Lain Long Kisim Amamas Long Pret Long Jehova
“Ol pikinini, yupela i mas i kam na putim yau gut long tok bilong mi. Mi laik skulim yupela na bai yupela i stap aninit [olsem pret] long God oltaim.”—SONG 34:11.
LONG olgeta hap ol man i gat bikpela laik long i stap fri long ol samting i save mekim ol i pret—olsem pret long ol raskol i bagarapim ol, o ol bai no gat wok mani, o bikpela sik bai painim ol. Orait, taim Kingdom bilong God i bosim graun, ol man bai stap fri olsem. Man! Em bai i gutpela taim tru! (Aisaia 33:24; 65:21-23; Maika 4:4) Tasol i no olgeta kain pret bai pinis. Na long nau tu yumi no ken laik long rausim olgeta pasin bilong pret long bel bilong yumi. Sampela kain pret i gutpela, na sampela kain pret i nogut.
2 Pret inap bagarapim tingting olsem gip nogut, na bai man i no inap skelim gut ol samting long tingting bilong em. Em inap daunim pasin bilong strongim bel na pinisim pasin bilong wetim gutpela samting i kamap bihain. Taim wanpela birua i laik bagarapim man, ating em bai pret. (Jeremaia 51:30) O ating em i laik bai ol man i gat namba ol i mas laikim em, olsem na em i pret long mekim wanpela samting ol i no laikim. (Sindaun 29:25) Tasol i gat wanpela kain pret i save helpim yumi—em i pasim yumi long mekim pasin kranki em inap bagarapim yumi. Tasol pasin bilong pret long God i save helpim yumi moa yet. Dispela pasin i mekim na yumi daun tru long Jehova na yumi pret tru long mekim wanpela samting em i no laikim. (Song 89:7) As bilong dispela kain pret, em bel bilong yumi i pilim tru pasin sori na gutpela pasin Jehova i bin mekim long yumi. (Song 5:7; Hosea 3:5) Na yumi save Jehova i Nambawan Bikpela Jas na em i God i Gat Olgeta Strong, na em i gat strong long givim strafe long ol man i bikhet long em, na kilim ol i dai tu.—Rom 14:10-12.
3 Pasin bilong pret long God em i helpim yumi—em i no nogutim yumi. Em i save kirapim yumi long sanap strong na bihainim pasin i stret, na yumi no surik na mekim rong. Em i no olsem dispela pasin pret bilong ol man i save lotuim god giaman bilong ol Grik, em Fobos, ol i tok em god bilong mekim nogut long ol man na ol i save pret long em. Na em i no olsem pasin pret bilong ol man i save lotuim god meri bilong ol Hindu, em Kali, ol i tok em i amamas long bagarapim ol man, na em i save kisim skin bilong ol man i dai pinis na ol snek na het bilong man olsem bilas bilong em. Tasol pasin bilong pret long God i gutpela samting; as bilong en, em yumi laikim tumas Jehova na yumi tenkyu long ol gutpela samting em i bin mekim bilong helpim yumi. Olsem na dispela pasin bilong pret long God i save helpim yumi long pas gut wantaim Jehova.—Lo 10:12, 13; Song 2:11.
Sampela i Gat na Sampela Nogat
4 Tasol ol man bilong dispela graun i no bin kisim pasin bilong pret long God. Long Rom 3:9-18, pastaim aposel Pol i stori long olgeta man i gat sin, na bihain em i kolim wanpela tok bilong Song na em i tok, “I no gat wanpela man i save mekim stretpela pasin. Nogat tru.” (Lukim Song 14:1.) Bihain em i toktok long pasin bilong ol, olsem ol i no wok long painim God, na ol i no mekim gutpela pasin long man; ol i save mekim tok giaman na tok nogut, na kilim i dai ol man. Dispela tok i makim stret ol man bilong nau! Klostu olgeta man i no tingim God na ol samting em i laik mekim, na taim ol i mekim gutpela pasin long man, ol i mekim bilong kisim sampela samting. Na planti ol i save mekim tok giaman na tok nogut. Na ol nius i save stori long ol man i kilim i dai ol man; na long ol stori i save kamap long televisen samting, ol man i save amamas long lukim ol man i kisim bagarap na blut bilong ol i kapsait. Wanem samting i mekim na dispela pasin i kamap? Tru, yumi olgeta man i pikinini bilong sinman Adam, tasol taim ol man i bihainim ol dispela pasin olsem aposel Pol i kolim, i gat narapela samting i as bilong en. Ves 18 i tokaut long en, olsem: “Ol i no save pret liklik long God.”—Lukim Song 36:1.
