Ol Misin Ol i Kolim ‘Kristen’ Ol i Kirapim Ol Man long Lotuim Ol God Giaman
“Ol manmeri bilong dispela graun ol i no bihainim tok bilong Jehova, em God bilong ol, na ol i no harim ol tok bilong stretim ol.”−JEREMAIA 7:28, NW.
“EM I bilip strong tru, na dispela bilip i olsem paia i stap long bel bilong em na i kirapim em long tokaut long tok i tru.” Tupela saveman bilong lain Hibru i tok olsem long Jeremaia. God i givim bikpela hatpela wok long em long toksave long lain Juda, na em i kirap long mekim dispela samting. Jeremaia i tok: “Mi autim tok bilong Jehova na ol i tok bilas long mi long olgeta taim. Na mi tok: ‘Mi no ken tokim ol moa long Jehova, na mi no ken autim tok moa long nem bilong em.’ ” Ol man i mekim nogut long Jeremaia na tok bilas long em na putim bikpela hevi long em na klostu em i laik lusim dispela wok God i givim long em. Tasol olsem wanem? Em i lusim, o nogat?−Jeremaia 20:8, 9, NW.
2 Na Jeremaia i tok moa olsem: “Long bel mi pilim dispela tok i olsem paia mi pasim insait long skin bilong mi na em i laik kamaut; mi les long pasim, na mi no inap pasim moa” (Jeremaia 20:9, NW ) Jeremaia i no surik long mekim wok bilong em long autim tok bilong God long strafe bai painim ol Juda.−Jeremaia 6:10, 11.
Jeremaia Bilong Nau
3 Olsem Jeremaia i bin mekim, olsem tasol Jisas Krais na ol disaipel Kristen bilong bipo ol i no pret; ol i strongim bel na ol i autim tok bilong Kingdom bilong God long ol Juda na ol narapela lain tu, maski planti man i no laik harim. Ol man i kalabusim Pita na ol disaipel, long wanem, ol i bin autim tok, na taim ol i aut long kalabus ol i tokim ol bikman bilong lotu, ol i tok: “Mipela i mas bihainim tok bilong God tasol. Mipela no ken bihainim tok bilong ol man.” Ol i tok olsem, na nau ol bikman bilong lotu i tokim ol man long paitim ol dispela aposel. Na nau yu ting ol aposel i mekim wanem? Baibel i tok: “Na long olgeta de, long tempel na long haus bilong ol manmeri, ol i wok long skulim ol manmeri. Ol i no lusim wok bilong telimautim gutnius bilong Jisas em i Krais.”−Aposel 5:29, 40-42; Matyu 23:13-33.
4 Olsem na ol Kristen bilong pastaim ol i bihainim pasin bilong Jeremaia. Maski planti hevi i painim ol, na ol hetman bilong lotu i biruaim ol na mekim nogut long ol, tasol ol i strongim bel na ol i autim tok bilong God long strafe bai painim ol dispela lain. Ol Kristen i no pret long autim dispela strongpela tok long ol. Orait, long nau husat ol i bihainim pasin bilong ol dispela Kristen bilong pastaim? Wanem lain ol i bin autim tok long rot na long ples klia na long haus bilong ol man long strafe bilong God bai painim pasin bilong dispela graun na ol lotu bilong en ol i kolim ‘Kristen,’ em Jerusalem i bin makim? Inap 68 yia pinis wok bilong dispela lain em Jeremaia i makim, em i kamap ples klia na yumi save em liklik lain Witnes Bilong Jehova, em i makim ol pinis. Ol i strong long autim dispela tok olsem Jeremaia i bin mekim, na ol i no pret. Kirap long yia 1935 sampela moa ol i bung wantaim ol na helpim ol long autim tok, na dispela ol narapela manmeri ol i wok long kamap planti, na nau ol i kamap bikpela lain tru, inap sampela milion. Ol tu i holim nem Witnes Bilong Jehova. Ol i wok gut wantaim dispela liklik lain na ol i bihainim pasin bilong Jeremaia na ol i kamapim long ples klia ol lotu giaman, ol i giamanim ol man na ol i pulim nating mani bilong ol.−Revelesen 7:9, 10; 14:1-5.
