Jeremaia—Em Profet Bilong Tokaut long Strafe Bilong God
“Taim mi no wokim yu yet long bel bilong mama, mi save long yu, . . . Mi makim yu bilong i stap profet bilong ol lain man.”−JEREMAIA 1:5, NW.
WANPELA saveman bilong Baibel em i stori long profet Jeremaia na em i tok, ‘Jeremaia em i wanpela strongpela profet tru, winim ol narapela profet.’ Tasol taim Jeremaia i kisim dispela wok, em i no ting em i wanpela strongpela man. Jehova i makim em long kamap profet bilong lain Juda na ol narapela lain, tasol Jeremaia i pret na em i tok: “O Nambawan Bikpela, Jehova, sori! Mi no save long autim tok, long wanem, mi manki tasol.” Jeremaia i pilim olsem em i manki tasol na em i no inap mekim dispela wok bilong givim ol strongpela tok bilong Jehova long ol lain i birua long Jehova. Tasol Jehova i no ting Jeremaia i no inap mekim dispela wok; em i save, Jeremaia inap mekim.−Jeremaia 1:6, NW.
2 Yumi tingim dispela tok Jehova i givim long Jeremaia na yumi save, Jehova i makim pinis Jeremaia taim em i stap yet long bel bilong mama. Tasol Jehova i no bin mekim olsem long planti man. Nogat. Orait, bilong wanem Jehova i mekim olsem long Jeremaia? Long wanem, Jehova i tingim wanpela bikpela wok bilong Jeremaia. Olsem na Jehova inap tokim Jeremaia: “Taim yu no lusim yet bel bilong mama, mi makim yu bilong mekim wok holi” (Jeremaia 1:5, NW ) Orait nau Jehova i tokim yangpela man Jeremaia: “Yu no ken tok, ‘Mi manki tasol.’ Yu mas i go long ol dispela man mi salim yu i go long ol; na olgeta tok mi givim long yu, em dispela tok yu mas autim long ol. Yu no ken pret long ol, long wanem, ‘Mi stap wantaim yu na mi bai helpim yu,’ em Jehova i tok olsem.” Em wanpela strongpela wok Jeremaia i kisim, na nogut bel bilong em i malumalum na em i pret; em i mas strongim bel, na em i mas strong long autim tok long ol dispela lain, na em i mas bilip tru olsem Jehova bai helpim em na sambai long em.−Jeremaia 1:7, 8, NW.
3 Ating yangpela man Jeremaia i kirap nogut long Jehova i makim em long mekim dispela bikpela wok bilong em! Em i wanpela strongpela wok tru! Olsem Jehova i tokim em: “Harim, nau long dispela de mi givim wok long yu bilong bosim ol lain man na ol kingdom, bilong kamautim na bagarapim ol samting, na bilong wokim na planim ol samting.” Long dispela taim, olsem 6 handet yia samting paslain long Krais, lain Juda i gat pasin antap tru, na ol i hambak long nambawan taun holi bilong ol, em Jerusalem. Ol i bilip olsem Jerusalem wantaim gutpela haus lotu bilong en bai lukautim ol na i no gat wanpela bagarap o birua samting inap painim ol. Olsem na Jeremaia i mas i gat strongpela bel bambai em i ken i go na givim tok bilong Jehova long ol. Em i mas mekim wok olsem profet inap 40 yia, na insait long dispela taim em i mas autim ol strongpela tok bilong Jehova long taim bilong 5-pela king (em Josaia, Jehoahas, Jehoiakim, Jehoiakin, Sedekaia). Em i mas givim wanpela strongpela tok long lain Juda na lain bilong Babilon na. Ol bai bel nogut long en; olsem em i mas tokaut long strafe bilong Jehova bai painim ol.−Jeremaia 1:10, NW; 51:41-64.
Bilong Wanem Yumi Mas Tingim Jeremaia?