5 Tasol olsem wanem na sampela man i save pret long God na sampela nogat? As bilong en, em sampela i wok long kisim dispela pasin na sampela nogat. Taim mama i karim yumi, yumi no gat dispela pasin, tasol yumi olgeta inap long kisim. Pasin bilong pret long God em i wanpela samting yumi mas lain long mekim. Orait, taim yumi kisim pinis dispela pasin, em bai i gat strong long bosim wokabaut bilong yumi.
Wanpela Gutpela Toksave
6 Long Song 34 i gat wanpela gutpela toksave i kam long yumi bilong kirapim yumi long kisim pasin bilong pret long God. Em i wanpela song bilong Devit. Na husat dispela man Devit i makim? Em Bikpela bilong yumi, Krais Jisas. I gat wanpela tok profet long ves 20 bilong Song 34 na aposel Jon i kolim dispela tok profet bilong makim Jisas. (Jon 19:36) Long nau Jisas i mekim wankain singaut long yumi olsem i stap long ves 11, em i tok: “Yupela i mas i kam na putim yau gut long tok bilong mi. Mi laik skulim yupela na bai yupela i stap aninit [olsem pret] long God oltaim.” Dispela i kamapim klia olsem yumi inap lain long kisim pasin bilong pret long God, na Krais Jisas em inap tru long skulim yumi. Olsem wanem na em inap tru long mekim?
7 Krais Jisas i save, pasin bilong pret long God em i bikpela samting. Hibru 5:7 i tok long em olsem: “Taim Jisas i stap man long graun, em i . . . beten strong long God, na em i singaut strong na i krai planti. Em i save daunim laik bilong em yet na i aninit [olsem pret] long God, olsem na God i harim beten bilong em.” Tasol dispela pasin bilong pret long God, em i no kisim tasol long taim ol i nilim em long diwai na em i laik i dai, nogat. Sindaun sapta 8 i tok, Pikinini bilong God em man bilong bihainim gutpela na stretpela tingting. Na Sindaun 9:10 i tok: “Sapos yu laik kisim gutpela tingting, orait pastaim yu mas aninit [olsem pret] long Bikpela.” Olsem na taim Pikinini bilong God i no kam daun yet long graun, em i gat dispela pasin bilong pret long God.
8 Na Aisaia 11:2, 3 i stori long Jisas em King God i bin makim, na i tok: “Spirit bilong Bikpela bai i kam i stap long em na givim em gutpela save na tingting, na bai em i stap strongpela king na i gat gutpela tingting . . . Oltaim em bai i stap aninit [olsem pret] long Bikpela, na dispela pasin bai i mekim em i amamas moa yet.” Tru tumas, pasin bilong pret long Jehova i no samting nogut—em i gutpela samting na i save helpim yumi. Bihain dispela pasin bai i stap long olgeta hap em Krais i bosim olsem King. Nau em i mekim wok king, na olgeta manmeri em i wok long bungim aninit long em, em i skulim ol long pasin bilong pret long Jehova. Tasol em i skulim ol olsem wanem?
9 Long rot bilong ol miting na ol bikpela na liklik kibung, Jisas, em dispela Het bilong lain Kristen na King God i bin makim, em i helpim yumi long save gut long pasin bilong pret long God na olsem wanem dispela pasin i save helpim gut yumi. Long dispela rot Jisas i helpim yumi long pilim gut pasin bilong pret long Jehova bambai yumi ken lain long kisim amamas long bihainim, olsem em i save mekim.
Bai Yu Wok Strong Long Mekim?
