Buk Bilong Baibel Namba 27—Daniel

Man Bilong Raitim: Daniel

Ples Em i Bin Raitim: Babilon

Raitim Pinis: 536 B.C.E. samting

Taim: 618–536 B.C.E. samting

 1. Wanem kain stori i stap long Buk Daniel? Em i mekim bikpela tok long wanem samting?

NAU long dispela taim bagarap i laik painim olgeta lain man, na Buk Daniel i kamapim sampela tok profet i bikpela samting tru long yumi. Ol man bilong raitim Buk Samuel na King na Stori, ol i stori long ol samting ol yet i lukim, em ol samting i bin kamap long kingdom bilong God long bipo (long lain king bilong Devit). Tasol Daniel i stori long ol lain bilong graun, na ol bikpela kantri i mas kamap strong na daunim ol narapela, kirap long taim bilong em na i kam inap long “taim bilong las de.” Em i tokaut long ol samting bai kamap long bihain, na ol samting bai kamap “klostu long las de.” Olsem Nebukatnesar, ol lain bilong graun tu i mas save, “God Antap Tru i bosim olgeta manmeri,” na bihain bai em i givim dispela wok long “wanpela man i wankain olsem yumi man bilong graun,” em Mesaia na Bikman, Krais Jisas. (Dan. 12:4; 10:14; 4:25; 7:​13, 14; 9:25; Jo. 3:​13-16) Sapos yumi tingim gut truim bilong ol tok profet bilong Buk Daniel, bai yumi pilim tru strong bilong Jehova long mekim tok profet, na ol tok promis bilong em long lukautim na mekim gut long lain bilong em.​—⁠2 Pi. 1:⁠19.

 2. Olsem wanem yumi inap save, Daniel em i wanpela man tru i bin i stap bipo? Em i autim ol tok profet long wanem taim?

² Ol i kolim dispela buk long nem bilong man i bin raitim. Insait bilong nem “Daniel” (tok Hibru, Da·ni·yeʼlʹ) i olsem: “God Em i Jas Bilong Mi.” Esekiel i bin stap long taim bilong Daniel na em i strongim tok olsem Daniel em i wanpela man tru i bin stap bipo, na Esekiel i kolim nem bilong Daniel wantaim nem bilong Noa na Jop. (Ese. 14:​14, 20; 28:⁠3) Daniel i kirap raitim buk bilong em long “namba 3 yia bilong [Jehoiakim] i stap king” bilong Juda. Dispela em yia 618 B.C.E., long namba 3 yia bilong Jehoiakim i stap king aninit long Nebukatnesar.a Daniel i bin kisim ol piksa olsem driman i kam inap long namba 3 yia bilong Sairus i stap king, em yia 536 B.C.E. samting. (Dan. 1:1; 2:1; 10:​1, 4) Ol bikpela samting tru i bin kamap long taim bilong Daniel! Taim em i pikinini yet, em i stap aninit long kingdom bilong God long kantri Juda. Bihain ol Babilon i kisim em wantaim sampela ol narapela yangpela bilong lain bikman Juda ol i go kalabus. Em i stap long Babilon long taim dispela namba 3 bikpela kantri Baibel i stori long en i kamap strong na i go inap long taim em i bagarap. Daniel i abrusim bagarap na em i kamap ofisa aninit long namba 4 bikpela gavman bilong graun, em Midia wantaim Persia. Daniel i bin stap klostu olsem 100 yia.

 3. Wanem samting i makim olsem Buk Daniel em i hap tru bilong Baibel na ol tok bilong en i tru?

³ Kirap long bipo yet ol Juda i save putim Buk Daniel long lista bilong ol buk i hap tru bilong Baibel. I gat sampela hap rait bilong Buk Daniel i stap namel long ol rait ol i bin painim klostu long raunwara Detsi, em rait bilong ol buk i hap tru bilong Baibel na sampela i olpela tru, olsem bilong yia 50 B.C.E. samting. Tasol i gat narapela samting i kamapim klia moa olsem Buk Daniel em i hap tru bilong Baibel, olsem: Ol man bilong raitim Ol Skripsa Grik i kolim sampela tok bilong en. Jisas i kolim stret nem bilong Daniel long tok profet bilong em long ‘las de bilong dispela graun,’ na insait long dispela tok profet em i kamapim sampela tok bilong Buk Daniel.​—⁠Mt. 24:3; lukim tu Dan. 9:27; 11:31; na 12:11​—⁠Mt. 24:15 na Mk. 13:14; Dan. 12:1​—⁠Mt. 24:21; Dan. 7:​13, 14​—⁠Mt. 24:⁠30.

