Taim Yu Stap Long Narapela Kantri—Stap Strong Long Bilip

1-3. (a) Wanem samting i mas i stap olsem namba 1 samting long laip bilong yumi? (b) Ol pablisa i lainim nupela tokples i bungim wanem ol hevi? (c) Yumi bai skelim wanem ol askim? (Lukim piksa long kirap bilong stadi.)

PLANTI tausen Witnes Bilong Jehova long nau i truim visen i stori long wok bilong autim gutnius “long olgeta kantri, na olgeta lain, na olgeta tokples, na olgeta lain pipol.” (Rev. 14:6) Olsem wanem? Yu tu yu wok long lainim narapela tokples? Yu mekim wok misineri o yu helpim wok autim tok long narapela kantri i sot long ol pablisa? Yu stap long kantri bilong yu yet na yu go long miting wantaim kongrigesen i mekim narapela tokples?

² Yumi mekim wok bilong God, olsem na em i bikpela samting long yumi na famili bilong yumi i mas stap strong yet long bilip. (Mat. 5:3) Ating sampela taim yumi bisi long mekim ol narapela samting, na yumi no gat taim long mekim gut pesenel stadi. Tasol ol lain i mekim wok bilong Kingdom long narapela kantri, ol i bungim ol narapela hevi tu.

³ Ol lain i mekim wok bilong Kingdom long narapela kantri, ol i mas lainim nupela tokples, na tu, oltaim ol i mas stadi gut long ol bikpela tok bilong Baibel bambai dispela inap strongim bilip bilong ol yet. (1 Kor. 2:10) Tasol hau bai ol inap strongim bilip bilong ol sapos ol i no kliagut long tokples ol i yusim long kongrigesen? Na tu, bilong wanem em i bikpela samting long papamama i mas putim Tok Bilong God long bel bilong pikinini?

 4. Wanem samting inap daunim bilip bilong yumi? Stori long wanpela eksampel.

⁴ Sapos yumi no pilim tru Tok Bilong God long narapela tokples, dispela inap nogutim yumi long sait bilong bilip. Inap 500 yia paslain long taim bilong Krais, Nehemia i tingting planti long sampela pikinini bilong lain Juda husat i kam bek long Babilon na ol i no save long tok Hibru. (Ritim Nehemia 13:23, 24.) Ol dispela pikinini i no kliagut long mining i stap long Tok Bilong God, olsem na dispela i pasim rot bilong ol long bilip long God.—Neh. 8:1, 2, 8.

5, 6. (a) Sampela papamama husat i mekim wok bilong Kingdom long hap we ol i yusim narapela tokples, ol i luksave long wanem hevi? (b) Bilong wanem dispela hevi i kamap?

⁵ Sampela papamama i mekim wok bilong Kingdom long hap we ol i mekim narapela tokples, na ol i luksave olsem ol pikinini i no amamas moa long tok i tru. Ol pikinini i no kisimgut ol tok i kamap long miting, olsem na ol i no pilim tru ol tok i kamap long Haus Kingdom. Pedro^[1] em wanpela papa husat i kisim famili bilong em na ol i lusim Saut Amerika na i go stap long Australia. Pedro i tok: “Taim man i stori long Tok Bilong God, em i mas pilim tru ol dispela tok long bel.”—Luk 24:32.

⁶ Taim yumi ritim narapela tokples, yumi no inap pilim tru tok olsem yumi save pilim taim yumi ritim tokples bilong yumi yet. Na tu, taim yumi no inap toktok gut wantaim ol narapela long nupela tokples, dispela inap mekim yumi tingting planti na isi isi dispela inap daunim yumi long sait bilong bilip. Olsem na yumi mas mekim ol samting bilong strongim laik bilong yumi long mekim wok bilong Jehova long narapela tokples, na tu, yumi mas lukautim bilip bilong yumi.—Mat. 4:4.

 7. Olsem wanem ol Babilon i laik pulim Daniel long bihainim kalsa na lotu bilong ol?

⁷ Taim Daniel na 3-pela pren bilong em i go kalabus, ol Babilon i skulim ol long “tok ples bilong ol Babilon.” Ol Babilon i laik pulim Daniel na ol pren bilong em long bihainim kalsa bilong Babilon. Na tu, nambawan ofisa husat i go pas long givim trening long Daniel na 3-pela pren bilong em, em i givim tu nem bilong Babilon long ol. (Dan. 1:3-7) Ol i givim nem Bel long Daniel, em nem bilong bikpela god bilong Babilon. King Nebukatnesar i laik kirapim Daniel long kisim tingting olsem god bilong Babilon i winim God Jehova.—Dan. 4:8.