10 Tru, sapos yumi kaunim Baibel o yumi go long ol miting long Haus Kingdom, dispela tasol i no mekim na bai yumi kisim tru pasin bilong pret long Jehova. Sindaun 2:1-5 i stori long ol samting yumi mas mekim bambai yumi ken lain long pasin bilong pret long Jehova. Em i tok: “Pikinini, yu mas harim tok bilong mi na putim gut long tingting bilong yu. Yu mas putim yau gut long olgeta tok i save givim yu gutpela tingting. Na yu mas wok strong long kisim gutpela save. Na yu mas askim gutpela tingting na save i kam long yu, . . . na yu mas wok [strong] long painim gutpela tingting, . . . olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit [olsem pret] long Bikpela, na bai yu save gut long God.” Olsem na yumi mas putim yau long olgeta tok i kamap long ol miting na tingim gut ol as tok bilong en, na tingting strong long olsem wanem pasin bilong yumi long givim bel long Jehova i mas kirapim yumi long bihainim ol tok bilong stretim yumi. Olsem bai yumi inap save na pilim tru pasin bilong pret long Jehova.
11 Song 86:11 i toktok long narapela bikpela samting—em beten. Man bilong raitim dispela Song em i tok: “Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai [bel bilong mi i pret, NW] long yu wanpela tasol.” Yumi save Jehova i orait long dispela beten, long wanem, em i stap long Baibel. Bilong kisim dispela pasin bilong pret long God, yumi tu i mas beten askim Jehova long helpim yumi, na yumi mas beten strong na beten oltaim.—Luk 18:1-8.
Bel i Mas Kirapim Yu
12 Na i gat narapela samting yumi mas tingim long Song 86:11. Man bilong raitim Song em i no askim God long givim save tasol long em long pasin bilong pret long God. Em i laik bai dispela save i go daun long bel bilong em. Bilong kisim pasin bilong pret long God, bel bilong yumi i mas mekim wok, long wanem, dispela em i samting bilong bel. Olgeta samting yumi save mekim i kamapim bel bilong yumi, olsem ol tingting na laik i stap long bel, na samting i save kirapim yumi long mekim ol samting, na ol samting yumi laik mekim bihain.
13 Baibel i toksave long yumi olsem: Nogut yumi gat tupela bel. Bel inap giamanim yumi. (Song 12:2; Jeremaia 17:9) Em inap kirapim yumi long mekim ol gutpela wok, olsem go long ol miting bilong kongrigesen na autim tok; tasol bel inap kirapim yumi long laikim tumas sampela pasin bilong graun. Dispela inap pasim yumi na yumi no givim bel tru long mekim wok bilong Kingdom. Em nau, ating bel bilong yumi bai traim kirapim yumi long ting, wok bilong planti ol narapela Kristen i no winim wok bilong yumi. O ating long skul o ples wok yumi save pret long ol man. Olsem na yumi pret long tokaut olsem yumi Witnes, na ating bai yumi kirap na mekim sampela samting i no stret long Kristen i mekim. Tasol bihain bel bilong yumi i gat tok. Yumi no laik i stap kain man olsem, a? Yumi mas i gat wankain laik olsem man bilong raitim Song, em i beten long Jehova olsem: “Lainim mi gut bai [bel bilong mi i pret, NW] long yu wanpela tasol.” Yumi laik bai olgeta samting yumi mekim i kamapim bel bilong yumi, yumi “aninit [olsem pret] long God tasol na bihainim ol lo bilong em.”—Saveman 12:13.
14 Jehova i tok promis long putim pasin bilong pret long God i go long bel bilong lain bilong em. Em i tok profet long taim em bai kisim bek lain Israel, na long Jeremaia 32:37-39 em i tok: “Bai mi bringim ol i kam bek long dispela graun na larim ol i stap gut. Na bai ol i stap lain manmeri bilong mi na bai mi stap God bilong ol. Bai mi givim wanpela tingting long ol na bai ol i bihainim wanpela rot tasol. Na bai ol i aninit [olsem pret] long mi oltaim na bai mi mekim gut long ol.” Na long ves 40 God i strongim dispela promis na i tok: “Na bai mi givim gutpela tingting long ol, na bai ol i aninit [olsem pret] long mi, na bai ol i no inap lusim mi gen.” Orait, long yia 537 paslain long Krais, Jehova i bringim ol i kam bek long Jerusalem olsem em i bin tok long mekim. Tasol olsem wanem long narapela hap bilong dispela tok promis, olsem Jehova bai ‘givim wanpela tingting long ol na bai ol i pret long em oltaim’? Taim Jehova i kisim ol long Babilon na bringim ol i kam bek, bilong wanem ol i lusim em gen na long yia 70 ol birua i kam bagarapim haus lotu bilong ol na ol i no wokim gen?
