Klia Long Olgeta Pasin Bilong Lotuim God Giaman
“Olsem wanem, bai yumi bungim haus bilong God wantaim haus lotu bilong ol giaman god?”—2 KORIN 6:16.
JEHOVA i gat haus lotu, na i no gat ol god giaman long en. Haus lotu sel Moses i bin wokim, na ol haus lotu ol i bin wokim long Jerusalem, ol dispela haus i bin makim “haus tru bilong God,” em samting bilong spirit. (Hibru 8:1-5) Dispela “haus” i olsem ol samting God i putim na i olsem rot na bai yumi ken lotu long God, na yumi ken mekim wantaim strong bilong ofa Krais Jisas i bin mekim bilong baim rong bilong yumi.—Hibru 9:2-10, 23.
2 Ol wan wan bilong lain Kristen em God i bin makim ol, ol i olsem ol “pos bilong strongim haus bilong God” long heven. Haus lotu Herot i bin wokim long Jerusalem i gat banis bilong ol man bilong ol narapela lain, na long nau i olsem bikpela lain “planti manmeri tru” i sanap insait long ples em dispela banis i makim na ol i lotuim God. Ol i bilip long ofa bilong Jisas, olsem na God i orait long ol, na em bai lukautim ol long taim bilong “bikpela hevi.”—KTH 3:12; 7:9-15.
3 Long tok piksa, lain remnan i olsem haus lotu i no gat god giaman i stap long en. Pol i bin tokim ol olsem: “Yupela i olsem haus God i wokim. Em i bin planim mipela aposel wantaim ol profet olsem pos bilong dispela haus. Na Krais Jisas em i namba wan pos tru. Olgeta bun bilong dispela haus i pas long Krais, olsem na olgeta i pas gut wantaim. Na God i wokim yet dispela haus, na haus i laik kamap bikpela moa na i stap haus bilong Bikpela yet. Yupela tu i pas long Krais, na God i bungim yupela wantaim ol arapela manmeri bilong en, na yupela i kamap haus tru bilong God, bai em wantaim Holi Spirit i ken i stap long dispela haus.” (Efesus 1:13; 2:20-22) Lain 144,000 i olsem “ol ston i gat laip,” na Pita i tokim ol olsem: “God i laik mekim yupela i kamap haus bilong em yet. Olsem bai yupela i ken i stap lain pris God i makim bilong em yet.”—1 Pita 2:5; KTH 7:4; 14:1.
4 Ol dispela pris i olsem “haus bilong God,” na em i no ken larim samting i mekim ol i kamap olsem doti. (1 Korin 3:9, 16, 17) Pol i tok: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i save stap wanbel wantaim Satan, a? Man i bilip long Krais na man i no bilip, tupela i ken holim wanpela kain tingting, a? Olsem wanem, bai yumi bungim haus bilong God wantaim haus lotu bilong ol giaman god?” Ol i bilong “Bikpela I Gat Olgeta Strong,” olsem na ol samting nogut bilong ol god giaman i no ken kam insait long lain bilong ol. (2 Korin 6:14-18) Na olgeta wan wan bilong bikpela lain tu i mas klia long olgeta samting bilong god giaman.
5 I gat kain kain pasin i olsem man i lotuim god giaman. Sapos yumi lotu long sampela samting o sampela man, i olsem yumi lotu long god giaman. Jehova em i Nambawan King, olsem na em i tok yumi mas lotu long em wanpela tasol. (Lo 4:24) Ol Kristen tru i save bihainim tambu em Baibel i kolim long yumi no ken lotu long god giaman. (1 Korin 10:7) Yumi ken stori long sampela pasin i olsem lotu long god giaman, na yumi mas klia long en.
Ol Lotu i Holim Nating Nem Kristen
6 Taim Esekiel i kalabus long Babilon long yia 612 paslain long Krais, em i driman na i lukim ol samting nogut ol Israel i mekim insait long haus lotu bilong Jehova long Jerusalem; ol “i bin sanapim piksa bilong wanpela giaman god, na God i belhat nogut tru long dispela samting,” na 70 hetman i mekim ofa long smok i gat gutpela smel, na ol meri i krai long god giaman, na 25 man i lotu long san.