Ol Lotu Ol i Kolim ‘Kristen’—Olsem Wanem Jerusalem i Makim Ol?
5 Ating bai yu tok, Olsem wanem na ol lotu bilong nau ol i wankain olsem Jerusalem bilong bipo? Long wanem, pasin na tingting bilong ol lain bilong Jerusalem i wankain olsem ol lotu bilong nau. Ol i hambak na ting ol i stap gutpela, na ol i gat ol ‘taun holi’ bilong ol, olsem Rom, na Jerusalem, na Kanteberi, na Fatima, na Guadalupe, na Saragosa na planti moa. Ol i hambak long ol draipela haus lotu bilong ol i gat ol gutpela bilas long en na ol i wokim gutpela tru. Ol i ting ol dispela haus lotu i litimapim nem bilong ol long ai bilong God na em i amamas long ol. Na ol i tok, ol i wokim ol dispela haus lotu bilong ‘litimapim nem bilong God.’ Tasol ol dispela haus i no gat nem bilong God Jehova i stap long en, a? Ol i kamapim nem bilong ol man i bin wokim ol dispela haus, na nem bilong ol man i bin wokim ol bilas bilong en, na ol maniman i bin baim ol samting bilong wokim ol dispela draipela haus lotu; na ol dispela haus i gat nem bilong ol ‘santuman’ i stap long en, em misin i bin dediketim haus long ol dispela man na pulim nem bilong ol long en. Lain bilong ol dispela lotu i ting ol dispela samting bai lukautim ol, olsem ol Juda i bin mekim bipo, em ol i ting haus lotu bilong ol bai lukautim ol na wanpela bagarap i no ken painim ol. Tasol dispela tingting bilong ol i giaman tru!−Jeremaia 7:4.
6 Jeremaia i bin tokaut strong long pasin giaman bilong ol bikpela man bilong lotu Juda, olsem ol pris na profet bilong ol; orait olsem wanem long ol bikpela man bilong lotu long nau? Jisas i mekim wankain strongpela tok long ol hetman bilong lotu Juda olsem Jeremaia i bin mekim, na tok bilong Jisas i sutim stret ol pris pasto bilong lotu long taim bilong yumi. Jisas i tok: “Ol i save mekim planti tok, tasol ol yet ol i no save bihainim. . . . Olgeta samting ol i save mekim, em ol i mekim bai ol man i ken lukim. . . . Ol i laikim namba wan sia long ol bikpela kaikai, na namba wan ples bilong sindaun long haus lotu.” (Matyu 23:3-7) Planti taim yumi save lukim ol pris pasto na bisop samting bilong ol misin ol i save go long ol bikpela bung bilong ol bikpela man bilong politik, na ol i mekim ol bikpela tok long ol dispela bung na ol i kisim biknem long en, na bihain ol nius i kamapim nem bilong ol wantaim nem bilong ol dispela bikpela man bilong politik, na dispela pasin i litimapim nem bilong ol long ai bilong ol man.
7 Long nau i gat planti pasto bilong lotu ol i mekim lotu long televisen, na ol i mekim kain kain trik na pasin giaman na kain kain pilai bilong grisim lain bilong ol na pulim mani bilong ol. Ol strongpela tok Jeremaia i bin mekim long ol bikpela man bilong lotu Juda i sutim stret ol dispela lain bilong lotu long nau, em 2,600 yia bihain long taim bilong Jeremaia! “. . . ol man nating wantaim ol bikpela man, olgeta ol i giaman na pulim mani; na ol profet wantaim ol pris [em ol i gat wok long soim gutpela rot long ol man na bihainim pasin i stret tasol], olgeta i mekim pasin giaman.” Tasol olgeta wantaim ol i no laik mekim wok Kristen tru bilong i go long haus bilong ol man na autim tok long ol. Ol Witnes Bilong Jehova tasol i mekim dispela wok em−liklik lain olsem Jeremaia i makim, na “bikpela lain” wantaim.−Jeremaia 6:13, NW; Aposel 20:20, 21.