4 Tasol ating bai yu tok, ‘Bilong wanem yumi mas save long ol samting i bin kamap long dispela taim bipo? Em i bilong bipo bipo yet na em i no samting bilong yumi.’ Tasol aposel Pol i stretim tingting bilong yumi long dispela samting taim em i raitim pas long kongrigesen bilong Korin na em i stori long ol samting i bin painim lain Isrel. Em i tok: “Na dispela olgeta samting i bin kamap olsem piksa, bilong yumi lukim na yumi no ken mangal long samting nogut, olsem ol i bin mangal long en. . . . ol dispela stori i stap long Baibel bilong givim tingting long yumi man i stap nau long taim i klostu i laik pinis.”−1 Korin 10:6, 11.
5 Ol samting i bin kamap long Isrel na Juda ol i olsem piksa em kongrigesen Kristen tru bilong nau i mas tingim, na i no ken bihainim pasin bilong ol dispela lain. Na ol dispela samting i bin kamap bipo i olsem piksa bilong samting bai kamap bihain. (Lukim Jeremaia 51:6-8 na Revelesen 18:2, 4.) Olsem na wok bilong Jeremaia long autim tok profet, na ol samting i bin painim Jerusalem, ol i bikpela samting long ol Witnes Bilong Jehova long nau, na ol i save dispela i makim stret wok bilong ol long autim tok namel long ol lain ol i kolim Kristen. Bai yumi save long dispela samting taim yumi kaunim ol tok i kam bihain long dispela.
Jeremaia i Tokaut long Strafe Bilong Jehova Bai Painim Ol
6 Jehova i laik strongim Jeremaia na bai em i no ken pret long mekim dispela bikpela wok, olsem na Jehova i tok moa long em: “Yu mas kirap na tokim ol long olgeta samting mi tokim yu long en. Yu no ken pret long ol, . . . Tasol nau bai mi strongim yu na bai yu stap olsem wanpela strongpela taun . . . na ol king bilong Juda, na ol bikpela man bilong Juda, na ol pris na ol manmeri bilong dispela ples, ol i no inap daunim yu.” Tru tumas, Jeremaia i mas strongim bel na i stap olsem wanpela strongpela taun i gat ol samting bilong sakim ol birua, long wanem em i mas givim strongpela tok long ol king na pris bilong Juda. Ol Juda i no ken amamas long harim dispela tok, olsem na Jeremaia i mas strongim bel tru bambai em i no ken pret long autim dispela tok long ol.−Jeremaia 1:17, 18, NW.
7 Na Jehova i toksave long Jeremaia: “Ol bai kirapim pait long yu, tasol ol i no inap daunim yu.” (Jeremaia 1:19, NW ) Tasol bilong wanem ol Juda wantaim king bilong ol bai birua na pait long Jeremaia? Long wanem, dispela tok em i mas givim long ol em i sutim stret pasin bilong ol long lotuim Jehova na i kamapim long ples klia olsem ol i lotuim em long skin tasol. Jeremaia i no pret−tok bilong em i sutim tru bel bilong ol. Em i tokim ol: “Harim! Tok bilong Jehova i sutim tru bel bilong ol na ol i no ken amamas long harim dispela tok. Long wanem, ol man nating wantaim ol bikpela man, olgeta ol i giaman na pulim mani; na ol profet wantaim ol pris [em ol i gat wok long soim gutpela rot long ol man na bihainim pasin i stret tasol], olgeta i mekim pasin giaman.”−Jeremaia 6:10, 13, NW.
8 Tru, ol dispela pris i wokim ol ofa bilong lain Juda na ol i mekim ol narapela pasin bilong lotu, na long skin i olsem ol i lotu tru long Jehova, tasol ol i no givim bel long en; bel bilong ol i stap longwe long Jehova. Ol i tingting tasol long mekim ol bilaspasin bilong lotu olsem em i bikpela samting, tasol ol i no tingting long bihainim stretpela pasin. Na ol hetman bilong lotu Juda ol i wok long giamanim bel bilong ol man na bai ol i ting ol samting i gutpela tasol. Ol i tok: “Em gutaim nau! Em gutaim nau!” Tasol em i no gutaim. (Jeremaia 6:14, NW; 8:11) Ol i giamanim tru ol man na ol i ting ol i stap wanbel wantaim God na em i orait long ol. Ol i ting i no gat wanpela samting nogut inap painim ol, long wanem Jehova i kisim ol pinis na ol i lain bilong em, na dispela taun holi wantaim haus lotu bilong en i bilong ol. Tasol olsem wanem long tingting bilong Jehova? Em tu i ting olsem?
