Ol i Sindaun Wantaim Long Wanpela “Kantri” Ol i Kisim Bek

“Yupela yet bai i stap olsem ol pris bilong Bikpela, na bai ol i kolim yupela ol wokman bilong God bilong yumi.”​—⁠AISAIA 61:⁠6.

1, 2. (a) Ol man bilong ol narapela lain i lotuim Jehova long Israel, ol i mekim wanem? (b) Long nau dispela lain “planti manmeri tru” i kamapim wanem tingting bilong ol?

LONG bipo, taim ol Israel i stap gut long Jehova ol i stap olsem wanpela lain i tokaut long biknem bilong Jehova long ol narapela lain. (Aisaia 41:​8, 9; 43:​10) Planti manmeri bilong ol narapela lain ol i bilip na ol i kirap lotuim Jehova wantaim lain em i bin makim bilong em stret. I olsem ol i bin mekim wankain tok olsem Rut i bin mekim long Naomi, em i tok: “God bilong yu bai i kamap God bilong mi.” (Rut 1:16) Ol i bihainim ol tok bilong Lo, na ol man i katim skin. (Kisim Bek 12:​43-48) Sampela meri namel long ol, ol i maritim ol man bilong Israel. Rahap bilong Jeriko na Rut bilong Moap ol i kamap tumbuna bilong Krais Jisas. (Matyu 1:⁠5) Ol dispela lain i bin kirap lotuim Jehova, ol i insait long lain Israel.​—⁠Lo 23:​7, 8.

² Olsem ol dispela narapela lain i stap long Israel, dispela lain “planti manmeri tru” long nau ol i tokim lain remnan: “Mipela i harim olsem God i stap wantaim yupela ol Juda. Olsem na mipela i laik kamap wanlain wantaim yupela.” (KTH 7:⁠9; Sekaraia 8:23) Ol i bilip olsem ol dispela Kristen God i bin makim ol, ol i dispela lain “wokboi i gat gutpela tingting” i mekim wok bilong Jehova, na dispela bikpela lain i wok gut wantaim ol. Olsem na lain remnan na “ol arapela sipsip” ol i “wanpela lain sipsip tasol na wanpela wasman tasol bilong ol.” (Matyu 24:​45-47; Jon 10:16) Wanem samting bai painim dispela lain planti manmeri tru taim ol brata bilong ol em God i bin makim ol, ol i kisim pinis prais bilong ol long heven? Ol i no ken pret. Nau long dispela “taim bilong las de” Jehova i redim pinis ol samting bilong helpim ol long dispela taim.​—⁠2 Timoti 3:⁠1.

Wanpela “Kantri” Bilong Spirit

³ Aposel Pita i tok profet long dispela gavman bilong heven em 144,000 Kristen bai insait long en. Em i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en.” (2 Pita 3:13) Dispela “nupela skai” i kamap pinis long 1914, taim Krais i kamap King long Kingdom bilong heven. Tasol olsem wanem long “nupela graun”?

4. (a) Wanem samting i kamap long 1919 na ol man i kirap nogut long en? (b) Wanem dispela ‘lain manmeri i kamap wantu tasol’? Wanem dispela ‘kantri i kamap long wanpela de tasol’?

⁴ Long 1919, Jehova i kisim bek lain remnan long kalabus bilong Bikpela Babilon. (KTH 18:⁠4) Ol bikman bilong ol lotu i gat nem Kristen ol i no ting dispela samting bai kamap. Baibel i tok long dispela samting olsem: “Ating yupela i bin lukim na harim tok bilong dispela kain samting bipo, a? Ating wanpela kantri inap kamap long wanpela de tasol, a? Ating wanpela bikpela lain manmeri inap kamap wantu tasol, a?” (Aisaia 66:⁠8) Dispela lain God i bin makim ol i kamap wantu tasol long ai bilong ol lain bilong graun olsem ol man i lusim pinis kalabus na i stap fri, na long dispela taim ol i olsem wanpela kantri i “kamap wantu tasol.” Tasol wanem dispela “kantri”? Yumi ken tok, long ol samting bilong spirit em i olsem kantri Israel bilong bipo. Em i olsem ples Jehova i givim long dispela nupela “lain” bilong mekim wok bilong ol long en. Long dispela ples ol tok profet bilong Paradais long Buk Aisaia i gat wanpela truim long nau long ol samting bilong spirit. (Aisaia 32:​16-20; 35:​1-7; skelim wantaim Hibru 12:​12-14.) Maski wanpela Kristen i stap we long skin, em i stap long dispela “kantri.”

