Strafe Bilong Jehova Long Ol Tisa Giaman
“Mi lukim ol profet bilong Jerusalem i mekim stingpela pasin tru. Ol i bihainim pasin bilong brukim marit na pasin bilong giaman. . . . Mi lukim olgeta Jerusalem i manmeri nogut olsem ol Sodom na ol Gomora.”—JEREMAIA 23:14.
1. Sapos ol man i skulim ol narapela long tok bilong God, bilong wanem ol i gat bikpela wok tru?
OL MAN i skulim ol narapela long tok bilong God ol i gat bikpela wok long dispela. Jems 3:1 i tok, “nogut planti man namel long yupela i kisim wok bilong skulim ol manmeri long pasin God i laikim. Long wanem, taim God i skelim pasin bilong ol manmeri, em bai i glasim gut tru wok bilong yumi ol man i gat wok bilong skulim ol manmeri.” Yes ol man i skulim ol narapela long Tok bilong God ol i gat bikpela wok moa winim ol narapela Kristen, long wanem, God bai skelim wok bilong ol. Orait, olsem wanem long ol tisa giaman, em ol i skulim ol man long ol tok giaman? Ol samting i bin kamap long taim bilong Jeremaia i makim ol samting bai painim ol.
2, 3. Long rot bilong Jeremaia Jehova i bin tok wanem long ol tisa giaman i bin stap long Jerusalem?
2 Long yia 647 paslain long Krais, em namba 13 yia bilong Josaia i stap king long Juda, God i givim wok long Jeremaia olsem profet bilong em. Jehova i gat tok long ol Juda. Olsem na em i salim Jeremaia i go autim tok bilong em long ol. Ol profet giaman o tisa giaman long Jerusalem “i mekim stingpela pasin tru” long ai bilong God. God i tok, pasin bilong Jerusalem na Juda i moa nogut, winim Sodom na Gomora. Jeremaia sapta 23 i stori long dispela long Jer 23 ves 14 olsem:
3 “Mi lukim ol profet bilong Jerusalem i mekim stingpela pasin tru. Ol i bihainim pasin bilong brukim marit na pasin bilong giaman. Ol i save strongim ol man bilong mekim pasin nogut. Olsem na i no gat wanpela man i givim baksait long ol dispela kain pasin. Mi lukim olgeta Jerusalem i manmeri nogut olsem ol Sodom na ol Gomora.”
4. Wanem pasin nogut bilong ol tisa long Jerusalem i stap nau long ol lotu ol i holim nating nem Kristen?
4 Ol dispela profet o tisa long taim bilong Jeremaia i mekim pasin nogut tru na dispela i strongim ol narapela long mekim pasin nogut. Na i wankain long ol misin long nau ol i holim nating nem Kristen! Ol i larim ol pamukman na ol man bilong mekim pasin Sodom ol i holim wok pris na pasto na mekim lotu. Olsem na yumi no ken kirap nogut taim yumi lukim lain bilong ol misin ol tu i mekim ol pasin nogut.
5. Bilong wanem yumi ken tok, pasin nogut bilong ol lotu i holim nating nem Kristen i winim pasin nogut bilong Sodom na Gomora?
5 Jehova i tok, ol man i stap long Jerusalem i kain olsem ol Sodom na Gomora. Tasol pasin nogut bilong ol misin long nau i winim tru pasin nogut bilong Sodom na Gomora. Ol i gat bikpela asua moa long ai bilong Jehova. Ol pris pasto i sakim ol lo bilong em na dispela i kamapim pasin nogut long graun na i gat planti samting bilong pulim ol manmeri long mekim olgeta kain pasin nogut. Long nau planti man i ting i no gat rong long ol pasin nogut, long wanem, planti manmeri long olgeta hap i mekim.
‘Ol i Bihainim Pasin Bilong Giaman’
6. Jeremaia i tok wanem long ol pasin nogut bilong ol profet bilong Jerusalem?
6 Orait, lukim gen Jer 23 ves 14, em i tok ol profet long Jerusalem i mekim “pasin bilong giaman,” na namba 2 hap bilong Jer 23 ves 15 i tok, “ol profet i bihainim pasin haiden na nau dispela pasin i inapim olgeta hap bilong graun.” Na Jer 23 ves 16 i tok: “Bikpela I Gat Olgeta Strong i tokim ol Jerusalem olsem, ‘Yupela i no ken harim tok ol profet i autim long yupela. Ol i giamanim yupela na i tok bai yupela i stap gut. Ol i save autim driman i bin kamap long tingting bilong ol yet. Mi no bin givim dispela tok long ol.’ ”
7, 8. Olsem wanem ol pris pasto bilong ol misin i wankain olsem ol profet giaman bilong Jerusalem? Dispela i mekim wanem long ol man i go lotu?