9 Jehova i tokim Jeremaia long i go sanap long dua bilong banis bilong haus lotu, long ai bilong ol man, na em i mas givim tok bilong Jehova long ol man i laik i go insait na mekim lotu. Jeremaia i mas tokim ol: “Yu no ken bilipim ol tok giaman i tok: ‘Ol i olsem haus bilong Jehova, ol i olsem haus bilong Jehova,’ . . . Dispela tok i no inap helpim ol liklik.” Ol Juda i bilip tasol long samting ol i lukim long ai, olsem dispela haus lotu bilong ol, em ol i save amamas long en; tasol ol i no bilip long samting ol i no inap lukim. Ol i lusim tingting pinis long tok Jehova i bin givim long ol, em i tok: “Heven i olsem sia king bilong mi, na graun i olsem ples bilong putim lek bilong mi antap long en. Orait wanem kain haus bai yupela i wokim bilong mi?” Jehova em i Nambawan King bilong heven na graun, na em i no ken i stap tasol insait long haus lotu bilong ol, maski em i gutpela haus tru na i gat gutpela bilas bilong en!−Jeremaia 7:1-8, NW; Aisaia 66:1, NW.
10 Jeremaia i wok yet long givim strongpela tok long ol man na em i tok: “Yupela wok long stil na kilim man i dai na bagarapim marit na mekim tok giaman na mekim ofa olsem smok smel long Bal na bihainim ol narapela god bipo yupela i no save long ol, . . . yupela i mekim ol dispela samting nogut tru, tasol yupela i tok, ‘God bai lukautim mipela.’ ” Bipo Jehova i bin kisim ol Juda na ol i kamap lain bilong em yet, olsem na ol i ting, sapos ol i kisim ol ofa bilong ol i kam long haus lotu, orait maski ol i mekim wanem kain pasin, Jehova bai i orait tasol long en. Ating ol i ting Jehova em i kain olsem papa i save isi isi long pikinini na i larim pikinini i bihainim laik bilong em na i no stretim em. Tasol bai ol i kirap nogut long samting Jehova i laik mekim long ol!−Jeremaia 7:9, 10, NW; Eksodas 19:5, 6.
11 Lotu bilong ol Juda i nogut tru long ai bilong Jehova, olsem na i stret em i tok: “Mi bin putim nem bilong mi long dispela haus, tasol long ai bilong yupela ating dispela haus i kamap olsem ples hait bilong ol stilman, a?” Klostu olsem 700 yia bihain, pasin bilong ol Juda i no senis na i kamap gutpela liklik. Nogat. Yumi save long dispela, long wanem, Jisas em i givim wankain strongpela tok long ol; em i kros nogut tru long dispela pasin ol i mekim insait long haus lotu, em ol i wok bisnis long ol samting bilong lotu na ol i putim nating mani bilong ol man. Na long nau tu, ol lotu ol i kolim Kristen ol i mekim wankain pasin.−Jeremaia 7:11, NW; Matyu 16:14; Mak 11:15-17.
Ol i Sakim Ol Wasman na Ol i Mas Kisim Nogut
12 Jeremaia i no namba wan profet Jehova i bin salim bilong tokaut long ol Isrel na Juda long pasin nogut ol i mekim. Inap wan handet yia samting paslain long Jeremaia, Jehova i bin salim profet Aisaia na Maika na Hosea na Oded olsem wasman bilong toksave long strafe bai painim ol dispela lain. (Aisaia 1:1; Maika 1:1; 2 Kronikel 28:6-9) Orait olsem wanem long ol dispela lain? Planti ol i harim dispela tok na tanim bel? Jehova tokim ol: “Mi bin putim ol wasman bilong yupela na ol i tok: ‘Yupela harim krai bilong biugel!’ Tasol ol i tok: ‘Mipela i no ken harim.’ ” (Jeremaia 6:17, NW; 7:13, 25, 26) Ol i bikhet na ol i no laik harim tok bilong Jeremaia. Ol i kirap na ol i mekim nogut long em na ol i laik pasim maus bilong em. Olsem na Jehova i tingting pinis long ol i mas kisim strafe long dispela pasin bikhet bilong ol.−Jeremaia 20:1, 2; 26:8, 11; 37:15; 38:6.
