Stap Fri Tru—Long Wanem Rot?
“Mipela man i no inap bosim wokabaut bilong mipela yet na bihainim ol rot mipela i laikim. Bikpela, yu ken stretim mipela.”—JEREMAIA 10:23, 24.
1, 2. Planti man i gat wanem tingting long i stap fri? Tasol ol i mas tingim wanem samting moa?
MIPELA save yu laik i stap fri tru. Yu laik i stap fri na bai yu ken kamapim tingting bilong yu, na stap long wanem hap yu laik i stap long en, na bihainim wanem kain pasin yu yet yu laikim. Yu laik bai yu inap mekim wanem kain wok yu gat laik long mekim, na kisim wanem kain kaikai o harim wanem kain musik yu gat laik long en, na poromanim ol manmeri yu gat laik long poromanim ol. Yu gat laik bilong yu yet long planti samting—ol bikpela na liklik samting. I no gat wanpela man i laik i stap kalabus aninit long ol hatpela bos na bai em i no inap mekim ol samting em i gat laik long mekim, o em inap mekim liklik tasol.
2 Yu laik i stap fri, tasol yu tingim ol narapela tu, a? Yu laik bai wanpela taim bilong i stap fri i kamap na bai olgeta man inap i stap gutpela—no gat wanpela samting i pasim ol, laka? Na sapos i no gat moa ol samting i save mekim ol man i pret, na pasin raskol, na ol man i no ken hangre moa o i stap rabis, na i no gat ol samting i bagarapim graun, na i no gat sik o pait, em yu laikim kain taim olsem i ken kamap, a? Tru tumas, yumi olgeta yumi gat bikpela laik long i stap fri o i stap gutpela olsem.
3. Olsem wanem yumi gat strongpela laik long i stap fri?
3 Olsem wanem yumi ol man i gat strongpela laik long i stap fri? Baibel i tok: “Sapos Spirit bilong [Jehova] i stap long wanpela man, orait i no gat wanpela samting i pasim dispela man. Nogat. Em i stap fri.” (2 Korin 3:17) Jehova em i God bilong pasin bilong i stap fri. Em i bin wokim yumi ol man ‘i kamap olsem em yet,’ olsem na yumi inap tingim ol samting yumi laik mekim na bihainim laik bilong yumi; yumi gat laik long i stap fri, na pasin bilong i stap fri inap helpim yumi.—Stat 1:26.
Ol i Mekim Nabaut Long Pasin Bilong i Stap Fri
4, 5. Long bipo yet na i kam inap long nau, olsem wanem ol man i bin mekim nabaut long pasin bilong i stap fri?
4 Tasol long bipo yet na i kam inap long nau ol man i mekim nabaut long dispela strong God i givim long ol long bihainim laik bilong ol yet—ol i bin mekim na planti milion man i bin wok kalabus na karim bikpela pen na kisim bagarap. Baibel i stori olsem inap 3,500 yia bipo “ol Isip i mekim ol Israel i wok hat nogut tru na sindaun bilong ol i kamap nogut olgeta.” (Kisim Bek 1:13, 14) Wanpela bikpela buk (The Encyclopedia Americana) i tok, long yia 317 samting paslain long Krais, long biktaun Atens na long tupela narapela biktaun bilong kantri Grik, planti planti man i stap wokboi nating na i wok kalabus long ol man, winim tru ol man i stap fri. Na dispela buk i tok: “Long Rom long bipo ol wokboi nating i no inap mekim wanpela samting long laik bilong ol yet; sapos wanpela i mekim liklik rong tasol, ol inap kilim em i dai.” Narapela bikpela buk (Compton’s Encyclopedia) i tok: “Wok ol wokboi nating i bin mekim long Rom em i as na kantri i kamap strong. . . . Ol i save pasim ol wokboi long sen na ol i mas wok long gaden. Long nait ol i save pasim ol wantaim na kalabusim ol insait long ol bikpela haus kalabus.” Planti wokboi nating olsem, bipo ol i stap fri. Orait, taim ol i stap kalabus na i stap nogut olsem, yumi save bel bilong ol i bagarap stret!