Tru God i Kisim Bek Ol Lotu na Ol i No Ken Bagarap?
8 Ol dispela pris pasto samting bilong televisen ol i toktok long “kamap nupela gen” na “God i kisim bek yumi, olsem na yumi no ken bagarap,” na long dispela rot ol i giamanim bel bilong ol man na bai ol i ting ol i stap gutpela na i no gat wanpela samting nogut bai painim ol. Inap planti milion manmeri bilong ol bikpela lotu na liklik lotu ol i bilip olsem ol i “kamap nupela gen” na “God i kisim bek” ol pinis. Na ol bikpela man bilong politik ol tu i mekim wankain tok. Na maski ol dispela lain bilong lotu i bruk na ol lain politik tu i bruk, tasol ol i ting God i orait long ol. Ol pris pasto i save tokim ol, God i kisim bek ol pinis, olsem na ol i stap wanbel wantaim God! Na ol manmeri i laikim tru ol dispela tok, olsem ol Juda bipo ol i bin amamas long harim ol kain tok olsem na i swit long yau bilong ol. (Jeremaia 5:31; 14:14) Ol i ting strafe bilong God long Amagedon i no ken painim ol.−Jeremaia 6:14; 23:17; 1 Korin 1:10; Revelesen 16:14, 16.
9 Tasol sapos yumi kisim save long tok bilong Baibel na ol tok Krais i mekim, bai yumi save, liklik lain tasol bai kamap nupela gen ‘long wara na long spirit holi,’ bambai ol i ken kamap king wantaim Krais long heven. (Jon 3:3-5; Rom 8:16, 17; Revelesen 14:1-3) ‘Bikpela lain’ bilong ol Kristen tru long nau ol i no gat wok long kamap nupela gen, long wanem ol i gat tingting long kisim laip oltaim long dispela graun−ol i no tingting long i go long heven. (2 Pita 3:13; Revelesen 21:3, 4) Dispela tok ol lotu i skulim ol man long en, as bilong en em wanpela bilip giaman−olsem yumi gat tewel na God i mas kisim bek dispela tewel bilong yumi. Tasol i no gat wanpela tok bilong Baibel i helpim dispela bilip−as bilong en em wanpela tok bilong ol Grik haiden bilong bipo yet.
Ol i No Amamas long Tok Bilong Em o long Nem Bilong Em
10 Na i gat sampela samting moa bilong ol lotu bilong nau na i wankain olsem bilong Jerusalem bilong bipo. Jeremaia i tok: “Harim! Tok bilong Jehova i sutim tru bel bilong ol na ol i no ken amamas long harim dispela tok.” (Jeremaia 6:10, NW ) Na ol pris pasto bilong lotu long nau tu ol i save kamapim tok bilong ol saveman bilong graun, na ol i no laik kamapim tok bilong Jehova long Baibel. Planti ol i save sem long Baibel na ol i tok bilas long en. Ol i ting save bilong ol i win, na long dispela save bilong ol, ol i wok long skelim skelim Baibel na ol i tok em i gutpela stori bilong kaunim, tasol em i stori nating bilong ol tumbuna tasol na i no gat as bilong en. (Jeremaia 7:28) Na ol i nolaik tru long Man i bin kamapim ol tok bilong Baibel. I gat wanem as na mipela inap tok olsem?