13.Ol Juda i sakim tok bilong ol wasman Jehova i salim i go long ol, olsem na Jehova i mekim wanpela tok na i olsem em i salim toksave i go long olgeta lain bilong graun; em i tok: “Yu graun, yu harim! Bai mi bekim nogut long dispela lain long tingting nogut bilong ol, long wanem ol i no bin putim yau long tok bilong mi yet; na lo bilong mi−ol i wok long sakim.” Bilong wanem dispela lain bai kisim nogut? Long wanem ol i gat tingting nogut, na dispela i kirapim ol long mekim pasin nogut. Ol i sakim tok bilong Jehova na ol i bihainim ol tingting na laik nogut bilong ol yet.−Jeremaia 6:18, 19, NW; Aisaia 55:8, 9; 59:7.
14 Tasol ol i mekim wanem insait long Juda na Jehova i belhat long ol? Ol i wokim ol skon na givim olsem ofa long god giaman bilong ol, ol i kolim “Kwin Bilong Heven.” Na ol i kapsaitim wain long alta bilong givim olsem ofa long ol narapela god, bilong mekim nogut bel bilong Jehova. Olsem na Jehova i tok: “Ol i kirapim bel bilong mi na bai mi belhat. . . . Tasol ol i bagarapim ol yet, na bai ol yet i kisim sem.” (Jeremaia 7:18, 19, NW ) Tasol ol i mekim samting nogut moa yet, winim ol dispela narapela samting. Ol i sanapim ol god giaman nogut tru insait long haus lotu i gat nem bilong Jehova i stap long en. Na ol i wokim ol alta ausait long Jerusalem, long ples baret bilong Hinom, bilong “kukim ol pikinini man na pikinini meri bilong ol long paia.” Bai ol i kisim wanem pe long dispela pasin bilong ol long givim baksait long Jehova na sakim lotu i tru?−Jeremaia 7:30, 31, NW.
Juda i Kisim Pe Nogut
15 “Long yia 632 samting paslain long Krais, ol lain Kaldia na Midia ol i daunim Asiria, na Isip tu i kamap olsem liklik gavman tasol long hap bilong saut. Ol strongpela lain birua bai kam long hap bilong not bilong daunim Juda. Olsem na Jeremaia i mas tokaut long ol wantok Juda long wanpela samting nogut bai painim ol! Em i tokim ol: “Harim! Wanpela lain bilong not bai ol i kam. . . . Ol i hatpela lain stret, na ol i no ken marimari liklik long ol manmeri. . . . O pikinini meri bilong Saion, ol i lain gut olsem wanpela strongpela ami na ol i redi long i kam pait long yu.” Nambawan bikpela gavman bilong dispela taim em Babilon, na Jehova i kirapim Babilon long i kam na givim strafe long dispela lain Juda ol i lusim pinis bilip na givim baksait long Jehova.−Jeremaia 6:22, 23, NW; 25:8, 9.
16 Tasol olsem wanem? I gutpela sapos Jeremaia i singaut long Jehova i helpim ol dispela wanples bilong em na bai ol birua i no ken bagarapim ol? I orait sapos ol i putim hap lotu giaman i go insait long lotu tru bilong Jehova? Sapos ol i mekim hap lotu i tru, ating Jehova i ken orait long dispela? Tasol Jehova i tokaut klia long Jeremaia inap 3-pela taim samting, em i tok: “Yu no ken beten bilong helpim ol dispela lain, . . . long wanem mi no ken harim beten bilong yu.” Ol dispela samting i bin kamap bipo ol i olsem piksa bilong samting i mas kamap long taim bilong yumi, olsem na yumi save, samting nogut bai painim ol lotu bilong nau ol i giaman na kolim Kristen.−Jeremaia 7:16, NW; 11:14; 14:11.