 8. Wanem samting i helpim Daniel long stap strong yet long bilip maski em i stap long narapela kantri?

⁸ Taim ol i kisim ol naispela kaikai long haus king na givim long Daniel, em “i no laik kaikai na dring” bikos em i no laik “kamap doti long ai bilong God.” (Dan. 1:8) Daniel i stap strong yet long bilip maski em i stap long narapela kantri bikos oltaim em i “ritim ol buk bilong God” long tokples bilong em stret. (Dan. 9:2) Olsem na maski em i stap inap olsem 70 yia long Babilon, ol man i tingim yet nem bilong em long tok Hibru.—Dan. 5:13.

 9. Olsem Buk Song 119 i kamapim, Tok Bilong God i mekim wanem long man i raitim dispela song?

⁹ Man i raitim Buk Song 119 i kisim strong long Tok Bilong God na dispela i helpim em long i stap narapela kain long ol man i no lotuim God. Sampela hetman long haus king i tok bilas na luk daun long em. (Sng. 119:23, 61) Maski i olsem, em i pilim tru ol tok bilong God na dispela i strongim em.—Ritim Song 119:11, 46.

10, 11. (a) Taim yumi stadi long Tok Bilong God, yumi mas holim wanem tingting? (b) Taim yumi stadi, yumi mas luksave long wanem samting? (c) Yumi mas tingim wanem tok piksa?

¹⁰ Maski yumi bisi tru long ol wok tiokratik na ol narapela wok bilong wan wan de, yumi olgeta i mas makim haptaim bilong mekim pesenel stadi na famili lotu. (Efe. 5:15, 16) Yumi no ken tingting tasol long hariap hariap na pinisim buk yumi stadi long en, o yumi laik redim tasol ol tok bilong bekim long taim bilong miting, nogat. Taim yumi stadi, mobeta yumi pilim tru Tok Bilong God na larim ol dispela tok i go daun tru long bel bilong yumi na strongim bilip bilong yumi.

¹¹ Taim yumi stadi, yumi mas luksave long olsem wanem dispela stadi inap redim yumi long helpim ol narapela na helpim yumi yet tu long sait bilong bilip. (Fili. 1:9, 10) Yumi mas luksave olsem taim yumi redim ol tok bilong yusim long autim tok, na ol tok bai kamap long miting, sampela taim ol dispela tok i no makim stret ol samting i kamap long laip bilong yumi. Tingim dispela tok piksa: Man bilong kukim kaikai i mas teistim kaikai paslain long em i sevim dispela kaikai long ol narapela, tasol em i no inap kisim strong long dispela liklik hap kaikai em i teistim, nogat. Sapos em i laik bai helt bilong em i stap gut, orait em i mas redim ol gutpela kaikai bilong em yet. Olsem tasol, yumi mas stadi gut long Tok Bilong God na putim dispela tok i go daun tru long bel na dispela bai inapim yumi long ol samting yumi yet i sot long en.

12, 13. Bilong wanem planti Witnes husat i mekim wok bilong God long narapela kantri i pilim olsem ol i mas mekim pesenel stadi long tokples bilong ol yet?

¹² Planti Witnes i mekim wok bilong Kingdom long hap we ol i mekim narapela tokples, na ol i luksave olsem ol i save kisim strong taim ol i stadi long Baibel long ‘tokples ol i bin kamap bikpela long en.’ (Apo. 2:8) Ol misineri husat i mekim wok bilong God long narapela kantri, ol i save kisim helpim long ol tok i kamap long ol miting, tasol ol i mas mekim tu pesenel stadi bilong ol yet.

¹³ Alain em i wanpela brata husat i lainim tokples Persia inap 8-pela yia, na em i tok: “Taim mi redim ol miting long tokples Persia, tingting bilong mi i stap tasol long wei bilong mekim dispela tokples, na mi no save pilim tru ol tok mi ritim. Olsem na mi makim haptaim we mi inap stadi long Baibel na ol narapela pablikesen bilong Baibel long tokples bilong mi yet.”

14. Ol papamama i mas wok strong long mekim wanem? Bilong wanem?

¹⁴ Ol papamama Kristen i mas wok strong long helpim pikinini long kliagut long Tok Bilong God na pilim tru long bel. Serge na meri bilong em Muriel i mekim wok bilong God long narapela tokples winim 3-pela yia, na tupela i lukim olsem pikinini man bilong ol i no amamas moa long mekim wok tiokratik—pikinini bilong ol i gat 17 krismas. Muriel i tok: “Em i no amamas long autim tok long narapela tokples olsem em i save mekim long tokples bilong em yet, tokples Frans. Taim mipela i luksave olsem dispela hevi i pasim pikinini long winim ol mak long sait bilong bilip, mipela i mekim disisen long go bek long olpela kongrigesen bilong mipela.”

