olgeta taim bihain, long wanem kain taim, o ples, olsem long heven o long graun, sapos wanpela i gat tok long wok king bilong God o em i mekim ol samting long laik bilong em yet, bai God i givim strafe long em.

Yu Laikim Wanem Kain Sindaun?

I gat tupela rot yu ken bihainim. Yu mas makim wanpela long dispela tupela rot: Yu ken sakim ol laik bilong God, na amamas long i stap aninit long ol gavman bilong dispela graun, na ol samting bai painim ol em bai painim yu tu. Na narapela rot em i olsem: Yu ken kisim save long laik bilong God na ol samting yu mas mekim bambai yu ken givim bel tru long i stap aninit long Kingdom bilong em, na bai em i ken amamas long yu.

Jisas i beten long God na i tok: “Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Olsem na sapos yumi laik i stap long nupela taim, orait nau yumi mas wok strong long kisim save long God, na long laik bilong em, na ol samting em i laik bai yumi mas mekim. Baibel i tok: “Sapos yupela i wok long painim em, orait bai yupela inap i kam klostu long em. Tasol sapos yupela i givim baksait long em, orait bai em i givim baksait long yupela.”​—2 Stori 15:2.

Taim bilong dispela olpela pasin bilong graun i wok long pinis na nupela pasin i wok long kam klostu tru, olsem Baibel i tok: “Na dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jon 2:17) Yu laik i stap long wanem kain taim​—dispela olpela pasin nau em i laik pinis o nupela taim klostu i laik kamap nau?

Baibel i tok: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim.”​—Lo 30:​19, 20.

Olsem wanem? Yu laik kisim ol dispela gutpela samting God i redim i stap bilong ol manmeri ol i bihainim laik bilong em? Ol lain i wokim dispela magasin o ol Witnes Bilong Jehova ol i stap long olgeta hap, bai ol i amamas long helpim yu long kisim save long ol dispela samting, na i no gat pe long en.

[Rait long pes 12]

Ol man i dai pinis bai kirap bek na ol inap i stap long nupela taim God bai kamapim