15 I no olsem Jehova i pundaun long wok bilong em, nogat. Em i bin wok long kirapim bel bilong ol long pret long em. Em i bin marimari long ol na em i kisim bek ol long Babilon na bringim ol i kam bek long ples bilong ol, olsem na ol i mas daun tru na pret long em. Na long rot bilong ol profet olsem Hagai, Sekaraia, Malakai; na Esra, em God i salim em olsem tisa; na Nambawan Gavman Nehemia; na Pikinini bilong Em yet, Jehova i bin givim tok long ol bilong kirapim gen tingting bilong ol na bilong stretim ol. Sampela taim ol Israel i putim yau na bihainim tok bilong em—olsem taim Hagai na Sekaraia i kirapim ol na ol i wokim gen haus lotu bilong Jehova, na long taim bilong Esra ol i rausim ol meri haiden bilong ol i go. (Esra 5:1, 2; 10:1-4) Tasol planti taim ol i bikhet. Sampela taim ol i putim yau na sampela taim nogat. Ol i no wok long bihainim ol tok bilong stretim ol; ol i pasim bel bilong ol. Ol Israel i no wok long kisim pasin bilong pret long God, olsem na dispela pasin i no gat strong long stiaim wokabaut bilong ol.—Malakai 1:6; Matyu 15:7, 8.
16 Tasol promis bilong Jehova long putim pasin bilong pret long em i go long bel bilong lain bilong em, dispela promis i no lus nating. Em i wokim nupela kontrak wantaim ol Israel bilong spirit, em ol Kristen em i bin givim tingting long ol long i go long heven. (Jeremaia 31:33; Galesia 6:16) Long 1919 em i kisim bek ol long kalabus bilong Bikpela Babilon, na long bel bilong ol em i putim pasin bilong pret long em. Dispela i bin helpim ol gut, na i helpim tu dispela lain “planti manmeri tru,” em ol i gat tingting long i stap oltaim long graun aninit long Kingdom. (Jeremaia 32:39; KTH 7:9) Bel bilong ol tu i kisim dispela pasin bilong pret long Jehova.
Olsem Wanem Pasin Bilong Pret i Save Go Long Bel Bilong Yumi
17 Olsem wanem Jehova i bin putim dispela pasin bilong pret i go long bel bilong yumi? Em i mekim long rot bilong spirit bilong em. Na yumi holim wanem samting em spirit holi i bin kamapim? Yumi holim Baibel, em Tok Bilong God. (2 Timoti 3:16, 17) Long Baibel em i tokim yumi long ol samting em i bin mekim bipo, na ol samting em i mekim nau long ol wokboi bilong em na i truim Tok bilong em, na ol tok profet long ol samting bai kamap bihain, na dispela i olsem wanpela as na yumi mas kisim pasin bilong pret long God.—Josua 24:2-15; Hibru 10:30, 31.
18 Olsem Lo 4:10 i tok, Jehova i bin tokim Moses: “Singautim olgeta manmeri i kam bung. Mi laik bai ol i ken harim tok mi laik mekim. Olsem bai ol i ken aninit [olsem pret] long mi olgeta taim ol i stap long graun. Na bai ol i ken skulim ol pikinini bilong ol.” Long nau tu, Jehova i wokim rot bambai yumi ken lain long pasin bilong pret long em. Long ol kibung na miting yumi save stori long ol samting i kamapim klia gutpela pasin Jehova i mekim long yumi, olsem taim yumi stadi long buk Nambawan Man Tru i Winim Olgeta Narapela Man. Dispela stadi i mekim wanem long yu na long tingting bilong yu long Jehova? Taim yu lukim ol gutpela pasin bilong Papa i stap long Pikinini bilong em, dispela i strongim laik bilong yu long abrusim olgeta pasin Jehova i no laikim?—Kolosi 1:15.