7 Ol pris pasto bilong ol misin long nau i mekim wankain pasin giaman—ol i autim ol tok giaman i no tok bilong God long Baibel, olsem tok bilong God Triwan, na pegatori, na ol i tok yumi gat tewel, na ol man nogut i kisim pen oltaim oltaim long bikpaia. Na ol i autim ol tok em yau bilong ol man i skrap long harim. Ol i tok, hevi i no ken painim ol, long wanem, ol i stap gut long ai bilong God. Ol i “autim driman i kamap long tingting bilong ol yet” na giamanim ol manmeri. Ol man i bilipim tok giaman bilong ol, i olsem ol i ‘kaikai marasin nogut’ em inap bagarapim ol long ol samting bilong spirit. Ol i giamanim ol i go na bihain bai ol i bagarap!
8 Lukim tok Jehova i mekim long ol dispela tisa i skulim ol man long ol tok giaman. Long Jer 23 ves 21 em i tok: “Mi no bin salim ol dispela profet, tasol ol i save hariap i go autim tok. Mi no bin givim tok long ol, tasol ol i save autim tok profet.” God i no bin salim ol pris pasto; ol i no autim ol tok tru bilong em. Olsem na ol man i go long lotu i no save long ol tok i tru bilong Baibel; ol pris pasto i bin skulim ol long ol tok nating bilong ol man.
9, 10. (a) Ol tisa giaman long Jerusalem i bin autim wanem kain driman? (b) Ol pris pasto long nau i autim wanem kain “giaman driman”?
9 Na ol pris pasto long nau i kirapim ol man long bilip long samting i no inap helpim ol. Lukim Jer 23 ves 25. God i tok: “Mi harim pinis tok giaman ol dispela profet i save autim long nem bilong mi. Ol i save tok olsem, ‘Mi bin lukim driman. Mi bin lukim driman.’ ” Em wanem kain driman? Long Jer 23 ves 32, God i tok: “Mi birua long ol dispela profet i kisim tok bilong ol giaman driman bilong ol na ol i autim long ol manmeri olsem tok mi bin givim ol. Ol i save autim kain kain tok giaman, na dispela i save pulim ol manmeri i go longwe long mi. Mi no bin salim ol na mi no bin givim wok long ol. Olsem na ol i no save helpim dispela lain manmeri.”
10 Ol pris pasto i bin autim wanem ol driman giaman? Ol i bin kirapim ol man long bilip long wanem samting i no inap helpim ol tru? Ol i tok, Yunaitet Nesen tasol inap kamapim gutaim. Ol i tok, “i no gat narapela samting inap helpim ol man long i stap wanbel na bel isi,” na ol i tok, Yunaitet Nesen em “nambawan samting bilong stretim tok na kamapim gutaim na stretpela pasin,” na em i “nambawan samting long graun bilong kamapim gutaim long olgeta hap.” Ol i giaman tru! I gat wanpela samting tasol em inap stretim ol hevi na helpim tru ol man, em Kingdom bilong God. Tasol ol pris pasto i no skulim ol man long ol tok i tru bilong dispela gavman bilong heven.
11. (a) Ol profet giaman long Jerusalem i bin mekim wanem long nem bilong God? (b) Lain remnan i mekim wanem long dispela nem holi, tasol ol tisa giaman bilong nau i bin mekim wanem long en?
11 Jer 23 Ves 27 i tok: “Ol i save tokim ol yet long ol driman bilong ol na ol i ting dispela bai i mekim ol manmeri bilong mi i lusim tingting long [nem bilong] mi, olsem bipo ol tumbuna bilong ol i bin lotu long god Bal na lusim tingting long mi.” Ol profet giaman long Jerusalem i mekim na ol manmeri i lusim tingting long nem bilong God. Olsem wanem? Ol tisa giaman long nau i bin mekim wankain pasin? Ol i nogut moa, long wanem, ol i haitim nem bilong God, em Jehova. Ol i tok yumi no gat wok long kolim dispela nem, na ol i rausim long Baibel. Na ol i birua long ol man i skulim ol narapela olsem Jehova em nem bilong God. Tasol lain remnan, em ol i mekim wankain wok olsem Jeremaia, na ol poroman bilong ol i mekim wok olsem Jisas i bin mekim. Ol i skulim planti milion manmeri long nem bilong God.—Jon 17:6.
