Strongpela Babilon​—⁠Namba Tri Bikpela Gavman Long Graun

Taun Babilon bilong bipo i kamap strong long taim bilong Nebukatnesa. Lotu bilong en i go kamap long olgeta hap bilong graun. Em i pundaun insait long wanpela nait tasol. Sapos yu save gut long ol dispela samting em bai strongim bilip bilong yu na bai yu bilip tru olsem ol tok bilong Baibel i stret, na truim bilong ol tok profet i save kamap stret.

STRONGPELA taun Babilon i stap long tupela arere bilong Wara Yufretis long Mesopotemia long hap bilong saut. Em i winim ol narapela gavman bilong graun. Em i as ples bilong lotu na bisnis na ami. (Aisaia 13:19) Em i ples bilong mani na kago, na em i gat ol bikpela gutpela haus, na ol gutpela gaden. Em i nambawan gavman long graun long dispela taim bipo!

Tasol profet bilong Jehova, em Jeremaia, em i tok: “Babilon bai bagarap na i stap olsem ol ston nating tasol i hip i stap, na em bai kamap ples hait bilong ol weldok, na ol man bai kirap nogut long em i bin kisim bagarap, na ol bai wisel, na em bai stap nating, no gat man.”​—⁠Jeremaia 51:​37, NW

Bipo ol man i ting Babilon i strong tumas, tasol em i bagarap. Ol pipia bilong en i stap lusim taun Bagdat inap 80 kilomita long hap bilong saut, long kantri Irak. Wanem samting i mekim na em i bagarap?

Babilon em wanpela olpela biktaun bilong bipo. Nimrot i bin kirapim Babilon. Nimrot em tumbuna pikinini bilong Noa, na em i save givim baksait long Jehova na raunim na kolim i dai ol animal. (Jenesis 10:​8-10) Tasol yumi laik stori hia long taim bihain long Nimrot, em taim bikpela gavman bilong Isip na bikpela gavman bilong Asiria i pinis.

Babilon long Taim Bilong Nebukatnesa

Inap 2,600 yia bipo, olsem long yia 632 paslain long Krais, ol Babilon i daunim ol Asiria,a na nau Babilon i kamap nambawan gavman bilong graun na namba tri bikpela gavman Baibel i stori long en.

Nebukatnesa i kamap king bilong Babilon. Em i man bilong winim pait, na man bilong kamapim ol taun. Em i wokim strongpela banis bilong taun Babilon na planti bikpela haus bilong en. Ol man i bin painim planti tausen brik bilong en na i gat nem “Nebukatnesa” long ol, em dispela Nebukatnesa Baibel i kolim long hap bilong Jeremaia na Danyel. Nebukatnesa i bin hambak na i tok: “Dispela Bikpela Taun Babilon em mi yet mi bin wokim.”​—⁠Danyel 4:​30, NW

Ol i bin wokim tupela bikpela banis i raunim taun Babilon, na ol i pulimapim graun na ol pipia brik namel long tupela banis na i kamap olsem wanpela bikpela banis em braitpela bilong en inap 24 mita. Ausait long banis ol i wokim baret em i op inap 20 mita i go inap 80 mita, na ol i lainim tupela arere bilong en long brik na ol i pulimapim wara long en, na ol kain bot i ron long en.

Bikpela rot haiwe long hap bilong not em i kam insait long Dua Ista. Dua hia i go antap inap 12 mita. Bikrot i kam insait, na haus king bilong Nebukatnesa i stap long han sut klostu long Dua Ista. Sia king i stap long bikpela rum; rum i op inap 17 mita, na longpela bilong en em 52 mita. I gat rot i kam insait long banis bilong haus, na dua bilong en na banis bilong rot em ol i bilasim long kain kain kala i lait, na ol i putim ol piksa bilong ol laion na bulmakau na pukpuk long arere bilong rot. Ol man i kisim wanpela piksa bilong laion na putim insait long haus tumbuna long Paris na nau ol man i ken i go lukim.

