Was i Stap, Olsem Jeremaia i Bin Mekim
‘Mi Bikpela, bai mi was gut [“was i stap,” NW ] long tok bilong mi bilong mekim em i kamap tru.’—JER. 1:12.
1, 2. Olsem wanem pasin bilong Jehova long “was i stap” i wankain olsem diwai amon?
LONG ol maunten bilong Lebanon na Israel, wanpela bilong ol diwai i save putim plaua paslain long ol narapela, em diwai amon. Ol naispela plaua bilong en i pink o waitpela na i save kamap long pinis bilong Janueri o kirap bilong Februeri. Mining bilong nem bilong dispela plaua long tok Hibru em “kirap long slip.”
2 Taim Jehova i makim Jeremaia olsem profet bilong em, Jehova i tok piksa long diwai amon bilong makim wanpela bikpela samting. Long kirap bilong wok bilong em, Jeremaia i lukim wanpela visen we Jehova i soim em wanpela han bilong diwai amon. Wanem insait bilong dispela? Jehova i tok: “Bai mi was gut [“was i stap,” NW ] long tok bilong mi bilong mekim em i kamap tru.” (Jer. 1:11, 12) Olsem diwai amon i save kirap hariap long putim plaua, Jehova i kirap hariap long salim ol profet bilong em i go long givim tok lukaut long ol man long strafe bai painim ol sapos ol i sakim tok. (Jer. 7:25) Na em i no inap malolo—em bai “was i stap”—i go inap long taim tok profet bilong em i kamap tru. Long 607 B.C.E., long taim stret Jehova i makim, kot bilong Jehova i painim lain Juda em ol i tromoi lotu i tru.
3. Yumi inap bilip tru olsem Jehova i mekim wanem?
3 Long nau tu, Jehova i was i stap, em i redi long kamapim laik bilong em. Em bai inapim tru tok bilong em. Pasin bilong Jehova long was i stap i mekim wanem long yu? Nau long yia 2011, yu bilip olsem Jehova i “was i stap” na i redi long truim ol tok promis bilong em? Sapos yumi gat tupela tingting long ol tok promis bilong Jehova, nau em i taim bilong yumi long lusim pasin bilong slip long ol samting bilong spirit na was i stap. (Rom 13:11) Jeremaia em profet bilong Jehova, na em i was i stap. Taim yumi skelim olsem wanem na bilong wanem Jeremaia i was i stap na i tingim wok God i givim long em, dispela bai helpim yumi long luksave long olsem wanem yumi inap mekim yet wok Jehova i bin givim long yumi.
Tok Lukaut Ol Man i Mas Harim
4. Wanem samting i givim hatwok long Jeremaia taim em i autim tok lukaut? Bilong wanem ol man i mas harim dispela tok?
4 Ating Jeremaia i gat 25 krismas taim Jehova i givim wok long em olsem wanpela wasman. (Jer. 1:1, 2) Tasol em i pilim olsem em i mangi tasol, em i no save long pasin bilong toktok wantaim ol hetman bilong kantri, em ol i gat bikpela krismas na bikpela namba. (Jer. 1:6) Jeremaia i autim ol strongpela tok na tokaut long kot bilong God long ol man, na moa yet long ol pris, ol profet giaman, na ol king, na tu, long ol man husat i “bihainim laik bilong ol yet” na i ‘givim baksait long God oltaim.’ (Jer. 6:13; 8:5, 6) Tempel bilong King Solomon i bin i stap olsem ples bilong mekim lotu i tru klostu 400 yia, em bai bagarap. Jerusalem na Juda bai stap nating na ol manmeri bilong en bai go kalabus. I klia tru olsem ol man i mas harim dispela tok lukaut Jeremaia i autim!
5, 6. (a) Long nau Jehova i givim wanem wok long lain remnan i olsem Jeremaia? (b) Long dispela stadi bai yumi skelim wanem samting?
5 Long nau, Jehova i bin kamapim wanpela lain Kristen em i bin makim ol long holi spirit, na ol i stap olsem wasman na i givim tok lukaut long ol man long kot bilong God. Inap planti yia, dispela lain remnan i mekim wok olsem Jeremaia, ol i bin kirapim ol man long tingim taim yumi stap long en. (Jer. 6:17) Baibel i kamapim klia olsem Jehova i no save wok isi isi. De bilong em bai kam long taim stret, long taim ol man i no ting em bai kam.—Sef. 3:8; Mak 13:33; 2 Pita 3:9, 10.