19 Long ol miting yumi save stadi tu long stori bilong taim Jehova i bin kisim bek lain bilong em long bipo. (2 Samuel 7:23) Taim yumi stadi long buk Kamapim Tok Hait—Bikpela Samting Bilong En i Laik Kamap!, yumi kisim save olsem truim bilong planti tok profet bilong Kamapim Tok Hait long Baibel i kamap pinis nau long taim bilong yumi, na sampela bikpela samting bilong mekim man i pret ol bai kamap bihain. Song 66:5 i tok long ol dispela wok bilong God olsem: “Yupela kam lukim ol . . . bikpela bikpela samting [God] i bin mekim namel long ol manmeri.” Sapos yumi gat stretpela tingting long ol dispela bikpela wok bilong God, ol dispela wok bai putim pasin bilong pret long Jehova i go long bel bilong yumi na yumi daun tru long em. Em nau, Jehova i truim tok promis bilong em, olsem: “Bai mi givim gutpela tingting long ol, na bai ol i aninit [olsem pret] long mi, na bai ol i no inap lusim mi gen.”—Jeremaia 32:40.
20 Tasol yumi save, dispela pasin bilong pret long God i no save kamap nating long bel bilong yumi. Jehova i wok long helpim yumi, orait yumi tu i mas mekim sampela wok—yumi mas wok strong long kisim pasin bilong pret long em. (Lo 5:29) Lain Israel bilong skin i no bin mekim olsem. Tasol lain Israel bilong spirit na ol poroman bilong ol i bilip long Jehova, olsem na ol i kisim planti gutpela samting em ol man bilong pret long God ol i save kisim. Bai yumi stori long ol dispela samting long narapela tok i kamap bihain long dispela.
Bai Yu Bekim Olsem Wanem?
◻ Stori long pasin bilong pret long God.
◻ Olsem wanem yumi lain long kisim amamas long pret long Jehova?
◻ Bilong kisim pasin bilong pret long God, yumi mas wok strong long mekim wanem?
◻ Bilong kisim pasin bilong pret long God, bilong wanem bel bilong yumi i gat bikpela wok?
[Askim Bilong Stadi]
1. Olsem wanem Kingdom bilong God bai pinisim pret? Tasol olgeta kain pret bai pinis o olsem wanem?
2. (a) Wanem kain pret i nogut, na wanem kain i gutpela? (b) Stori long pasin bilong pret long Jehova. Olsem wanem ol skripsa long paragraf i makim dispela samting?
3. Olsem wanem pasin bilong pret long Jehova i narapela kain long pasin bilong pret long ol god bilong ol haiden?
4. Olsem aposel Pol i tok, ol man i stap olsem wanem long nau? Wanem samting i mekim na ol i stap olsem?
5. Olsem wanem na sampela man i save pret long God, na sampela nogat?
6. Dispela toksave long Song 34:11, husat i salim i kam long yumi? Olsem wanem dispela tok i kamapim klia olsem yumi mas lain long kisim pasin bilong pret long God?
7. Olsem wanem Jisas inap tru long lainim yumi long pasin bilong pret long God?
8. Long Aisaia 11:2, 3, yumi kisim wanem save long pasin bilong pret long Jehova?
9. Olsem wanem Krais Jisas i skulim yumi long pasin bilong pret long Jehova? Em i laik bai yumi lain long mekim wanem?
10. Taim yumi go long ol miting Kristen, yumi mas mekim wanem bambai yumi ken lain long pasin bilong pret long Jehova?
11. Bilong kisim pasin bilong pret long God, yumi mas wok strong na wok oltaim long mekim wanem?
12. Bilong wanem yumi mas tingim gut bel bilong yumi?
13. (a) Wanem samting inap makim olsem man i gat tupela bel? (b) Taim yumi wok long kisim pasin bilong pret long God, yumi mas wok strong long mekim wanem?
14, 15. (a) Taim Jehova i tok profet long kisim bek ol Israel long kalabus long Babilon, em i tok promis long givim wanem samting long lain bilong em? (b) Jehova i mekim wanem bilong putim pasin bilong pret long em i go long bel bilong lain bilong em? (c) Bilong wanem lain Israel i lusim Jehova?
16. Jehova i putim pinis pasin bilong pret long em i go long bel bilong husat?
17. Olsem wanem Jehova i bin putim pasin bilong pret long God i go long bel bilong yumi?
18, 19. Olsem wanem ol kibung na miting i helpim yumi long kisim pasin bilong pret long God?
20. Yumi mas mekim wanem na bai pasin bilong pret long God i ken go daun tru long bel bilong yumi?
[Ol Piksa long pes 12, 13]
Yumi mas stadi oltaim bambai yumi ken lain long pasin bilong pret long Jehova