17 Orait yumi laik save, wanem samting i bin painim ol Juda? Wankain samting olsem Jehova i bin tokim Jeremaia. Long taim bilong King Jehoiakim, strongpela gavman bilong Babilon i daunim strong bilong Juda na ol i mas i stap aninit long Babilon Orait 3-pela yia bihain Jehoiakim i kirap na em i bikhet long Babilon na i no laik i stap moa aninit long en. Tasol dispela pasin longlong bilong Jehoiakim i no helpim ol Juda. Ol i kisim bikpela hevi moa long han bilong ol Babilon−ol i banisim Jerusalem na ol Juda i kalabus i stap insait long taun bilong ol. Long dispela taim King Jehoiakim i dai pinis na pikinini bilong em Jehoiakin i kamap king. Ol Babilon i banisim ol Juda i stap na ol Juda i no gat strong moa long sakim ol, na ol Babilon i go insait long Jerusalem na kalabusim King Jehoiakin wantaim famili olgeta bilong em na ol bikpela man bilong Juda wantaim famili bilong ol, na ol i kisim ol dispela Juda i go kalabus long Babilon−2 King 24:5-17.
18 Orait, wanem samting i painim gutpela haus lotu long Jerusalem wantaim ol gutpela gutpela bilas olsem ol kap gol na ol narapela gutpela samting bilong en? Ol dispela samting i no bin helpim ol Juda long abrusim bagarap. Nebukatnesa i ‘kisim olgeta gutpela gutpela samting i stap long haus bilong Jehova na haus bilong king, na em i katkatim olgeta kap na plet na dis gol na ol narapela samting em King Solomon bilong Isrel i bin wokim na i putim insait long haus bilong Jehova.’ (2 King 24:13) Babilon i makim king Sedekaia long lukautim hap lain ol i stap yet long Jerusalem, tasol bihain em tu i bikhet na i no laik i stap aninit long Babilon. Em nau, Nebukatnesa i les pinis long ol. Ami bilong em i kam bek na banisim gen Jerusalem, na long yia 607 B.C.E. Nebusaradan bilong Babilon i daunim Jerusalem na i bagarapim olgeta.−Jeremaia 34:1, 21, 22; 52:5-11.
19 Em samting nogut tru i painim dispela ‘lain bilong God’! Tasol Jeremaia i bin tokaut long strafe bai painim ol, na nau ol samting i kamap stret olsem em i bin tok. Ol Juda i bin giamanim bel bilong ol yet na ol i ting i no gat wanpela samting nogut inap painim ol, long wanem, ol i ‘lain bilong God,’ na Jeremaia yet i kranki na em i wok long kolim ol samting nogut bai kamap. Tasol Jeremaia i no giamanim bel bilong em olsem ol Juda i bin mekim. Nogat. Ol samting nogut em i tok bai kamap, em ol i kamap tru. (Jeremaia 38:4; dispela tok olsem “bekim nogut o “bagarap o ol kain tok olsem em i kamap 64 taim long hap bilong Jeremaia long Baibel.) Ol samting nogut Jehova i tok bai painim ol Juda ol i kamap stret olsem em i bin kolim. Em i tok: “Na yu mas tokim ol: ‘Ol manmeri bilong dispela lain ol i no bihainim tok bilong Jehova, em God bilong ol, na ol i no harim ol tok bilong stretim ol. Pasin bilong i stap gut long God em i pinis long ol na ol i no toktok moa long dispela pasin.’ Na long ol biktaun bilong Juda na long ol rot bilong Jerusalem bai mi mekim dai ol lap na singaut hamas na bai i no gat moa . . . long wanem, dispela ples bai bagarap na graun bilong en bai i stap nating tasol”!−Jeremaia 7:28, 34, NW.