5. As bilong wanem lain i bin kamap long 1919? Stori long dispela.

⁵ Tasol olsem wanem? Dispela em i samting bilong “nupela graun” Pita i tok profet long en? Orait, tingim dispela samting: Dispela nupela “lain” i bin kamap long 1919 long wanpela “kantri” ol i kisim bek, em i mas i go bikpela na kamap wanpela bikpela oganaisesen i stap long olgeta hap, i gat dispela lain God i bin makim ol na lain God i no bin makim ol, em olgeta wantaim i litimapim nem bilong Jehova. Dispela oganaisesen bai abrusim bagarap long Armagedon na go insait long nupela taim God bai kamapim. Long dispela rot yumi ken tingim dispela lain i olsem as bilong nupela stretpela lain man, olsem nupela graun, em bai stap taim ol lain bilong Satan i bagarap.a Long 1935 samting, ol i bungim pinis lain remnan long dispela “kantri” ol i bin kisim bek. Kirap long dispela taim, ol remnan i wok strong long bungim bikpela lain arapela sipsip, nau ol i klostu olsem 5 milion. (KTH 14:​15, 16) Olsem wanem? I gat planti manmeri tumas long dispela “kantri” na ol i pas pas? Nogat. Ol inap surikim mak bilong “kantri” i go i go na bai em i kamap bikpela moa. (Aisaia 26:15) Tru tumas, yumi amamas tru long lukim dispela lain i go bikpela tru na lain remnan i wok long kamapim planti “kaikai” i pulap tru long dispela “kantri”​—⁠em ol gutpela kaikai bilong spirit i strongim ol man. (Aisaia 27:⁠6) Tasol ol dispela arapela sipsip i stap long dispela “kantri” ol i gat wanem wok?

Ol Narapela Lain Long “Kantri”

⁶ Ol manmeri bilong ol narapela lain i lotuim Jehova long Israel, ol i bihainim Lo Bilong Moses, na olsem tasol dispela bikpela lain bilong nau i stap long dispela “kantri” ol i save bihainim ol lo bilong Jehova. Ol brata bilong ol em God i bin makim, ol i bin skulim ol, olsem na ol i klia long olgeta kain lotu giaman na ol i bihainim tambu bilong blut, olsem blut i holi. (Aposel 15:​19, 20; Galesia 5:​19, 20; Kolosi 3:⁠5) Ol i laikim tru Jehova long bel na tingting na strong olgeta bilong ol, na ol i laikim ol narapela man olsem ol i laikim ol yet. (Matyu 22:37; Jems 2:⁠8) Long Israel bilong bipo, ol dispela man bilong ol narapela lain i lotuim Jehova ol i helpim wok bilong sanapim haus lotu bilong Solomon, na ol i helpim ol narapela wok bilong kamapim bek lotu i tru. (1 Stori 22:2; 2 Stori 15:​8-14; 30:25) Long nau dispela bikpela lain tu i insait long ol wok olsem bilong strongim ol kongrigesen na ol sekit na mekim i go bikpela, na ol i insait long ol bikpela wok bilong sanapim ol Haus Kingdom, na Haus Kibung, na ol haus brens, na kain wok olsem.