5 Inap sampela handet yia ol misin i holim nating nem Kristen ol i insait long wok nogut bilong kisim ol man na baim ol i go wok kalabus. Wanpela bikpela buk (The World Book Encyclopedia) i tok: “Long yia 1500 i go inap yia 1850 samting ol lain bilong Yurop i kisim olsem 10 milion blakskin Afrika bilong wok kalabus long hap bilong Wes.” Na long taim bilong yumi, gavman bilong Hitler long Jemani i bin kalabusim planti man na mekim ol i wok strong tumas na ol i dai, o gavman i kilim ol i dai. Planti bilong ol dispela kalabusman ol i Witnes Bilong Jehova, em gavman i bin putim ol long kalabus, long wanem, ol i no laik helpim wok nogut bilong gavman long kilim i dai ol man.
Ol i Kalabus Long Lotu Giaman
6. Olsem wanem lotu giaman i bin kalabusim ol Kenan bilong bipo?
6 Tasol i gat narapela samting tu i save kalabusim ol man—taim man i bihainim wanpela lotu giaman em i stap olsem kalabus. Olsem: Ol Kenan bilong bipo i save givim pikinini bilong ol olsem ofa long wanpela god bilong ol, em Molek. Stori i tok, ol i sapim traipela piksa bilong dispela god giaman, na ol i wokim bikpela paia insait long en, na ol i tromoi ol pikinini i stap laip yet i go insait long dispela paia. Dispela lotu giaman i pulim sampela Israel tu. God i tok: “Ol i ofaim ol pikinini bilong ol yet long god Molek. Tasol mi no bin tokim ol long mekim dispela kain pasin. Na tu mi no bin tingting long givim dispela kain lo long ol. Mi no laik tru long ol i mekim dispela stingpela pasin.” (Jeremaia 32:35) Orait olsem wanem? Molek i bin helpim ol man i bin lotuim em? Nogat. Ol dispela lain Kenan i stap we long nau? Ol i no stap; ol i pinis olgeta. Na lotu bilong god Molek tu i pinis, long wanem, em lotu giaman, na as bilong en em tok giaman tasol na i no tok i tru.—Aisaia 60:12.
7. I gat wanem pasin nogut tru em i hap lotu bilong ol Astek?
7 Sampela handet yia paslain long taim bilong yumi long Sentral Amerika, lain Astek ol i kalabus long lotu giaman. Ol i gat planti god giaman, olsem ol god bilong ol yet, na ol god bilong win na klaut samting, na ol god bilong ol wok ol i save mekim long olgeta de, na ol god bilong ol diwai samting, na i gat god tu bilong ol man i kilim i dai skin bilong ol yet. Wanpela bikpela buk (The Ancient Sun Kingdoms of the Americas) i stori olsem: ‘Olgeta wok gavman bilong ol Astek i bilong strongim wok bilong lotuim ol god bilong ol na amamasim ol. Ol i save kamautim klok long bel bilong planti man na ol i givim long ol dispela god. Ol i tok, blut em dring bilong ol god. Ol i save kirapim planti liklik pait na bai ol i ken kalabusim planti man bilong kamautim klok bilong ol na mekim ofa long ol god.’ Long yia 1486 taim ol i mekim wanpela bikpela bung bilong givim nupela haus lotu long ol god, ol i bungim planti tausen birua ol i bin kisim long pait ol i winim, na ‘ol i slipim ol long wanpela ston bilong wokim ofa, na ol i katim bel bilong ol na kamautim klok na litimapim na soim long san,’ em wanpela god bilong ol, na ol i mekim olsem bilong mekim gut bel bilong dispela god. Na wanpela buk (The World Book Encyclopedia) i tok: “Sampela taim ol i kaikai hap mit bilong skin bilong ol dispela man ol i kilim i dai olsem ofa.” Tasol ol dispela pasin i no bin helpim lain Astek na lotu bilong ol—dispela lain na dispela lotu i pinis olgeta.