Lotu Bilong Babilon

Nem Hibru bilong taun Babilon em Bebel na insait bilong en i olsem “longlong nabaut.” Long tok ples Sumeria na tok ples Akedia, em insait bilong nem Babilon i olsem “Dua bilong God.” Ol dispela nem em i samting bilong lotu bilong ol Babilon. God Maduk em god bilong ol Babilon (Baibel i kolim Merodak), na sampela saveman i tok, em Nimrot tasol. Na ol Babilon i gat sampela ol narapela god tu, na ol i bungim 3-pela 3-pela wantaim, olsem god triwan o god triniti. Wanpela god triwan bilong ol em olsem god Sin (em god bilong mun), na god Samas (em god bilong san), na god Ista (em god bilong mekim pasin pren na kisim bel na kamapim pikinini).

Na ol Babilon i save lukluk long sta bilong painim sampela save bilong bihain. Ol i putim nem long sampela sta, em nem bilong ol god man na god meri bilong ol. Wanpela buk i tok, bihain long taim bilong Babilon, ol Rom i senisim ol dispela nem i go long tok ples Rom, na sta Ista i kamap sta Vinas, na sta Maduk i kamap sta Jupita.b Kaldia em narapela nem bilong lain Babilon, na i olsem “man i save lukluk long sta.”

Baibel i tok, kantri Babilon em ples bilong ol god giaman na piksa nogut. (Jeremaia 50:​2, 38) Ol samting bilong lotu bilong Babilon i as bilong ol narapela lotu bilong olgeta hap bilong graun. Wanpela buk (The Religion of Babylonia and Assyria em Profeso Morris Jastrow i raitim) em i tok: ‘Paslain long taim lotu Kristen i kamap, lotu bilong Babilon i kisim Isip na Pesia na Grik.’ Na bihain moa ol lotu ol i kolim Kristen long en ol tu i kisim planti bilip giaman bilong Babilon. Olsem na Baibel i bungim olgeta lotu giaman na i kolim “bikpela taun Babilon.”​—⁠Revelesen 17:​3-5.

Babilon i Kisim Jerusalem

Profet Aisaia i bin stap long taim namba 2 bikpela gavman Asiria i bin bosim graun. Tasol spirit bilong God i givim save long em na em i tok, bihain ol Babilon bai bagarapim Jerusalem. (Aisaia 39:​6, 7) Dispela samting i bin kamap, o nogat? Orait, yumi ken stori moa.

Aisaia i dai pinis na 100 yia samting bihain ol Babilon i daunim ol Asiria na nau Babilon i kamap nambawan bikpela gavman. Na long yia 617 paslain long Krais, king bilong Babilon, em Nebukatnesa, em i daunim King Jehoiakin bilong Jerusalem na salim em wantaim sampela bikman moa i go kalabus long Babilon. Nebukatnesa i makim Matanaia bilong i stap king long Jerusalem na Nebukatnesa i senisim nem bilong em na kolim em Sedekaia.​—⁠2 King 24:​11-17.

Ol man i painim pinis sampela rait bilong Babilon, na ol dispela rait i stori long ol dispela samting. Ol i bin painim sampela brik ol Babilon i bin wokim long graun malumalum na i gat ol rait i stap long en, na rait i tok, king bilong Babilon i pait wantaim Jerusalem na i winim pait na em i kalabusim king bilong Jerusalem, na em i makim narapela man bilong i stap king, na em i kisim bikpela mani long ol, na em i salim ol i go long Babilon.

Na Baibel i stori long kaikai ol i bin makim bilong Jehoiakin olsem skel bilong em taim em i stap kalabus long Babilon. (2 King 25:​27-30) Ol man i painim pinis ol rait bilong Babilon em i stori long kaikai ol i bin makim bilong King Jehoiakin na “ol pikinini man bilong king bilong Juda.”

Ol man bilong Jerusalem i bin tok promis long bihainim tok bilong God Jehova, tasol ol i bikhet na ol i no laik daun long God o harim tok bilong ol profet bilong em. Em i tok, ol i pasim yau bilong ol bambai ol i no inap harim tok bilong em. Long rot bilong Jeremaia em Jehova i tok: “Bai mi larim king bilong Babilon i daunim olgeta Juda, na em bai kisim ol i go kalabus long Babilon na kilim ol i dai long bainat.”​—⁠Jeremaia 19:15; 20:​4, NW.