20 Sori tumas, long dispela rot ol Juda i mas save, maski ol i stap olsem ‘lain bilong God’ na ol i singaut long em, tasol God i no kisim bek ol. Olsem tok profet bilong Jeremaia i tok: “Mipela i ting gutaim bai kamap, tasol nogat; na mipela i ting bai mipela i orait bek, tasol nogat! Taim bilong kamautim na bungim kaikai i pinis; taim bilong bikpela san i pinis; tasol yumi, God i no kisim bek yumi!” (Jeremaia 8:15, 20 NW ) Nau em taim bilong ol Juda i kisim strafe. Tasol Jehova i bin lukautim profet Jeremaia na em i mekim wok profet i go inap long pinis bilong dispela wok. Em i no i go kalabus long Babilon wantaim ol Juda. Nogat. Em i ranawe i go long Isip na em i stap long dispela hap inap long em i dai. Inap 65 yia samting Jeremaia i bin tokaut long strafe bilong God bai painim ol man, na em i no pret long autim dispela tok.
21 Tasol nau yumi laik save, i stap bilong Jeremaia na wok bilong em i makim wanem samting long taim bilong yumi? Jeremaia i makim husat long nau? Na Juda wantaim Jerusalem i makim wanem ol lain nau long taim bilong yumi? Na ol birua i lusim hap bilong not na ol i kam long Jerusalem, ol i makim wanem samting long nau? Ol tok i kam bihain long dispela bai stori long ol dispela samting.
Yu Tingim?
◻ Jeremaia i ting olsem wanem long wok Jehova i givim long em? Jehova i bekim wanem tok long em?
◻ Bilong wanem yumi laik save long ol samting i bin kamap long taim bilong Jeremaia?
◻ Ol Juda i stap olsem wanem long lotu? Ol Juda i bilip long wanem samting bai helpim ol?
◻ Bihain wanem samting i painim Jerusalem na Juda?
[Askim Bilong Stadi]
1. (a) Sampela man i ting olsem wanem long Jeremaia? (b) Tasol Jeremaia i ting olsem wanem long em yet?
2. Jehova i givim wanem tok long Jeremaia bilong strongim bel bilong em?
3. Olsem wanem dispela wok Jeremaia i mas mekim em i hatwok?
4, 5. (a) Bilong wanem yumi man bilong nau i mas tingim ol dispela samting i bin kamap long taim bilong Jeremaia? (Rom 15:4) (b) Wanem samting i bin kamap long dispela taim em i olsem piksa long samting bilong nau na yumi mas tingim?
6. Wanem samting i mekim na wok bilong Jeremaia em i wanpela strongpela wok tru? Tasol Jehova i tok wanem long em long strongim bel bilong em?
7. Bilong wanem ol king bilong lain Juda i sakim Jeremaia?
8. Ol pris wantaim profet ol i giamanim ol man olsem wanem?
9. Ol man i laik lotu na Jeremaia i tok wanem long ol long haus lotu bilong ol?
10, 11. Ol dispela lain Jeremaia i givim strongpela tok long ol, ol i stap olsem wanem long ol samting bilong spirit? Na olsem wanem long ol lain bilong nau ol i kolim Kristen? (2 Timoti 3:5)
12. Ol Juda i mekim wanem long ol profet Jehova i salim i go long ol?
13. I gat wanem as na Jehova i laik givim strafe long ol?
14. Ol i mekim wanem na lotu giaman bilong ol i go nogut olgeta? (Lukim 2 Kronikel 33:1-9.)
15. Jeremaia i mas givim wanem tok long ol Juda?
16. Bilong wanem Jeremaia i no inap helpim ol Juda sapos em i singaut long Jehova?
17, 18. Bihain God i givim wanem strafe long Juda?
19, 20. Ol Juda na Jeremaia i gat wanem narapela narapela tingting long samting nogut Jehova i tok bai painim ol? Wanem samting tru i bin painim ol Juda na Jeremaia?
21. Wanem sampela samting moa yumi laik save long en?
[Rait long pes 12]
Jeremaia i no pret long tokim ol Juda wantaim ol hetman bilong ol long strafe bilong Jehova bai painim ol
[Piksa long pes 13]
Ol meri i wokim ol skon na givim olsem ofa long god giaman bilong ol, ol i kolim “Kwin bilong Heven”