7 Ol dispela samting nogut Esekiel i lukim long driman i makim pasin bilong ol misin i holim nating nem Kristen, em ol i save lotu long ol god giaman. Esekiel i tok: “Mi lukim dispela piksa bilong giaman god i sanap klostu long dispela alta i stap klostu long dua. Na God i belhat nogut tru long dispela samting nogut. God i tokim mi olsem, ‘Man bilong graun, yu lukim ol dispela pasin nogut ol manmeri bilong Israel i mekim. Long dispela pasin ol i wok long rausim mi long dispela haus bilong mi, na mekim mi i go i stap longwe long ol.’ ”—Esekiel 8:1-6.
8 Ol Israel i bin sanapim wanpela pos na ating em i makim god meri em ol Kenan i bilip olsem em i meri bilong god Bal, na dispela i senisim Jehova na ol i lotu long en. Jehova i belhat long dispela pasin ol i mekim long brukim lo bilong em, em dispela lo i tok: “Mi yet mi Bikpela, mi God bilong yupela. . . . Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi. Nogat tru.”—Kisim Bek 20:2-5.
9 Ol Israel i mekim bikpela rong—ol i lotuim god giaman insait long haus lotu bilong Jehova. Ol lotu i holim nating nem Kristen ol i mekim wankain samting—ol i sanapim ol mak na piksa samting insait long haus lotu bilong ol na ol i litimapim nem bilong en na lotu long en, na ol i no lotu long dispela God tru ol i tok ol i lotu long em. Ol i givim baksait long Kingdom bilong em, na ol i litimapim nem bilong Yunaitet Nesen, em “dispela samting nogut tru . . . i sanap i stap long haus bilong God yet,” na i no ples bilong en.—Matyu 24:15, 16; Mak 13:14.
10 Esekiel i stori long ol samting nogut em i lukim insait long haus lotu na em i tok: “Mi lukim ol piksa bilong snek na ol arapela kain abus i doti long ai bilong God ol i pulap long olgeta banis bilong dispela rum. Na tu i gat ol piksa bilong ol giaman god ol Israel i save lotu long en. Na mi lukim 70 hetman bilong Israel i stap long dispela rum, . . . olgeta i holim plet bilong kukim paura bilong kamapim smok i gat gutpela smel na mi lukim smok i go antap.” Em samting nogut tru ol hetman bilong Israel i mekim long lotuim ol dispela piksa! (Esekiel 8:10-12) Piksa bilong ol pisin na animal i mak bilong ol kantri em ol lotu i holim nem Kristen ol i stap long en, na ol man i litimapim ol dispela piksa. Na ol misin i helpim tok giaman bilong evolusen i tok, bipo ol tumbuna bilong yumi em ol animal o binatang samting. Ol misin i no lainim ol man long tok tru bilong Baibel i tok, God Jehova i bin wokim ol samting.—Aposel 17:24-28.
11 Esekiel i lukim ol meri long dua bilong haus lotu, ol i krai long Tamus, em god giaman. (Esekiel 8:13, 14) Ol Babilon na Siria i tok, Tamus i god bilong ol samting bilong gaden na gras samting, em ol i kamap long taim bilong ren, na ol i drai long taim bilong san, na taim ol i drai, dispela i makim Tamus i dai pinis, na nau ol man i krai sori long em; tasol taim ren i kamap gen, ol i tok, Tamus i kirap bek. Namba wan leta long nem bilong em i olsem T, na i wankain olsem kruse bilong ol misin em ol man i save lotu long en.
12 Na Esekiel i lukim 25 man Israel i lotuim san, na dispela i brukim lo bilong Jehova. (Lo 4:15-19) Na ol i lotuim wanpela mak nogut i makim samting bilong sem. Olsem na God i no harim beten bilong ol, na em bai i no ken harim beten bilong ol misin giaman tu long taim bilong “bikpela hevi tru,” taim ol i krai long em i helpim ol. (Matyu 24:21) Ol dispela Israel i givim baksait long haus lotu bilong Jehova na ol i lotu long san, olsem ol misin i givim baksait long lait o save i kam long Jehova na ol i skulim ol man long ol bilip giaman na ol i givim bel long ol save bilong dispela graun, na ol i no gat tok long pasin pamuk na ol narapela pasin sem.—Esekiel 8:15-18.