7. Taim ol Juda i lusim Babilon na kam bek long Jerusalem, wanem samting i kamap taim ol i sot long ol Livai bilong mekim wok long haus bilong Jehova?

⁷ Long yia 537 paslain long Krais, taim ol Israel i lusim Babilon na ol i go bek long ples bilong ol, ol i kirap stretim wok bilong lotu long ples bipo haus bilong Jehova i bin sanap long en. Tasol ol man bilong lain Livai i go bek wantaim ol, ol i no planti tumas. Olsem na ol dispela man bilong ol narapela lain i bin katim skin na bipo ol i stap wokboi bilong ol Livai, nau ol i kisim sampela bikpela wok long haus bilong Jehova. Tasol ol i no mekim wankain wok olsem ol pris bilong lain bilong Aron i mekim.b​—⁠Esra 7:24; 8:​15-20; Nehemia 3:​22-26.

8, 9. Nau long taim bilong las de, olsem wanem na ol arapela sipsip i kisim planti wok moa insait long wok bilong Jehova?

⁸ Ol Kristen bilong nau em God i bin makim, ol i bihainim dispela pasin. Nau yumi wok long kamap klostu long pinis bilong “taim bilong las de” na lain remnan i wok long i go liklik long dispela “kantri” bilong lain bilong God. (Daniel 12:9; KTH 12:17) Olsem na nau dispela bikpela lain yet i mekim planti wok insait long dispela ‘wok bilong God.’ (KTH 7:15) Ol i bihainim pasin bilong ol brata bilong ol em God i bin makim ol, na ol i “givim biknem long God . . . olsem ofa [ol i] save givim long God.” Na ol i “mekim gutpela pasin long ol manmeri” na sapos sampela i sot long ol samting, ol i save “givim sampela samting bilong [ol] bilong helpim ol,” long wanem, “em dispela kain ofa God i save laikim tru.”​—⁠Hibru 13:​15, 16.

⁹ Na tu, long olgeta yia sampela handet tausen moa i save kam insait long dispela bikpela lain, olsem na i mas i gat planti wasman moa bilong lukautim ol. Bipo ol Kristen God i bin makim, ol tasol i save stap wasman long ol kongrigesen. Tasol long klostu olgeta kongrigesen long nau, na ol sekit, na distrik, na ol brens ofis, ol arapela sipsip i mas mekim wok wasman. Long 1992 Sosaiti i singautim wan wan bilong ol arapela sipsip long sindaun long miting bilong ol komiti bilong Lain Bilong Bosim Ol Witnes Bilong Jehova, na ol i mekim sampela wok olsem helpim. Tasol taim dispela Lain Bilong Bosim Ol Witnes i mas pasim tok long ol samting ol bai mekim, ol dispela arapela sipsip i no insait long dispela wok. Tasol ol dispela lain arapela sipsip ol i stap gut long ol wanwok Kristen God i bin makim ol, na ol i ting em i bikpela samting long ol inap helpim dispela lain wokboi i gat gutpela tingting.​—⁠Matyu 25:​34-40.

‘Olsem Hetman’

¹⁰ Sekaraia 9:​6, 7 i tok profet long pasin bilong dispela “wokboi i gat gutpela tingting” long givim wok i gat namba long ol arapela sipsip. Em i tok: “Ol dispela Filistia i man bilong bikhet, olsem na bai mi daunim ol tru. Na ol hap lain bilong Filistia i stap yet bai i kamap lain manmeri bilong mi, na bai ol i stap olsem [hetman, NW] insait long lain bilong Juda. Na ol Ekron bai i kamap lain manmeri bilong mi, olsem ol Jebus i bin mekim bipo.”c Ol Filistia i birua tru long lain bilong Jehova, olsem ol man bilong dispela graun bilong Satan long nau ol i mekim. (1 Jon 5:19) Bihain ol Filistia i bagarap na lain bilong ol i pinis, na olsem tasol dispela graun bilong Satan long nau, em ol lain bilong lotu na politik na ol bikpela bisnis, liklik taim belhat bilong Jehova bai painim ol na bai ol i bagarap.​—⁠KTH 18:21; 19:​19-21.