11 Nem bilong God long rait bilong tok Hibru (????) olsem “Jehova” o “Yawe,” i kamap klostu 7 tausen taim long Olpela Testamen, tasol long planti Baibel bilong nau ol i rausim dispela nem na ol i raitim olsem “BIKPELA.” Long Baibel bilong tok Afrikaans ol i rausim nem bilong God long ol nupela Baibel. Na wanpela Baibel bilong tok Spen (Franquesa-Solé) pastaim em i gat dispela nem i stap long en, tasol ol i rausim dispela nem long ol Baibel bilong nau na ol i raitim olsem Bikpela (Señor). Long sampela Baibel ol misin i save mekim wok long en, dispela nem i stap yet, tasol ol pris na pasto samting ol i no save kamapim dispela nem. Tasol Jeremaia i kamapim nem bilong God inap 726 taim long ol tok profet bilong em!
“Kwin Bilong Heven” na Pasin Bilong Lotuim God Giaman
12 Taim yumi skelim ol tok Jeremaia i givim long ol lain bilong Jerusalem, yumi save, i gat narapela samting tu na ol lotu bilong nau i wankain olsem Jerusalem. Jehova i bin tokim Jeremaia em i no ken beten bilong helpim ol dispela lain, na Jehova i kamapim as bilong dispela. Em i tokim Jeremaia: “Yu no lukim ol samting ol i mekim long ol taun bilong Juda na long ol rot bilong Jerusalem? Ol pikinini i bungim paiawut, na ol papa i wokim paia, na ol meri i tanim plaua.” Na wanem bikpela wok ol i mekim na olgeta wan wan long famili ol i insait long en? Ol i laik “wokim ol skon bilong kwin bilong heven”!−Jeremaia 7:16-18, NW, 44:15, 19.
13 Wanpela man i raitim buk i stori long ol Juda bilong bipo na em i tok, “Dispela pasin bilong lotuim ‘kwin bilong heven,’ ol manmeri ol i givim bel long mekim, na ol i mekim long ples klia.” Yumi kirap nogut long dispela pasin bilong ol Juda, ol i lotuim wanpela god giaman, ating em i wanpela god meri bilong ol Babilon, nem bilong en Ista, em i namba 3 bilong god triwan bilong Babilon; ol i bilip olsem em god bilong helpim ol meri long kamapim planti pikinini; o ating dispela “kwin” i makim wanpela god meri bilong ol Kenan, nem bilong en Astoret, em kain olsem dispela narapela god meri.−1 King 11:5, 33.
14 Tasol ol Juda i no lotuim dispela god meri tasol. Nogat. Ol i lotuim ol narapela god giaman tu. Jehova i bel nogut tru long dispela samting na em i tok: “Bilong wanem ol i wokim ol god giaman na lotuim ol god bilong ol narapela lain, na ol i mekim nogut bel bilong mi?” Na Jehova i tok: “Ol i no bihainim tok bilong mi; ol i wok long bihainim pasin bikhet i stap long bel bilong ol yet na ol i bihainim god Bal, tasol ol papa bilong ol i no bin lainim ol long mekim olsem.” (Jeremaia 8:19; 9:13, 14, NW ) Ol lotu bilong nau ol i mekim wankain pasin, a?
15 Yu ken i go lukim ol haus lotu bilong ol Talatala o Katolik o Otodoks, na bai yu lukim olgeta ol i gat kruse. Tasol long haus lotu bilong ol Katolik na Otodoks bai yu lukim planti piksa ol i sanapim bilong “virgo Maria Santu, Mama Bilong God Tru.”a Ol i givim kain kain bikpela nem long em, olsem “Kwin Bilong Heven” na “Kwin Bilong Heven na Graun”!b Tasol dispela lain bilong nau em Jeremaia i bin makim, ol i narapela kain tru; ol i no daunim Maria−em i wanpela gutpela meri na em i mama bilong Jisas, na em i wanpela bilipmeri na God i makim em pinis wantaim ol narapela Kristen bilong ‘liklik lain,’ tasol ol dispela Kristen tru i bihainim tok bilong wanpela aposel, em i tok: “Yupela i mas givim baksait long olgeta god giaman.”−1 Jon 5:21; Jeremaia 10:14.