Olsem na taim Sedekaia i bikhet long Nebukatnesa, ol Babilon i kam bek bilong mekim pait long Jerusalem. Ol Babilon i brukim banis bilong Jerusalem long mun Tamas long de 9 long yia 607 paslain long Krais. Ol i go insait na kukim haus lotu na daunim banis bilong taun, na ol i kisim Sedekaia na planti ol narapela man na kisim ol i go kalabus long Babilon. Dispela i truim tok bilong Jehova, em i bin tok: “Na ol dispela hap bai kamap olsem ples i bagarap, na taim ol man i lukim, ol bai kirap nogut, na ol dispela lain i mas wok kalabus long king bilong Babilon inap 70 yia.”​—⁠Jeremaia 25:​11, NW.

Piksa Em Nebukatnesa i Lukim long Driman

Bihain King Nebukatnesa bilong Babilon i kisim narapela kain save. God i givim driman long em. Em i lukim draipela piksa bilong man. Piksa i makim ol bikpela gavman i mas kamap long graun, kirap long taim bilong Babilon na i kam inap long gavman bilong ol Midia na Pesia na i kam long gavman bilong Grik na long gavman bilong Rom na i kam inap long taim bilong yumi na i go moa inap long taim bihain, em taim bilong gavman o Kingdom bilong God bai pinisim ol dispela gavman bilong ol man na em wanpela bai bosim graun. Profet bilong God, em Danyel, em i tokim Nebukatnesa olsem: “Bikpela God yet i kamapim insait bilong driman na bai king i ken save wanem samting bai kamap bihain. Na driman i no giaman, na insait bilong en em i stret.”​—⁠Danyel 2:​28-45, NW.

Na God i mas mekim save long Nebukatnesa na bai em i save God em i bos na God inap daunim gavman bilong ol man sapos em i laik, na God em i “Nambawan Bikpela em i stap Bos long kingdom bilong ol man, na sapos em i laik givim long wanpela man, em inap givim long em.”​—⁠Danyel 4:​25, NW.

God i Tok, Babilon Bai Bagarap

Ol Babilon i mekim nogut tru long lain bilong Jehova, na ol i mas kisim strafe long dispela pasin nogut bilong ol. Long rot bilong Jeremaia, God i tok: “Bai mi bekim nogut long Babilon na olgeta manmeri bilong Kaldia long olgeta pasin nogut ol i bin mekim long Saion long ai bilong yupela.” Na long rot bilong Aisaia Jehova i tok: “Bai mi kirapim ol Midia i kam pait wantaim ol.”​—⁠Jeremaia 51:​24, NW; Aisaia 13:​17, NW.

Na Jehova i kolim nem bilong dispela bikpela man i mas daunim Babilon na larim lain bilong God i lusim Babilon​—⁠nem bilong em Sairas, na ol i kolim em Bikpela Sairas. Na Jehova i kolim nem bilong em 200 yia paslain long taim Sairas i mekim dispela wok. Wanpela tok profet bilong Baibel em i makim Sairas, na i tok, Jehova bai “opim tupela hap dua na em [Sairas] i ken go insait, na ol dua i no ken pas bek.” (Aisaia 44:​26–45:​1, NW ) Olsem wanem? Dispela samting i bin kamap, o nogat? Bai yumi save.

Babilon i Pundaun!

Jehova i makim 70 yia em ol Juda i mas i stap kalabus long Babilon. Orait, taim dispela 70 yia i laik pinis ol Midia na Pesia i kirap long i go pait wantaim ol Babilon. Pastaim lain bilong Sairas i pait wantaim King Nabonidas bilong Babilon na Sairas i winim Nabonidas na em i ranawe. Nau ol Midia na Pesia i laik pait wantaim ol Babilon. Na wanpela Grik bilong bipo, em man bilong raitim stori bilong ol samting i bin kamap, em Herodotas, em i tok, ol Babilon i redi gut long ol dispela lain i kam pait. Ol i ting, strongpela banis bilong taun Babilon bai pasim ol birua na ol i no inap kam insait.