4, 5. Olsem wanem ol samting ol man i painim pinis i daunim tok bilong ol saveman i tok, ol stori bilong Buk Daniel i no tru?

⁴ Sampela man i laik daunim Baibel na ol i tok, ol samting i no bin kamap olsem buk bilong Daniel i tok. Tasol ol samting bilong bipo ol saveman i painim pinis i kamapim klia olsem tok bilong ol i no stret. Olsem: Ol i tok, stori bilong Daniel long Belsasar i kranki, long wanem, em i tok Belsasar i stap king bilong Babilon long taim Nabonaidas i stap king bilong en. (Dan. 5:⁠1) Tasol ol samting ol saveman i painim pinis i kamapim klia olsem Belsasar em i wanpela man tru i bin stap bipo na em i bin wok king wantaim Nabonaidas inap sampela yia paslain long taim Babilon i bagarap. Ol i painim pinis wanpela olpela rait tru (“Ol Ves i Stori Long Nabonaidas”) em i makim olsem Belsasar i bin holim bikpela namba olsem king long Babilon, na rait i stori long olsem wanem em i bin kirap mekim wok king wantaim Nabonaidas.b Sampela olpela rait moa i strongim dispela tok olsem Belsasar i bin mekim wok king. Wanpela ston i gat rait long en, em i bilong namba 12 yia bilong King Nabonaidas, i kamapim wanpela tok tru antap ol i bin mekim long nem bilong King Nabonaidas, na long nem bilong Belsasar, em pikinini bilong king. Dispela i soim olsem Belsasar i bin holim bikpela namba wankain olsem papa bilong em.c Dispela i helpim yumi long save bilong wanem Belsasar i tok, sapos Daniel inap kamapim as bilong rait i stap long banis, bai em i mekim Daniel i kamap “namba 3” long gavman bilong em. Nabonaidas em i namba wan, Belsasar em i namba 2, na Daniel bai stap “namba 3.” (5:​16, 29) Wanpela saveman i tok: “Ol olpela rait em ol i gat sampela stori long Belsasar, ol i kamapim klia wok em i bin mekim long bipo. I gat planti tok long ol dispela rait i makim olsem Belsasar i holim bikpela namba na nem klostu wankain olsem Nabonaidas. Nau yumi ken save tru, tupela wantaim i bin stap king bilong Babilon inap sampela yia klostu long taim Babilon i bagarap. Nabonaidas i sindaun long haus king long Tema, long Arebia, na em i stap nambawan bos olgeta, na Belsasar i mekim wok king long kantri bilong em, na Babilon i olsem biktaun bilong em long mekim dispela wok. Em nau, Belsasar i no mausman bilong king, nogat; em i holim ‘wok king.’ ”d

⁵ Sampela i tok, stori bilong Daniel long bikpela paia (sapta 3) em i wanpela stori nating tasol. Wanpela pas bilong Olpela Babilon i tok: “Rim-Sin, em bikpela bilong yu, em i tok olsem: Em i bin tromoi yangpela wokboi nating long aven, na yu mas tromoi wokboi nating i go long bikpela paia.” Wanpela saveman (G. R. Driver) em i stori long dispela pas na em i tok, dispela kain strafe “i stap tu long stori bilong Tripela Man Holi. (Dan. III 6, 15, 19-27).”e

 6. I gat wanem tupela hap bilong Buk Daniel?

⁶ Long lista bilong ol buk bilong Ol Skripsa Hibru, ol Juda i bungim Buk Daniel wantaim Ol Rait; ol i no bungim wantaim buk bilong Ol Profet. Tasol Baibel Inglis i bihainim Baibel Grik Septuagint na Baibel Latin Vulgate na putim Buk Daniel namel long 3-pela longpela buk na ol 12-pela sotpela buk bilong ol profet. I gat olsem tupela hap bilong Buk Daniel. Namba wan hap, em sapta 1 i go 6, i stori long ol samting i painim Daniel wantaim 3-pela poroman bilong em taim ol i stap wokman bilong king bilong Babilon long yia 617 B.C.E. i go 538 B.C.E., na stori i bihainim stret taim bilong ol dispela samting i bin kamap. (Dan. 1:​1, 21) Long namba 2 hap, em sapta 7 i go 12, Daniel i raitim stori bilong ol driman em yet i lukim, na ol tok ol ensel i bin givim long em, kirap long yia 553 B.C.E.f i go inap long yia 536 B.C.E. samting. (7:​2, 28; 8:2; 9:2; 12:​5, 7, 8) Tupela hap wantaim em Buk Daniel, em olgeta tok bilong en i stret wantaim.