Ol i Lusim Nambawan King Jehova na Ol i Kisim God Triwan
16 Orait, ating yu laik save, pasin bilong litimapim Maria na lotu long em, dispela pasin i bin kamap olsem wanem? Em i bin kamap bipo, taim ol lotu i lusim rot bilong Kristen tru na ol i wok long pulim ol lain bilong lotu haiden i kam insait long ol. Bipo yet ol haiden i save lotuim god triwan. Long haus lotu haiden bilong ol Rom bilong bipo ol i wokim sampela liklik rum na ol i bungim 3-pela 3-pela, em ol i makim bilong ol god triwan bilong ol. Ol i mekim olsem tu long haus lotu haiden long biktaun bilong ol, em bilong Jupita Optimas Maksimas, na ol i makim dispela haus lotu em bilong god triwan ol i kolim Jupita-Juno-Mineva.c
17 Bilong kamapim strong dispela bilip bilong god triwan olsem 300 yia samting bihain long Jisas, Misin Katolik i mas daunim bilip bilong ol Hibru bilong bipo, em Jeremaia i bin tokaut klia tru long en, em i tok, “O Jehova, i no gat narapela god olsem yu. Yu bikpela tru, na nem bilong yu i gat bikpela strong. Tasol Jehova em i God tru. Em God i gat laip na em i stap King inap long olgeta taim bihain.” Jisas em i strongim dispela tok bilong Jeremaia na em i kamapim wanpela tok bilong Moses, i tok: “Yupela Isrel, yupela harim! Bikpela [Jehova], God bilong yumi, em wanpela tasol em i Bikpela.”−Jeremaia 10:6, 10, NW, Mak 12:29; Diuteronomi 6:4.
18 Bihain ol Juda i kisim wanpela tingting o bilip kranki na ol i pret long kolim nem “Yawe” o “Jehova,” na ol misin tu i bihainim pasin bilong ol na ol i no kolim moa nem bilong God. Em nau, ol i gat rot bilong putim senis bilong en, ol i kolim em ‘God Triwan.’d
19 Olsem na ol lotu bilong dispela graun ol i save kolim ‘Kristen,’ ol i ‘bihainim narapela god,’ em god triwan; bipo ol Juda na Krais na ol Kristen tru ol i no save long dispela god. Na bilong strongim dispela bilip bilong ol, ol man bilong lotu ol i bin tanim Baibel King James Version ol i mekim pasin giaman na paulim sampela tok bilong Baibel.e Ol dispela lotu i bin lainim ol man long tok bilong God Triwan, olsem na bikpela hap lain ol i kolim ‘Kristen’ ol i kirap na lotuim “Kwin Bilong Heven.”−Jeremaia 7:17, 18, NW.
Ol Pris Pasto i Kirapim Pasin Birua
20 Yumi tingim ol dispela tok yumi kaunim pinis na yumi save, wanpela askim bilong Jeremaia i sutim stret ol pris pasto bilong lotu long nau. Jeremaia i askim olsem: “Olsem wanem yupela ol man inap tok: ‘Mipela i gat save, na lo bilong Jehova i stap long mipela’? Em nau, ol rait giaman bilong ol kuskus i giamanim ol man. . . . Harim! Ol i sakim pinis tok bilong Jehova na ol i gat wanem save? Nogat tru!” (Jeremaia 8:8, 9, NW ) Ol i sakim Jehova na ol man bilong autim tok bilong em, em ol Witnes bilong em. Bipo ol pris wantaim profet bilong lain Juda ol i bin mekim nogut long Jeremaia, na i wankain tu long nau−ol pris na pasto bilong ol lotu ol i bin kirapim planti lain long biruaim ol Witnes Bilong Jehova na mekim nogut tru long ol.
21 Tasol bilong wanem ol i kirapim ol man long mekim nogut tru long ol Witnes? Ol dispela Witnes i bin mekim wanem na ol lotu bilong dispela graun i belhat na kirapim ol man long mekim nogut long ol? Laspela stori bilong dispela samting bai skelim ol ‘dispela askim na sampela askim moa.