Baibel i tok, long de 5 o 6 bilong mun Oktoba long yia 539 paslain long Krais, Belsasa, em king bilong ol Babilon, em i wokim bikpela kaikai insait long taun Babilon long nait, na em i singautim 1,000 bikman i kam long dispela pati, na ol i wok long dring wain na kaikai. (Danyel 5:​1-4) Ol i mekim save singsing na amamas. Wara Yufretis i ron namel long taun, na Sairas i go long hap bilong wara antap na wokim narapela baret na pasim wara bilong Yufretis na mekim em i ron long dispela narapela baret, na nau wara i no ron moa insait long taun Babilon. Olsem na ami bilong Sairas i wokabaut namel long baret bilong Wara Yufretis na ol i kam insait long taun Babilon. Ol Babilon i bin lusim tingting long pasim ol dua long not i go daun long wara, na lain bilong Sairas i bihainim dispela na i kam antap na ol i go insait long taun Babilon.

Bipo Jeremaia i bin stori long pundaun bilong Babilon, na em i tok: “Ol strongpela man bilong Babilon i lusim pait. . . . Narapela man i ran bringim tok, na em i bungim narapela i ran bringim tok, na narapela man i bringim toksave i kam na em i bungim narapela i bringim toksave i kam, ol i laik toksave long king olsem ol birua i kisim pinis taun Babilon bilong em, na ol i kisim pinis ol wara, na ol i kukim pinis ol bot.”​—⁠Jeremaia 51:​30-32, NW.

Wanpela rait bilong bipo, ol i kolim Nabonidas Kronikal, nau em i stap long haus tumbuna long Englan, em i tok, ‘ol ami bilong Sairas i go insait long Babilon na kisim pinis na i no gat pait i bin kamap.’

Truim Bilong Tok Bilong Jehova i Kamap Stret

Insait long wanpela nait tasol Babilon i pundaun pinis. Dispela namba 3 bikpela gavman bilong graun em i no stap moa. Ol man i painim pinis wanpela rait bilong Sairas, em i hambak na i tok: “Mi Sairas, mi king bilong olgeta hap bilong graun, mi bikpela king, mi king tru, mi king bilong Babilon na Suma.” Bihain liklik Sairas i larim 50,000 Juda i lusim kalabus na i go bek na sanapim gen taun Jerusalem na haus lotu bilong Jehova. Ol i kamap long Jerusalem 70 yia stret bihain long taim ol i bin kalabus.​—⁠Esra 1:​1-11.

Planti handet yia bihain aposel Pita i skulim sampela Juda long Babilon. Na Pita i stap long Babilon taim em i bin raitim sampela hap bilong Baibel. (1 Pita 5:13) Na bihain moa i no gat man moa i stap long dispela hap, na dispela i truim wanpela tok bilong Baibel, em i tok: “Babilon, em i olsem gutpela bilas bilong ol gavman, na em i gutpela samting bilong ol Kaldia, tasol em i mas kamap wankain olsem Sodom na Gomora taim God i bagarapim dispela tupela ples. Em i mas i stap nating inap long olgeta taim bihain, no gat man, na i no gat sampela lain moa i ken kamap na i stap long en.”​—⁠Aisaia 13:​19, 20, NW.

Long nau dispela hap em strongpela taun Babilon i bin stap long en em i olsem ples nating, no gat man i stap; ol pipia tasol i stap, em ol ston na das tasol. Tru tumas, taim Jehova i tok long samting bai kamap, em bai kamap stret olsem em i bin tok.​—⁠Jeremaia 51:​36, 37.

[Ol Futnot]

[Mep long pes 31]

(Bilong save ol dispela rait i stap we long pes, lukim buk o magasin)

OL HAP GRAUN EM GAVMAN BILONG BABILON I BIN BOSIM

BIKPELA SOLWARA

Wara Yufretis

Babilon

MIDIA

Jerusalem

[Kredit Lain]

Based on a map copyrighted by pictorial Archive (Near Eastern History) Est. and Survey of Israel

[Ol Piksa long pes 31]

Dua Ista bilong Babilon, em ol i bin wokim gen (han sut)

[Kredit Lain]

Museum of Western Asiatic Antiqiity, East Berlin, GDR

Ol pipia bilong Babilon long nau (daunbilo)