HELPIM YUMI OLSEM WANEM?

19. Buk Daniel i stori long wanem ol man i stap olsem gutpela piksa tru long pasin bilong stap gut long God na beten na wetim Em?

¹⁹ Olgeta manmeri i laik stap gut long God namel long ol man i stap longwe long Em, ol i mas tingim Daniel na 3-pela poroman bilong em, ol i stap olsem gutpela piksa yumi ken bihainim. Maski ol man i tok long mekim nogut tru long ol, ol i stap gut long ol lo bilong God bilong stiaim tingting. Taim bagarap i laik painim ol, Daniel “i tingting gut” na mekim ol samting, na em i daun long bikpela namba bilong king. (Dan. 2:​14-16) Taim king i strong long ol i mas lotuim imis gol, 3-pela Hibru hia i no laik mekim olsem, maski ol bai tromoi 3-pela i go insait long paia. Na Daniel i no laik lusim pasin bilong beten long Jehova, maski ol bai tromoi em i go daun long hul bilong ol laion. Long ol dispela traim i bin painim ol, Jehova i lukautim ol. (3:​4-6, 16-18, 27; 6:​10, 11, 23) Daniel i beten oltaim na wetim God Jehova i helpim em​—⁠em i stap olsem gutpela piksa tru yumi ken bihainim.​—⁠2:​19-23; 9:​3-23; 10:⁠12.

20. Buk Daniel i stori long wanem 4-pela driman i makim ol strongpela gavman i kamap long graun? Sapos yumi tingim ol dispela driman long nau, olsem wanem dispela bai strongim bilip bilong yumi?

²⁰ Taim yumi tingim gen ol driman bilong Daniel, ol bai kirapim tru bel bilong yumi na strongim bilip bilong yumi. Pastaim yumi ken tingim 4-pela driman i makim ol strongpela gavman i kamap long graun: (1) I gat driman bilong traipela imis olsem man, em het gol i makim lain king bilong Babilon na Nebukatnesar i namba wan bilong dispela lain. Bihain 3-pela strongpela gavman moa i kamap, em ol narapela hap bilong imis i makim ol. “Ston” bai kam bagarapim ol dispela gavman, na em yet bai kamap ‘wanpela kingdom em bai i stap oltaim,’ em Kingdom bilong God. (2:​31-45) (2) Bihain long dispela, Daniel yet i lukim ol narapela driman. Namba wan em driman bilong 4-pela animal i makim “4-pela strongpela kantri,” olsem laion, bea, lepat i gat 4-pela het, na animal i gat traipela tit ain na 10-pela kom na wanpela liklik kom i kamap bihain. (7:​1-8, 17-28) (3) Bihain long en i gat driman bilong sipsip man (Midia wantaim Persia), na meme man (Grik), na liklik kom. (8:​1-27) (4) Na laspela driman i stori long king bilong saut na king bilong not. Daniel 11:​5-19 i stori stret tru long pasin birua i bin stap namel long gavman bilong Isip na Siria, em tupela i olsem kru i kamap long Gavman Grik bilong Aleksander taim em i dai long yia 323 B.C.E. Kirap long ves 20, dispela tok profet i stori long sampela kantri moa bilong saut na not ol bai kamap strong bihain. Taim Jisas i mekim tok profet na kolim ol samting bai makim em i kam bek i stap olsem king, em i stori long “dispela samting nogut tru” (11:31), olsem na yumi save dispela tupela king bai birua birua i kam inap long taim “pasin bilong dispela graun i laik pinis.” (Mt. 24:⁠3, NW ) Tok profet bilong Buk Daniel i tok olsem, long taim ‘bikpela hevi tru i kamap, em bipo kain hevi olsem i no bin kamap long wanpela kantri bilong graun,’ Maikel bai kamap na rausim ol lain i givim baksait long God, na ol manmeri i bihainim tok bai ol i stap bel isi. Dispela tok profet i strongim tru bel bilong yumi!​—⁠Dan. 11:​20–12:⁠1.