Ol i Kamapim Klia Rong Bilong Ol
12. (a) Bilong wanem ol tisa giaman i gat asua long blut? (b) Ol pris pasto i bin mekim wanem long taim bilong Namba Wan na Namba 2 Pait?
12 Lain remnan, em liklik hap lain bilong ol Kristen em God i makim long spirit holi, ol i bin mekim wok wankain olsem Jeremaia. Planti taim ol i kamapim klia olsem ol pris pasto i tisa giaman na ol i bringim lain bilong ol misin i go long rot bilong bagarap. Tru tumas, lain remnan i bin tokaut klia long ol samting ol dispela man bilong driman i bin mekim na i olsem as na strafe bilong God i mas painim ol. Planti taim ol wokboi bilong Jehova i bin kolim tok bilong Kamapim Tok Hait 18:24 i tok, Bikpela Babilon “i gat asua bilong kilim i dai . . . olgeta man bilong graun ol birua i bin kilim ol i dai.” Tingim ol bikpela pait i bin kamap, long wanem, narapela lotu i birua long narapela lotu. Tru tumas, ol dispela tisa bilong lotu i bin skulim ol man long ol tok giaman na ol i gat bikpela asua long blut bilong ol man! Tok bilong ol i bin kirapim ol man long birua long ol man bilong narapela lotu o narapela lain. Wanpela buk (Preachers Present Arms) i stori long Namba Wan Pait Bilong Olgeta Hap na i tok: “Ol pris pasto i bin givim tingting long ol man olsem em i pait bilong God na dispela i kirapim ol long givim bel long pait . . . olsem na ol misin i helpim tru dispela pait.” Na i wankain tu long Namba 2 Pait Bilong Olgeta Hap. Ol pris pasto i helpim tru ol lain i pait na givim blesing long ol ami bilong ol. Dispela tupela bikpela pait i bin kirap insait long ol lain i holim nating nem Kristen, na ol i kilim i dai ol wanlotu bilong ol bilong ol narapela kantri. Inap long nau ol kantri na misin i holim nating nem Kristen ol i kapsaitim blut bilong ol man. Tok giaman ol pris pasto i bin skulim ol man long en i kamapim dispela pasin nogut tru!
13. Jeremaia 23:22 i tok wanem na yumi save ol pris pasto bilong ol misin i no stap klostu long Jehova?
13 Lukim Jeremaia sapta 23, ves 22: “Sapos ol i bin stap long kibung bilong mi, ating ol inap i go autim tok tru bilong mi long ol manmeri bilong mi. Na ating dispela tok inap mekim ol manmeri i lusim rot nogut . . . na ol i lusim ol pasin nogut.” Sapos ol profet bilong ol lotu i holim nating nem Kristen i stap long kibung bilong God, olsem stap klostu long em olsem wanpela gutpela wokboi, bai ol tu inap bihainim ol lo bilong God na autim tok tru bilong God long olgeta lain Kristen. Tasol nogat, ol dispela tisa giaman bilong nau i mekim na lain bilong ol i kamap olsem wokboi bilong Satan, dispela Birua bilong God.
14. Long 1958 wanem samting i bin kamapim long ples klia pasin nogut bilong ol pris pasto?
14 Lain remnan i bin wok strong long tokaut klia long pasin nogut bilong ol misin. Olsem: Long yia 1958 ol Witnes Bilong Jehova i mekim Laik Bilong God Kibung Intenesenel long Nu Yok, na long dispela kibung, nambatu presiden bilong Sosaiti Was Taua i mekim tok olsem: “Mipela i tokaut klia olsem olgeta pasin raskol, na pasin bikhet, na birua, na pait, na tingting nogut . . . em lotu giaman i as bilong en, na . . . Satan, em i as bilong dispela. Ol tisa na hetman bilong lotu i gat bikpela asua long pasin nogut nau i stap long graun; na bikpela asua tru i stap long ol pris pasto bilong ol misin i holim nating nem Kristen. . . . Namba Wan Pait i pinis na inap long nau ol dispela misin i stap nogut long ai bilong God wankain olsem ol Israel long taim bilong Jeremaia. Tru tumas, bikpela bagarap tru i laik painim ol dispela Kristen giaman, i winim bagarap i bin painim Jerusalem long taim bilong Jeremaia.”