6 Jehova i was i stap na long taim stret em bai kamapim nupela taim i gat stretpela pasin long en. Dispela i mas kirapim lain remnan i olsem Jeremaia na ol poroman bilong ol i dediket pinis, long was i stap na tingim moa yet tok lukaut ol man i mas harim. Dispela i mekim wanem long yu? Jisas i tok olsem olgeta man i mas kamapim klia olsem ol i sapotim Kingdom Bilong God. Nau bai yumi skelim 3-pela pasin i bin helpim Jeremaia long was i stap na tingim wok bilong em, na ol dispela pasin bai helpim yumi long mekim wankain samting.
Laikim Tru Ol Man
7. Stori long olsem wanem pasin laikim i kirapim Jeremaia long autim tok maski i gat ol hevi.
7 Wanem samting i kirapim Jeremaia long autim tok maski i gat ol hevi? Em i save laikim tru ol man. Jeremaia i save olsem ol wasman giaman i givim planti hevi long ol man. (Jer. 23:1, 2) Dispela save i helpim em long kamapim pasin laikim na pasin sori taim em i mekim wok bilong em. Em i laik bai ol wanples bilong em i harim tok bilong God na i stap laip. Em i wari tru long ol man na i krai long bikpela bagarap bai painim ol. (Ritim Jeremaia 8:21; 9:1.) Buk Krai i kamapim klia olsem Jeremaia i laikim na i tingim tru nem bilong Jehova na lain bilong em. (Kra. 4:6, 9) Long nau, taim yu lukim ol man em ol narapela i bin “mekim nogut long ol na ol i stap nogut tru olsem ol sipsip i no gat wasman,” ating yu gat laik long autim gutpela tok bilong Kingdom Bilong God long ol, laka?—Mat. 9:36.
8. Wanem samting i soim olsem bikpela hevi i no mekim Jeremaia i bel nogut?
8 Jeremaia i kisim bikpela hevi long han bilong ol man em i laik helpim ol, tasol em i no bekim pasin nogut bilong ol o bel nogut. Em i no les kwik na em i mekim gutpela pasin, em i mekim gutpela pasin long King Sedekaia tu, maski em i king nogut! Bihain long Sedekaia i tokim ol man long kilim Jeremaia i dai, Jeremaia i askim yet king long bihainim tok bilong Jehova. (Jer. 38:4, 5, 19, 20) Olsem wanem? Pasin bilong yumi long laikim tru ol man i strong olsem bilong Jeremaia?
God i Strongim Bel Bilong Em
9. Olsem wanem yumi save God i as bilong strongpela bel bilong Jeremaia?
9 Taim Jehova i toktok long Jeremaia long namba wan taim, Jeremaia i tingting planti long wok Jehova i laik givim em. Dispela i soim olsem strongpela bel em i bin kamapim long bihain, dispela i no pasin bilong em. Nogat. Pasin bilong Jeremaia long bilip tru long God i as bilong bikpela strong em i bin kamapim taim em i mekim wok profet. Tru tumas, Jehova i stap wantaim Jeremaia olsem “wanpela strongpela soldia,” em i helpim Jeremaia na givim strong long em long mekim ol wok. (Jer. 20:11) Jeremaia i gat nem olsem man i gat strongpela bel na i no pret, olsem na taim Jisas i mekim wok bilong em long graun, sampela i ting Jisas em i Jeremaia i kisim laip gen!—Mat. 16:13, 14.
10. Olsem wanem yumi ken tok lain remnan i “bosim ol lain manmeri bilong planti kantri”?
10 Jehova em i “king bilong olgeta lain manmeri,” na em i tokim Jeremaia long tokaut long kot bilong em long ol lain manmeri bilong planti kantri. (Jer. 10:6, 7) Tasol olsem wanem lain remnan i “bosim ol lain manmeri bilong planti kantri”? (Jer. 1:10) Olsem dispela profet bilong bipo, King bilong heven na graun i givim wok long lain remnan i olsem Jeremaia. Dispela lain God i bin makim, ol i gat wok long tokaut long kot bilong God long ol lain manmeri bilong planti kantri. Lain remnan i bin kisim namba long God Antap Tru na ol i yusim Tok bilong em i klia tru, na tokaut olsem ol lain manmeri bilong planti kantri bai kisim bagarap long taim na long rot God i makim. (Jer. 18:7-10; Rev. 11:18) Lain remnan i olsem Jeremaia i tingting strong long ol i no ken lusim dispela wok God i bin givim long ol, long tokaut long kot bilong Jehova long olgeta hap bilong graun.
