Long namba tu piksa, Danyel i lukim wanpela meme man i “lusim hap bilong san i go daun na em i kam.” Em i ran i kam spid tru na i olsem “lek bilong en i no holim graun.” Em i ran i kam long sipsip man i gat tupela kom, em ensel i tok dispela sipsip man i makim “king bilong Midia na Pesia.” Nau dispela meme man i “paitim dispela sipsip man na em i brukim tupela kom bilong en.” Ensel i tokim Danyel, “dispela meme man i gat planti gras em i makim king bilong Grik.”−Danyel 8:​5-8, 20, 21, NW.

Ol Dispela Tok Profet i Kamap Tru

Long kirap bilong yia 334 paslain long Krais, Aleksanda i brukim liklik pasis ol i kolim Dadanels na em i go insait long hap bilong Esia. Em i gat bikpela ami, inap olsem 30,000 soldia ol i wokabaut long lek na 5,000 ol i sindaun long hos. Aleksanda i ran i go spid tru, olsem lepat i gat 4-pela pul bilong pisin o meme man i ran spid tru na i olsem lek bilong en i no holim graun. Kwiktaim tru em i daunim olgeta hap em Pesia i bosim. Em bikpela hap, winim tru ol hap Aleksanda yet i bosim. Tasol olsem wanem? “Em bai bosim planti hap, na em bai mekim laik bilong em yet,” olsem Baibel i tok profet long em? Ol samting i bin kamap i soim yumi, tru tumas em i bin mekim olsem.

Long Wara Granikas, long hap bilong not-wes long Esia Maina (nau yumi kolim Teki), Aleksanda i winim pait na daunim ol Pesia long namba wan taim. Long taim bilong kol em i daunim olgeta hap bilong wes long Esia Maina. Na long mun Oktoba samting long yia bihain, long Isas long hap bilong saut-is long Esia Maina, em i daunim olgeta wanpela bikpela ami bilong ol Pesia, em inap olsem 500,000 soldia, na bikpela king Darias Namba 3 bilong Pesia em i ranawe i go. Em i lusim meri pikinini bilong em i stap na Aleksanda i holim ol.

Aleksanda i no bihainim ol dispela Pesia i ranawe i go. Em i kisim ami bilong em i go long hap bilong saut long nambis bilong Solwara Mediterenian, na em i daunim ol as ples bilong bikpela lain sip bilong ol Pesia. Em i kirapim pait long taun Taia long ailan, tasol inap 7-pela mun Taia i stap strong. Bihain Aleksanda i kisim ol bruk bruk ston na pipia bilong olpela taun Taia long bikples, em Nebukatnesa i bin bagarapim, na em i tromoi long solwara na wokim olsem rot i go long dispela taun long ailan na em i bagarapim dispela taun. Sampela hap hap ston samting bilong dispela rot i stap yet na sapos yu go long dispela hap yu inap lukim. Dispela samting i truim wanpela tok profet bilong Esikiel, em i bin tok ol bai tromoi das bilong Taia i go insait long solwara.−Esikiel 26:​4, 12.

Aleksanda i laik kirapim pait long Jerusalem, tasol ol i no laik pait na ol i givim dispela taun long em, olsem na em i no bagarapim. Na bihain em i go long hap bilong saut na daunim Gasa. Em i wok long “bosim planti hap” moa na em i “mekim laik bilong em yet” i go inap long Isip. Ol Isip i amamas long em na ol i tok, em i man bilong kisim bek ol long han bilong ol birua. Long Memfis em i mekim ofa long wanpela god bilong ol Isip, em bulmakau Apis, na ol pris bilong ol Isip i amamas. Na em i kamapim taun Aleksandria. Bihain i gat planti skul na ol saveman i pulap long dispela taun na taun i kamap olsem as ples bilong kisim save na i laik winim taun Atens long dispela samting. Dispela taun i holim yet nem bilong em.

Olgeta samting Filip, em papa bilong Aleksanda, i bin tingting long mekim, em Aleksanda i mekim pinis na em i winim i go moa, na i gat sampela wok moa em i laik mekim. Kwiktaim tru, olsem wanpela meme man i ran spid tru, em tanim i go long hap bilong not-is. Em i brukim hap bilong Palestain i go long Wara Taigris. Na long yia 331 paslain long Krais em i pait wantaim ol Pesia long Gaugamela, klostu long olpela taun Niniva, em biktaun bilong Asiria long bipo na i bagarap pinis. Ol Pesia i bin strongim gen ami bilong ol na ol i gat 1 milion samting soldia, tasol liklik lain ami bilong Aleksanda, ol inap olsem 47,000, ol i daunim dispela draipela ami na Darias Namba 3 i ranawe i go. Bihain lain bilong em yet i kilim em i dai.

Aleksanda i amamas tru long em i winim ol pait na nau em i kisim ami bilong em i go long hap bilong saut na em i daunim biktaun bilong ol Pesia bilong taim bilong kol, em Babilon. Em i kisim tu ol narapela biktaun bilong ol, em Susa na Pesepolis, na em i kisim olgeta gol na silva samting bilong ol Pesia na kukim bikpela haus king bilong Seksis. Bihain em i daunim biktaun Ekbatana. Nau dispela man bilong winim kwik ol pait em i daunim ol narapela hap em Pesia i bosim i go inap long Wara Indas long hap nau yumi kolim Pakistan. Ol Grik i kamap namba faiv bikpela gavman long graun em Baibel i stori long en.