15. (a) Wanem ol samting inap kirapim ol papamama long i go bek long kongrigesen i yusim tokples ol pikinini i kliagut long en? (b) Lo 6:5-7 i givim wanem skultok long ol papamama?

¹⁵ Wanem ol samting inap kirapim ol papamama long i go bek long kongrigesen i yusim tokples ol pikinini i kliagut long en? Namba 1: Ating papamama i skelim olsem ol i sot long taim na ol tul bilong helpim ol pikinini long laikim tru Jehova na lainim narapela tokples. Namba 2: Ol i lukim olsem ol pikinini i no amamas moa long mekim wok lotu long narapela tokples. Taim papamama i skelim ol dispela samting, ol i ken i go bek long kongrigesen i yusim tokples ol pikinini i kliagut long en, na wet inap long ol pikinini i kamap strong long bilip.—Ritim Lo 6:5-7.

16, 17. Sampela papamama i mekim wanem bilong skulim ol pikinini long sait bilong bilip taim ol i stap long grup o kongrigesen i yusim narapela tokples?

¹⁶ Sampela papamama i yusim tokples bilong ol yet long skulim ol pikinini maski ol i go long kongrigesen i mekim narapela tokples. Charles em papa bilong 3-pela pikinini meri em krismas bilong ol i stap namel long 9 na 13, na ol i save bung wantaim grup i mekim tokples Lingala. Charles i tok: “Mipela i mekim disisen long yusim tokples bilong mipela yet taim mipela i stadi na mekim famili lotu. Na tu, mipela i makim haptaim bilong mekim prektis na pilai gem long tokples Lingala bambai ol inap kisim amamas long lainim dispela tokples.”

¹⁷ Kevin em papa bilong 2-pela pikinini meri i gat 5 krismas na 8 krismas. Em i mekim sampela samting bambai ol pikinini inap pilim tru ol tok i kamap long ol miting long tokples ol i no kliagut long en. Kevin i tok: “Mi na meri bilong mi i save mekim pesenel stadi wantaim 2-pela pikinini long tokples Frans, em tokples bilong mipela. Na tu, mipela i putim mak long i go long miting long tokples Frans wanpela taim long olgeta mun, na mipela i save yusim holide bilong mipela long i go long ol kibung i kamap long tokples Frans.”

18. (a) Wanem stiatok bilong Rom 15:1, 2 inap stiaim yu long mekim disisen long gutpela rot bilong helpim ol pikinini long sait bilong bilip? (b) Sampela papamama i bin kamapim wanem ol gutpela tok bilong helpim ol narapela? (Lukim futnot.)

¹⁸ Olgeta wan wan famili i ken mekim disisen bilong ol yet long wanem rot i gutpela moa bilong helpim ol pikinini long kamap strong long bilip.^[2] (Gal. 6:5) Muriel em yumi stori long em long paragraf 14, em i tok em na man bilong em i daunim sampela laik bilong ol yet bambai ol inap strongim bilip bilong pikinini. (Ritim Rom 15:1, 2.) Serge i tok ol i mekim stretpela disisen. Em i tok: “Taim mipela i go bek long kongrigesen i mekim tokples Frans, pikinini bilong mipela i kamap strong long bilip na em i kisim baptais. Long nau em i mekim wok olsem painia oltaim. Na tu, em i tingting long go bek long wanpela grup i mekim narapela tokples!”

19, 20. Olsem wanem yumi inap soim olsem yumi laikim tru Tok Bilong God?

¹⁹ Jehova i gat pasin laikim, olsem na em i stretim rot na Baibel i stap long planti handret tokples bambai ‘olgeta kain man inap kisim stretpela save long tok i tru.’ (1 Tim. 2:4) God i save olsem ol man bai pas gut moa wantaim em sapos ol i ritim Tok Bilong Em long tokples bilong ol yet, em tokples ol inap pilim tru long bel.

²⁰ Maski yumi gat wanem kain sindaun, yumi mas wok strong long stadi gut long Tok Bilong God na putim ol dispela tok i go daun long bel bilong yumi. Taim yumi stadi oltaim long Baibel long tokples bilong yumi yet, yumi bai strongim bilip bilong yumi, bilip bilong ol wanfamili, na yumi bai soim olsem yumi laikim tru Tok Bilong God.—Sng. 119:11.