Ol Tisa Giaman i Kot
15. Ol pris pasto i bin mekim wanem tok profet? Em bai kamap tru?
15 Ol i bin autim dispela toksave, tasol ol pris pasto i mekim wanem? Ol i mekim olsem Jer 23 ves 17 i tok: “Ol manmeri i save sakim tok bilong mi na ol profet i tokim ol olsem, ‘Bai yupela i gat gutpela sindaun.’ . . . ‘Samting nogut i no ken kamap long yupela.’ ” Tasol ol i giaman! Jehova bai kamapim klia olsem tok profet bilong ol i giaman tasol. Em i no ken truim ol tok profet ol i autim long nem bilong em. Tasol tok bilong ol i giamanim tru ol manmeri na ol i ting ol i stap gut wantaim God!
16. (a) Wanem kain pasin i stap nau long dispela graun, na husat i gat hap asua long dispela? (b) Ol lain i mekim wok olsem Jeremaia i helpim yumi olsem wanem?
16 Ating yu ting olsem: ‘Tok bilong ol i no ken giamanim mi!’ Tasol yu mas was gut! Ol tok giaman bilong ol i bin kamapim pasin nogut tru long graun. Ol i orait long kain kain pasin, maski em i pasin sem nogut tru. Nau ol dispela kain tingting na pasin nogut i kamap insait long olgeta samting bilong amamas, olsem long ol piksa wokabaut, na long televisen, na ol nius, na long musik na singsing. Olsem na yu mas was gut tru, nogut dispela i paulim tingting na pasin bilong yu. Ol yangpela i mas was gut long ol video nogut na musik nogut. Long nau ol man i orait long kain kain pasin nogut na ol i ting i no gat rong long en. As bilong dispela em olsem: Ol pris pasto i bin skulim ol long ol tok giaman na ol i no bin kamapim ol stretpela lo bilong God long ol. Lain remnan i olsem Jeremaia na ol i wok strong long helpim yumi long sakim ol dispela kain tingting na pasin nogut i pulap long ol misin i holim nating nem Kristen.
17. (a) Olsem Jeremaia i bin tok, wanem samting bai painim Jerusalem? (b) Klostu nau, wanem samting bai painim ol misin?
17 Jehova em bikpela Jas na em bai givim wanem strafe long ol dispela tisa giaman bilong ol misin i holim nating nem Kristen? Jer 23 Ves 19, 20, 39, 40 i bekim tok olsem: “Belhat bilong Bikpela bai i kamap long ol man nogut olsem strongpela win na ren i kamap long ol . . . Bikpela bai i belhat i stap inap em i pinisim tru olgeta samting em i bin tingting long mekim. . . . Olsem na tru tumas, bai mi kisim yupela na tromoi yupela i go longwe long mi. Mi bai mekim olsem long yupela na long dispela taun mi bin givim long ol tumbuna bilong yupela na long yupela yet. Mi bai mekim yupela i sem nogut tru, na dispela sem bai i stap oltaim oltaim, na bai yupela i no inap lusim tingting long en.” Dispela olgeta samting i bin kamap long Jerusalem nogut bilong bipo na haus lotu bilong en, na klostu nau bai wankain bagarap i painim ol misin i holim nating nem Kristen, em ol i mekim pasin nogut!
‘Tok Bilong Jehova i Hevi Tru’
18, 19. Jeremaia i autim wanem “tok i hevi” long ol Juda? Na ol man i ting wanem long dispela tok?