11. Taim ol hevi i painim yumi, wanem samting bai helpim yumi long mekim yet wok autim tok?
11 Em i nomol long bel hevi long sampela taim, taim ol man i birua, i les long harim tok, o ol hevi i painim yumi. (2 Kor. 1:8) Tasol olsem Jeremaia, yumi mas mekim yet wok i go. Yumi no ken bel hevi. Gutpela sapos yumi olgeta wan wan i beten strong long God, bilip long em, na “strongim bel” na askim em long helpim yumi. (1 Tes. 2:2) Yumi lotu tru long God, olsem na yumi mas wok yet long was i stap na tingim ol wok God i givim long yumi. Yumi mas tingting strong long tokaut yet long bagarap bai painim lain Kristendom, em Jerusalem bilong bipo i lusim Jehova i makim dispela lain. Lain remnan i olsem Jeremaia bai tokaut long ‘taim i kamap pinis long God i laik mekim gut long ol manmeri bilong en,’ na tu, ol bai tokaut olsem God bai ‘mekim save long ol birua bilong em.’—Ais. 61:1, 2; 2 Kor. 6:2.
Bikpela Amamas
12. Olsem wanem yumi save Jeremaia i no lusim pasin bilong amamas? Wanem samting i helpim em long mekim olsem?
12 Jeremaia i kisim amamas long wok em i mekim. Em i tokim Jehova olsem: “Yu bin givim tok bilong yu long mi na mi kisim, olsem man i kisim kaikai. Na dispela tok bilong yu i mekim mi i amamas na belgut tru, long wanem, mi bilong yu, God Bikpela I Gat Olgeta Strong.” (Jer. 15:16) Jeremaia i ting wok bilong i stap olsem mausman bilong God na autim tok bilong em, dispela em i wanpela gutpela wok tru. Taim Jeremaia i tingim tok bilas ol man i mekim long em, em i no amamas. Tasol taim em i tingim gutpela tok em i autim na tingim olsem dispela tok i bikpela samting, orait em i amamas gen.—Jer. 20:8, 9.
13. Bilong wanem pasin bilong stadi long ol strongpela tok i tru i bikpela samting bilong helpim yumi long stap amamas yet?
13 Bilong stap amamas yet long wok autim tok long nau, yumi mas kisim “strongpela kaikai,” em ol strongpela tok i tru bilong Baibel. (Hib. 5:14) Pasin bilong stadi long ol strongpela tok i strongim bilip. (Kol. 2:6, 7) Em i helpim yumi long kliagut olsem Jehova i pilim tru ol samting yumi mekim. Sapos yumi hatwok long painim taim bilong ritim na stadi long Baibel, orait yumi mas skelim gen sediul bilong yumi. Sapos long olgeta de yumi lusim sampela minit tasol long stadi na tingim tingim long bel ol tok yumi ritim, dispela bai mekim yumi go klostu moa long Jehova na bai yumi “amamas na belgut tru” olsem Jeremaia.
14, 15. (a) Wanem gutpela samting i kamap taim Jeremaia i stap gut long wok bilong em? (b) Lain bilong God long nau i kliagut long wanem samting?
14 Jeremaia i no lusim wok bilong autim ol tok lukaut na tokaut long kot bilong Jehova, tasol em i tingim tru wok bilong em long “wokim ol samting na bilong planim ol samting.” (Jer. 1:10) Wok bilong em long wokim na planim ol samting i karim kaikai. Sampela Juda na ol man i no bilong lain Juda, ol i abrusim bagarap taim Jerusalem i bagarap long 607 B.C.E. Yumi save long stori bilong lain Rekap, Ebetmelek na Baruk. (Jer. 35:19; 39:15-18; 43:5-7) Ol dispela lain i stap gut long God na ol i pren bilong Jeremaia, i makim stret lain long nau husat i wet long kisim laip long graun na ol i poromanim lain remnan i olsem Jeremaia. Na lain remnan i amamas tru long strongim bilip bilong “bikpela lain manmeri.” (Rev. 7:9) Ol dispela gutpela poroman bilong lain remnan, ol tu i amamas long helpim ol man i gat gutpela bel long kisim save long tok i tru.