8. Wanpela man i kisim ol turis i raun em i stori long wanem pasin bilong nau long kilim i dai planti man em i winim tru pasin ol Astek i mekim long kilim planti man?
8 Wanpela taim ol turis i raun insait long wanpela haus tumbuna, na ol i lukim piksa bilong ol pris Astek i wok long katim bel bilong wanpela yangpela man na kamautim klok bilong em. Man bilong kisim ol turis i raun em i stori long ol long dispela piksa, na planti turis i kirap nogut tru, olsem na man i tok: “Yupela i nolaik long pasin bilong ol Astek long kilim ol yangpela man na wokim ofa long ol god giaman bilong ol, a? Tasol ol man long nau i bin salim planti milion yangpela man i go long ol pait na ol i dai; i olsem ol i givim ofa long god bilong ol pait. Yupela ting dispela i winim pasin nogut bilong ol Astek?” Na yumi save, long taim bilong pait ol bikman bilong lotu long olgeta kantri ol i save beten bai lain bilong ol i ken winim pait, maski ol birua i wanlotu bilong ol.—1 Jon 3:10-12; 4:8, 20, 21; 5:3.
9. Wanem pasin long nau i kilim i dai planti pikinini, winim olgeta pasin olsem bilong bipo?
9 Pasin bilong kilim i dai ol pikinini olsem ofa bilong god Molek, na kilim i dai ol yangpela olsem ofa bilong ol god bilong lain Astek o bilong pait, dispela em i pasin nogut, tasol long nau i gat wanpela pasin i moa nogut, em pasin bilong kilim i dai ol pikinini i stap yet long bel bilong mama, olsem rausim bel—ol i save kilim i dai 40 milion o 50 milion pikinini olsem long olgeta yia. Insait long 3-pela yia i go pinis, ol i bin rausim planti pikinini tru long bel, olsem kilim ol i dai—namba bilong ol i winim tru namba bilong ol wan handet milion man i dai pinis long ol pait kirap long yia 1900 na i kam inap nau. Long olgeta yia ol i kilim i dai planti pikinini tru long dispela rot, winim namba bilong olgeta man em gavman bilong Hitler i bin kilim i dai insait long 12-pela yia dispela gavman i bin stap. Long nau ol i bin kilim i dai planti tausen tausen pikinini olsem, winim moa yet namba bilong olgeta pikinini em lain Kenan i bin kilim olsem ofa bilong god Molek, na olgeta yangpela man em lain Astek i bin kilim olsem ofa. Tasol long ol dispela meri i rausim bel, na long ol dokta i helpim ol, planti tru (klostu olgeta) ol i tok ol i gat lotu.
10. Lotu giaman i kalabusim ol man long wanem narapela rot?
10 Lotu giaman i bin kalabusim ol man long ol narapela rot tu. Olsem: Planti man i ting ol man i gat tewel na taim man i dai, tewel bilong em i stap yet long wanpela hap, olsem na ol i pret long tewel bilong ol tumbuna i dai pinis na ol i lotu long ol, na ol i ting bai ol dispela tewel i helpim ol. Dispela bilip i mekim na ol i stap olsem kalabus long ol papaitman na marilaman na man bilong wokim posin na ol pris pasto i tok ol inap helpim ol man long mekim ol samting bambai ol tewel i no ken mekim nogut long ol o bagarapim ol. Olsem na yumi laik save, i gat rot bilong lusim dispela kain kalabus o nogat?—Lo 18:10-12; Saveman 9:5, 10.
[Piksa long pes 4, 5]
Ol man inap bihainim laik bilong ol, tasol long bipo yet i kam inap nau ol i bin mekim nabaut long dispela na kalabusim ol narapela man