10, 11. Olsem sampela Filistia i bin mekim bipo, olsem wanem sampela birua bilong lain bilong God ol i bin tanim bel? Olsem na wanem samting i kamap?

¹¹ Tasol olsem tok bilong Sekaraia i makim, sampela Filistia i bin tanim bel, na dispela i olsem piksa na i makim olsem sampela man bilong dispela graun long nau bai ol i no birua moa long Jehova. Bai ol i lusim ol lotu giaman i gat ol pasin nogut tru insait long en na ol ofa nogut tru, na ol i kamap olsem klinpela man long ai bilong Jehova. Long taim bilong yumi, i gat sampela olsem ol Filistia i bin tanim bel na ol i stap insait long dispela lain planti manmeri tru.

12. Long nau, olsem wanem “ol Ekron” i kamap “olsem ol Jebus”?

¹² Olsem dispela tok profet i tok, nambawan biktaun bilong Filistia, em Ekron, em bai kamap “olsem ol Jebus.” Bipo ol Jebus tu i birua long ol Israel. Ol i bin bosim Jerusalem i go inap long taim Devit i kisim dispela taun. Tasol sampela i bin abrusim bagarap taim ol Israel i mekim pait long ol, na ol i bihainim lotu bilong ol Israel. Ol i mekim wok long Israel olsem ol wokboi nating, na ol i insait tu long wok bilong sanapim haus bilong Jehova, em wanpela gutpela wok ol inap mekim. (2 Samuel 5:​4-9; 2 Stori 8:​1-18) Orait, ol “Ekron” bilong nau i kirap long lotuim Jehova, ol tu i kisim gutpela wok insait long dispela “kantri” em “wokboi i gat gutpela tingting” i lukautim.

13. Wanem sampela hetman long ol lain bilong bipo ol i gat bikpela namba?

¹³ Sekaraia i tok, ol Filistia bai kamap olsem ol hetman long Juda. Tok Hibru olsem ʼal·luphʹ, em ol i tanim olsem “hetman,” insait bilong en i olsem “lida bilong wan tausen.” Kain man olsem, em i gat bikpela namba tru. Kantri Idom long bipo i gat 13 tasol. (Stat 36:​15-19) Taim Moses i singautim ol man i olsem maus bilong ol Israel na ol i mas i kam bung, em i kolim ol olsem “hetman bilong ol wan wan lain bilong ol manmeri bilong Israel.” I gat 12-pela man i holim bikpela namba olsem; Moses tasol i gat bikpela namba moa. (Namba 1:​4-16) Na long ol ami tu, ol ofisa i bosim wan tausen o sampela tausen man ol i gat bikpela namba tru; ol jeneral o king tasol i gat bikpela namba moa.​—⁠2 Samuel 18:​1, 2; 2 Stori 25:⁠5.

14. Long nau, olsem wanem ol “Filistia” i kamap olsem ol hetman?

¹⁴ Sekaraia i no tok profet olsem ol Filistia i tanim bel ol bai kamap hetman long Israel, nogat. Dispela bai i no stret, long wanem, ol i no Israel tru. Tasol ol bai i olsem hetman. Na dispela tok i kamap tru. Long nau lain remnan i wok long i go liklik, na planti ol i lapun pinis na ol i no inap mekim planti wok, olsem na sampela bilong ol arapela sipsip i bin lain gut, ol i helpim ol long mekim ol wok. Ol i no laik senisim ol brata bilong ol em God i bin makim ol, nogat. Tasol lain wokboi i gat gutpela tingting i givim namba long ol long mekim ol wok insait long dispela “kantri” bambai oganaisesen bilong God i ken wok long kamap strong moa na ol samting i ken wok stret. I gat narapela tok profet i toktok long dispela samting.