[Ol Futnot]
a Buk The Image of Guadalupe−Myth or Miracle?, bilong Jody Brant Smith, pes 6.
b Buk The Glories of Mary, bilong Alphonsus de Liguori, pes 424.
c Buk Las Grandes Religiones Illustradas, pes 408.
d Bilong save moa long tok bilong God Triwan, lukim buk (tok Inglis) Reasoning From the Scriptures, pes 405-26.
e Ol i skruim sampela tok moa long 1 Jon 5:7 na dispela tok i no stret, na long Matyu 24:36 ol i giaman na lusim tok “Pikinini tu i no save long en.”
Yu Tingim?
◻ Wanem dispela lain bilong nau em Jeremaia i makim?
◻ Wanem sampela samting bilong Jerusalem bilong bipo i wankain olsem ol lotu bilong nau ol i kolim ‘Kristen’?
◻ Ol pris pasto i giamanim ol man olsem wanem na ol i ting God i orait long ol?
◻ Ol misin ‘Kristen’ long nau ol i no kamapim wanem samting? Wanem pasin bilong lotuim god giaman i kamap insait long ol dispela lotu?
[Askim Bilong Stadi]
1, 2. Jeremaia i ting olsem wanem long dispela wok em God i givim long em, na em i mekim wanem?
3. Jisas na ol disaipel i mekim wanem long dispela wok God i givim long ol?
4. Nau long taim bilong yumi husat ol i bihainim pasin bilong Jeremaia? Ol i mekim wanem?
5. Olsem wanem ol lotu bilong nau i wankain olsem Jerusalem?
6. Olsem wanem strongpela tok Jisas i sutim long ol hetman bilong lotu Juda i sutim stret ol bikpela man bilong lotu long nau?
7. (a) Sampela pasto bilong lotu i mekim wanem bilong giamanim ol man? (b) Tasol ol pris na pasto bilong lotu ol i abrusim wanem bikpela wok?
8. Bilong wanem ol lotu bilong nau ol i ting strafe bilong God long Amagedon i no ken painim ol?
9. (a) Wanem lain tasol ol i mas “kamap nupela gen”? (b) Tok bilong ol lotu olsem yumi gat tewel, Baibel i helpim dispela tok?
10. Planti pris pasto bilong lotu ol i ting olsem wanem long Baibel?
11. Ol lotu bilong nau i save kamapim nem bilong God? Olsem wanem long Jeremaia?
12-14. (a) Ol famili bilong lain Juda ol i givim bel long mekim wanem wok? (b) Jehova i ting olsem wanem long lotu bilong ol?
15. (a) Yumi lukim wanem pasin long ol lotu bilong nau? Stori long sampela pasin bilong ol lotu long hap bilong yu. (b) Ol Kristen tru ol i ting olsem wanem long Maria?
16. Wanem bilip bilong bipo i kamapim pasin bilong lotuim Maria? Em i kamap olsem wanem?
17, 18. Ol i daunim wanem samting bambai bilip bilong God Triwan i ken kamap strong?
19. (a) Taim ol lotu i kisim God Triwan, wanem samting i kamap? (b) Ol i mekim wanem pasin giaman bilong strongim tok bilong God Triwan?
20, 21. Ol pris pasto bilong lotu long nau ol i bihainim pasin bilong husat long bipo? Olsem na nau yumi laik skelim wanem ol askim?
[Piksa long pes 17]
Long 1938 ol Witnes i kamapim ples klia ol lotu giaman
[Ol Piksa long pes 18]
Ol lotu bilong nau ol i bilip olsem ol draipela haus lotu bilong ol bai lukautim ol, olsem ol Juda i bin bilip long en
[Piksa long pes 19]
Ol pris pasto i mekim lotu long televisen ol i giamanim bel bilong planti man na meri na ol i ting God i “kisim bek ol” o ol i “kamap nupela gen”