18 Orait, lain remnan na lain poroman bilong ol i gat wanem wok ol i mas mekim? Jer 23 Ves 33 i tok: “Sapos ol manmeri o wanpela profet o wanpela pris i kam askim yu olsem, ‘Bikpela i gat sampela tok i hevi, o nogat?’, orait yu mas autim dispela tok bilong mi long en. ‘Mi Bikpela, mi gat tok long yupela. Yupela i givim hevi long mi. Olsem na bai mi rausim yupela.’ ”
19 Hap tok Hibru yumi tanim olsem “hevi” i gat narapela insait bilong en. Dispela tok inap makim strongpela tok bilong God o samting i givim hevi long man. Tok bilong Jehova em Jeremaia i autim em strongpela tok bilong God i givim hevi long ol man—Jeremaia i tokaut olsem Jerusalem i mas bagarap. Yu ting ol manmeri bilong Jerusalem i amamas long harim dispela tok profet? Ol i no amamas. Ol i tok bilas long Jeremaia na i tok, ‘Yu gat wanem tok profet moa bilong givim hevi long mipela?’ Tasol Jehova i tok: “Yupela i givim hevi long mi. Olsem na bai mi rausim yupela.” Tru tumas, dispela lain i givim hevi long Jehova na em i laik rausim ol.
20. Long nau wanem tok “i hevi tru”?
20 Orait, i gat wanem ‘tok bilong Jehova i hevi tru’ em yumi mas autim long nau? Yumi mas autim strongpela tok bilong God i stap long Baibel. Dispela tok “i hevi tru,” long wanem, em i tokaut olsem klostu nau bai bagarap i painim ol misin i holim nating nem Kristen. Lain bilong Jehova i gat bikpela wok—yumi mas autim dispela ‘tok bilong Jehova em i hevi tru.’ Las de i klostu na yumi mas tokim ol dispela misin i bin lusim rot, ol i olsem wanpela “hevi”—ol i “givim hevi” long God Jehova, na i no longtaim bai em i rausim dispela “hevi.” Bagarap bai painim ol.
21 Long taim bilong Jeremaia, strafe bilong Jehova i bin painim Jerusalem long taim ol Babilon i bagarapim dispela taun long yia 607 paslain long Krais. Ol tok profet i tok, long dispela taim ol bikhetman bilong lain Israel, em ol i no bin i stap gut long Jehova, ol i sem nogut tru. (Jeremaia 23:39, 40) Planti taim ol i bin bikhet long em na nau ol i save, em i rausim ol pinis, na hevi bilong pasin nogut bilong ol yet i painim ol. Ol hambak profet giaman bilong ol i no autim tok moa. Tasol Jeremaia i no pasim maus, na Jehova i no lusim em. Dispela i makim olsem taim strafe bilong Jehova i painim ol pris pasto long nau wantaim ol man i bilipim ol tok giaman bilong ol, na Jehova i bagarapim ol, em i no ken lusim lain remnan, em ol i mekim wok olsem bilong Jeremaia.
22. Jehova bai mekim wanem long ol lotu i holim nating nem Kristen?
22 Jerusalem i bagarap long yia 607 na bihain dispela taun i stap nating. Na ol misin i holim nating nem Kristen bai ol i stap olsem tasol taim ol birua i rausim ol bilas bilong ol na rong bilong ol i kamap ples klia na ol i sem. Dispela em i stretpela strafe bilong Jehova i mas painim ol tisa giaman. Dispela strafe bai painim ol tru. Olgeta toksave bilong Jeremaia i bin kamap tru long bipo, long nau tu bai i olsem. Olsem na yumi mas bihainim pasin bilong Jeremaia. Yumi no ken pret long autim tok bilong Jehova long ol man, maski dispela tok i hevi, em bai helpim ol long save long bikpela hevi em stretpela strafe bilong Jehova bai kamapim long olgeta tisa bilong lotu giaman!
Ol Askim Bilong Tingim Gen
◻ Jehova i ting olsem wanem long pasin nogut bilong Jerusalem?
◻ Olsem wanem ol misin i ‘bihainim pasin bilong giaman’?
◻ Olsem wanem ol i bin kamapim klia rong bilong ol pris pasto bilong nau?
◻ Nau yumi autim wanem ‘tok bilong Jehova i hevi tru’?
21. (a) Bilong wanem Jerusalem i bin kisim bagarap? (b) Taim Jerusalem i bagarap pinis, wanem samting i painim ol profet giaman? Wanem samting i painim Jeremaia? Na dispela i makim wanem samting long nau?
[Piksa long pes 8]
Ol profet bilong Jerusalem “i mekim stingpela pasin tru”
[Piksa long pes 9]
“Ol i save autim driman i bin kamap long tingting bilong ol yet”
[Piksa long pes 10]
Jerusalem i bagarap—dispela i makim samting bai painim ol lotu i holim nating nem Kristen