Ol Pris na Fama

¹⁵ Aisaia 61:​5, 6 i tok olsem: “Ol man bilong ol arapela kantri bai i kam mekim wok bilong yupela. Bai ol i was long ol sipsip samting bilong yupela, na bai ol i brukim graun na planim kaikai. Na bai ol i lukautim tu ol gaden wain bilong yupela. Tasol yupela yet bai i stap olsem ol pris bilong Bikpela, na bai ol i kolim yupela ol wokman bilong God bilong yumi. Na bai yupela i gat planti samting, em ol man bilong ol arapela kantri bai i bringim i kam. Na bai yupela i amamas tru long ol planti gutpela samting ol i givim yupela.” Long nau ol dispela “pris bilong Bikpela” em dispela lain Kristen God i bin makim ol. Bihain ol bai “stap olsem pris bilong Bikpela, na . . . wokman bilong God bilong yumi,” long Kingdom bilong heven. (KTH 4:​9-11) Husat dispela “ol man bilong ol arapela kantri” i gat wok olsem fama? Em ol arapela sipsip, ol i sindaun long “kantri” bilong lain Israel bilong God. Wanem ol dispela wok ol i kisim, olsem lukautim sipsip, na planim kaikai, na lukautim gaden wain? Long ol samting bilong spirit, ol dispela wok i olsem wok bilong helpim na lukautim ol man na bai ol i ken kamap strong, na bungim ol olsem man i save bungim ol kaikai bilong gaden.​—⁠Aisaia 5:7; Matyu 9:​37, 38; 1 Korin 3:9; 1 Pita 5:⁠2.

16. Bihain husat bai lukautim olgeta wok long “kantri” bilong lain bilong God?

¹⁶ Long nau, liklik hap lain bilong ol Israel bilong spirit ol i stap yet long graun, na ol i insait long wok olsem bilong was long ol sipsip na planim kaikai na lukautim gaden wain. Bihain, taim olgeta bilong lain Israel bilong spirit i go antap na bung wantaim Krais, ol arapela sipsip bai kisim ol dispela wok. Na wok bilong lukautim dispela “kantri,” dispela tu bai stap long han bilong ol arapela sipsip i gat save long mekim dispela wok; Buk Esekiel i kolim dispela lain olsem hetman.​—⁠Esekiel, sapta 45, 46, NW.d

Dispela “Kantri” Bai Stap Oltaim

¹⁷ Tru tumas, dispela bikpela lain ol i no ken pret! Jehova i redim pinis planti gutpela samting bilong ol. Wanpela bikpela wok tru i bin kamap long dispela taim bilong las de, em wok bilong bungim na putim mak long ol manmeri bilong i go long heven. (KTH 7:⁠3) Tasol taim dispela wok i stap, Jehova i wok long bringim ol arapela sipsip i kam bung wantaim ol long wanpela kantri bilong spirit ol i bin kisim bek. Ol i bin kisim ol kaikai bilong spirit na lain long bihainim pasin Kristen. Na ol i bin lain gut long mekim wok bilong God, na wok bilong lukautim ol sipsip tu. Ol i tenkyu tru long Jehova na ol brata bilong ol em God i bin makim ol.

18. Wanem ol samting bai kamap na ol arapela sipsip bai stap gut insait long “kantri” bilong ol Israel bilong spirit?

¹⁸ Taim Gok bilong graun Magok i kam mekim laspela pait long lain bilong God, ol arapela sipsip bai i sanap strong wantaim lain remnan long “ol taun bilong ol i no gat banis i raunim.” Na taim Jehova i bagarapim ol lain bilong dispela graun, ol arapela sipsip bai abrusim bagarap na stap yet long dispela “kantri” na go insait long nupela taim God bai kamapim. (Esekiel 38:11; 39:​12, 13; Daniel 12:1; KTH 7:​9, 14) Sapos ol i stap gut long Jehova, bai ol i no inap lusim dispela gutpela ples.​—⁠Aisaia 11:⁠9.