15 Lain bilong God i kliagut olsem wok bilong autim gutnius i no wanpela wok tasol bilong helpim ol man i harim tok, nogat, em wanpela wok ol i mekim bilong lotu long God. Maski yumi painim man i laik harim tok o nogat, pasin bilong mekim wok bilong Jehova long rot bilong autim tok, dispela i givim bikpela amamas long yumi.—Sng. 71:23; ritim Rom 1:9.
“Was i Stap” na Tingim Wok Bilong Yu!
16, 17. Olsem wanem Revelesen 17:10 na Habakuk 2:3 i soim olsem taim i sot pinis?
16 Taim yumi skelim tok profet bilong Revelesen 17:10, dispela i kamapim klia olsem taim i sot pinis. Namba 7 king, em Gavman Inglan-Amerika, i kamap pinis. Baibel i stori long en olsem: “Taim em [namba 7 strongpela gavman] i kamap, em i mas i stap sotpela taim tasol.” Klostu nau dispela “sotpela taim” bai pinis. Profet Habakuk i stori long pinis bilong pasin nogut bilong dispela graun, olsem: “Taim bilong ol dispela samting i mas kamap, em i no yet. . . . Tasol yu mas wet liklik na em bai i kamap.”—Hab. 2:3.
17 Askim yu yet: ‘Wokabaut bilong mi i soim olsem mi pilim tru olsem taim i sot pinis? Ol samting mi mekim i soim olsem mi ting klostu nau pinis bai kamap? O ol disisen bilong mi na ol samting i bikpela samting long mi, i soim olsem mi no ting pinis i klostu o i soim olsem mi gat tupela tingting, olsem pinis bai kam o nogat?’
18, 19. Bilong wanem nau em i no taim bilong slek long mekim wok?
18 Wok bilong lain remnan long i stap olsem lain wasman i no pinis yet. (Ritim Jeremaia 1:17-19.) Yumi amamas tru long dispela lain remnan i sanap strong, olsem “pos ain” na “taun i gat strongpela banis”! Ol i ‘pasim tok i tru olsem ol i save pasim let long bel,’ olsem ol i larim Tok Bilong God i strongim ol i go inap long ol i pinisim wok. (Efe. 6:14) Bikpela lain manmeri tu i wok strong long sapotim lain remnan long mekim dispela wok God i bin givim long ol.
19 Nau em i no taim bilong slek long mekim wok bilong Kingdom, nogat, nau em taim bilong tingim tok bilong Jeremaia 12:5. (Ritim.) Yumi olgeta i mas karim ol hevi i painim yumi. Ol dispela hevi i traim bilip, ol i olsem “ol man” yumi mas resis wantaim ol. Tasol “traipela hevi tru” i wok long i kam klostu, olsem na yumi save ol hevi bai i go bikpela moa. (Mat. 24:21) Pasin bilong karim ol bikpela hevi em ol bai kamap bihain, dispela i olsem yumi “resis wantaim ol hos.” Man i mas i gat bikpela strong tru bambai em inap resis wantaim ol hos. Olsem na em i gutpela long karim hevi bilong ol traim i painim yumi long nau, dispela inap redim yumi long karim ol hevi bai kamap bihain.
20. Yu tingting strong long mekim wanem?
20 Yumi olgeta inap bihainim pasin bilong Jeremaia na inapim tru wok bilong yumi long autim tok! Ol kain pasin olsem pasin laikim, strongpela bel, na amamas i kirapim Jeremaia long i stap gut long wok em i bin mekim inap 67 yia. Naispela plaua bilong diwai amon i kirapim yumi long tingim olsem Jehova i save “was i stap” i go inap long taim tok bilong em i kamap tru. Olsem na i gat as tru na yumi mas mekim wankain pasin. Jeremaia i bin “was i stap,” na yumi tu inap mekim olsem.
Yu Inap Tingim?
• Olsem wanem pasin laikim i helpim Jeremaia long “was i stap” na tingim wok bilong em?
• Bilong wanem God i mas strongim bel bilong yumi?
• Wanem samting i helpim Jeremaia long stap amamas yet?
• Bilong wanem yu laik “was i stap”?
[Piksa long pes 31]
Bai yu autim tok yet maski ol man i birua?