13 Ol Witnes Bilong Jehova i no insait liklik long pasin bilong ol misin long lotu long ol god giaman kain olsem Esekiel i bin lukim. Yumi no save litimapim piksa bilong animal samting na givim biknem long en. Tru, yumi save daun long “ol gavman,” tasol yumi moa daun long trupela God. (Rom 13:1-7; Mak 12:17; Aposel 5:29) Yumi givim bel olgeta long em wantaim Kingdom bilong em. Yumi no lainim ol man long stori giaman bilong evolusen; yumi lainim ol long tok i tru bilong God, em yet i bin wokim ol samting. (KTH 4:11) Na yumi no save givim biknem long kruse olsem lotu long en, o long bikpela save bilong graun, o long ol narapela samting bilong graun. (1 Timoti 6:20, 21) Yumi klia long ol narapela kain god giaman tu. Wanem kain?
Sampela God Giaman Moa
14 Ol Kristen i no save givim biknem long dispela samting Baibel i kolim “wel animal” na lotu long en. Jon i tok: “Mi lukim wanpela wel animal i kamap long solwara. Em i gat 7-pela het na 10-pela kom i kamap long ol het bilong en. Na 10-pela hat olsem ol hat bilong king i stap long ol kom bilong en. . . . Olgeta manmeri long graun, . . . ol bai i lotu long dispela wel animal.” (KTH 13:1, 8) Sampela taim ol animal i makim wok “king” o wok politik. (Daniel 7:17; 8:3-8, 20-25) Olsem na “7-pela het” bilong “wel animal” i makim 7-pela gavman—Isip, Asiria, Babilon, Midia wantaim Persia, Grik, Rom, Inglan wantaim Amerika. Ol misin i mekim nogut long nem bilong God na Krais, long wanem, ol i kirapim ol man long litimapim nem bilong ol lain politik em ol i stap aninit long Satan, em i “hetman i save bosim dispela graun.” (Jon 12:31) Tasol lain bilong Jehova i save litimapim Kingdom na ol i sakim pasin bilong lotuim ol dispela samting olsem god giaman.—Jems 1:27.
15 Lain bilong God i no save bihainim pasin bilong ol man bilong graun long litimapim nem bilong ol manmeri i gat nem long singsing o pilaim musik o danis o spot na putim ol olsem god bilong ol. Wanpela man bilong pilaim musik em i kamap Witnes, em i tok: ‘Sampela musik na singsing i givim tingting kranki long ol manmeri. Sapos man i singsing long ol samting bilong amamas, ol marit i harim na nau ol i tingim poroman marit bilong ol em i sot long ol dispela gutpela pasin, tasol man i mekim singsing em i no sot long dispela, olsem na ol dispela marit i no laikim moa poroman bilong ol—ol i laikim dispela man bilong singsing. Ol i putim piksa bilong em long rum bilong ol, na pasim klos olsem bilong em, na komim gras olsem em i mekim, na em i kamap olsem god bilong ol. Kristen i mas litimapim nem bilong God na lotuim em tasol, na wanpela man o meri nogat.’
16 Tru tumas, yumi mas litimapim nem bilong God wanpela tasol na lotu long em wanpela tasol. Wanpela taim Jon i “brukim skru klostu long lek bilong ensel,” na nau ensel i tok strong long Jon olsem: “Yu no ken mekim olsem! Mi tu mi wanwok bilong yu wantaim ol brata bilong yu, em ol profet. Na mi wanwok bilong olgeta man i save bihainim tok bilong dispela buk. Yu mas lotu long God wanpela tasol.” (KTH 22:8, 9) Sapos yumi pret long Jehova na daun long em, dispela bai kirapim yumi long lotu long em wanpela tasol. (KTH 14:7) Olsem na sapos yumi givim bel tru long Jehova, dispela bai helpim yumi long i stap longwe long pasin bilong lotuim ol god giaman, o givim bel long sampela manmeri o wanpela samting na dispela i kamap olsem wanpela god.—1 Timoti 4:8.