19, 20. (a) Long nupela taim, husat ol bai bosim ol manmeri i sindaun long dispela “kantri”? (b) Yumi wet long mekim wanem gutpela samting tru?

¹⁹ Long Israel bilong bipo, ol man bilong graun i save stap king bilong ol, na ol i gat ol pris bilong lain Livai. Tasol long nupela taim ol Kristen bai i gat ol king na pris i antap moa long ol dispela king na pris bilong graun. God Jehova bai stap Nambawan, na ol bai stap aninit long bikpela Hetpris na King, em Krais Jisas, wantaim 144,000 nambatu pris na king​—⁠em ol i save pinis long sampela bilong dispela lain taim ol i bin i stap brata na sista Kristen bilong ol long graun. (KTH 21:⁠1) Ol manmeri i stap gut long Jehova long dispela kantri bilong spirit, ol bai stap long graun i kamap gen olsem paradais tru, na bai ol i amamas tru long ol gutpela gutpela blesing i kam long rot bilong Nupela Jerusalem bilong oraitim ol.​—⁠Aisaia 32:1; KTH 21:2; 22:​1, 2.

²⁰ Traipela karis bilong Jehova long heven i wokabaut i go bilong kamapim ol laik bilong em, na i no gat wanpela man inap long pasim. Olsem na yumi olgeta i ken tingting strong long mekim gut ol wok yumi bin kisim na inapim tru. (Esekiel 1:​1-28) Orait, taim Jehova i kamapim pinis ol dispela laik bilong em, bai yumi kisim bikpela amamas moa yet long lukim Jehova i win tru na em i mekim holi nem bilong em! Olgeta long heven na graun bai mekim dispela gutpela singsing i stap long Kamapim Tok Hait 5:13: “Dispela Man i save sindaun long sia king bilong en, na Pikinini Sipsip tu, tupela i ken kisim olgeta tenkyu na biknem na amamas na strong, inap oltaim oltaim”! Maski yumi bai stap long heven o long graun, yumi gat bikpela laik tru long i stap na bungim nek bilong yumi wantaim ol dispela lain long mekim dispela gutpela singsing bilong litimapim nem bilong Jehova, a?

[Ol Futnot]

Bai Yu Bekim Olsem Wanem?

◻ Wanem “kantri” i kamap bek long 1919? Olsem wanem ol manmeri i pulap long en?

◻ Olsem wanem ol arapela sipsip i bin kisim ol bikpela wok long dispela “kantri” bilong lain bilong God?

◻ Olsem wanem ol manmeri bilong bikpela lain ol i “olsem ol Jebus”? Olsem wanem ol i olsem ‘ol hetman long Juda’?

◻ Ol arapela sipsip i stap gut long Jehova, ol bai stap hamas yia long dispela “kantri”?

3. Wanem dispela “nupela skai” em Pita i tok profet long en? Em i kamap long wanem taim?

6. Ol man bilong ol narapela kantri ol i bin mekim wanem wok long “kantri” bilong lain bilong God?

15. (a) Long truim bilong Aisaia 61:​5, 6, husat dispela “ol pris bilong Bikpela”? Wanem taim ol bai mekim tru dispela wok? (b) Husat dispela “ol man bilong ol arapela kantri” ol i mekim wok bilong ol Israel olsem fama? Long ol samting bilong spirit, ol i mekim wanem wok?

17. Nau long taim bilong las de, Jehova i mekim wanem bilong redim ol samting?

[Piksa long pes 23]

Ol Filistia bilong nau bai kamap olsem ‘ol hetman long Juda’

[Ol Piksa long pes 24]

Ol manmeri God i bin makim na ol arapela sipsip ol i wok wantaim long dispela kantri bilong spirit