21. Tok profet bilong Daniel long “70 taims 7-pela yia” i kamap tru olsem wanem?

²¹ Daniel i tok profet tu long “70 taims 7-pela yia.” Taim 69 taims 7-pela yia i pinis, orait “bikman God i bin makim” bai kamap. Inap 483 yia (69 taims 7-pela yia) bihain long taim “tok i kamap bilong wokim gen Jerusalem” olsem King Artaserksis i tok long mekim long namba 20 yia bilong em na Nehemia i go mekim dispela wok, Jisas bilong Nasaret i baptais long wara Jordan na God i makim em long spirit holi bilong kamap Krais, o Mesaia (em Man God i Makim).g Dispela samting i kamap long yia 29 C.E. Bihain long dispela taim, olsem Daniel i tok profet pinis, “bagarap God i makim pinis” i kamap taim Jerusalem i bagarap long yia 70 C.E.​—⁠Dan. 9:​24-27; Lu. 3:​21-23; 21:⁠20.

22. Jehova i daunim Nebukatnesar na dispela i lainim yumi long wanem samting?

²² Long Daniel sapta 4 i gat stori bilong driman bilong Nebukatnesar long diwai ol i katim na i pundaun, na stori i tok, king i hambak long ol bikpela wok em i bin mekim na em i bilip long bikpela strong bilong em, na God Jehova i daunim em. Em i mas go i stap ausait na i stap wankain olsem ol animal bilong bus inap long taim em i save “God Antap Tru i bosim olgeta manmeri. Long laik bilong em yet, em i save mekim ol man i kamap king.” (Dan. 4:32) Olsem wanem? Bai yumi bihainim pasin bilong Nebukatnesar na hambak long ol wok yumi yet i mekim na bilip long strong bilong ol man, na bai Jehova i mas mekim save long yumi? O bai yumi bihainim gutpela tingting na daun long Em, em i Bos tru bilong olgeta manmeri, na yumi bilip na wetim Kingdom bilong em?

23. (a) Olsem wanem Buk Daniel i litimapim tru tok promis bilong Kingdom? (b) Dispela buk i gat ol tok profet long en, em i mas kirapim yumi long mekim wanem?

²³ Buk Daniel i kirapim yumi long bilip tru long Kingdom! Buk i kamapim klia olsem God Jehova em i Nambawan Bikpela King, na em bai kamapim wanpela Kingdom i no inap bagarap na dispela Kingdom bai bagarapim olgeta narapela kingdom. (2:​19-23, 44; 4:25) Tupela king haiden, em Nebukatnesar na Darius, ol i mas tokaut olsem Jehova em i Nambawan Bikpela. (3:​28, 29; 4:​2, 3, 37; 6:​25-27) Buk Daniel i givim biknem long Jehova, em i Man bilong bipo bipo yet na em yet bai stretim tok long husat i ken i stap king. Em bai givim wok king na strong na biknem long “wanpela man i wankain olsem yumi man bilong graun,” na “olgeta manmeri bilong olgeta kantri na olgeta lain na olgeta tok ples bai i stap aninit long en.” “Ol manmeri bilong God Antap Tru” bai stap king wantaim Krais Jisas, em “Pikinini Bilong Man,” long Kingdom. (Dan. 7:​13, 14, 18, 22; Mt. 24:30; KTH 14:14) Em i Maikel, em nambawan ensel. Em i bosim Kingdom na em bai pinisim olgeta kingdom bilong dispela graun. (Dan. 12:1; 2:44; Mt. 24:​3, 21; KTH 12:​7-10) Ol man i laikim tumas stretpela pasin, taim ol i kisim save long as bilong ol dispela driman na tok profet, dispela i mas kirapim ol long lukim Baibel, na wok strong long kisim save long ol “narakain samting” tru God i laik mekim long rot bilong Kingdom, em Buk Daniel i kamapim long yumi. Tru tumas, spirit bilong God yet i bin kamapim olgeta tok i stap long Buk Daniel na em i gutpela samting tru bilong helpim yumi.​—⁠Dan. 12:​2, 3, 6.

[Ol Futnot]