17 Pasin pamuk tu em olsem pasin bilong lotuim god giaman, na lain bilong Jehova i givim baksait long en. Ol i save, “ol manmeri bilong mekim pasin pamuk na olkain pasin doti, na ol manmeri bilong mangal, em wankain pasin olsem pasin bilong lotuim ol giaman god, ol dispela lain i no inap i kam insait long kingdom bilong Krais na God.” (Efesus 5:5) Sapos yumi tingting oltaim long mekim pasin pamuk, o lukim ol piksa bilong pasin sem, dispela i kamap olsem god bilong yumi na samting yumi mekim lotu long en, na dispela kain tingting bai kilim i dai ol gutpela pasin i stap long tingting na bel bilong yumi na yumi no inap pas gut wantaim gutpela God holi, em Jehova. (Aisaia 6:3) Yumi mas klia long ol piksa na musik nogut, na holimpas ol samting bilong spirit na tok bilong Baibel, na “kamap ol nupela manmeri . . . olsem God yet, long wanem, pasin bilong ol i stretpela olgeta na i holi tru.”—Efesus 4:22-24.
No Ken Mangal
18 Ol Kristen i no ken mangal; em tu i olsem pasin bilong lotuim god giaman. Sapos yumi laik kisim moa moa samting, o yumi laik kisim samting bilong narapela man, dispela i olsem pasin mangal. Jisas i bin stori long maniman i mangal tumas long ol samting bilong skin, tasol em i “stap rabis long ai bilong God” long ol gutpela pasin bilong spirit. (Luk 12:15-21) Pol i tok: “Yupela i mas kilim i dai olgeta pasin bilong dispela graun i stap long bel bilong yupela. Mi tok long . . . pasin bilong mangal long ol samting bilong narapela man. Dispela pasin bilong mangal em i wankain olsem pasin bilong lotu long giaman god.”—Kolosi 3:5.
19 Sampela man i tingting tasol long mani na long kisim moa moa mani, na sampela i tingting tumas long kaikai o long dring, na sampela i tingting tumas long kisim bikpela namba na bai ol i gat strong. Dispela ol samting i kamap olsem god bilong ol. Pol i tok, kain man olsem i no ken stap long Kingdom. (1 Korin 6:9, 10; Efesus 5:5) Sapos man i baptais pinis na em i bihainim pasin mangal, na dispela i stap olsem god bilong em, inap ol i ken rausim em long kongrigesen Kristen. Tasol sapos em i bihainim tok bilong Baibel, na oltaim em i beten long God i helpim em, em inap givim baksait long pasin mangal. Sindaun 30:7-9 i tok: “God, mi laik askim yu long tupela samting, na mi laik bai yu mas givim mi. Long olgeta taim mi stap long graun yu ken helpim mi na mi ken givim baksait long olkain pasin bilong giaman, na yu no ken larim mi i kamap maniman o rabisman. Nogat. Yu ken givim mi kaikai inap long skel bilong mi. Nogut mi gat planti samting tumas na mi givim baksait long yu, na mi tok, ‘Bikpela em husat?’ Na nogut mi kamap rabisman na mi stilim ol samting na mi daunim nem bilong yu, God bilong mi.”
No Ken Litimapim Yu Yet
20 Lain bilong Jehova i no ken litimapim ol yet. Sampela man i save litimapim nem na laik bilong ol yet, olsem ol i wanpela god. Ol i laik bai ol man i ken givim biknem long ol, olsem na planti ol i mekim pasin giaman. Ol i strong long narapela i mas bihainim laik bilong ol yet na maski long God. Sapos yumi subim ol narapela long bihainim laik bilong yumi na yumi laik i stap olsem bikpela bilong ol, yumi no inap i stap pren bilong God. (Sindaun 3:32; Matyu 20:20-28; 1 Pita 5:2, 3) Yumi ol disaipel bilong Jisas, olsem na yumi mas sakim ol pasin giaman bilong dispela graun.—2 Korin 4:1, 2.
