“Plis Larim Mipela i Kam Bek”

Olsem wanem? Bipo yu bin lotuim Jehova? Nau yu laik kirap gen long lotuim em, tasol yu tingting planti olsem em bai orait gen long yu o nogat? Plis, ritim gut dispela stori na stori i kamap bihain long en. Mipela i tingim yu na raitim ol dispela stori.

“MI BETEN askim Jehova long larim mi i kam bek na fogivim mi long mekim em i bel hevi.” Em tok bilong wanpela meri husat i bin lusim God na ol pasin Kristen em i bin kamap bikpela long en. Yu pilim hevi bilong em? Ating yu laik save: ‘God i gat wanem tingting long ol manmeri em bipo ol i bin lotuim em, tasol nau ol i no lotuim em moa? Em i save tingim ol? Em i laik bai ol i “kam bek” long em?’ Bilong bekim ol dispela askim, yumi ken skelim tok bilong Jeremaia. Ol bekim bai mekim gut bel bilong yu.—Ritim Jeremaia 31:18-20.

Skelim ol samting i bin kamap long taim Jeremaia i raitim dispela tok. Long 740 B.C.E., em planti yia paslain long taim bilong Jeremaia, Jehova i larim ol Asiria i kisim 10-pela lain bilong Israel i go kalabus.a God i larim dispela hevi i painim ol bilong skulim ol, long wanem, lain bilong em i bin mekim ol bikpela rong na planti taim ol i sakim ol tok lukaut em ol profet bilong em i bin autim. (2 King 17:5-18) Laip bilong ol manmeri i hat tru taim ol i stap long kalabus, na ol i stap longwe long God na long graun bilong ol, olsem na yu ting dispela i mekim na ol i senisim tingting bilong ol? Yu ting Jehova i lusim tingting olgeta long ol? Yu ting em bai larim ol i kam bek long em?

“Mipela i Tanim Bel Pinis”

Ol manmeri i kisim bek stretpela tingting taim ol i stap kalabus na dispela i kirapim ol long tanim bel. Jehova i luksave olsem ol i pilim tru rong ol i bin mekim na ol i tanim bel. Orait, skelim ol tok Jehova i mekim bilong kamapim tingting na filings bilong lain Israel i stap long kalabus—long hia God i kolim ol olsem Efraim.

Jehova i tok: “Mi harim pinis krai bilong ol lain bilong Efraim.” (Ves 18) Em i harim krai bilong lain Israel taim ol i karim hevi bilong ol rong ol i bin mekim. Wanpela savemeri i tok, dispela tok “krai” inap makim olsem man i “meknaisim het.” Ol i olsem wanpela bikhet pikinini husat i meknaisim het taim em i tingim ol hevi em i kamapim long em yet na em i gat laik tru long i go bek na kisim gen dispela sindaun em i gat long bipo taim em i stap wantaim papa bilong em. (Luk 15:11-17) Ol manmeri i tok wanem?

“Yu bin givim kanda long mipela . . . olsem man i givim kanda long yangpela bulmakau i save bikhet.” (Ves 18) Ol manmeri i luksave olsem i stret Jehova i stretim ol. Ol i bin stap olsem yangpela bulmakau i bikhet. Wanpela buk i tok, dispela tok piksa i makim olsem lain Israel i olsem yangpela bulmakau husat i “pilim pen bilong stik i gat sap, long wanem, ol i bin bikhet.”

“Bikpela, yu tasol yu God bilong mipela na mipela i laik kam bek long yu. Olsem na yu mas bringim mipela i kam bek.” (Ves 18) Ol manmeri i daunim ol yet na ol i singaut long God. Bipo ol i insait tru long ol pasin nogut, tasol nau ol i askim God long helpim ol bambai ol i ken mekim ol stretpela pasin na bai em i ken orait gen long ol.

“Mipela i tanim bel pinis. . . . Mipela i sem tru na daunim het bilong mipela.” (Ves 19) Ol manmeri i sori tru long sin bilong ol. Ol i luksave olsem ol i bin mekim sin na ol i tokaut olsem ol i gat asua. Na tu, ol i sem pipia na bel bilong ol i bagarap olgeta, i olsem ol i wok long paitim bros bilong ol.—Luk 15:18, 19, 21.