21 Lain bilong God i no laik kisim biknem, nogat. Ol i bihainim tok bilong Pol, olsem: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.” (1 Korin 10:31) Ol i wokman bilong Jehova, olsem na ol i daunim laik bilong ol yet na bai ol i ken bihainim laik bilong em na tok bilong “wokboi i gat gutpela tingting,” na ol i wok aninit long oganaisesen bilong Jehova.—Matyu 24:45-47.
Mas Was i Stap!
22 Yumi stap lain bilong Jehova, olsem na yumi no save lotuim wanpela god giaman. Na i gat sampela ol samting i laik pulim yumi na bai ol i kamap olsem god bilong yumi, tasol yumi mas was gut na bai yumi abrusim olgeta kain pasin bilong lotuim god giaman. Olsem na yumi bihainim tok bilong Jon, em i tok: “Yupela i mas i stap longwe long olgeta giaman god.”—1 Jon 5:21.
23 Sapos yu bilong lain bilong Jehova, yu mas harim tok bilong maus bilong bel em i lain pinis long ol lo bilong Baibel. (Hibru 5:14) Olsem bai yu no larim pasin bilong graun i giamanim yu na yu mekim pasin olsem lotuim god giaman. Bai yu bihainim pasin bilong tripela Hibru na ol Kristen bilong bipo tu em ol i stap gut long God. Bai yu lotu long Jehova wanpela tasol, na em bai helpim yu long abrusim olgeta kain pasin bilong lotuim god giaman.
Wanem Tingting Bilong Yu?
◻ Ol Witnes i mekim wanem na bai ol i no lotuim ol god giaman olsem Esekiel i lukim long driman?
◻ “Wel animal” bilong Kamapim Tok Hait 13:1 i makim wanem samting? Lain bilong Jehova i ting olsem wanem long en?
◻ Bilong wanem yumi no ken givim biknem long ol man bilong singsing na spot samting na ol i kamap olsem god bilong yumi?
◻ Olsem wanem long pasin bilong litimapim yumi yet?
◻ Bilong wanem yumi mas klia long olgeta kain pasin bilong lotuim god giaman?
[Askim Bilong Stadi]
1. Haus sel na ol haus lotu ol Israel i bin wokim, ol i bin makim wanem samting?
2. Husat i olsem pos bilong haus bilong God? Na olsem wanem long bikpela lain?
3, 4. Lain remnan i olsem wanem samting? Dispela lain i mas klia long wanem samting?
5. Kristen tru i save ol i mas lotuim Jehova wanpela tasol, olsem na ol i mekim wanem?
6. Long driman Esekiel i lukim wanem samting nogut tru?
7, 8. Jehova i bin belhat long wanem samting? Bilong wanem dispela i mekim em i belhat?
9. Ol lotu i holim nating nem Kristen ol i mekim wanem na God i belhat long ol?
10. Esekiel i lukim wanem ol samting insait long haus lotu? Na olsem wanem long ol misin?
11. Bilong wanem ol meri i krai long Tamus?
12. Esekiel i lukim 25 Israel i mekim wanem? Ol misin i mekim wanem wankain samting?
13. Olsem wanem ol Witnes i klia long ol god giaman olsem Esekiel i lukim?
14. Lain bilong Jehova i mekim wanem long samting em “wel animal” i makim?
15. Lain bilong God i ting olsem wanem long ol manmeri bilong graun ol i gat nem long singsing o danis o pilai spot samting? Wanpela Witnes i tok wanem long dispela samting?
16. Wanem samting i bin kamap na yumi save, ol gutpela ensel tu i laik bai yumi mas lotu long trupela God tasol?
17. Yumi mas mekim wanem long ol pasin sem samting?
18, 19. (a) Mangal em wanem samting? (b) Yumi mas mekim wanem na bai yumi no ken mangal?
20, 21. Lain bilong Jehova i save mekim wanem na ol i no ken litimapim ol yet olsem wanpela god?
22, 23. Yumi mas mekim wanem na bai yumi sakim olgeta kain pasin bilong lotuim god giaman?
[Ol Piksa long pes 26]
Ol samting nogut Esekiel i bin lukim i makim ol misin i lotuim ol god giaman1
[Kredit Lain]
Artwork (upper left) based on photo by Ralph Crane/Bardo Museum