Lain Israel i tanim bel. Ol i bel hevi tru, autim sin bilong ol long God, na givim baksait olgeta long ol pasin nogut bilong ol. Olsem na yu ting dispela bai mekim God i sori long ol? Yu ting em bai larim ol i kam bek long em?

“Bai Mi Sori Long Em na Marimari Long Em”

Jehova i laikim tru lain Israel. Em i tok: “Mi stap Papa bilong ol lain bilong Israel, na Efraim i olsem namba wan pikinini bilong mi.” (Jeremaia 31:9) Gutpela papa i save sori tru na laikim pikinini taim pikinini i tanim bel na sori tru long rong bilong em. Lukim, olsem wanpela gutpela Papa, Jehova i mekim ol tok bilong kamapim tingting em i gat long lain bilong em.

“Mi Bikpela, mi tok, mi laikim tumas Efraim, em pikinini man bilong mi. Olgeta taim mi save kolim nem bilong en [“stretim em,” NW ], mi save tingting tumas long em.” (Ves 20) Dispela tok i helpim yumi long pilim tru pasin laikim bilong God! Em i olsem wanpela gutpela papa husat i strong long bihainim ol stretpela lo, na em i pilim olsem em i gat wok long “stretim” ol pikinini bilong em, na planti taim em i givim ol tok lukaut long ol i mas lusim ol pasin nogut bilong ol. Taim ol i bikhet na i no laik harim tok bilong em, em i larim ol i go kalabus, i olsem ol i go longwe long em. Tasol maski em i mas givim strafe long ol, em i no lusim tingting long ol. Em i no inap tru long mekim olsem. Gutpela papa i no save lusim tingting long pikinini bilong em. Orait, Jehova i pilim olsem wanem taim em i lukim olsem ol pikinini bilong em i tanim bel tru?

“Mi save givim bel bilong mi moa yet long em. Olsem na bai mi sori long em na marimari long em.” (Ves 20) Jehova i laikim tru ol pikinini bilong em. Taim ol i sori tru na tanim bel, dispela i mekim gut bel bilong em na em i laik tru long ol i mas kam bek long em. Wankain olsem dispela papa long tok piksa bilong Jisas long pikinini i lusim papa, Jehova “i sori tru” long ol pikinini bilong em na em i gat laik tru long welkamim ol i kam bek.—Luk 15:20.

“Jehova i Larim Mi i Kam Bek”

Ol tok bilong Jeremaia 31:18-20 i helpim yumi long kliagut long pasin marimari na bikpela pasin sori bilong Jehova. God i no save lusim tingting long ol manmeri em bipo ol i bin lotuim em. Olsem wanem sapos long nau ol i laik kam bek long em? God i redi long “rausim sin” bilong ol. (Song 86:5) Em i no inap tru long givim baksait long ol manmeri em ol i tanim bel tru na i laik kam bek long em. (Song 51:17) Em i amamas tru long welkamim ol.—Luk 15:22-24.

Dispela meri em mipela i kamapim tok bilong em long kirap bilong dispela stori, em yet i bin mekim ol samting bilong kam bek long Jehova na em i go long wanpela kongrigesen bilong ol Witnes Bilong Jehova i stap klostu long em. Pastaim em i mas daunim ol tingting kranki bilong em yet, em i tok: “Mi pilim olsem mi samting nating tasol.” Tasol ol elda bilong kongrigesen i strongim na helpim em long kisim bek strong long lotuim Jehova. Em i tenkyu tru na i tok: “Mi amamas tru olsem Jehova i larim mi i kam bek long em!”

Sapos bipo yu bin lotuim Jehova na yu tingting long lotuim em gen, mipela i laik kirapim yu long go long wanpela kongrigesen bilong ol Witnes Bilong Jehova i stap klostu long yu. Tingim, Jehova i save marimari na mekim bikpela pasin sori taim ol manmeri i tanim bel na i tok, “Plis larim mipela i kam bek.”

Baibel ritim bilong Epril:

◼ Jeremaia 17-31

[Futnot]